ཨ་རིའི་ནང་དུ་མའོ་ཙེ་ཏུང་གི་དྲུང་ཆེའི་ཉིན་ཐོ་དང་འབྲེལ་བའི་གྱོད་ཞིབ་གཅིག་འགོ་བཙུགས།

རྒྱ་ནག་དམར་ཤོག་ཚོགས་པའི་གནད་དོན་མང་པོ་འཁོད་པའི་རྒྱ་ནག་དམར་ཤོག་གཞུང་གི་འགོ་ཁྲིད་མའི་ཙེ་ཏུང་གི་དྲུང་ཆེས། ཕྱི་ལོ་༡༩༠༣ ནས་ ༢༠༡༨ བར་བྲིས་པའི་ཉིན་ཐོ་ཞིག་དང་འབྲེལ་བའི་གྱོད་ཞིབ་གཅིག་ཨ་རིའི་མངའ་སྡེ་(California)་ནང་འགོ་འཛུགས་བྱས་ཡོད་འདུག་པ་དང་། གྱོད་ཞིབ་དེའི་ནང་ཉིན་ཐོ་དེ་རྒྱ་ནག་ལ་ཕྱིར་སྤྲོད་དགོས་ཀྱི་ཡོད་དམ། ཡང་ན་(Stanford University)གཙུག་ལག་སློབ་ཆེན་གྱིས་ཉར་ན་འགྲིགས་མིན་གྱི་སྐོར་ཡིན་འདུག 

ཕྱི་ཚེས་༢༠ ཉིན་སྦི་སྦི་སིའི་གསར་ཁང་གིས་གནས་ཚུལ་སྤེལ་གསལ་ལྟར་ན། རྒྱ་ནག་དམར་ཤོག་གཞུང་གི་འགོ་ཁྲིད་མའོ་ཙེ་ཏུང་གི་དྲུང་ཆེ་(Li Rui)ཟེར་བ་དེས། ཕྱི་ལོ་༡༩༣༠ ནས་༢༠༡༨ བར་བྲིས་ཤིང་། རྒྱ་ནག་དམར་ཤོག་ཚོགས་པའི་གསང་བའི་གནད་དོན་དུ་མའི་སྐོར་འཁོད་པའི་ཉིན་ཐོ་ཞིག་མའོ་ཙེ་ཏུང་གི་དྲུང་ཆེའི་བུ་མོས་ཕྱི་ལོ་༢༠༡༤ ལ་ཨ་རིའི་(Stanford University)གཙུག་ལག་སློབ་ཆེན་ལ་སྤྲད་ཡོད་འདུག་པར་བརྟེན། ད་ཆར་ཉིན་ཐོ་དེ་རྒྱ་ནག་ལ་ཕར་སྤྲོད་དགོས་མིན་དང་། གཙུག་ལག་སློབ་ཆེན་གྱིས་ཉར་ན་འགྲིག་གི་ཡོད་མེད་སྐོར་གྱོད་ཞིབ་གཅིག་ཨ་རིའི་(California)་ནང་འགོ་འཛུགས་བྱས་ཡོད་འདུག གལ་སྲིད་ཉིན་ཐོ་དེ་རྒྱ་ནག་ལ་ཕར་སྤྲད་ན་དེའི་ནང་དུ་དམར་ཤོག་ཚོགས་པ་དང་འབྲེལ་བའི་གསང་བའི་གནད་ཚུལ་དུ་མ་ཞིག་དང་། གཞན་ཡང་རྩོད་གཞི་ཅན་གྱི་གནད་དོན་མང་པོ་ཡོད་འདུག་པར་བརྟེན། ཉིན་ཐོ་དེ་མེད་པ་བཟོ་སྲིད་པར་རྗོད་ཀྱི་ཡོད་འདུག མའོ་ཙེ་ཏུང་གི་དྲུང་ཆེ་(Li Rui)ཟེར་བ་དེ་ཕྱི་ལོ་༢༠༡༩ ལོར་འདས་གྲོངས་སུ་གྱུར་ཡོད་འདུག་པ་དང་། ཁོང་གི་བཟའ་ཟླ་གཉིས་པ་དེས་ཉིན་ཐོ་དེ་ཕྱིར་རྒྱ་ནག་ལ་སྤྲོད་དགོས་པའི་དགོས་འདུན་བཏོན་ཡོད་འདུག་ཀྱང་། སེ་ཏྲན་ཧྥོ་གཙུག་ལག་སློབ་ཆེན་གྱིས་ཡིག་ཆ་དེ་ཕྱིར་རྒྱ་ནག་ལ་སྤྲད་ན་དམར་ཤོག་ཚོགས་པས་མེད་པ་བཟོ་སྲིད་པའི་ཉེན་ཁ་མཐོང་ནས་སྤྲོད་ཀྱི་ཡོད་མི་འདུག