ཨ་རིའི་གྲོས་ཚོགས་གོང་མའི་ནང་བོད་དོན་ཐོག་ཁྲིམས་འཆར་གལ་ཆེན་ཞིག་བཏོན་འདུག 

ཨ་རིའི་གྲོས་ཚོགས་གོང་མའི་ནང་དུ་བོད་དེ་ནམ་ཡང་རྒྱ་ནག་གི་ཆ་ཤས་ཆགས་མྱོང་མེད་པ་དང་། བོད་མི་རྣམས་ལ་རང་ཐག་རང་གཅོད་ཀྱི་ཐོབ་ཐང་ཡོད་པ། བོད་ཀྱི་མངའ་ཁོངས་སུ་བོད་རང་སྐྱོང་ལྗོངས་ཞེས་པ་དེ་གཅིག་པུ་མིན་པ་སོགས་ངོས་འཛིན་དགོས་པའི་ཁྲིམས་འཆར་ཞིག་བཏོན་འདུག་པ་དང་། བོད་མིའི་སྒྲིག་འཛུགས་ཀྱིས་ཁྲིམས་འཆར་དེར་དགའ་བསུ་གནང་འདུག 

ཟླ་༡༢ པའི་ཚེས་༢༠ ཉིན་ཨ་རིའི་གྲོས་ཚོགས་གོང་མའི་ནང་དུ་མང་གཙོ་ཚོགས་པའི་གྲོས་ཚོགས་གོང་མའི་འཐུས་མི་རྗེ་ཧྥེ་མེར་ཀེ་ལཱི་དང་པཱ་ཀྲེ་རེག་ལཱི། སྤྱི་མཐུན་ཚོགས་པའི་གྲོས་ཚོགས་གོང་མའི་འཐུས་མི་ཊོ་ཌེ་ཡོང་བཅས་ནས། བོད་རྒྱའི་དཀའ་རྙོག་སེལ་བའི་ཁྲིམས་འཆར་ཞེས་པ་ཞིག་བཏོན་གནང་འདུག་པ་དང་། དེ་ནི་ཉེ་སྔོན་ཟླ་༧ པའི་ནང་གྲོས་ཚོགས་འོག་མའི་ནང་དུ་བཏོན་པའི་ཁྲིམས་འཆར་གྱི་ཐོན་གཞན་ཞིག་ཡིན་འདུག 

ཁྲིམས་འཆར་འདོན་མཁན་གྲོས་ཚོགས་འཐུས་མི་རྗེ་ཧྥེ་མེར་ཀེ་ལཱི་ཡིས། ཁྲིམས་འཆར་དེས་ཨ་རིའི་ངོས་ནས་བོད་རྒྱ་གཉིས་ཀྱི་དཀའ་རྙོག་སེལ་མེད་པ་ངོས་འཛིན་དང་། བོད་མི་རྣམས་ལ་སྲིད་གཞུང་གང་འདྲ་ཞིག་དགོས་མིན་ཐད་འདམ་ག་བྱེད་པའི་ཐོབ་ཐང་ཡོད་པ་ངོས་འཛིན་བྱེད་ཀྱི་ཡོད་པ་གསལ་པོ་བཟོས་ཡོད་པ། དེ་བཞིན་ཁྲིམས་འཆར་དེས་ཨ་རིའི་ངོས་ནས་རྒྱ་ནག་གཞུང་ལ་བརྡ་ལན་གསལ་པོ་སྤྲོད་རྒྱུ་ལ། བོད་ཀྱི་གནས་བབ་ཐད་གྲོས་མོལ་དོན་ཕན་ལྡན་པ་དགོས་པའི་དགོས་འདུན་འདོན་གྱི་ཡོད་པ་དང་། ད་ཡོད་རྒྱ་ནག་གཞུང་གི་བྱ་སྤྱོད་ཀྱིས་དགོས་འདུན་དེ་སྒྲུབ་ཀྱི་མེད་པ་ངོས་འཛིན་བྱེད་ཀྱི་ཡོད་སྐོར་གསུངས་འདུག 

