ཨ་རིའི་ནང་མཐོང་མཆན་དུས་ཡུན་རྫོགས་པའི་སློབ་མ་༦༠༠༠ གར་སོང་ཆ་མེད།

སློབ་མའི་མཐོང་མཆན་ཐོག་ནས་ཨ་རི་ལ་སླེབས་པའི་ཕྱིའི་རྒྱལ་ཁབ་ཀྱི་མི་ཉུང་མཐའ་ཡང་༦༠༠༠ ཙམ་གྱི་མཐོང་མཆན་དུས་ཡུན་རྫོགས་པའི་རྗེས་ཨ་རིའི་ནང་མུ་མཐུད་དུ་སྡོད་ཡོད་ཀྱང་། ཨ་རིའི་གཞུང་གིས་ཁོང་ཚོ་གང་དུ་ཡོད་མིན་གྱི་ཞིབ་ཕྲའི་གནས་ཚུལ་ཤེས་རྟོགས་ཐུབ་མེད་པ་རེད།

ཨ་རིའི་རྒྱང་བསྒྲགས་ལས་ཁུངས་(ABC news) ཀྱིས་ཟླ་འདིའི་ཕྱི་ཚེས་༢ ཉིན་གནས་ཚུལ་སྤེལ་བ་ལྟར་ན། སློབ་མའི་མཐོང་མཆན་ཐོག་ཨ་རིར་སླེབས་པའི་ཕྱིའི་རྒྱལ་ཁབ་ཀྱི་མི་༦༠༠༠ ཙམ་གྱི་མཐོང་མཆན་དུས་ཡུན་རྫོགས་ཟིན་ཡང་། ད་དུང་མུ་མཐུད་དུ་ཨ་རིའི་ནང་སྡོད་དེ་གར་སོང་ཆ་མེད་དུ་གྱུར་པ་ནི་ལས་དོན་ཐད་ཀྱི་འཐུས་ཤོར་ཞིག་ཡིན་པ་དང་། ཨ་རིའི་བདེ་འཇགས་ལའང་ཉེན་ཁ་བཟོ་སྲིད་པ་ཞིག་ཡིན་འདུག ཁོང་ཚོ་གར་སོང་ཆ་མེད་དུ་གྱུར་པའི་རྒྱུ་མཚན་གཙོ་བོ་ནི་སློབ་མའི་མཐོང་མཆན་འགན་ཁུར་མི་སྣ་དང་སློབ་གྲྭ དེ་བཞིན་ཨ་རིའི་གཞུང་བར་གྱི་འབྲེལ་ལམ་ཆད་པའི་རྐྱེན་གྱིས་ཡིན་ཞིང་། འདི་ནི་ཕྱི་ལོ་༢༠༡༡ ཟླ་༩ པའི་ཚེས་༡༡ ཉིན་གྱི་འཇིགས་སྐུལ་འཇབ་རྒོལ་རྗེས་མུ་མཐུད་དུ་ལྷག་པའི་སེམས་འཚབ་སྐྱེ་གཞིའི་གནད་དོན་ཞིག་ཡིན་པ་རེད།

ཨ་རིའི་སྤྱི་མཐུན་ཡུལ་སྤོ་དང་སྒོ་ཁྲལ་ལག་བསྟར་ལས་ཁུངས་(ICE) ཀྱི་དཔོན་རིགས་པི་ཌར་ཨེ་རྗི་(Peter Edge) ཡིས་བརྗོད་དོན། ང་ཚོའི་སེམས་འཚབ་ཆེ་ཤོས་ནི་ཁོང་ཚོས་ལས་ཀ་ཅི་ལྟ་བུ་ཞིག་ཡིན་ནའང་བྱ་སྲིད་པ་དང་། མི་ཁ་ཤས་ཀྱིས་གོ་སྐབས་དེ་བརྒྱུད་ནས་གཏོར་བརླག་གི་བྱ་སྤྱོད་སྤེལ་སྲིད་པ་རེད།