སེ་ཏྲན་ཧྥོ་གཙུག་ལག་སློབ་ཆེན་གྱི་ཁྲིམས་རྩོད་པ་(Mark Litvack)ཟེར་བས་ཉིན་ཐོ་དེ་ཕྱིར་རྒྱ་ནག་ལ་སྤྲད་ན་མེད་པ་བཟོ་རྒྱུ་ཡིན་པ་དང་། ད་བར་རྒྱ་ནག་དམར་ཤོག་ཚོགས་པ་ལ་སྐྱོན་བརྗོད་རིགས་ཀྱི་ཡིག་ཆ་གང་ཡང་འདོན་ཆོག་གི་ཡོད་མ་རེད་ཅེས་བརྗོད་ཡོད་འདུག མའོ་ཙེ་ཏུང་གི་དྲུང་ཆེ་(Li Rui)ཟེར་བ་དེ་གཞོན་ནུའི་དུས་སུ་ཤེས་ཡོན་ལྡན་ཞིང་སྨྲ་ལྕེ་བདེ་བའི་རྐྱེན་གྱིས་ཕྱི་ལོ་༡༩༥༠ ཙམ་ནས་མའོ་ཙེ་ཏུང་གི་དྲུང་ཆེ་བདམས་ཡོད་འདུག་ཀྱང་། ཡུན་རིང་མ་འགོར་བར་དྲུང་ཆེ་དེས་མའོ་ཙེ་ཏུང་གི་སྲིད་དོན་ཚོགས་འདུ་ཞིག་ལ་འགག་པ་བརྒྱབས་རྗེས་རྒྱ་ནག་གི་དམར་ཤོག་ཚོགས་པའི་འགོ་ཁྲིད་མང་པོ་བཙོན་དུ་བཅུག་ཡོད་པ་དང་། དྲུང་ཆེ་(Li Rui)་ཡང་ལོ་མང་རིང་བཙོན་འཇུག་བྱས་ཡོད་འདུག ཕྱིས་སུ་ཕྱི་ལོ་༡༩༧༦ ལོར་མའོ་ཙེ་ཏུང་ཤི་རྗེས་དྲུང་ཆེ་(Li Rui) ཁོང་ཡང་བཙོན་གྲོལ་ཐོབ་ནས་རྒྱ་ནག་ནང་གློག་ཁང་འཛུགས་སྐྲུན་ལྷན་ཁང་ནང་ལས་ཀ་བྱས་ཡོད་འདུག་ལ། དེ་བཞིན་རྒྱ་ནག་དམར་ཤོག་གཞུང་གི་ལས་བྱེད་འདེམས་བསྐོ་ལྷན་ཁང་ནང་དུའང་ལས་ཀ་བྱེད་མྱོང་ཡོད་འདུག ད་དུང་ཁོང་ནི་རྒྱ་ནག་དམར་ཤོག་གཞུང་དང་དཔོན་རིགས་ཁྲོད་གུ་ཡངས་ཅན་དང་བཅོས་བསྒྱུར་གྱི་བསམ་བློ་ཡོད་མཁན་ཞིག་ཡིན་པར་བརྗོད་འདུག དམར་ཤོག་གཞུང་ནས་རྒན་ཡོལ་ཞུས་རྗེས་ཀྱང་རྒྱ་ནག་དམར་ཤོག་གཞུང་ནང་བཅོས་བསྒྱུར་དགོས་པ་སོགས་ཀྱི་རྩོམ་དང་དེབ་སོགས་བཏོན་ནས་བསལ་ཚུལ་མང་པོ་འདོན་མཁན་ཞིག་ཡིན་འདུག་པ་མ་ཟད། རྒྱ་ནག་གི་སྲིད་འཛིན་ཞི་ཅིན་ཕིང་ནི་ཤེས་ཡོན་གནས་ཚད་སྐྱོ་བོ་ཡོད་པས། འགོ་ཁྲིད་ཚད་ལྡན་ཞིག་མི་ཡོང་ཚུལ་སོགས་སྐྱོན་བརྗོད་དུ་མ་བྱས་པའི་རྐྱེན་གྱིེས་ཁོའི་རྩོམ་དང་དེབ་རྣམས་རྒྱ་ནག་ནང་བཀག་ཡོད་འདུག 

ཡིན་ན་ཡང་ཁོང་ནི་རྒྱ་ནག་དམར་ཤོག་གཞུང་ནང་འགོ་ཁྲིད་རྒན་གྲས་ཤིག་ཡིན་པར་བརྟེན། རྒན་ཡོལ་ཞུས་རྗེས་ཀྱང་མི་མང་དང་འགོ་ཁྲིད་ཁྲོད་ཆེ་མཐོང་ཆེན་པོ་ཡོད་འདུག ཕྱི་ལོ་༢༠༡༩ ལོར་ཁོ་འདས་གྲོངས་སུ་གྱུར་རྗེས་རྒྱ་ནག་གཞུང་གི་ངོས་ནས་མྱ་ངན་དང་རྗེས་དྲན་བྱས་ཡོད་འདུག