ཨ་རིའི་ཆེས་མཐོའི་ཁྲིམས་ཁང་གི་གསང་བའི་ཟིན་བྲིས་ཤིག་ཕྱིར་ཐོན་ནས་གླེང་གཞི་ཆེན་པོ་ཆགས་འདུག 

ཨ་རིའི་ཆེས་མཐོའི་ཁྲིམས་ཁང་གི་ཁྲིམས་དཔོན་ཚོས་རྒྱལ་ཁབ་དེའི་མངལ་དབྱུང་གི་ཐོབ་ཐང་ཁྲིམས་དེ་ནུས་མེད་བཟོ་དགོས་མིན་ཐད་ཀྱི་སྔོན་འགྲོའི་བགྲོ་གླེང་དང་འོས་བསྡུ་བྱས་ཏེ། ཁྲིམས་དེ་ནུས་མེད་བཟོ་རྒྱུར་མང་མོས་རྒྱབ་སྐྱོར་ཐོབ་ནས་དེ་འབྲེལ་གྱི་ཟིན་བྲིས་ཤིག་གི་གསང་བ་ཕྱིར་ཐོན་ནས། ཨ་རིའི་སྲིད་དོན་ཁོར་ཡུག་དང་སྤྱི་ཚོགས་ནང་གླེང་སློང་ཆེན་པོ་འབྱུང་བཞིན་འདུག སྤྱིར་བཏང་ཐག་གཅོད་དེ་མཐའ་མ་དང་ནུས་ལྡན་མིན་ཡང་དེ་ལྟར་དངོས་སུ་འབྱུང་བར་སེམས་འཚབ་བྱེད་མཁན་མང་པོ་ཡོད་འདུག 

ཟླ་༤ པའི་ཚེས་༣ ཉིན་ཨ་རིའི་ཆེས་མཐོའི་ཁྲིམས་ཁང་མདུན་དུ་བུད་མེད་ཀྱི་མངལ་དབྱུང་ཐོབ་ཐང་རྩོད་ལེན་པ་མང་པོ་ཞིག་གིས། ཆེས་མཐོའི་ཁྲིམས་ཁང་གིས་མངལ་དབྱུང་ཐོབ་ཐང་གི་ཁྲིམས་དེ་ནུས་མེད་བཟོ་འཆར་ཡོད་པའི་གནས་ཚུལ་ཕྱིར་ཐོན་དང་འབྲེལ་ནས་ངོ་རྒོལ་ལས་འགུལ་ཤུགས་ཆེན་སྤེལ་ཡོད་པ་དང་། དེ་བཞིན་ཁྲིམས་དེ་ནུས་མེད་བཟོ་བར་རྒྱབ་སྐྱོར་བྱེད་མཁན་གྱི་ལས་འགུལ་བ་ཡང་མང་པོ་སླེབས་ནས་ལས་འགུལ་སྤེལ་ཡོད་འདུག 