དེ་བཞིན་གྲོས་ཚོགས་འཐུས་མི་པཱ་ཀྲེ་རེག་ལཱི་ཡིས། ཁྲིམས་འཆར་དེས་བོད་དེ་ནམ་ཡང་རྒྱ་ནག་གི་ཆ་ཤས་ཆགས་མྱོང་མེད་པ་བསྐྱར་ནན་བྱས་ཡོད་པ་དང་། ཨ་རིས་བོད་མི་རྣམས་ཀྱི་རང་ཐག་རང་གཅོད་ཀྱི་ཐོབ་ཐང་ལ་རྒྱབ་སྐྱོར་བརྟན་པོ་ཡོད་པ་བསྐྱར་ནན་བྱས་ཡོད་སྐོར་གསུངས་འདུག 

ཁྲིམས་འཆར་དེའི་ནང་དུ། ཨ་རིའི་གཞུང་གི་སྲིད་བྱུས་ནང་དུ་བོད་རྒྱ་གཉིས་ཀྱི་དཀའ་རྙོག་སེལ་མེད་པ་དང་། རྒྱལ་སྤྱིའི་ཁྲིམས་འོག་ནས་བོད་ཀྱི་ཁྲིམས་མཐུན་གནས་བབ་ཐག་གཅོད་བྱེད་རྒྱུ་ལྷག་བསྡད་ཡོད་པའི་ངོོས་འཛིན་བྱེད་དགོས་པ། བོད་མི་རྣམས་ལ་རང་ཐག་རང་གཅོད་ཀྱི་ཐོབ་ཐང་ཡོད་ཀྱང་རྒྱ་ནག་གཞུང་གི་སྲིད་བྱུས་ཀྱིས་ཐོབ་ཐང་དེ་ལག་བསྟར་བྱེད་པར་འགོག་རྐྱེན་བཟོ་ཡི་ཡོད་པ་ངོས་འཛིན་བྱེད་དགོས་པ། ༧གོང་ས་མཆོག་གམ་ཁོང་གི་སྐུབ་ཚབ་དང་ལྷན་དུ་གྲོས་མོལ་བྱེད་མ་ཐུབ་པ་དེ་རྒྱ་ནག་གི་ནོར་འཁྲུལ་ཡིན་པ་ངོས་འཛིན་བྱེད་དགོས་པ། རྒྱ་ནག་གིས་གནའ་སྔ་མོ་ནས་བོད་དེ་རྒྱ་ནག་གི་ཆ་ཤས་ཡིན་ཚུལ་གྱི་འཁྱོག་བཤད་བྱེད་བཞིན་པ་དེར་ངོས་ལེན་མི་བྱེད་པ། རྒྱ་ནག་དམར་ཤོག་ཚོགས་པས་བོད་ཀྱི་ལོ་རྒྱུས་དང་བོད་མི། བོད་མིའི་སྒྲིག་འཛུགས་ཁག ༧གོང་ས་མཆོག་སོགས་ལ་དྲིལ་བསྒྲགས་རྫུན་མ་བྱེད་པར། ཨ་རིའི་བོད་དོན་དམིགས་བསལ་འབྲེལ་མཐུད་ལས་ཁང་ལ་རྒྱ་ནག་གི་ཁ་གཏད་དུ་ལངས་ནས་ལན་འདེབས་བྱེད་པའི་འགན་དབང་སྤྲོད་དགོས་པ། བོད་ཀྱི་མངའ་ཁོངས་སུ་བོད་རང་སྐྱོང་ལྗོངས་ཞེས་པ་དེ་གཅིག་པུ་མིན་པར། ཀན་སུ་དང་སི་ཁྲོན། ཆིང་ཧེ། ཡུ་ནན་བཅས་ཀྱི་བོད་མིའི་ས་ཁུལ་རྣམས་ཀྱང་ཚུད་ཀྱི་ཡོད་པ་གསལ་པོ་བཟོ་དགོས་པ་སོགས་འཁོད་ཡོད་འདུག 

