ཨ་རིའི་ལོ་རྒྱུས་ནང་གི་བུད་མེད་སྲིད་འཛིན་འོས་མི་དང་པོ།

ལྕམ་ཧི་ལ་རཱི་ཁེ་ལེན་ཊོན་ཨ་རིའི་མང་གཙོ་ཚོགས་པའི་ཕྱི་ལོ་༢༠༡༦ ལོའི་སྲིད་འཛིན་འོས་མིར་འདེམས་ཐོན་བྱུང་འདུག་པས། མོ་རང་ཨ་རིའི་ལོ་རྒྱུས་ནང་ཆབ་སྲིད་ཚོགས་པ་ཆེ་བ་ཞིག་གི་སྲིད་འཛིན་འོས་མིར་བུད་མེད་འདེམས་ཐོན་བྱུང་བ་དང་པོ་དེ་ཆགས་ཡོད་པ་རེད་འདུག

དེ་ཡང་ཟླ་འདིའི་ཚེས་༢༥ ནས་༢༨ བར་ཨ་རི་མང་གཙོ་ཚོགས་པའི་ཚོགས་ཆེན་དེ་འཚོགས་ཡོད་པ་དང་། དེ་གར་ཨ་རིའི་མངའ་སྡེ་ཡོངས་ནས་མང་གཙོ་ཚོགས་པའི་ཚོགས་མི་རྣམས་ཀྱི་སྐུ་ཚབ་༤༧༦༧ ཙམ་མཉམ་འཛོམས་ཐོག ཚོགས་པ་དེའི་སྲིད་འཛིན་འོས་མི་འོས་བསྡུ་བྱས་ཡོད་པ་རེད། འགྲན་ཞུགས་པ་ཞིག་འོས་མིར་ཐོབ་པར་ཉུང་མཐར་ལ་འོས་གྲངས་༢༣༨༢ རག་དགོས་ཀྱི་ཡོད་འདུག ཚེས་༢༦ ཉིན་འོས་བསྡུ་བྱས་ཏེ་ལྕམ་ཧི་ལ་རཱི་ལ་སྲིད་འཛིན་འོས་མིར་དགོས་ངེས་ཀྱི་འོས་གྲངས་༢༣༨༢ ལས་བརྒལ་ནས་ཚོགས་པ་དེའི་སྲིད་འཛིན་འོས་མིར་འདེམས་ཐོན་བྱུང་ཡོད་འདུག

ལྕམ་ཧི་ལ་རཱི་སྲིད་འཛིན་འོས་མིར་འདེམས་ཐོན་བྱུང་མ་ཐག སྐུ་ཞབས་བྷེ་ནིས་སེན་ཌེར་གྱི་རྒྱབ་སྐྱོར་བ་སྐུ་ཚབ་མང་པོ་ཞིག་གིས་ངོ་རྒོལ་བྱས་ཏེ་ཚོགས་ཁང་ལས་ཕྱིར་ཐོན་བྱས་ཡོད་འདུག མང་གཙོ་ཚོགས་པའི་ཚོགས་མིའི་བར་ལ་ཆིག་སྒྲིལ་ཡོང་ཐབས་སུ་སྐུ་ཞབས་བྷེ་ནིས་ཀྱིས་ཁོང་གི་རྒྱབ་སྐྱོར་བ་ཚོས་ལྕམ་ཧི་ལ་རཱི་ལ་རྒྱབ་སྐྱོར་བྱེད་དགོས་པའི་རེ་སྐུལ་མང་པོ་བྱས་ཡོད་ཀྱང་། ཁོང་གི་རྒྱབ་སྐྱོར་བ་མང་དག་ཅིག་གིས་མོ་རང་ལ་རྒྱབ་སྐྱོར་བྱེད་རྒྱུ་མིན་པའི་ངོ་རྒོལ་བྱས་ཡོད་པ་རེད།

