ཨ་རིའི་སྲིད་འཛིན་བྷ་ཌན་གྱིས་ཕྱི་མི་གནས་སྤོ་བ་འགོག་ཆེད་དུ་ཁྲིམས་གསར་པ་འགའ་ཤས་བཟོས་ཡོད་འདུག
ཨ་རི་དང་མེག་སི་ཁོའི་ས་མཚམས་བརྒྱུད་ནས་གནས་སྤོ་མཁན་མང་པོ་སླེབ་ཀྱི་ཡོད་འདུག་པས་ཨ་རིའི་གཞུང་གིས་དེ་འགོག་བྱེད་དུ་ཁྲིམས་གསར་པ་བཟོས་ཡོད་འདུག
ཟླ་འདིའི་ཚེས་༥ ཉིན་བྷི་བྷི་སི་ཡིས་གནས་ཚུལ་སྤེལ་གསལ་ལྟར་ན། རེས་གཟའ་མིག་དམར་གྱི་ཞོགས་པར་ཨ་རིིའི་གྲོང་སྡེའི་སྤྱི་ཁྱབ་ཚོའི་མདུན་དུ་ཨ་རི་དང་མེག་སི་ཁོའི་བར་གྱི་ས་མཚམས་ནས་གནས་སྤོ་མཁན་སླེབས་པ་རྣམས་བཀག་འགོག་བྱེད་ཆེད་དུ་ཨ་རིའི་སྲིད་འཛིན་བྷ་ཌན་གྱིས་བཀའ་ཁྱབ་གསར་པ་ཞིག་བཏང་ཡོད་འདུག་ལ། ས་མཚམས་ཀྱི་རྙོག་གྲ་དེའི་རྐྱེན་གྱིས་སྲིད་འཛིན་བྷ་ཌན་ལ་འོས་བསྡུའི་སྐབས་གྱོང་གུད་བྱུང་ཡོད་འདུག བཀའ་ཁྱབ་གསར་པ་དེའི་འོག་སྐྱབས་བཅོལ་གྱི་སྙན་ཞུ་མེད་པའི་ཐོག་ཨ་རིའི་ནང་ཁྲིམས་འགལ་གྱིས་གནས་སྤོ་བར་ཡོང་མཁན་རྣམས་ས་གནས་དཔོན་རིགས་ཚོས་ལམ་སེང་ཕྱིར་སློག་བྱེད་ཆོག་ཡོད་འདུག ཉིན་རེ་ཡི་མི་གྲངས་ཀྱི་ཚད་དེ་ལོན་པ་དང་། ས་མཚམས་ནས་མི་སླེབས་རྒྱུ་མང་དྲགས་ན་ཨ་རིའི་ཕོ་བྲང་དཀར་པོས་དེ་ལྟར་བྱེད་ཀྱི་ཡིན་ཞེས་བཤད་ཡོད་འདུག ཨ་རིས་གནས་སྤོ་དང་འབྲེལ་བའི་ཁྲིམས་གཞན་གསར་པ་མང་པོ་བཟོས་ཡོད་འདུག་པར་བརྟེན། གནས་སྤོ་བའི་ལས་འགུལ་སྤེལ་མཁན་རྣམས་ཀྱིས་དེ་ལ་སྐྱོན་འཛུགས་བྱས་ཡོད་འདུག National Immigration Forum གྱི་སྤྱི་ཁྱབ་འགན་འཛིན་གྱིས་བཤད་པ་ལྟར་ན། ཆབ་སྲིད་ཀྱི་དོན་དུ་གནས་སྤོ་དང་གནས་སྡོད་བྱེད་མཁན་རྣམས་བཀག་འགོག་བྱེད་ཀྱི་ཡོད་འདུག་ལ། སྲིད་འཛིན་བྷ་ཌན་གྱི་སྐབས་སུ་གནས་སྤོ་མཁན་མི་ས་ཡ་༦.༤ བཀག་ཡོད་འདུག ལོ་འདིའི་ནང་གནས་སྤོ་མཁན་ཉུང་དུ་ཕྱིན་ཡོད་འདུག་ཀྱང་། ཆེད་ལས་པ་ཚོས་མུ་མཐུད་ནས་དེ་ལྟར་ཡོང་རྒྱུ་ཁག་པོ་ཡིན་པར་བཤད་ཡོད་འདུག
