ཨ་རིའི་གྲོས་ཚོགས་འོག་མའི་ཚོགས་གཙོ་དང་ཐེ་ཝན་གྱི་སྲིད་འཛིན་བར་མཇལ་འཕྲད་གནང་འདུག
ཟླ་འདིའི་ཚེས་༣ ཉིན་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་སྤེལ་གསལ་ལྟར་ན། རྒྱ་ནག་གིས་སྐྱོན་བརྗོད་དྲགས་པོ་བྱེད་བཞིན་པའི་སྐབས་དེར་ཨ་རིའི་གྲོས་ཚོགས་འོག་མའི་ཚོགས་གཙོ་ནན་སི་པེ་ལོ་སི་དང་ཐེ་ཝན་གྱི་སྲིད་འཛིན་ཚེ་ཨིན་ཝན་གཉིས་ཀྱི་བར་དུ་མཇལ་འཕྲད་གནང་ཡོད་པའི་གནས་ཚུལ་ཐོན་འདུག
ཨ་རིའི་གྲོས་ཚོགས་འོག་མའི་ཚོགས་གཙོ་ནི་ཨ་རིའི་སྲིད་འཛིན་དང་སྲིད་འཛིན་གཞོན་པ་རྣམ་པ་གཉིས་ཀྱི་རྗེས་སུ་ཨ་རིའི་དཔོན་རིགས་མཐོ་ཤོས་ཨང་གསུམ་པ་དེ་ཆགས་ཀྱི་ཡོད་པ་དང་། ཨ་རིའི་གྲོས་ཚོགས་འོག་མའི་ཚོགས་གཙོ་ནན་སི་ཟླ་འདིིའི་ཚེས་༢ དགོང་མོ་དེར་ཐེ་ཝན་དུ་འབྱོར་ཡོད་པ་དང་། ཐེངས་འདི་འཚམས་གཟིགས་སུ་ཕེབས་པ་དེ་ནི་འདས་པའི་མི་ལོ་ཉི་ཤུ་རྩ་ལྔའི་རྗེས་སུ་ཨ་རིའི་དཔོན་རིགས་མཐོ་གྲས་འདི་ལྟར་ཞིག་ཐེ་ཝན་དུ་ཕེབས་པ་ཐོག་མ་དེ་ཆགས་ཡོད་འདུག
དེ་རིང་ཚེས་༣ གྱི་ཉིན་ཁོ་མོས་ཐེ་ཝན་གྱི་སྲིད་འཛིན་དང་ལྷན་དུ་མཇལ་འཕྲད་གནང་ཡོད་པ་དང་། སྐབས་དེར་ཁོ་མོས་ཨ་རི་ཡིས་ཐེ་ཝན་སྲུང་སྐྱོབ་བྱེད་རྒྱུ་ཁས་ལེན་བྱས་ནས་ད་བར་མོ་ལོ་བཞི་བཅུ་ཞེ་གསུམ་ཕྱིན་ཡོད་པ་དང་། ཐེ་ཝན་ནི་རང་དབང་ལ་དགའ་མཁན་ཀུན་གྱི་སེམས་ཤུགས་སྐྱེས་ས་ཞིག་ཡིན་རབས་བརྗོད་འདུག ཐེ་ཝན་གྱི་སྲིད་འཛིན་གྱིས་ཐེ་ཝན་ནི་ཨ་རི་ཡིས་བློ་གཏད་དང་ཡི་ཆད་བྱེད་ཆོག་པའི་རོགས་ཟླ་ཞིག་ཡིན་པ་དང་། ཐེ་ཝན་ལ་དམག་གི་འཇིགས་སྐུལ་ཡོང་གི་ཡོད་པས་ཐེ་ཝན་གྱིས་རང་ཉིད་སྲུང་སྐྱོབ་ཀྱི་དོན་དུ་ནུས་པ་ཡོད་ཚད་འདོན་རྒྱུ་ཡིན་རབས་བརྗོད་འདུག
