ཨ་རིའི་སྲིད་འཛིན་བྷ་ཌན་གྱིས་༧གོང་ས་མཆོག་ལ་མཇལ་འཕྲད་བྱེད་མིན་ཀུན་གྱིས་དོ་སྣང་བྱེད་ས་ཞིག་ཏུ་གྱུར།
ཟླ་འདིའི་ཚེས་༡༤ ་ཉིན་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་སྤེལ་གསལ་ལྟར་ན། ཨ་རིའི་ཆབ་སྲིད་ཚོགས་པ་གཉིས་ཀྱི་གྲོས་ཚོགས་འཐུས་མི་ལས་གྲུབ་པའི་སྐུ་ཚབ་ཚོགས་པ་ཞིག་བཞུགས་སྒར་དྷ་སར་ཕེབས་ནས་༧གོང་ས་མཆོག་ལ་མཇལ་འཕྲད་གནང་རྒྱུ་རེད་འདུག
ཨ་རིའི་སྤྱི་མཐུན་ཚོགས་པའི་གྲོས་ཚོགས་འཐུས་མི་མ་ཧི་ཀལ་མེག་ཀོལ་(Michael McCaul)་གྱི་སྣེ་ཁྲིད་འོག ཆབ་སྲིད་ཚོགས་པ་གཉིས་ཀྱི་གྲོས་ཚོགས་འཐུས་མི་ལས་གྲུབ་པའི་སྐུ་ཚབ་ཚོགས་ཆུང་ཞིག་ཟླ་འདིའི་ཚེས་༡༨ ནས་༡༩ བར་བཞུགས་སྒར་དྷ་སར་ཕེབས་ནས་༧གོང་ས་མཆོག་དང་མཇལ་འཕྲད་གནང་རྒྱུ་རེད་འདུག ཐེངས་འདིའི་སྐུ་ཚབ་ཚོགས་ཆུང་གི་ནང་དུ་ཨ་རིའི་གྲོས་ཚོགས་འོག་མའི་ཚོགས་གཙོ་ཟུར་པ་ལྕམ་སྐུ་ནེན་སི་པི་ལོ་སི་ཡང་ཚུད་ཡོད་འདུག
ཉེ་ཆར་དགའ་ལྡན་ཕོ་བྲང་ཡིག་ཚང་ནས་༧གོང་ས་མཆོག་རིང་མིན་ཨ་རིར་ཞབས་པུས་སྨན་བཅོས་ཆེད་ཆིབས་བསྒྱུར་བསྐྱང་གཏན་འཁེལ་བས། ཕྱི་ཟླ་༦ ཚེས་༢༠ ནས་བཟུང་ཕྱིར་བཞུགས་སྒར་དུ་ཞབས་སོར་མ་འཁོད་བར་མཇལ་ཁ་སོགས་མཛད་འཆར་རིགས་ངང་འཐེན་གནང་ཡོད་པའི་གསལ་བསྒྲགས་སྤེལ་ཡོད་པ་བཞིན། ཐེངས་འདིའི་སྐུ་ཚབ་ཚོགས་ཆུང་གི་མཇལ་འཕྲད་དེ་ནི་༧གོང་ས་མཆོག་ཨ་རིར་མ་ཕེབས་གོང་དུ་གནང་རྒྱུ་ཡིན་འདུག
ཨ་རྒྱ་གཉིས་ཀྱི་འགྲན་རྩོད་ཉིན་རེ་བཞིན་ཇེ་ཆེར་འགྲོ་བཞིན་པའི་སྐབས་དེར། ཨ་རི་དང་རྒྱ་གར་གཉིས་ཀྱི་འབྲེལ་ལམ་ཟབ་ཏུ་གཏོང་ཆེད་ཨ་རིའི་སྲིད་འཛིན་ལས་ཁུངས་ཀྱི་རྒྱལ་ཁབ་བདེ་འཇགས་སློབ་སྟོན་པ་(Jake Sullivan) ་དང་དྲུང་ཆེ་གཞོན་པ་(kurt Campbell) ་གཉིས་རྒྱ་གར་དུ་འཚམས་གཟིགས་སུ་ཕེབས་རྒྱུ་དང་། ཨ་རིའི་སྐུ་ཚབ་ཚོགས་པ་ཞིག་༧གོང་ས་མཆོག་མཇལ་ཁར་བཅར་བ་གཉིས་དུས་མཉམ་ཁེལ་ཡོད་འདུག
དེ་སྔ་༧གོང་ས་མཆོག་ཨ་རི་ལ་ཕེབས་སྐབས་ཨ་རིའི་སྲིད་འཛིན་དང་ཆེས་མཐོའི་འགོ་ཁྲིད་ཁག་ཅིག་དང་མཇལ་འཕྲད་གནང་ཡོད་ཀྱང་། ཕྱི་ལོ་༢༠༢༡ ལོར་སྲིད་འཛིན་བྷ་ཌན་སྲིད་སྟེགས་ཐོག་བསླེབས་པ་ནས་བཟུང་༧གོང་ས་མཆོག་ལ་མཇལ་འཕྲད་གནང་མེད་པ་རེད།
ཕྱི་ལོ་༢༠༢༠ ལོར་ལས་ཐོག་སྲིད་འཛིན་བྷ་ཌན་སྲིད་འཛིན་གྱི་འོས་མི་ཡིན་པའི་སྐབས་སུ། ཁོང་གིས་སྲིད་འཛིན་ཊོམ་ཕུ་ནི་འདས་པའི་ལོ་ངོ་སུམ་ཅུའི་རིང་༧གོང་ས་མཆོག་དང་མཇལ་འཕྲད་མ་གནང་མཁན་ནམ། བཀའ་མོལ་མ་གནང་མཁན་གྱི་སྲིད་འཛིན་གཅིག་པུ་དེ་ཡིན་པས་ཞབས་འདྲེན་རེད་ཅེས་སྐབས་དེར་ལས་ཐོག་སྲིད་འཛིན་ཊོམ་ཕུ་ལ་སྐྱོན་བརྗོད་བྱས་ཡོད་འདུག
༧གོང་ས་མཆོག་ཨ་རིར་ཕེབས་ལ་ཉེ་བས་ཕྱི་ལོ་༢༠༢༠ ལོར་སྲིད་འཛིན་བྷ་ཌན་གྱིས་༧གོང་ས་མཆོག་དང་མཇལ་རྒྱུ་ཡིན་ཞེས་བརྗོད་པར་ལྟར། མཇལ་འཕྲད་གནང་རྒྱུ་ཡིན་མིན་ནི་ཀུན་གྱིས་དོ་སྣང་བྱེད་ས་ཞིག་ཆགས་ཡོད་འདུག
རྒྱ་ནག་ལྷོ་ཕྱོགས་ཀྱི་ཞོགས་པའི་གསར་འཕྲིན་ཐོག་ད་ལྟའི་ཆར་ཨ་རྒྱ་གཉིས་ཀྱིས་ཕྱོགས་གཉིས་ཀྱི་བར་འབྲེལ་ལམ་བརྟན་པོ་ཡོང་ཐབས་སུ་འབད་པ་བྱེད་བཞིན་པའི་དུས་སྐབས་སུ། ༧གོང་ས་མཆོག་མཇལ་འཕྲད་གནང་བ་སོགས་ཀྱི་ལས་དོན་གྱིས་རྒྱ་གཞུང་ལ་ཁོང་ཁྲོ་སློང་སྲིད་པ་རེད་ཅེས་བཀོད་འདུག།།
གསར་འགོད་པ། བློ་བཟང་རྒྱ་མཚོ།
