ཨ་རིས་ཏོག་དབྱིབས་ནད་འབུའི་འབྱུང་ཁུངས་གང་ཡིན་ཐག་ཆོད་མེད་འདུག

འཛམ་གླིང་མི་ཡང་ས་ཡ་༤ ལས་མང་བའི་ཚེ་སྲོག་བཅོམ་མཁན་ཏོག་དབྱིབས་ནད་འབུའི་འབྱུང་ཁུངས་ཐད་རྩོད་རྙོག་ཡོད་པ་དང་བསྟུན། ཐེངས་འདིར་ཨ་རིའི་གསང་བའི་ཚོགས་སྡེ་ཁག་གིས་ཞིབ་འཇུག་གི་གྲུབ་དོན་ལ་ཏོག་དབྱིབས་ནད་འབུའི་འབྱུང་ཁུངས་གང་ཡིན་ཐག་ཆོད་གསལ་པོ་བྱེད་ཐུབ་མེད་པ་རེད། 

ཟླ་༨ པའི་ཚེས་༢༦ ཉིན་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་སྤེལ་གསལ། དེ་ཡང་ཕྱི་ལོ་༢༠༡༩ ལོའི་ཟླ་༡༡ པའི་ནང་རྒྱ་ནག་གི་གྲོང་ཁྱེར་ཝུ་ཧན་གྱི་ནད་འབུའི་བརྟག་དཔྱད་ཁང་གི་ཉམས་ཞིབ་པ་ཁག་ཅིག་ནད་པ་ཆགས་ནས་སྨན་ཁང་དུ་ལུས་ཡོད་པའི་གསང་བའི་གནས་ཚུལ་དེ་ལོ་གཉིས་ཙམ་རྗེས་ཕྱིར་ཐོན་རྗེས། ཟླ་༥ པའི་ནང་ཨ་རིའི་སྲིད་འཛིན་རྗོ་བྷའེ་ཌན་གྱིས་ཨ་རིའི་གསང་བའི་ཚོགས་སྡེ་ཁག་ལ་ཉིན་གྲངས་༩༠ ཡི་ནང་ཏོག་དབྱིབས་ནད་འབུའི་འབྱུང་ཁུངས་དང་འབྲེལ་བའི་གནས་ཚུལ་མཁོ་སྒྲུབ་དང་དཔྱད་ཞིབ་བྱས་ཏེ་ཞིབ་འཇུག་གི་སྙན་ཐོ་ཞིག་འདོན་དགོས་པའི་བཀའ་བཏང་བ་ལྟར། ཟླ་༨ པའི་ཚེས་༢༣ ཉིན་ཞིབ་འཇུག་གི་སྙན་ཐོ་དེ་སྲིད་འཛིན་རྗོ་བྷའེ་ཌན་ལ་སྤྲད་ཡོད་པ་དང་། ཉིན་ཤས་རྗེས་སྙན་ཐོ་དེའི་གསང་བ་མ་ཡིན་པའི་ཐོ་ཞིག་ཡོངས་གྲགས་བཟོ་རྒྱུ་ཡིན་འདུག 

བརྒྱུད་ལམ་ཁག་ཏུ་གནས་ཚུལ་སྤེལ་བར་གཞིགས་ན། ཨ་རིའི་གསང་བའི་ལས་ཁུངས་ཁག་གི་བར་དུ་ཏོག་དབྱིབས་ནད་འབུའི་འབྱུང་ཁུངས་ཐད་གཅིག་མཚུངས་ཀྱི་བསམ་བློ་བྱུང་ཐུབ་མེད་འདུག་པས། ནད་འབུའི་འབྱུང་ཁུངས་དེ་སྲོག་ཆགས་ནས་མི་ལ་འགོས་པ་ཡིན་ནམ། ཡང་ན་ཝུ་ཧན་གྱི་བརྟག་དཔྱད་ཁང་ནས་ཕྱིར་ཐོན་ཡིན་མིན་ཐད་ཐག་གཅོད་གསལ་པོ་བྱེད་ཐུབ་མེད་འདུག 