དེ་བཞིན་ཨ་རིའི་གྲོས་ཚོགས་འོག་མའི་ཚོགས་གཙོས་ཐེ་ཝན་གྱི་གྲོས་ཚོགས་སུ་གཏམ་བཤད་གནང་ཡོད་པ་དང་། སྐབས་དེར་ཁོ་མོས་ད་ལྟའི་ཆར་འཛམ་གླིང་ཐོག་མང་གཙོ་དང་མི་གཅིག་དབང་སྒྱུར་རིང་ལུགས་བར་གྱི་གདང་ཁ་ཞིག་བྱེད་ཀྱི་ཡོད་པ་དང་། ཨ་རི་ཡིས་ཐེ་ཝན་དང་འཛམ་གླིང་ཁྱོན་ཡོངས་ཀྱི་མང་གཙོ་སྲུང་སྐྱོབ་བྱེད་པའི་ཆོད་སེམས་ལ་འགྱུར་བ་མེད་རབས་ཀྱི་གསུང་བཤད་གནང་འདུག
ཨ་རིའི་གྲོས་ཚོགས་འོག་མའི་ཚོགས་གཙོ་གཙོས་པའི་སྐུ་ཚབ་ཚོགས་པ་ཐེ་ཝན་དུ་འབྱོར་བའི་རྗེས་སུ། རྒྱ་ནག་གི་གནམ་དམག་དང་ས་དམག་སོགས་ཀྱིས་ཐེ་ཝན་གྱི་མཐའ་སྐོར་དམག་སྦྱོང་བྱེད་འགོ་བཙུགས་ཡོད་འདུག་ལ། ཨ་རིའི་སྐུ་ཚབ་ཚོགས་པ་ཐེ་ཝན་དུ་མ་འབྱོར་བའི་སྔོན་དུ་ཡང་། ཐེ་ཝན་གྱི་སྲིད་འཛིན་དང་ཕྱི་སྲིད་བློན་ཆེན་སོགས་ཀྱི་དྲྭ་ཚིགས་ལ་དྲྭ་རྒོལ་བྱུང་ཡོད་འདུག་པ་མ་ཟད། རྒྱ་ནག་གིས་ཟས་རིགས་མཁོ་སྤྲོད་བྱེད་མཁན་ཐེ་ཝན་བརྒྱ་ལྷག་ཙམ་ཞིག་ནས་ཟས་རིགས་མ་ཉོ་པ་བཀག་སྡོམ་བྱས་ཡོད་པའི་གནས་ཚུལ་ཐོན་འདུག རྒྱ་ནག་ནི་ཐེ་ཝན་གྱི་ཚོང་ཤག་ཆེ་ཤོས་དེ་ཡིན་པ་དང་། འདས་པའི་ལོ་གཅིག་གི་ནང་དུ་ཨ་སྒོར་ཐེ་འབུམ་གསུམ་བརྒྱ་ཉི་ཤུ་རྩ་བརྒྱད་ལྷག་གི་ཚོང་འབྲེལ་བྱས་ཡོད་འདུག
ཐེ་ཝན་དང་རྒྱ་ནག་བར་གྱི་འབྲེལ་བ་ཇེ་སྡུག་ཏུ་འགྲོ་བཞིན་པ་དང་། གལ་སྲིད་རྒྱ་ནག་གིས་མེ་ཤུགས་འཕུར་མདའ་སོགས་ཀྱིས་གཏོར་རྒོལ་བྱས་ཚེས། ཐེ་ཝན་བ་ཚོས་རང་ཉིད་སྲུང་སྐྱོབ་བྱེད་དགོས་པ་བཞིན། ཐེ་ཝན་གྱི་རྒྱལ་ས་ཁུལ་དུ་ས་འོག་ཡིབ་ས་སྟོང་ཕྲག་བཞི་དང་དྲུག་བརྒྱ་ལྷག་བཟོས་ཡོད་པ་དང་། ཡིབ་ས་དེ་དག་གི་ནང་དུ་མི་མང་ས་ཡ་བཅུ་གཉིས་ཙམ་ཤོང་གི་ཡོད་རབས་བརྗོད་འདུག་ལ། དེ་ནི་ཐེ་ཝན་རྒྱལ་ས་ཁུལ་དུ་གནས་སྡོད་བྱེད་མཁན་དག་དང་བསྡུར་ན་ལྡབ་བཞི་ཙམ་མང་བ་ཡོད་རབས་བརྗོད་འདུག །
གསར་འགོད་པ་བློ་བཟང་རྒྱ་མཚོ།