དེ་སྔོན་ཟླ་༧ པའི་ཚེས་༡༣ ཉིན་ཨ་རིའི་གྲོས་ཚོགས་འོག་མའི་ནང་དུ། མང་གཙོ་ཚོགས་པའི་གྲོས་ཚོགས་འཐུས་མི་ཇཱིམ་མེག་གྷོ་ཝན་དང་སྤྱི་མཐུན་ཚོགས་པའི་གྲོས་ཚོགས་འཐུས་མི་མཱེ་ཁེལ་མེག་ཁོལ་གཉིས་ཀྱིས་བོད་རྒྱའི་དཀའ་རྙོག་སེལ་བར་རྒྱབ་སྐྱོར་གྱི་ཁྲིམས་ཞེས་པའི་ཁྲིམས་འཆར་གསར་པ་ཞིག་བཏོན་གནང་ཡོད་པ་རེད་འདུག 

ཟླ་ ༡༢ ཚེས་ ༢༠ ཉིན་བོད་མིའི་སྒྲིག་འཛུགས་ཀྱིས་དགའ་བསུའི་གསར་འགོད་གསལ་བསྒྲགས་ཤིག་སྤེལ་གནང་བའི་ནང་འཁོད་དོན། ཨ་རིའི་གྲོས་ཚོགས་ཀྱི་རྒྱ་ནག་ལས་དོན་ཚོགས་ཆུང་གི་ཟུང་འབྲེལ་ཚོགས་གཙོ་དང་ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་ཇེབ་མར་ཀི་ལི་མཆོག་དང་། ཨ་རིའི་གྲོས་གོང་མའི་འཐུས་མི་དང་ཨ་རིའི་གྲོས་ཚོགས་གོང་མའི་ཕྱི་འབྲེལ་ལས་དོན་ཚོགས་ཆུང་གི་ཚོགས་མི་སྐུ་ཞབས་ཊོ་ཌི་ཡོན་གི་མཆོག བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་ཧ་ཅང་ཐུགས་མཉེས་པོ་གནང་གི་ཡོད་པའི་ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་པེ་ཊིག་ལི་ཧེ་མཆོག་བཅས་ལས་གྲུབ་པའི་ཨ་རིའི་མང་གཙོ་ཚོགས་པ་དང་སྤྱི་མཐུན་ཚོགས་པ་གཉིས་ཀྱི་གྲོས་ཚོགས་འཐུས་མི་རྣམ་པས་ཕྱི་ལོ་ ༢༠༢༢ ཟླ་ ༡༢ ཚེས་ ༢༠ རེས་གཟའ་མིག་དམར་ཉིན་ཨ་རིའི་གྲོས་ཚོགས་གོང་མའི་ནང་བོད་རྒྱའི་དཀའ་རྙོག་སེལ་ཐབས་སུ་རྒྱབ་སྐྱོར་གྱི་ཁྲིམས་འཆར་ཞིག་ངོ་སྤྲོད་གནང་བར་བོད་མིའི་སྒྲིག་འཛུགས་ནས་དགའ་བསུ་ཞུ་ཡི་ཡོད། ཁྲིམས་འཆར་དེ་ཨ་རིའི་སྲིད་བྱུས་ཆགས་ཚེ་སྲིད་བྱུས་དེས་ད་ལྟའི་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱིས་བོད་མི་རྣམས་ཀྱི་རང་ཐག་རང་གཅོད་ཀྱི་ཐོབ་ཐང་ལ་འགོག་རྐྱེན་བཟོ་བཞིན་པར་ཁ་གཏད་ཀྱིས་བོད་མི་རྣམས་ནས་རྒྱལ་སྤྱིའི་ཁྲིམས་ལུགས་འོག་རང་ཐག་རང་གཅོད་ཀྱི་ཐོབ་ཐང་ཉམས་ལེན་བྱེད་ཆོག་པར་རྒྱབ་སྐྱོར་དང་། རྒྱལ་སྤྱིའི་ཁྲིམས་ལུགས་འོག་བོད་རྒྱའི་དཀའ་རྙོག་ད་དུང་སེལ་མེད་པའི་གནས་བབ་ལ་ངོས་འཛིན་བྱ་ངེས་ཡིན་པ་མ་ཟད། ཁྲིམས་འཆར་དེས་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་གིས་དགོངས་ཚུལ་བཏོན་གནང་མཛད་པའི་དབུ་མའི་ལམ་གྱི་སྲིད་བྱུས་ནི་སྔོན་འགྲོའི་ཆ་རྐྱེན་གང་ཡང་མེད་པའི་ཐོག་གྲོས་མོལ་བརྒྱུད་རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་རྩ་ཁྲིམས་ཀྱི་སྒྲོམ་གཞིའི་ནང་ཁྲིམས་མཐུན་གྱི་ཐོབ་ཐང་ཡོད་པའི་བོད་རིགས་ཡོངས་ལ་མི་རིགས་ས་གནས་རང་སྐྱོང་གི་གནས་བབ་ཚད་ལྡན་མིང་དོན་མཚུངས་པ་ཞིག་འཐོབ་ཐབས་ཀྱི་ལམ་ཁ་ཉག་གཅིག་ཡིན་པ་དེ་གསལ་འདོན་བྱས་ཡོད། ཅེས་སོགས་འཁོད་ཡོད་འདུག