རྒྱ་ནག་གི་ཕྱི་སྲིད་བློན་ཆེན་ཝང་ཡཱི་ཡིས་སྙན་ཐོ་དེ་ནི་ཚན་རིག་དང་མཐུན་གྱི་མེད་པ་དང་། ཨ་རིས་འཛམ་གླིང་འཕྲོད་བསྟེན་ལྷན་ཚོགས་ཀྱི་ཞིབ་འཇུག་སྙན་ཐོ་སྣང་མེད་བཏང་ནས། སོ་སོའི་ཆབ་སྲིད་ཀྱི་དགོས་མཁོ་སྒྲུབ་པའི་སྙན་ཐོ་ཞིག་བཏོན་ཡོད་པ་དང། དེ་ལས་ཨ་རིས་འཛམ་གླིང་འཕྲོད་བསྟེན་ལྷན་ཚོགས་དེ་ཨ་རིའི་ནང་དུ་དེ་སྔོན་ནད་འབུ་བརྟག་དཔྱད་ཁང་(Fort Detrick) ལ་ཞིབ་འཇུག་བྱེད་ཆེད་དུ་སྐད་བཏང་དགོས་སྐོར་བརྗོད་འདུག རྒྱ་ནག་གཞུང་གིས་རྒྱ་ནག་ནང་དུ་ཏོག་དབྱིབས་ནད་འབུ་འབྱུང་ཁུངས་ནི་ཨ་རིའི་བརྟག་དཔྱད་ཁང་དེ་ཡིན་པའི་གནས་ཚུལ་དྲིལ་བསྒྲགས་ཆེན་པོ་བྱེད་བཞིན་ཡོད་པ་རེད།

འདི་ལོའི་ཟླ་༢ པའི་ནང་འཛམ་གླིང་འཕྲོད་བསྟེན་ལྷན་ཚོགས་ཀྱི་ཏོག་དབྱིབས་ནད་དུག་འབྱུང་ཁུངས་དཔྱད་ཞིབ་བྱེད་པའི་རིམ་པ་དང་པོ་མཇུག་བསྒྲིལ་ཡོད་པ་དང་། གྲུབ་དོན་དུ་ཏོག་དབྱིབས་ནད་དུག་གི་འབྱུང་ཁུངས་དེ་བརྟག་དཔྱད་ཁང་མིན་པའི་ངེས་པ་ཆེན་པོ་ཡོད་སྐོར་བརྗོད་ཡོད་པ་རེད་དེ། ཟླ་༧ པའི་ཚེས་༡༥ ཉིན་འཛམ་གླིང་འཕྲོད་བསྟེན་ལྷན་ཚོགས་ཀྱི་ཚོགས་གཙོས་རྒྱ་ནག་ལ་ཕྱི་གསལ་ནང་གསལ་དང་གནས་ཚུལ་དཔྱད་ཞིབ་ཆེད་དུ་མཐུན་འགྱུར་ཡག་ཏུ་གཏོང་དགོས་སྐོར་བརྗོད་ནས། དཔྱད་ཞིབ་རིམ་པ་དང་པོའི་སྐབས་སུ་ཏོག་དབྱིབས་ནད་དུག་ཁྱབ་གདལ་འགོ་མ་བཙུགས་ཙམ་གྱི་སྔོན་དང་འགོ་འཛུགས་བྱས་པའི་སྐབས་ཀྱི་ནད་པའི་གནས་ཚུལ་བཅོས་འགྱུར་མ་བྱས་པའི་ཐོག་མ་རྣམས་རྒྱ་ནག་གིས་མཁོ་སྤྲོད་བྱས་མེད་པས། དཔྱད་ཞིབ་རིམ་པ་གཉིས་པའི་སྐབས་སུ་གནས་ཚུལ་དེ་རྣམས་མཁོ་སྤྲོད་དགོས་པ། དེ་བཞིན་ཝུ་ཧན་གྲོང་ཁྱེར་ནང་གི་ནད་འབུ་བརྟག་དཔྱད་ཁང་གི་གནས་ཚུལ་གསལ་པོ་མཁོ་སྤྲོ་དགོས་པ་དང་། རང་ཉིད་འཕྲོད་བསྟེན་ཆེད་ལས་པ་ཞིག་ཡིན་པའི་ཆ་ནས། ནོར་འཁྲུལ་རིགས་ཤོར་རྒྱུ་ཡོད་པ་ཤེས་ཀྱི་ཡོད་སྐོར་བརྗོད་ཡོད་པ་རེད། 

