ཨ་རིའི་ནང་བོད་རིགས་ཤིག་གྲོང་སྡེའི་སྤྱི་ཁྱབ་ཏུ་འདེམས་ཐོན་བྱུང་འདུག 

ཨ་རིའི་ནང་གི་སཱན་སི་ནེ་ཊིའི་གྲོང་ཁྱེར་སྤྱི་ཁྱབ་ཀྱི་འོས་བསྡུའི་ནང་བོད་རིགས་ཨཱ་ཧྥེ་ཏབ་སྐར་མ་སིང་པུ་རི་ཝལ་ལ་རྒྱལ་ཁ་ཐོབ་འདུག་པས། དེ་ནི་གྲོང་སྡེ་དེའི་ལོ་རྒྱུས་ནང་བོད་རིགས་དང་ཨེ་ཤི་ཡའི་མི་རིགས་ཤིག་གྲོང་སྡེའི་སྤྱི་ཁྱབ་ཏུ་འདེམས་ཐོན་བྱུང་བ་ཐོག་མ་ཆགས་ཀྱི་ཡོད་འདུག 

ཟླ་༡༡ པའི་ཚེས་༢ ཉིན་ཨ་རིའི་ཨཱོ་ཧ་ཡོ་མངའ་སྡེ་སཱན་སི་ནེ་ཊིའི་གྲོང་སྡེའི་སྤྱི་ཁྱབ་ཀྱི་འོས་བསྡུ་བྱས་ཡོད་འདུག་པ་དང་། འོས་བསྡུའི་གྲུབ་དོན་མང་གཙོ་ཚོགས་པའི་ཚོགས་མི་བོད་རིགས་ཨཱ་ཧྥེ་ཏབ་པུ་རི་ཝལ་ལ་འོས་གྲངས་ཀྱི་བརྒྱ་ཆ་༦༦ ཐོབ་ནས་རྒྱལ་ཁ་ཤིན་ཏུ་ཆེན་པོ་ཐོབ་འདུག ཁོང་གི་ཁ་གཏད་ནི་མང་གཙོ་ཚོགས་པའི་ཚོགས་མི་དང་གྲོང་སྡེའི་སྤྱི་ཁྱབ་ཟུར་པ། གྲོས་ཚོགས་འཐུས་མི། གྲོང་སྡེའི་འཐུས་ཚོགས་ཀྱི་ཚོགས་མི་སོགས་བྱེད་མཁན་མྱོང་མཁན་ཞིག་ཡིན་འདུག་ཀྱང་། བོད་རིགས་ཁོང་ལ་འོས་འཕེན་པ་ཚོས་རྒྱབ་སྐྱོར་ཤུགས་ཆེན་བྱས་ནས་རྒྱལ་ཁ་ཐོབ་ཡོད་པ་རེད་འདུག 

ཨཱ་ཧྥེ་ཊབ་ཀྱིས་ཐེངས་འདིའི་རྒྱལ་ཁར་དགའ་སྤོབས་ཆེན་པོ་བྱུང་བ་དང་། དེ་ནི་ལོ་རྒྱུས་ཀྱི་ཟིན་ཐོ་གསར་པ་ཞིག་ཡིན་སྐོར་བརྗོད་འདུག 

ལོ་ན་༣༩ ལ་ཕེབས་པའི་ཁོང་གི་མ་བོད་པ་དང་ཕ་རྒྱ་གར་བ་ཡིན་ཞིང་། ཨ་རིའི་ནང་དུ་སྐྱེས་ཤིང་ཕྱི་ལོ་༢༠༠༥ ལོར་ཨཱོ་ཧ་ཡོ་མངའ་སྡེའི་གཙུག་ལག་སློབ་གཉེར་ཁང་ནས་ཆབ་སྲིད་ཚན་རིག་ཐོག་གཙུག་ལག་རབ་འབྱམས་པ་ཐོན་ཞིང་། ཕྱི་ལོ་༢༠༠༨ ལོར་སཱན་སི་ནེ་ཊིའི་ཁྲིམས་ལུགས་རིག་པའི་མཐོ་སློབ་ནས་སློབ་ཐོན་བྱུང་རྗེས། ཁྲིམས་དང་འབྲེལ་བའི་ལས་དོན་མང་པོ་ཞིག་ནང་ཞུགས་འདུག ཕྱི་ལོ་༢༠༡༨ ལོར་ཨ་རིའི་གྲོས་ཚོགས་འོག་མའི་འོས་བསྡུར་མང་གཙོ་ཚོགས་པའི་འོས་མིར་འདེམས་ཐོན་བྱུང་སྐབས། ཁོང་ལ་རེ་བ་བྱེད་མཁན་མང་པོ་བྱུང་ཡོད་ཀྱང་སྐབས་དེར་ཉམས་མྱོང་ལྡན་པའི་སྤྱི་མཐུན་ཚོགས་པའི་འོས་མིར་རྒྱལ་ཁ་ཐོབ་ནས་ཁོང་ལ་ཕམ་ཁ་བྱུང་ཡོད་པ་རེད། ཐེངས་འདིར་གྲོང་སྡེའི་སྤྱི་ཁྱབ་པ་འདེམས་ཐོན་བྱུང་བ་དེ་ནི་གྲོང་སྡེ་དེའི་ནང་བོད་རིགས་དང་ཨེ་ཤི་ཡའི་མི་རིགས་ཤིག་གོ་གནས་དེར་འདེམས་བྱུང་མཁན་དང་པོ་དེ་ཆགས་ཡོད་པས། མ་འོངས་པར་ཆབ་སྲིད་ཀྱི་མདུན་ལམ་ལ་རེ་བ་ཆེན་པོ་ཡོད་སྐོར་བརྗོད་བཞིན་འདུག །

གསར་འགོད་པ་སྐལ་བཟང་དོན་གྲུབ།