ཨ་རིའི་སྲིད་འཛིན་ཡུ་རོབ་ཏུ་བསྐྱོད་རྒྱུ་རེད་འདུག

ཟླ་འདིའི་ཚེས་༢༡ ཉིན་རྒྱ་གར་གྱི་དུས་བབ་གསར་ཁང་གིས་གནས་ཚུལ་སྤེལ་གསལ་ལྟར་ན། ཨ་རིའི་སྲིད་འཛིན་བྷ་ཌན་བདུན་ཕྲག་འདིའི་ནང་དུ་པོ་ལན་ཊི་རྒྱལ་ཁབ་ཏུ་ཕེབས་རྒྱུ་དང་། དེ་ནས་རྒྱལ་ས་Brussels ཕྱིན་ནས་བྱང་ཆིངས་རྩ་འཛུགས་ཀྱི་དབུ་ཁྲིད་ཚོ་དང་འཇལ་འཕྲད་བྱེད་རྒྱུ་རེད་འདུག

ཕོ་བྲང་དཀར་པོ་ནས་བརྗོད་གསལ་ལ། ཨ་རི་དང་པོ་ལན་ཊི་ཕྱོགས་གཉིས་ཀྱི་སྲིད་འཛིན་གཉིས་འཇལ་ཕྲད་ཐོག་ཡུག་རེེན་ནང་འབྱུང་བཞིན་པའི་དམག་འཁྲུག་གིས་བསྐྲུན་པའི་འགྲོ་བ་མིའི་བདེ་རྩ་དང་འགྲོ་བ་མིའི་ཐོབ་ཐང་གི་དཀའ་རྙོག་ཐོག་ཨ་རི་དང་ཨ་རིའི་མཐུན་ཕྱོགས་རྒྱལ་ཁབ་དག་གིས་ཡ་ལན་ཇི་ལྟར་བྱེད་དགོས་པའི་ཐོག་ལ་གྲོས་བསྡུར་བྱེད་རྒྱུ་ཡིན་པར་བརྗོད་འདུག

རྒྱ་གར་གྱི་དུས་བབ་གསར་ཁང་གིས་ཚེས་༢༢ ཉིན་གནས་ཚུལ་སྤེལ་གསལ་ལ་བལྟས་ན། ཁ་སང་རེས་གཟའ་ཟླ་བའི་ཉིན་ཨ་རི་སྲིད་འཛིན་བྷ་ཌན་གྱིས་ཨ་རིའི་མཐུན་ཕྱོགས་རྒྱལ་ཁབ་གཞན་དང་མི་འདྲ་བར་ཨུ་རུ་སུས་ཡུག་རེན་ལ་བཙན་འཛུལ་བྱེད་པའི་ཐོག་ལ་རྒྱ་གར་གྱི་ཡ་ལན་ནི་བརྟན་པོ་མི་འདུག་ཅེས་བརྗོད་ཡོད་འདུག དེ་བཞིན་ཨ་རི་སྲིད་འཛིན་བྷ་ཌན་གྱིས་ཨ་རིའི་འགོ་འཁྲིད་པའི་མཐུན་ཕྱོགས་མནའ་འབྲེལ་བྱང་ཆིངས་རྩ་འཛུགས་(NATO) དང་ཡུ་རོབ་མནའ་འབྲེལ། གཙོ་བོ་ཨེ་ཤི་ཡའི་ནང་གི་རོགས་ཟླ་སོགས་ཀྱིས་ཆིག་སྒྲིག་ཐོག་ཨུ་རུ་སུའི་སྲིད་འཛིན་པུ་ཊན་ལ་ཁ་གཏད་བཅག་པ་དེ་ལ་བསྔགས་བརྗོད་བྱེད་ཡོད་པ་ཡང་བཀོད་འདུག

QUAD ཞེས་པའི་ཚོགས་པའི་ནང་དུ་ཡོད་པའི་ཚོགས་མི་ཉི་ཧོང་དང་ཨོ་སི་ཁྲི་ལི་ཡ། ཨ་རི་བཅས་དང་མི་འདྲ་བ་རྒྱ་གར་གྱིས་མུ་མཐུད་དུ་ཨུ་རུ་སུའི་རྩ་ནས་སྣུམ་ཉོ་བཞིན་པ་དང་། མཉམ་འབྲེལ་རྒྱལ་ཁབ་ཏུ་ཡང་རྒྱ་གར་གྱིས་ཨུ་རུ་སུ་ལ་ཉེས་འཛུགས་བྱེད་རྒྱུའི་འོས་ཤོག་འཕེན་རྒྱུ་ལ་མཉམ་ཞུགས་བྱེད་རྒྱུའི་ཁས་ལེན་བྱས་མེད་པའི་གནས་ཚུལ་ཐོན་འདུག །