དེ་ཡང་ཉེ་ཆར་ཟླ་༥ པའི་ཚེས་༢ ཉིན་ཨ་རིའི་གསར་ཁང་ཞིག་གིས་ཆེས་མཐོའི་ཁྲིམས་ཁང་གི་གསང་བའི་ཟིན་བྲིས་ཤིག་དང་འབྲེལ་ནས་གནས་ཚུལ་སྤེལ་ཡོད་འདུག་པ་དང་། དེའི་ནང་ད་ལྟའི་ཆར་རྙིང་ཞེན་གྱི་ལྟ་བ་འཛིན་མཁན་མང་བ་ཡོད་པའི་ཆེས་མཐོའི་ཁྲིམས་ཁང་གི་ཁྲིམས་དཔོན་ཚོའི་བར་དུ། རྩོད་རྙོག་དང་སེམས་ཚོར་རྣོ་བའི་བུད་མེད་མངལ་དབྱུང་གི་ཐོབ་ཐང་ཁྲིམས་དེ་ནུས་མེད་བཟོ་དགོས་མིན་ཐད་བགྲོ་གླེང་དང་འོས་བསྡུ་བྱས་ཏེ། ཁྲིམས་དེ་ནུས་མེད་བཟོ་བར་རྒྱབ་སྐྱོར་བྱེད་མཁན་མང་བ་བྱུང་ནས། ཁྲིམས་དེ་ནུས་མེད་བཟོ་དགོས་པའི་བསམ་ཚུལ་གྱི་ཟིན་བྲིས་ཤིག་བྲིས་ཡོད་པ་རེད་འདུག སྤྱིར་བཏང་ཟིན་བྲིས་དེ་མཐའ་མའི་ཐག་གཅོད་གཅིག་ཆགས་མེད་ཁར། ཁྲིམས་དཔོན་ཚོའི་ལངས་ཕྱོགས་ཀྱང་དངོས་གཞིའི་འོས་བསྡུ་སྔོན་དུ་འགྱུར་བ་འགྲོ་སྲིད་པ་དང་དེ་འདྲ་བྱུང་མྱོང་ཡོད་འདུག་པས། ཟིན་བྲིས་དེ་དང་དེ་འབྲེལ་གྱི་ལས་དོན་རྣམས་གསང་བ་ཡིན་འདུག འོན་ཀྱང་གསང་བ་དེ་ཕྱིར་ཐོན་རྗེས་མངལ་དབྱུང་ཐོབ་ཐང་ལ་རྒྱབ་སྐྱོར་བྱེད་མཁན་གྱི་ལས་འགུལ་བ་དང་སྒེར་པ་ཚོས་སེམས་འཚབ་ཆེན་པོས་ངོ་རྒོལ་བྱེད་བཞིན་འདུག་པ་དང་། མང་གཙོ་ཚོགས་པའི་འགོ་ཁྲིད་ཚོས་ཆེས་མཐོའི་ཁྲིམས་ཁང་གི་ལས་དོན་དེར་སྐྱོན་བརྗོད་བྱེད་བཞིན་འདུག འོན་ཀྱང་སྤྱི་མཐུན་ཚོགས་པའི་གྲོས་ཚོགས་འཐུས་མི་མང་པོ་ཞིག་གིས་ཆེས་མཐོའི་ཁྲིམས་ཁང་གི་ལས་དོན་དེར་རྒྱབ་སྐྱོར་དང་། གསང་བ་དེ་འདྲ་ཕྱིར་བསྒྲགས་དང་མང་གཙོ་ཚོགས་པས་ཆེས་མཐོའི་ཁྲིམས་ཁང་ལ་སྐྱོན་བརྗོད་སོགས་ལ་བརྟེན་ནས། ཆེས་མཐོའི་ཁྲིམས་ཁང་གི་ལས་དོན་ལ་གནོན་ཤུགས་སྤྲོད་ཐབས་དང་སྲིད་དོན་གྱི་ཐེ་བྱུས་བྱེད་ཐབས་བྱེད་ཀྱི་ཡོད་པའི་སྐྱོན་བརྗོད་བྱེད་བཞིན་འདུག 

ཨ་རིའི་ནང་རྙིང་ཞེན་རིང་ལུགས་པ་དང་གུ་ཡངས་རིང་ལུགས་ཀྱི་ལྟ་བ་འཛིན་མཁན་བར་བུད་མེད་ཀྱི་མངལ་དབྱུང་ཐོབ་ཐང་དང་འབྲེལ་ནས་འགལ་ཟླ་ཆེན་པོ་ཡོད་ཁར། སྲིད་དོན་པ་དང་ཆོས་པ་ཚོས་འགལ་ཟླ་དེ་ཞལ་འདེབས་དང་འོས་བསྡུར་བེད་སྤྱོད་ཆེན་པོ་གཏོང་གི་ཡོད་པ་རེད་འདུག འོན་ཀྱང་ཕྱི་ལོ་༡༩༧༣ ལོར་ཨ་རིའི་ནང་མངལ་དབྱུང་གི་ཁྲིམས་དེ་ཆེས་མཐོའི་ཁྲིམས་ཁང་གིས་གཏན་འབེབས་བྱས་པ་ནས་བཟུང་ད་བར་ཁྲིམས་དེ་ནུས་མེད་བཟོ་ཐུབ་མེད་པ་རེད་དེ། ད་ལྟའི་ཆར་ལོ་མང་རིང་ནས་སྤྱི་མཐུན་ཚོགས་པ་དང་རྙིང་ཞེན་རིང་ལུགས་པ་ཚོས་ཆེས་མཐོའི་ཁྲིམས་ཁང་ནང་དུ་རྙིང་ཞེན་གྱི་ལྟ་བ་འཛིན་མཁན་ཁྲིམས་དཔོན་བསྐོ་གཞག་ཡོང་ཐབས་བྱས་ཏེ་གྲུབ་འབྲས་ཐོན་ཡོད་པས། ཐེངས་འདིར་ཁྲིམས་དེ་དངོས་སུ་ནུས་མེད་བཟོ་ཐུབ་པའི་ཉེན་ཁ་ཆེན་པོ་ཡོད་འདུག 