ཡུལ་སྤོ་དང་སྒོ་ཁྲལ་ལག་བསྟར་ལས་ཁུངས་ཀྱིས་སློབ་མའི་མཐོང་མཆན་ཐོག་ཨ་རིར་སླེབས་པའི་ཕྱིའི་རྒྱལ་ཁབ་ཀྱི་མིའི་གནད་དོན་རྩད་གཅོད་ཐད་སྔོན་ནས་འགལ་རྐྱེན་འཕྲད་བཞིན་ཡོད་ཅིང་། ལོ་རེར་ཁྱོན་མི་ཁྲི་༡༠༠ ཙམ་སློབ་མའི་མཐོང་མཆན་ཐོག་ནས་ཨ་རིར་ལྟ་སྐོར་དུ་སླེབས་བཞིན་པ་དང་། ཁོང་ཚོའི་ནང་གི་མི་ཁྲི་༥།༨ ལྷག་གི་མཐོང་མཆན་དུས་ཡུན་རྫོགས་ཟིན་ཡོད་པའི་ཁྲོད་ཀྱི་མི་༦༠༠༠ ཙམ་གྱི་ཀུན་སློང་ལ་དོགས་པ་ཡོད་སྟབས། མུ་མཐུད་དུ་དེའི་སྐོར་བརྟག་དཔྱད་དང་ཞིབ་འཇུག་བྱ་རྒྱུ་ཡིན་འདུག

ཨ་རིའི་མིག་སྔར་གྱི་སྒྲིག་སྲོལ་གཏན་འབེབས་ལྟར་ན། སློབ་གྲྭར་ཕྱིའི་རྒྱལ་ཁབ་ཀྱི་སློབ་མར་ལྟ་རྟོག་བྱེད་པའི་འགན་ཁུར་ཡོད་པ་དང་། གལ་སྲིད་ཕྱི་རྒྱལ་གྱི་སློབ་ཕྲུག་འཛིན་གྲྭར་ཡང་ནས་བསྐྱར་དུ་མ་སླེབས་པ་ཡིན་ན། སློབ་གྲྭ་ཡིས་སྤྱི་མཐུན་སྲིད་གཞུང་ལ་ཡར་ཞུ་བྱེད་དགོས་ཀྱི་ཡོད་པ་རེད།

དེ་བཞིན་ICE ལས་ཁུངས་དང་ས་གནས་སྲིད་གཞུང་མཉམ་འབྲེལ་ཐོག་གར་སོང་ཆ་མེད་དུ་གྱུར་པའི་ཕྱི་རྒྱལ་གྱི་སློབ་ཕྲུག་རྣམས་རྩད་གཅོད་བྱ་རྒྱུ་ཡིན་པ་དང་། ཨེ་རྗི་ཡིས་བརྗོད་པ་ལྟར་ན། ཁོང་ཚོར་དེའི་ཐད་ད་དུང་ལས་ཀ་མང་པོ་བྱེད་རྒྱུ་ལྷག་ཡོད་འདུག

འཐུས་ཤོར་དེའི་རིགས་ནི་སེམས་འཚབ་སྐྱེ་གཞི་ཞིག་ཡིན་ཞིང་༩༡༡ འཇིགས་སྐུལ་འཇབ་རྒོལ་རྗེས། སློབ་ཕྲུག་གི་མཐོང་མཆན་ཡོད་པའི་ཕྱིའི་རྒྱལ་ཁབ་ཀྱི་མི་ཉུང་མཐའ་ཡང་༢༦ ཙམ་ཨ་རི་རུ་འཇུ་བཟུང་བྱས་ཡོད་པ་དང་། དེའི་སྐབས་ཀྱི་འཇིགས་སྐུལ་འཇབ་རྒོལ་དོན་རྐྱེན་གྱི་ཉེས་ཅན་གཏེ་བོ་ཡང་སློབ་ཕྲུག་གི་མཐོང་མཆན་ཐོག་ཨ་རིར་འཛུལ་པ་ཞིག་ཡིན་འདུག།