འོན་ཀྱང་རྒྱ་ནག་གཞུང་གིས་འཛམ་གླིང་འཕྲོད་བསྟེན་ལྷན་ཚོགས་ཀྱིས་ཏོག་དབྱིབས་ནད་དུག་གི་འབྱུང་ཁུངས་རྩད་གཅོད་བྱེད་མཁན་ཆེད་ལས་པའི་རུ་ཁག ལོ་འདིའི་འགོ་སྟོད་དུ་ཞིབ་འཇུག་བྱས་ཟིན་པའི་ཝུ་ཧན་གྱི་ས་ཚིགས་ཁག་ཏུ་བསྐྱར་དུ་ཡོང་རྒྱུ་དང་། ཏོག་དབྱིབས་ནད་དུག་དེ་ཐོག་མར་ཝུ་ཧན་གྱི་བརྟག་དཔྱད་ཁང་ནས་ཐོན་ཡིན་སྲིད་པའི་བསམ་ཚུལ་ལ་ཞིབ་འཇུག་བྱེད་འཆར་ཡོད་པ་དེར་ཧང་སངས་ཡོད་པ་དང་། ལས་དོན་དེ་ནི་ཚན་རིག་དང་མཐུན་གྱི་མེད་པ། ཝུ་ཧན་ནང་དུ་ཏོག་དབྱིབས་ནད་དུག་ཐོག་མར་མ་ཐོན་པའི་སྔོན་དུ། ཉམས་ཞིབ་པ་གསུམ་ལ་ཏོག་ནད་འགོས་ཡོད་པའི་གནས་ཚུལ་དེ་ནི་བདེན་པ་མིན་པ། འཛམ་གླིང་འཕྲོད་བསྟེན་ལྷན་ཚོགས་ཀྱིས་སེམས་ཅན་ནས་མི་ལ་ཏོག་ནད་འགོས་ཡོད་པའི་བསམ་ཚུལ་ལ་དོ་སྣང་ཆེ་ཙམ་དང་། ཞིབ་འཇུག་དེ་རྒྱལ་སྤྱིའི་རྒྱལ་ཁབ་གཞན་དུ་ཡང་རྒྱ་སྐྱེད་བྱེད་དགོས་སྐོར་བརྗོད་ནས། འཛམ་གླིང་འཕྲོད་བསྟེན་ལྷན་ཚོགས་ཀྱི་དགོས་འདུན་ངོས་ལེན་བྱས་མེད་པ་རེད།

ཚན་རིག་པ་ཁག་ཅིག་གིས་བརྗོད་དོན་ལྟར་ན། ཏོག་དབྱིབས་ནད་འབུའི་འབྱུང་ཁུངས་དེ་ཐག་གཅོད་བརྟན་པོ་ཞིག་བྱེད་ཐུབ་པར། ཞིབ་འཇུག་ལོ་མང་རིང་བྱེད་དགོས་ཁེལ་སྲིད་པ་རེད་འདུག །

གསར་འགོད་པ་སྐལ་བཟང་དོན་གྲུབ།