རེས་གཟའ་མིག་དམར་གྱི་ཞོགས་པར་ཁྲིམས་རྩོད་པ་དང་མང་གཙོའི་ཁྲིམས་བཟོ་བ་བཅུ་གཉིས་ཙམ་ཞིག་གིས་ཨ་རིའི་གྲོས་ཚོགས་ཁང་གི་ཕྱི་ལོགས་སུ་གསར་འགོད་ལྷན་ཚོགས་ཤིག་བསྐོངས་ཏེ་སྲིད་འཛིན་བྷ་ཌན་ལ་སྐྱོན་བརྗོད་བྱས་ཡོད་འདུག Congressional Progressive Caucus གྱི་འགན་འཛིན་འཇའ་ཡ་པལ་Pramila Jayapal ཟེར་བ་ཡིས་འཛིན་སྐྱོང་གྱི་ཐག་གཅོད་དེར་མོ་རང་གི་སེམས་གཏིང་ནས་བློ་ཕམ་ཡོད་པ་དང་། ཁྲིམས་གསར་པ་དེ་ནི་ཁ་ཕྱོགས་ནོར་བ་ཞིག་ལ་གོམ་པ་སྤོས་པ་རེད་ཅེས་བཤད་ཡོད་འདུག
ཌོ་ནལ་ཊམ་གྱི་ལས་འགུལ་སྤེལ་མཁན་ཚོས། ད་ལན་གྱི་ཁྲིམས་གསར་པ་འདི་ནི་སྲིད་དོན་གྱི་ནག་ཉེས་གུ་ཡངས་ཆེད་དུ་ཡིན་པ་ལས། ས་མཚམས་སྲུང་སྐྱོབ་ཆེད་དུ་མ་ཡིན་ཞེས་བཤད་ཡོད་འདུག ཨ་རིའི་ཕོ་བྲང་དཀར་པོ་ཡིས། ལྷོ་ཕྱོགས་ཀྱི་ས་མཚམས་དེར་མི་ཧ་ཅང་མང་པོ་ཞིག་སླེབས་ནས་དུས་ཐོག་ཏུ་ཁོང་ཚོར་ལན་སྤྲོད་མ་ཐུབ་ཚེ། ཁྲིམས་གསར་པ་དེ་ཚོ་ལག་བསྟར་བྱེད་རྒྱུ་ཡིན་ཞེས་བཤད་ཡོད་འདུག རེས་གཟའ་མིག་དམར་ཉིན་ཁྲིམས་གསར་པ་གསལ་བསྒྲགས་བྱས་པ་དེའི་ནང་ནས་རེ་ཟུང་ཞིག་གིས་ཨ་རིའི་སྐྱབས་བཅོལ་བྱ་ཆོག་པའི་ཁྲིམས་༡༩༥༢ དེ་འགོག་གི་ཡོད་འདུག ཁྲིམས་༢༡༢ (f) ལྟར་ན་ཕྱི་མི་དེ་ལུང་པ་ལ་གནོད་འཚེ་བྱེད་མཁན་ཞིག་ཡིན་ན་ལུང་པའི་ནང་ཡོང་མི་ཆོག་པ་བཟོ་རྒྱུ་དེ་ཨ་རིའི་སྲིད་འཛིན་ལ་དབང་ཆ་ཡོད་འདུག སྲིད་འཛིན་ཟུར་པ་ཊམ་Trump གྱིས་འཛིན་སྐྱོང་བྱེད་པའི་སྐབས་སུ་ཁྲིམས་དེའི་འོག་ཁ་ཆེའི་ཡུལ་ནས་གནས་སྤོ་དང་འགྲུལ་བཞུད་བྱེད་མཁན་རྣམས་བཀག་ཡོད་པ་དང་། ཁྲིམས་འགལ་ཐོག་ནས་གནས་སྤོ་བྱེད་མཁན་རྣམས་སྐྱབས་བཅོལ་ཉེན་སྐྱོབ་ནས་བཀག་སྡོམ་བྱས་ཡོད་འདུག་ལ། དེའི་རྐྱེན་གྱིས་མི་ཚོས་སྲིད་འཛིན་ཊམ་ལ་མི་རིགས་འཐེན་འཁྱེར་བྱས་པའི་སྐྱོན་བརྗོད་བྱས་ཡོད་འདུག
ཉིན་ལྟར་སྐྱབས་བཅོལ་བ་༡༥༠༠ ཙམ་ཞིག་གཞུང་འབྲེལ་བརྒྱུད་ནས་འགྲོ་ཐབས་བྱེད་ཀྱི་ཡོད་འདུག་པ་དང་། བདུན་ཕྲག་གཅིག་ལ་ཆ་སྙོམ་མི་གྲངས་༢༥༠༠ ལས་བརྒལ་ན་ཁྲིམས་གསར་པ་དེ་ལག་བསྟར་བྱེད་རྒྱུ་ཡིན་འདུག བདག་པོ་མེད་པའི་བྱིས་པ་དང་། མི་ཉོ་ཚོང་གི་འོག་ཏུ་ཚུད་པ་རྣམས་ལ་དམིགས་བསལ་གྱི་ཆག་ཡངས་ཡོད་འདུག
གསར་འགོད་པ། བསྟན་འཛིན་གཡང་འཛོམ།
