ཨ་རིའི་སྲིད་འཛིན་ལ་ཏོག་ནད་ཐོན་འདུག 

ཨ་རིའི་སྲིད་འཛིན་རྗོ་བྷའེ་ཌན་ལ་ཏོག་དབྱིབས་ནད་དུག་འཕོག་ཡོད་པའི་བརྟག་དཔྱད་གྲུབ་དོན་ཐོན་འདུག་ཀྱང་། ནད་རྟགས་ཚབས་ཆུང་ཡིན་འདུག་པས། ཟུར་བཀག་གནས་སྡོད་ཀྱིས་ལས་ཀ་མུ་མཐུད་བྱེད་བཞིན་ཡོད་འདུག 

དེ་ཡང་ཟླ་༧ པའི་ཚེས་༢༢ ཉིན་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་སྤེལ་གསལ། ཚེས་༢༡ ཉིན་རང་ལོ་༧༩ ཡིན་པའི་ཨ་རིའི་སྲིད་འཛིན་རྗོ་བྷའེ་ཌན་གྱིས་དྲ་ཐོག་བརྙན་ཐུང་ཞིག་སྤེལ་ནས། ཁོང་ལ་ཏོག་ནད་འཕོག་ཡོད་པའི་བརྟག་དཔྱད་གྲུབ་དོན་ཐོན་ཡོད་ཀྱང་། ནད་རྟགས་ཚབས་ཆུང་ཡིན་པས་ཟུར་བཀག་གནས་སྡོད་ཀྱིས་ལས་ཀ་མུ་མཐུད་བྱེད་བཞིན་ཡོད་པས། མི་མང་ཚོས་སེམས་ཁྲལ་བྱེད་དགོས་དོན་མེད་སྐོར་བརྗོད་འདུག 

ཨ་རིའི་གཞུང་གི་ཏོག་དབྱིབས་ནད་དུག་ལས་དོན་གྱི་འབྲེལ་མཐུད་པས་བརྗོད་དོན་ལ།སྲིད་འཛིན་ཁོང་གིས་ཏོག་དབྱིབས་ནད་དུག་སྔོན་འགོག་གི་སྨན་ཁབ་ཐེངས་གཉིས་བརྒྱབ་ཡོད་ཁར། ནུས་སྤོར་སྨན་ཁབ་ཐེངས་གཉིས་བརྒྱབ་ཟིན་ཡོད་པས།  ན་ཚ་ཚབས་ཆེན་ཡོང་རྒྱུའི་ཉེན་ཚབས་ཤིན་ཏུ་ཆུང་ཆུང་ཡིན་པ།  སྲིད་འཛིན་གྱིས་དབུགས་གཏོང་ལེན་ཡག་པོ་བྱེད་ཐུབ་ཀྱི་ཡོད་པའི་ཐོག  སྲོག་རླུང་གི་ཚད་གཞི་ཐོག་ལ་ཡང་སེམས་ཁྲལ་བྱེད་དགོས་པ་གང་ཡང་མེད་སྐོར་བརྗོད་འདུག 

སྲིད་འཛིན་ཁོང་ཏོག་དབྱིབས་ནད་དུག་ལས་དྲག་སྐྱེད་བྱུང་བའི་བརྟག་དཔྱད་གྲུབ་འབྲས་མ་ཐོན་བར་དུ། ཟུར་བཀག་གནས་སྡོད་བྱེད་རྒྱུ་ཡིན་འདུག་པས། ཉིན་ལྔ་ཡི་ཕྱོགས་སྐྱོད་ལས་རིམ་ཆ་ཚང་ཕྱིར་འཐེན་བྱས་ཡོད་འདུག 

ས་གནས་གཞན་དུ་ཕྱོགས་སྐྱོད་འགྲོ་བཞིན་ཡོད་པའི་སྲིད་འཛིན་གྱི་བཟའ་ཟླ་ལ་ཏོག་ནད་ཐོན་མེད་ཁར། སྲིད་འཛིན་གཞོན་པ་ལ་ཡང་ཏོག་དབྱིབས་ནད་དུག་ཐོན་མེད་འདུག །

གསར་འགོད་པ་སྐལ་བཟང་དོན་གྲུབ།