བོད་མིའི་སྒྲིག་འཛུགས་ཀྱི་སྲིད་སྐྱོང་སྤེན་པ་ཚེ་རིང་གིས། ཁྲིམས་འཆར་དེར་དགའ་བསུ་ཞུས་གནང་བ་དང་འབྲེལ་ཨ་རིའི་གཞུང་གིས་བོད་རྒྱའི་དཀའ་རྙོག་དེ་ཞི་བའི་ལམ་ནས་སེལ་ཐབས་གནང་བཞིན་ཡོད་པས་བོད་མི་རྣམས་ཀྱིས་དུས་རྟག་ཏུ་ཐུགས་རྗེ་ཆེ་ཞུ་ཡི་ཡོད། ཁྲིམས་འཆར་དེས་བོད་དོན་ཙམ་མིན་པར་གྲོས་མོལ་བརྒྱུད་ཞི་བདེ་དང་། མང་གཙོ། རང་དབང་འཐབ་རྩོད་གནང་མཁན་རྣམས་ལའང་རེ་བའི་འོད་སྣང་ཞིག་སྦྱིན་ཡོད། བོད་མིའི་སྒྲིག་འཛུགས་ནས་བོད་རིགས་ཡོངས་ལ་མི་རིགས་ས་གནས་རང་སྐྱོང་གི་གནས་བབ་ཚད་ལྡན་མིང་དོན་མཚུངས་པ་ཞིག་འཐོབ་པར་དབུ་མའི་ལམ་གྱི་སྲིད་བྱུས་བརྒྱུད་བོད་རྒྱའི་དཀའ་རྙོག་སེམས་ཐབས་ཞུ་རྒྱུའི་ཆོད་སེམས་བརྟན་པོ་ཡོད། ཅེས་དང་།  ངས་ཨ་རིའི་གྲོས་ཚོགས་ཀྱི་འཐུས་མི་རྣམ་པས་ཨ་རིའི་གྲོས་ཚོགས་གོང་འོག་གཉིས་ནང་ཁྲིམས་འཆར་དེར་རྒྱབ་སྐྱོར་གནང་སྟེ་ཨ་རིའི་སྲིད་འཛིན་མཆོག་གི་མདུན་ཅོག་སྟེང་བསླེབ་ཐབས་གནང་རྒྱུའི་རེ་སྐུལ་ཞུ་རྒྱུ་ཡིན་ལ། ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་ཇེབ་མར་ཀི་ལི་མཆོག་དང་། ཨ་རིའི་གྲོས་གོང་མའི་འཐུས་མི་སྐུ་ཞབས་ཊོ་ཌི་ཡོན་གི་(Todd Young) མཆོག ཨ་རིའི་གྲོས་ཚོགས་གོང་མའི་འཐུས་མི་སྐུ་ཞབས་པེ་ཊིག་ལི་ཧེ་མཆོག་བཅས་ནས་ཁྲིམས་འཆར་ངོ་སྤྲོད་གནང་བར་ངས་སྙིང་ཐག་པ་ནས་ཐུགས་རྗེ་ཆེ་ཞུ་རྒྱུ་ཡིན་ཞེས་གསུངས་འདུག

