ཨ་རིའི་གྲོས་ཚོགས་འོག་མས་སྲིད་འཛིན་བྷའེ་ཌན་གྱི་ནང་མིར་ཞིབ་འཇུག་བྱེད་འཆར་འདུག 

སྤྱི་མཐུན་ཚོགས་པའི་གྲོས་ཚོགས་འཐུས་མི་མང་མོས་ཡིན་པའི་ཨ་རིའི་གྲོས་ཚོགས་འོག་མས། སྲིད་འཛིན་བྷའེ་ཌན་དང་ཁོང་གི་ནང་མིར་ཞིབ་འཇུག་བྱེད་རྒྱུ་གསལ་བསྒྲགས་བྱས་འདུག་པ་དང་། དེ་ལ་བརྟེན་ནས་ཕྱི་ལོ་༢༠༢༤ ལོའི་སྲིད་འཛིན་འོས་བསྡུར་ཤུགས་རྐྱེན་ཐེབས་སྲིད་པ་རེད་འདུག 

ཟླ་༡ པོའི་ཚེས་༡༠ ཉིན་ཨ་རིའི་གྲོས་ཚོགས་འོག་མའི་སྤྱི་མཐུན་ཚོགས་པའི་གྲོས་ཚོགས་འཐུས་མི་ཚོས་རྒྱུན་རིང་ནས་ཁས་ལེན་བྱས་ཡོད་པའི་གནད་དོན་ཞིག་དངོས་སུ་ལག་བསྟར་བྱེད་འགོ་བཙུགས་འདུག དེ་ཡང་སྤྱི་མཐུན་ཚོགས་པའི་གྲོས་ཚོགས་འོག་མའི་འཐུས་མི་ཚོས་དེ་སྔོན་ནས་སྲིད་འཛིན་བྷའེ་ཌན་དང་ཁོང་གི་ནང་མིར་གནད་དོན་ཁག་ཅིག་གི་ཐོག་གྲོས་ཚོགས་འོག་མ་ནས་ཞིབ་འཇུག་མཐིལ་ཕྱིན་པ་བྱེད་རྒྱུ་ཁས་ལེན་བྱས་ཡོད་པ་ལྟར། ཐེངས་འདིར་བར་མའི་འོས་བསྡུ་སྐབས་སུ་སྤྱི་མཐུན་ཚོགས་པར་གྲོས་ཚོགས་འོག་མའི་ནང་རྐུབ་སྟེགས་མང་བ་ཐོབ་ཡོད་པས། ལས་དོན་དེ་དངོས་སུ་སྤེལ་རྒྱུ་གསལ་བསྒྲགས་བྱས་འདུག 

དེ་ཡང་གྲོས་ཚོགས་འོག་མའི་རྟོག་ཞིབ་དང་སྟངས་འཛིན་ཚོགས་ཆུང་གི་ཚོགས་གཙོ་སྤྱི་མཐུན་ཚོགས་པའི་གྲོས་ཚོགས་འཐུས་མི་ཇཱེམ་སེ་ཀཱོ་མེར་གྱིས། ད་ལྟའི་ཆར་ཨ་རི་ནང་མང་གཙོ་ཚོགས་པའི་སྲིད་དོན་ཚོགས་པ་གཅིག་གི་དབང་འཛིན་ལམ་ལུགས་མེད་པ་ཆགས་ཡོད་པས། འགན་ཁུར་དང་སྟངས་འཛིན་གྱི་ལས་དོན་སྤེལ་རྒྱུ་ཡིན་སྐོར་བརྗོད་འདུག གྲོས་ཚོགས་འོག་མའི་རྟོག་ཞིབ་དང་སྟངས་འཛིན་ཚོགས་ཆུང་གིས་ཨ་རིའི་གཞུང་གི་ནོར་སྲིད་ལྷན་ཁང་ལ་ཡི་གེ་མང་པོ་ཞིག་བཏང་ནས། དོགས་པ་ཡོད་པའི་སྲིད་འཛིན་བྷའེ་ཌན་གྱི་ནང་མིའི་དངུལ་གཏོང་ལེན་གྱི་གྲངས་ཐོ་དང་གནས་ཚུལ་རྣམས་མཁོ་སྤྲོད་དགོས་པའི་རེ་སྐུལ་བྱས་ཡོད་འདུག སྤྱིར་བཏང་ཨ་རིའི་ནང་དངུལ་འབོར་ཆེན་པོ་གཏོང་ལེན་བྱས་ཚེ། དོགས་གཞིའི་འོག་ནས་གཞུང་ལ་བརྡ་ལན་འབྱོར་གྱི་ཡོད་པ་རེད་འདུག 