ཆེས་མཐོའི་ཁྲིམས་ཁང་གིས་གནད་དོན་དེའི་ཐོག་ཟླ་༦ པའི་ནང་མཐའ་མའི་ཐག་གཅོད་བྱེད་སྲིད་པ་རེད་འདུག གལ་ཏེ་མངལ་དབྱུང་གི་ཐོབ་ཐང་དེ་འཕྲོག་ཚེ། ཨ་རིའི་ནང་གི་མངའ་སྡེ་༢༤ ནས་༢༦ བར་གྱིས་བུད་མེད་ཚོའི་མངལ་དབྱུང་ཐོབ་ཐང་ཕྱིར་འཐེན་བྱེད་སྲིད་པ་རེད་འདུག་པ་དང་། དེ་དག་མང་ཆེ་བ་ནི་ཨ་རིའི་ལྷོ་ཕྱོགས་དང་དཀྱིལ་ལ་གནས་པའི་མངའ་སྡེ་ཡིན་འདུག ཨ་རིའི་ནང་གུ་ཡངས་ཀྱི་མངའ་སྡེ་ཆེ་ཤོས་སུ་ངོས་འཛིན་བྱེད་བཞིན་པའི་ནིའུ་ཡོག་མངའ་སྡེའི་སྲིད་སྐྱོང་གིས་ཟིན་བྲིས་དེ་ནི་བུད་མེད་ཀྱི་ཐོབ་ཐང་ལ་ངོ་ཚ་དགོས་པའི་གཏོར་རྒོལ་ཞིག་ཡིན་པ་དང་། མངའ་སྡེ་དེའི་ནང་མངལ་དབྱུང་ཐོབ་ཐང་དེ་མུ་མཐུད་གནས་རྒྱུ་ཡིན་སྐོར་བརྗོད་འདུག 

རྒྱལ་སྤྱིའི་ནང་ཨ་རི་དང་ཡུ་རོབ་རྒྱལ་ཁབ་ཁག་ཅིག དེ་བཞིན་ཆོས་དད་གུ་དོག་གི་ལྟ་བ་ཤུགས་ཆེན་ཡོད་མཁན་གྱི་རྒྱལ་ཁབ་ཁག་ནང་། བུད་མེད་ཀྱི་མངལ་དབྱུང་དེ་ནི་ཆོས་ལུགས་དང་མི་མཐུན་པ་ཡིན་སྐོར་བརྗོད་ནས་བཀག་སྡོམ་བྱེད་ཐབས་བྱེད་མཁན་ཚོགས་སྡེ་མང་པོ་ཡོད་ཁར། དགག་ཕྱོགས་སུ་མངལ་དབྱུང་དེ་ནི་བུད་མེད་དང་འབྲེལ་བ་ཡོད་པས། བུད་མེད་ཀྱི་འགྲོ་བ་མིའི་ཐོབ་ཐང་ཡིན་སྐོར་བརྗོད་ནས་བཀག་སྡོམ་ལ་ངོ་རྒོལ་བྱེད་མཁན་ཡང་མང་པོ་ཡོད་པ་རེད། རྒྱལ་ཁབ་དང་མངའ་སྡེ་ཁག་ཅིག་ནང་མངལ་དབྱུང་གི་ཁྲིམས་དམ་པོ་ཡོད་རྐྱེན། བུད་མེད་ཚོས་མངལ་དབྱུང་ཆེད་དུ་རྒྱལ་ཁབ་གཞན་དང་མངའ་སྡེ་གཞན་དུ་ལས་དོན་དེའི་ཆེད་དུ་སྐྱོད་དགོས་པ་ཆགས་ཀྱི་ཡོད་པ་རེད། དེ་བཞིན་མངལ་དབྱུང་གི་གནད་དོན་དེ་ནི་འོས་བསྡུའི་གནད་དོན་གལ་ཆེན་ཞིག་ཀྱང་ཆགས་ཀྱི་ཡོད་འདུག སྲིད་དོན་པ་ཚོས་རྙིང་ཞེན་པ་ཚོས་འོས་ཤོག་ཐོབ་ཆེད་དུ། མངལ་དབྱུང་ཐོབ་ཐང་ལ་གུ་དོག་གི་གཏམ་བཤད་སྤེལ་གྱི་ཡོད་པ་དང་། ཁྲིམས་ཁང་ཁག་ཏུ་ཡང་རྙིང་ཞེན་ལྟ་བ་འཛིན་མཁན་ཁྲིམས་དཔོན་བསྐོ་གཞག་བྱེད་རྒྱུ་ཁས་ལེན་བྱེད་ཀྱི་ཡོད་པ་རེད།།

གསར་འགོད་པ་སྐལ་བཟང་དོན་གྲུབ།