བདུན་ཕྲག་གཅིག་གི་སྔོན་དུ་ཨ་རིའི་སྤྱི་མཐུན་ཚོགས་པའི་ཚོགས་ཆེན་འཚོགས་ཡོད་པ་དང་། སྐུ་ཞབས་ཌོ་ནལ་ཊེ་རམ་ལ་སྲིད་འཛིན་འོས་མིར་འདེམས་ཐོན་བྱུང་ཡོད་པ་རེད། མང་གཙོ་ཚོགས་པོའི་ཚོགས་མི་མཐོ་གྲས་མང་པོ་ཞིག་གིས་སྐུ་ཞབས་ཁོང་ལ་ཁ་གཏད་གཅོག་ཆེད་དུ། མང་གཙོ་ཚོགས་པའི་ཚོགས་མི་ཚང་མས་ཆིག་སྒྲིལ་ཐོག་ལྕམ་ཧི་ལ་རཱི་ལ་རྒྱབ་སྐྱོར་བྱེད་དགོས་པའི་རེ་སྐུལ་ཐེངས་མང་བྱས་ཡོད་ཀྱང་། ཚོགས་མི་མང་པོ་ཞིག་གིས་ཆབ་སྲིད་ཀྱི་ལངས་ཕྱོགས་ཁ་བསྒྱུར་བྱས་ནས། སྤྱི་མཐུན་ཚོགས་པར་རྒྱབ་སྐྱོར་བྱེད་རྒྱུ་ཡིན་སྐོར་བརྗོད་མཁན་མང་པོ་ཡོད་འདུག་ལ། སྲིད་ཛིན་འོས་བསྡུ་ལ་མཉམ་ཞུགས་བྱེད་རྒྱུ་མིན་པར་བརྗོད་མཁན་ཡང་མང་པོ་ཡོད་འདུག གལ་ཏེ་མང་གཙོ་ཚོགས་པའི་ཚོགས་མི་མང་པོ་ཞིག་གིས་སྤྱི་མཐུན་ཚོགས་པར་རྒྱབ་སྐྱོར་བྱས་པའམ་སྲིད་འཛིན་འོས་བསྡུའི་ནང་མཉམ་ཞུགས་མ་བྱས་ཚེ། སྤྱི་མཐུན་ཚོགས་པའི་སྲིད་འཛིན་འོས་མི་སྐུ་ཞབས་ཌོ་ནལ་ཊིར་རམ་ལ་སྲིད་འཛིན་འོས་ཐོབ་ཉེན་ཡོད་པས། དེས་སྐུ་ཞབས་ཁོང་གི་ལངས་ཕྱོགས་ལ་མི་དགའ་མཁན་མི་མང་དང་མང་གཙོ་ཚོགས་པའི་ཚོགས་མི་མཐོ་གྲས་མང་པོ་ཞིག་ལ་སེམས་འཚབ་ཆེན་པོ་ཡོད་འདུག

ལྕམ་ཧི་ལ་རཱི་ལ་མི་དགའ་བ་དང་ཡིད་ཆེས་མེད་པའི་རྣམ་འགྱུར་ཤུགས་ཆེན་སྟོན་དགོས་པའི་རྒྱུ་མཚན་གཙོ་བོ་ནི་མོ་རང་ལ་ཨ་རི་དང་འཛམ་གླིང་གི་ཚོང་ལས་སྡེ་ཚན་ཆེ་ཁག་མང་པོ་ཞིག་གིས་རྒྱབ་སྐྱོར་བྱེད་ཀྱི་ཡོད་པ་དང་། དེ་སྔོན་མོ་རང་ལ་ཨ་རིའི་གསང་བའི་ལས་ཁང་(FBI)གིས་ཞིབ་འཇུག་མང་པོ་བྱས་ཡོད་ཀྱང་། ནག་ཉེས་བཙུགས་མེད་པ་རེད། དེ་བཞིན་མོ་རང་གིས་དེ་སྔ་ཨ་རིའི་ཚོང་ལས་ཁག་མང་པོ་ཞིག་དང་ངན་འབྲེལ་ཐོག་ལྐོག་ཟ་རུལ་སུངས་བྱས་པའི་དོགས་གཞིའི་འོག་ཞིབ་འཇུག་བྱས་པ་མང་པོ་བྱུང་ཡོད་པ་རེད། མི་མང་ནང་མོ་རང་ནི་ཕྱུག་བདག་ཚོ་ཡི་བདེ་སྡུག་མ་གཏོགས། མི་མང་དཀྱུས་མའི་བདེ་སྡུག་ལ་ལས་ཀ་བྱེད་པའི་འདུན་པ་མེད་པར་ངོས་འཛིན་བྱེད་མཁན་མང་པོ་ཡོད་འདུག་པས། ཐེངས་འདིར་སྐུ་ཞབས་བྷེ་ནིས་ལ་མི་མང་གིས་ཡིད་ཆེས་ཆེན་པོ་བྱས་ཡོད་ཀྱང་། ཁོང་སྲིད་འཛིན་འོས་མིར་འདེམས་ཐོན་མ་བྱུང་བས། སེམས་ཕམ་བྱུང་མཁན་མང་པོ་ཡོད་འདུག

ཨ་རི་ནི་འཛམ་གླིང་ནང་སྟོབས་ཆེན་རྒྱལ་ཁབ་ཆེ་ཤོས་དེ་ཡིན་པས། ལུང་པ་དེའི་སྲིད་འཛིན་འོས་བསྡུ་ལ་ཕྱོགས་ཚང་མ་ནས་དོ་སྣང་དང་ལྐོག་ལ་ཤུགས་རྐྱེན་སྤྲོད་ཐབས་བྱེད་མཁན་མང་པོ་ཞིག་ཡོད་པ་རེད། ཨ་རིའི་སྲིད་འཛིན་འོས་མི་སུ་ཐོབ་དང་མ་ཐོབ་དེས། འབྱུང་འགྱུར་འཛམ་གླིང་གི་དཔལ་འབྱོར་དང་ཆབ་སྲིད་སོགས་ལ་ཤུགས་རྐྱེན་ཆེན་པོ་སྤྲོད་ཐུབ་ཀྱི་ཡོད་པ་རེད།

ཨ་རིའི་སྲིད་འཛིན་འོས་བསྡུའི་དངོས་གཞི་དེ་ནི་ཕྱི་ལོ་༢༠༡༦ ལོའི་ཟླ་༡༡ པའི་ཚེས་༨ ཉིན་བྱེད་རྒྱུ་ཡིན་འདུག །

གསར་འགོད་པ་སྐལ་བཟང་དོན་གྲུབ།