ཨ་རིའི་གྲོས་ཚོགས་འཐུས་མི་ཚོས་སྲིད་འཛིན་བྷ་ཌན་ལ་༧གོང་ས་མཆོག་དང་མཇལ་ཁ་ཞུ་བའི་དགོས་འདུན་བཏོན་འདུག

ཨ་རིའི་གྲོས་ཚོགས་འཐུས་མི་ཚོས་སྲིད་འཛིན་བྷ་ཌན་ལ་༧གོང་ས་མཆོག་དང་མཇལ་ཁ་ཞུ་བའི་དགོས་འདུན་བཏོན་པ་དང་། གལ་སྲིད་ལོ་ན་བགྲེས་པའི་༧རིན་པོ་ཆེ་མཆོག་ཨ་རིར་ཕེབས་མ་ཐུབ་པ་ཡིན་ན། སྲིད་འཛིན་གཞོན་པ་ཁཱ་མ་ལ-ཧ་རེ་སི་(Kamala Harris) འམ་ཡང་ན་མི་སྣ་མཐོན་པོ་ཞིག་རྒྱ་གར་ལ་ཆེད་གཏོང་གིས་ཁོང་དང་མཇལ་ཁ་ཞུ་དགོས་སྐོར་གསུངས་འདུག 

ཟླ་འདིའི་ཚེས་༡༤ ཉིན་ཨ་རིའི་གྲོས་ཚོགས་གོང་འོག་གཉིས་ཀའི་འཐུས་མི་ཚོས་ཐུན་མོང་གི་ཐོག་ནས་ཕྱི་སྲིད་ལས་ཁུངས་ཀྱི་མང་གཙོ་དང་འགྲོ་བ་མིའི་ཐོབ་ཐང་གི་དྲུང་འཕར་ཛ་ཡ་(Uzra Zeya) ཕུལ་བའི་ཞུ་ཡིག་དེའི་ནང་། འཐུས་མི་ཚོས་བོད་ཀྱི་གནད་དོན་དེ་ཤིན་ཏུ་ཛ་དྲག་ཆེ་བའི་གནད་དོན་ཞིག་ཆགས་ཡོད་པ་དང་། ཨ་རྒྱའི་འགལ་ཟླ་ཤུགས་ཆེ་བའི་དུས་ཚོད་འདིར་༧གོང་ས་མཆོག་དང་མཇལ་འཕྲད་ཞུ་བ་དེས་རྒྱལ་ཁབ་གཉིས་ཀྱི་འགལ་བ་སྔར་བས་ཀྱང་ཤུགས་ཆེ་རུང་གཏོང་བའི་ཉེན་ཁ་ཡོད་ན་ཡང་། སྲིད་འཛིན་བྷ་ཌན་གྱིས་༧གོང་ས་མཆོག་ལ་མཇལ་ཁ་ཞུ་དགོས་ཞེས་འཁོད་འདུག 

ཨ་རིའི་ཆབ་སྲིད་ཚོགས་པ་གཉིས་ཀའི་གྲོས་ཚོགས་འཐུས་མི་༦༠ ལྷག་གིས་ཕུལ་བའི་ཞུ་ཡིག་དེའི་ནང་། བྷ་ཌན་སྲིད་གཞུང་ནས་༧གོང་ས་མཆོག་དང་མཇལ་འཕྲད་ཞུ་དགོས་པ་དང་། བོད་མིའི་སྒྲིག་འཛུགས་དང་འབྲེལ་ལམ་ཟབ་ཏུ་གཏོང་དགོས་པ། ༧གོང་ས་མཆོག་གི་ཡང་སྲིད་བཙལ་འཚོལ་གྱི་གནད་དོན་དེ་༧གོང་ས་མཆོག་དང་བོད་མི་ཁོ་ནས་ཐག་གཅོད་ཆོག་པ། བོད་ཀྱི་སྐད་ཡིག་དང་རིག་གཞུང་རྒྱུན་འཛིན་བྱེད་པར་ཨ་རིས་རྒྱབ་སྐྱོར་དང་རོགས་རམ་བྱེད་དགོས་པ་ལ་སོགས་པའི་གནད་དོན་གལ་ཆེན་འགའ་གསལ་བརྗོད་བྱས་འདུག 

གཞན་ཡང་། གྲོས་ཚོགས་ཀྱི་ཞུ་ཡིག་དེའི་ནང་། ཕྱི་སྲིད་ལས་ཁུངས་ཀྱི་༢༠༢༠ ལོའི་འགྲོ་བ་མིའི་ཐོབ་ཐང་གི་སྙན་ཐོའི་ནང་དུ་བོད་ཀྱི་ས་ཁུལ་ལ་“རྒྱ་ནག་མི་དམངས་སྤྱི་མཐུན་རྒྱལ་ཁབ་ཀྱི་ཆ་ཤས་”རེད་ཅེས་མ་བོས་པ་དེར་རྗེས་སུ་ཡིད་རང་དང་། མ་འོངས་པར་ཡང་ཨ་རིའི་ཕྱི་སྲིད་ལས་ཁུངས་ཀྱི་སྙན་ཐོའི་ནང་དུ་“བོད་རྒྱ་ནག་གི་ཆ་ཤས་རེད་”ཅེས་པའི་ཟེར་སྲོལ་དེ་མཚམས་འཇོག་བྱེད་དགོས་པའི་དགོས་འདུན་ཡང་བཏོན་འདུག 

ལོ་སྔོན་མའི་ཕྱི་ཟླ་༩ པར་སྐུ་ཞབས་བྷ་ཌན་གྱི་འོས་བསྡུའི་ལས་འགུལ་སྤེལ་བའི་སྐབས། ཁོང་གིས་“ངའི་སྲིད་གཞུང་གིས་བོད་དུ་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་མཁན་གྱི་འགོ་ཁྲིད་རྣམས་ལ་ཉེས་ཆད་གཏོང་རྒྱུ་ཡིན་ལ། འཛམ་གླིང་ཕྱིའི་གནས་ཚུལ་བོད་དུ་འཕྲོད་པའི་ཆེད་ཨེ་ཤི་ཡ་རང་དབང་རླུང་འཕྲིན་ཁང་དང་། ཨ་རིའི་རླུང་འཕྲིན་ཁང་གྱི་བོད་སྐད་སྡེ་ཚན་རྒྱ་བསྐྱེད་བྱེད་པ་སོགས་འདུས་པའི་བོད་མི་ལ་རྒྱབ་སྐྱོར་ཆེ་རུ་གཏོང་རྒྱུ་ཡིན་”ཞེས་གསུངས་ཡོད་པ་མ་ཟད། གལ་སྲིད་ཁོང་ཨ་རིའི་སྲིད་འཛིན་དུ་འདེམས་ཐོན་བྱུང་བ་ཡིན་ན། ཁོང་གིས་༧གོང་ས་མཆོག་དང་མཇལ་འཕྲད་ཞུ་བ་དང་། བོད་ཀྱི་གནད་དོན་ལ་རྟོག་ཞིབ་བྱེད་མཁན་གྱི་དམིགས་བསལ་འབྲེལ་མཐུད་པ་བསྐོ་བཞག་བྱེད་རྒྱུ་ཡིན་སྐོར་ཡང་གསུངས་ཡོད། 

གསར་འགོད་པ་དཀོན་མཆོག་རབ་བརྟན།