ཨ་རིའི་ཚན་རིག་སློབ་དཔོན་ཆེན་མོ་ཞིག་ལ་རྒྱ་ནག་དང་གསང་འབྲེལ་གྱིས་སྒོར་མོ་བླངས་པའི་ནག་ཉེས་ཕོག་འདུག 

ཨ་རིའི་ཧཱ་ཝར་ཌི་སློབ་ཆེན་(Harvard University) གྱི་རྫས་སྦྱོར་རིག་པའི་སློབ་དཔོན་ཞིག་ལ་རྒྱ་ནག་དམར་ཤོག་ཚོགས་པ་དང་གསང་འབྲེལ་གྱིས་སྒོར་མོ་ཕོན་ཆེན་བླངས་པའི་ནག་ཉེས་ཕོག་འདུག 

ཕྱི་ཟླ་༡༢ པའི་ཚེས་༢༢ ཉིན་རྒྱལ་སྤྱིའི་བརྒྱུད་ལམ་ཁག་ནས་གནས་ཚུལ་སྤེལ་བ་ལྟར་ན། ཨ་རིའི་ཁྲིམས་ཁང་ཞིག་གིས་ཉིན་དྲུག་རིང་ཁྲིམས་ཞིབ་འཚོགས་པའི་གྲུབ་འབྲས་སུ། སྙན་གྲགས་ཆེ་བའི་ཚན་རིག་པ་དང་། ཧ་ཝར་ཌི་སློབ་ཆེན་གྱི་སློབ་དཔོན་ཆེན་མོ་ཆལ་སེ་ལཱི་བྷེར་(Charles Lieber) ལ་རྒྱ་ནག་དམར་ཤོག་ཚོགས་པ་དང་མཉམ་ལས་བྱས་ཏེ་ཨ་སྒོར་ཁྲི་ཕྲག་མང་པོ་བླངས་པའི་གནས་ཚུལ་རྣམས་སྦས་གསང་བྱས་པའི་ནག་ཉེས་ཕོག་ཡོད་འདུག 

དེ་ཡང་ལོ་ན་༦༢ སོན་པའི་སློབ་དཔོན་ཆེན་མོ་ཆལ་སེ་བྷེར་ཧཱ་ཝར་ཌི་སློབ་ཆེན་གྱི་རྫས་སྦྱོར་དང་སྐྱེ་དངོས་རྫས་སྦྱོར་རིག་པའི་སྡེ་ཚན་གྱི་འགན་འཛིན་ཡིན་འདུག་པ་དང་། ཁོས་རྒྱ་ནག་གི་ཚོགས་པ་ཁག་ཅིག་དང་མཉམ་ལས་བྱས་ནས་ཨ་སྒོར་ཁྲི་མང་པོ་བླངས་ན་ཡང་། གནས་ཚུལ་ཨ་རིའི་འབྲེལ་ཡོད་ལས་ཁུངས་ལ་ཡར་ཞུ་མ་བྱས་པར་སྦས་གསང་བྱས་ཡོད་འདུག

ཧཱ་ཝར་ཌི་སློབ་ཆེན་གྱི་སློབ་དཔོན་ཆེན་མོ་ཁོའི་ཉམས་ཞིབ་རུ་ཁག་ལ་ཨ་རིའི་རྒྱལ་ཁབ་ཀྱི་འཕྲོད་བསྟེན་དང་བདེ་སྲུང་ལྟེ་གནས་ཁང་ནས་རོགས་དངུལ་ཨ་སྒོར་ས་ཡ་༡༥ ཐོབ་ཡོད་པས། གལ་ཏེ་ཕྱིའི་རྒྱལ་ཁབ་ཁག་ནས་དམིགས་ཡུལ་འགལ་ཟླར་གྱུར་བའི་དངུལ་ལེན་གྱི་ཡོད་ཚེ་ཕྱིར་བསྒྲགས་བྱེད་དགོས་ཀྱི་ཡོད་འདུག་ཀྱང་། སློབ་དཔོན་ཆེན་མོ་ཁོ་དང་རྒྱ་ནག་གི་ཝུ་ཧན་སློབ་ཆེན་བར་འབྲེལ་བ་ཡོད་ཁར། རྒྱ་ནག་གི་སློབ་ཆེན་དེས་ཁོ་ལ་འཚོ་བའི་འགྲོ་གྲོན་ཨ་སྒོར་༡༥༨,༠༠༠ བཏང་བའི་ཐོག ཟླ་རེར་ཨ་སྒོར་ཁྲི་༥ སྤྲད་ཡོད་འདུག་པ་མ་ཟད། སློབ་ཆེན་དེར་ཚན་རིག་གི་ཞིབ་འཇུག་ལྟེ་གནས་ཁང་ཞིག་འཛུགས་ཆེད་དུ་ཁོ་ལ་ཨ་སྒོར་ས་ཡ་༡.༥ སྤྲད་ཡོད་འདུག དེ་བཞིན་རྒྱ་ནག་ནང་དུ་ཚན་རིག་པ་གྲགས་ཅན་ཡོང་ཆེད་དུ། རྒྱ་ནག་གི་རིག་སྩལ་བ་གསར་འཇུག་གི་ལས་ཁང་ཞིག་དང་ཁོའི་བར་གན་རྒྱ་ཡག་བཞག་ཡོད་འདུག ཁོས་དངུལ་དེ་དག་དང་རྒྱ་ནག་གི་སློབ་ཆེན་དང་འབྲེལ་བ་ཡོད་པ་རྣམས་ཁྲིམས་འགལ་ཐོག་ནས་སྦས་གསང་བྱས་ཡོད་པ་རེད་འདུག

ད་ལྟའི་ཆར་འཛམ་གླིང་གི་མིག་ལམ་དུ། རྒྱ་ནག་གིས་མ་དངུལ་ཕོན་ཆེན་བཏང་ནས་སྔོན་ཐོན་རྒྱལ་ཁབ་དག་གི་དབང་ཤུགས་ཆེ་བའི་ཚན་རིག་པ་དང་། ཚོང་པ། ཆབ་སྲིད་པ་རྣམས་གཡོ་ཐབས་འདྲ་མིན་གྱིས་བསླུས་ནས་རྒྱལ་ཁབ་དེ་དག་གི་ཆབ་དཔལ་རིག་གསུམ་གྱི་ལག་རྩལ་དང་ཤེས་བྱ་རྣམས་རྐུ་འཁྱེར་བྱེད་བཞིན་པའི་གནས་ཚུལ་དེ་ཇེ་གསལ་དུ་འགྱུར་བཞིན་ཡོད་པས། ཨ་རིས་གཙོས་པའི་ཡར་ཐོན་ཅན་གྱི་རྒྱལ་ཁབ་མང་པོ་ཞིག་གིས་རྒྱ་ནག་གི་གསང་ཉུལ་དང་། རྒྱ་ནག་དང་གསང་འབྲེལ་ཡོད་པའི་གནད་ཡོད་མི་སྣ་རྣམས་ལ་དོགས་ཟོན་དང་ཞིབ་འཇུག་ནན་པོ་བྱེད་ཀྱི་ཡོད་འདུག ། 

གསར་འགོད་པ་དཀོན་མཆོག་རབ་བརྟན།