ཁོང་གི་ཉིན་ཐོའི་ནང་རྒྱ་ནག་དམར་ཤོག་གཞུང་གི་ཁྲོད་དུ་ཆབ་སྲིད་གང་འདྲ་རྩེ་གི་ཡོད་མེད་དང་དུས་ཚིགས་ཁྱད་པར་ཅན་སོགས་ཉིན་ཐོའི་ནང་འཁོད་ཡོད་འདུག དཔེར་ན། གནམ་སྡེ་སྒོ་མོ་ཆེའི་ཐང་ཆེན་དུ་དོན་རྐྱེན་ག་རེ་བྱུང་ཡོད་མེད་སྐོར་བདུན་ཕྲག་ནག་པོ་ཞེས་བཀོད་ཡོད་འདུག་ལ། སྐབས་དེ་དུས་ཁོ་རང་ཉིད་ཀྱི་མཐོང་ཐོས་མྱོང་གསུམ་བྲིས་ཡོད་འདུག གནད་དོན་དེ་དག་ནི་རྒྱ་ནག་ནང་ཧ་ཅང་གླེང་སློང་བྱེད་མི་ཆོག་པའི་རིགས་ཡིན་ཡང་ཁོང་གིས་བྲིས་ཡོད་འདུག ཕྱི་ལོ་༢༠༡༤་ལོར་ ཁོང་གི་བུ་མོས་ཉིན་ཐོ་རྣམས་སེ་ཏྲན་ཧྥོ་གཙུག་ལག་སློབ་ཆེན་ལ་སྤྲད་ཡོད་འདུག་པ་དང་བུ་མོས་ཕ་ཡིས་གང་བཤད་པ་ལྟར་བྱས་ཡོད་ཅེས་སྦི་སྦི་སི་གསར་ཁང་ལ་བརྗོད་འདུག ལོ་དེའི་ནང་དྲུང་ཆེ་ཡི་བཟའ་ཟླ་གཉིས་པ་དེས་བུ་མོ་རྒྱ་ནག་ནང་ཁྲིམས་ལ་གཏུགས་ཡོད་འདུག བཟའ་ཟླ་གཉིས་པ་(Ms Zhang)ཟེར་བ་དེས་བུ་མོ་(Li Nanyang)ཟེར་བ་དེས་ནོར་ནས་སེ་ཏྲན་ཧྥོ་གཙུག་ལག་སློབ་ཆེན་ལ་ཡིག་ཆ་དེ་དག་སྤྲད་པ་རེད་ཅེས་རྗོད་ཀྱི་ཡོད་འདུག བཟའ་ཟླ་གཉིས་པས་ཡིག་ཆ་དེའི་ནང་ཁོང་མོ་སྒེར་གྱི་གནད་དོན་མང་པོ་ཡོད་ཚུལ་དང་། ཁོང་མོ་ངོ་ཚ་བོ་ཆགས་རྒྱུ་ཡིན་ཚུལ་སོགས་མང་པོ་བརྗོད་ཡོད་འདུག རྒྱ་ནག་གི་ཁྲིམས་ཁང་གིས་བཟའ་ཟླ་གཉིས་པ་དེ་ལ་རྒྱབ་སྐྱོར་བྱས་ནས་ཡིག་ཆ་རྣམས་ཕྱིར་ཁོང་མོ་ལ་སྤྲོད་དགོས་པའི་དགོས་འདུན་བཏོན་ཡོད་འདུག་ཀྱང་། སེ་ཏྲན་ཧྥོ་གཙུག་ལག་སློབ་ཆེན་གྱིས་ཁྲིམས་རྩོད་པས་རྒྱ་ནག་གི་ཁྲིམས་ཁང་གིས། ང་ཚོའི་ཕྱོགས་ནས་སྲུང་སྐྱོབ་བྱེད་རྒྱུའི་ཆོག་མཆན་གང་ཡང་སྤྲོད་ཀྱི་མི་འདུག་པས་དེ་འདྲ་འགྲིག་གི་མ་རེད་ཅེས་བརྗོད་ཡོད་འདུག ཨ་རིའི་(California)མངའ་སྡེའི་ནང་ཉེ་ཆར་གཟའ་ཟླ་བའི་ཉིན་གྱོད་ཞིབ་འགོ་འཛུགས་བྱས་ཡོད་འདུག སེ་ཏྲན་ཧྥོ་གཙུག་ལག་སློབ་ཆེན་གྱི་ཁྲིམས་རྩོད་པས་རྒྱ་ནག་གིས་དེང་རབས་རྒྱ་ནག་གི་ལོ་རྒྱུས་དེ་དག་རྩ་བ་ནས་མེད་པ་བཟོ་འདོད་བྱེད་ཀྱི་ཡོད་པས། ང་ཚོས་ངེས་པར་དུ་དེ་དག་སྲུང་སྐྱོབ་བྱེད་དགོས་ཞེས་བརྗོད་ཡོད་འདུག 

གསར་འགོད་པ། བསོད་ནམས་ཕུན་ཚོགས།