དེ་སྔོན་ནས་སྤྱི་མཐུན་ཚོགས་པའི་གྲོས་ཚོགས་འཐུས་མི་ཚོས། སྲིད་འཛིན་བྷའེ་ཌན་གྱི་བུ་ཧན་ཊར་བྷའེ་ཌན་གྱི་རྒྱ་ནག་དང་ཡུག་ཀེ་རན་ནང་གི་ཚོང་འབྲེལ་དང་དཔྱ་ཁྲལ་གྱི་གནད་དོན་ཐད་དོགས་སློང་ཆེན་པོ་བྱེད་བཞིན་ཡོད་པ་དང་། ཐེངས་འདིར་སྤྱི་མཐུན་ཚོགས་པར་གནད་དོན་དེ་དང་འབྲེལ་བའི་མི་སྣ་འབོད་འགུག་བྱེད་པའི་དབང་ཚད་ཐོབ་ཡོད་པས། གནད་དོན་དེར་རྟོག་ཞིབ་ནན་པོ་བྱེད་འཆར་ཡོད་འདུག 

དེ་བཞིན་སྤྱི་མཐུན་ཚོགས་པས་བརྗོད་དོན་ལ། ཕྱི་ལོ་༢༠༢༠ ལོའི་ཟླ་༡༠ པའི་ནང་བརྒྱུད་ལམ་ཞིག་གི་ཐོག་ཏུ། སྲིད་འཛིན་བྷའེ་ཌན་གྱི་བུ་ཧན་ཊར་ཐོག་ཏུ་གནས་ཚུལ་ཞིག་སྤེལ་ཡོད་འདུག་པ་དང་། སྐབས་དེར་གནས་ཚུལ་དེ་སྤྱི་ཚོགས་དྲ་ལམ་ཊེའུ་ཊར་ཐོག་ཏུ་བཀག་འགོག་བྱས་ཡོད་པས། སྐབས་དེར་ཚོང་ལས་ཁང་དེའི་འབྲེལ་ཡོད་ལས་བྱེད་རྣམས་འབོད་འགུག་གིས་བདེན་དཔང་བྱེད་དགོས་པའི་རེ་སྐུལ་བྱས་ཡོད་པ་རེད་འདུག 

ཨ་རིའི་གཞུང་གི་མགྲིན་ཚབ་པས། སྤྱི་མཐུན་ཚོགས་པ་གྲོས་ཚོགས་འོག་མའི་ནང་དུ་མང་མོས་ཆགས་པའི་བདུན་ཕྲག་དང་པོའི་ནང་དུ། ཨ་རིའི་ནང་དུ་འཚོ་བའི་རིན་གོང་འཕར་བཞིན་པའི་དཀའ་ངལ་སེལ་བའི་ལས་དོན་དོན་ཕན་ལྡན་པ་གང་ཡང་མ་སྤེལ་བར། སྲིད་དོན་གྱི་སྐུལ་སློང་ལྡན་པའི་བྱ་སྤྱོད་སྤེལ་བཞིན་ཡོད་པའི་སྐྱོན་བརྗོད་བྱས་འདུག །

གསར་འགོད་པ་སྐལ་བཟང་དོན་གྲུབ།