བྱང་ཨ་རི་སྐུ་ཚབ་དོན་གཅོད་རྣམ་རྒྱལ་ཆོས་གྲུབ་ཀྱིས། ཁྲིམས་འཆར་དེའི་སྐོར་གསུང་དོན། རྒྱ་ནག་གཞུང་གིས་བོད་ལ་དབང་བསྒྱུར་བྱས་པའི་རིང་བོད་མི་རྣམས་ཀྱིས་དཀའ་སྡུག་ཧ་ཅང་མྱངས་ཡོད་ཀྱང་ང་ཚོ་ངོས་ནས་རྒྱུན་དུ་བོད་རྒྱའི་དཀའ་རྙོག་དེ་གྲོས་མོལ་བརྒྱུད་སེལ་ཐབས་བྱེད་བཞིན་ཡོད། ཅེས་དང་། ཁྲིམས་འཆར་དེས་ཨ་རིའི་གཞུང་གིས་དུས་རྟག་ཏུ་བོད་རྒྱའི་དཀའ་རྙོག་གྲོས་མོལ་བརྒྱུད་སེལ་ཐབས་གནང་བཞིན་པར་རྒྱབ་སྐྱོར་དང་། རྒྱ་ནག་གི་དབང་བསྒྱུར་འོག་བོད་ནང་མུ་མཐུད་དཀའ་སྡུག་མྱོང་བཞིན་པའི་བོད་མི་རྣམས་ལ་རེ་བ་གསར་པ་ཞིག་བསྐྲུན་གནང་ཡོད་ཅེས་གསུངས་ཡོད་འདུག 

ཕྱི་ལོ་༢༠༢༡ ལོའི་ཟླ་༧ པའི་ནང་ཨ་རིའི་གྲོས་ཚོགས་འོག་མའི་འཐུས་མི་སཱེ་ཁོ་ཌ་པཱེ་རི་ཡིས་བོད་དེ་རང་བཙན་རྒྱལ་ཁབ་གཅིག་ཡིན་པ་དང་རྒྱ་ནག་གིས་ཁྲིམས་འགལ་ཐོག་ནས་བཙན་འཛུལ་བྱས་པ་ཡིན་པ། བོད་ཀྱི་མངའ་ཁོངས་སུ་བོད་ཆོལ་ཁ་གསུམ་གྱི་ས་ཆ་ཚུད་ཀྱི་ཡོད་པ་ངོས་འཛིན་བྱེད་དགོས་པའི་ཁྲིམས་འཆར་བཏོན་ཡོད་པ་དང་། དེ་བཞིན་ཁྲིམས་འཆར་དེའི་ནང་དུ་བོད་མིའི་སྒྲིག་འཛུགས་ཞེས་པའི་བོད་ཀྱི་མང་གཙོའི་སྲིད་གཞུང་དེ་བོད་ཀྱི་དབང་འཛིན་གྱི་སྲིད་གཞུང་ཁོ་ནར་ངོས་འཛིན་དགོས་པ་དང་ཁྲིམས་འཆར་དེ་གཏན་ལ་ཕབ་པའི་རྗེས་ཀྱི་ལོ་གཅིག་གི་ནང་ཚུད་དུ་ཨ་རིའི་སྲིད་འཛིན་གྱིས་གཞུང་འབྲེལ་ཐོག་ནས་བོད་ཀྱི་ལས་ཐོག་སྲིད་སྐྱོང་ཨ་རིར་གདན་འདྲེན་ཞུ་དགོས་པ་སོགས་འཁོད་ཡོད་པ་རེད་འདུག །

གསར་འགོད་པ་སྐལ་བཟང་དོན་གྲུབ།