ཨ་རིས་ཐའེ་ཝན་དོན་གཅོད་ཁང་གི་མིང་སྒྱུར་བའི་གླེང་སློང་བྱེད་བཞིན་པར་རྒྱ་ནག་གིས་ངོ་རྒོལ་ཤུགས་ཆེན་བྱས་འདུག 

རྒྱ་ནག་གི་གཞུང་འབྲེལ་གསར་ཁང་གོ་ལའི་དུས་བབ་(Global Times) ཀྱིས་གལ་སྲིད་བྷ་ཌན་སྲིད་གཞུང་གིས་ཐའེ་ཝན་དོན་གཅོད་ཁང་གི་མིང་བརྗེ་སྒྱུར་བྱས་ནས་“ཐའེ་ཝན་”ཞེས་པའི་ཚིག་བཞག་པ་ཡིན་ན། “དྲག་པོའི་དམག་”གི་ཡ་ལན་སྟེར་རྒྱུ་ཡིན་པའི་འཇིགས་སྐུལ་བྱས་ཡོད་འདུག 

ཉིན་ཤས་གོང་དུ་རྒྱལ་སྤྱིའི་བརྒྱུད་ལམ་ཁག་ནས་བྷ་ཌན་སྲིད་གཞུང་གིས་ཐའེ་ཝན་གྱི་སྐུ་ཚབ་ཚོའི་རེ་སྐུལ་ལྟར་རྒྱལ་ས་ཝ་ཤིན་ཏྲོན་དུ་ཡོད་པའི་ཐའེ་ཝན་གྱི་སྐུ་ཚབ་དོན་གཅོད་ཁང་གི་མིང་དེ། “ཐའེ་བྷའི་དཔལ་འབྱོར་དང་རིག་གཞུང་སྐུ་ཚབ་དོན་གཅོད་ཁང་”ནས་“ཐའེ་ཝན་སྐུ་ཚབ་དོན་གཅོད་ཁང་”དུ་སྒྱུར་རྒྱུའི་བསམ་གཞིགས་ནན་པོ་བྱེད་ཀྱི་ཡོད་པའི་གནས་ཚུལ་སྤེལ་རྗེས། རྒྱ་ནག་གི་གཞུང་འབྲེལ་གསར་ཁང་གོ་ལའི་དུས་བབ་ཀྱིས་རྩོམ་སྒྲིག་པའི་ཆེད་བརྗོད་ཅིག་སྤེལ་ནས། གལ་སྲིད་ཨ་རིས་འཆར་གཞི་ལག་བསྟར་གྱིས་ཐའེ་ཝན་དོན་གཅོད་ཁང་གི་མིང་བརྗེས་པ་ཡིན་ན། རྒྱ་ནག་གིས་དཔལ་འབྱོར་དང་དམག་གི་ཡ་ལན་སྤྲོད་རྒྱུ་ཡིན་པའི་འཇིགས་སྐུལ་བྱས་འདུག 

གོ་ལའི་དུས་བབ་ཀྱི་རྩོམ་སྒྲིག་པའི་གཏམ་དེའི་ནང་དུ། ཨ་རིས་དེ་ལྟར་མིང་བརྗེ་སྒྱུར་བྱས་པ་ཡིན། དེ་ནི་“རྒྱ་ནག་གཅིག་”གི་སྲིད་བྱུས་རྒྱབ་ཏུ་བསྐྱུར་བ་ཞིག་ཡིན་སྐོར་བརྗོད་པའི་ཐོག དེའི་ཤུགས་རྐྱེན་ལ་བརྟེན་ནས་རྒྱལ་ཁབ་གཞན་རྣམས་ཀྱིས་ཀྱང་སོ་སོའི་ཡུལ་དུ་ཡོད་པའི་ཐའེ་ཝན་སྐུ་ཚབ་དོན་གཅོད་ཁང་གི་མིང་བརྗེ་བའི་ཉེན་ཁ་ཡོད་ཚུལ་ཡང་བཤད་ཡོད་འདུག 

གཞན་ཡང་། རྩོམ་སྒྲིག་པའི་གཏམ་དེའི་ནང་དུ། རྒྱ་ནག་གིས་ཉེ་ཆར་ཐི་ནི་ཡ་(Lithuania) ལ་སྤྲད་པའི་ཡ་ལན་ལྟར། ཨ་རིར་ཡོད་པའི་རྒྱ་ནག་གི་གཞུང་ཚབ་པ་ཕྱིར་འཐེན་བྱེད་ངེས་པ་མ་ཟད། “ཨ་རིའི་ཁེངས་དྲེགས་འཇོམས་ཆེད་དཔལ་འབྱོར་དང་དམག་གི་ཡ་ལན་དྲག་པོ་སྤྲོད་”ངེས་ཚུལ་ཡང་བརྗོད་ཡོད་འདུག

ཟླ་གོང་མར་ཡུ་རོབ་གླིང་ཆེན་གྱི་རྒྱལ་ཁབ་ལི་ཐི་ནི་ཡས་སོ་སོའི་རྒྱལ་ཁབ་ནང་དུ་ཐའེ་ཝན་རང་གི་མིང་ཐོག་ནས་གཞུང་ཚབ་ཁང་ཞིག་གསར་འཛུགས་བྱེད་དུ་བཅུག་པར་བརྟེན། རྒྱ་ནག་གིས་རྒྱལ་ཁབ་དེའི་ནང་དུ་ཡོད་པའི་གཞུང་ཚབ་ཕྱིར་འཐེན་བྱས་པ་མ་ཟད། ལི་ཐི་ནི་ཡའི་གཞུང་ཚབ་ཀྱང་པེ་ཅིང་ནས་ཕྱིར་འཐེན་དགོས་ཚུལ་བཤད་དེ་ད་ལྟ་རྒྱལ་ཁབ་གཉིས་ཀྱི་བར་དུ་འགལ་ཟླ་ཚབས་ཆེན་འབྱུང་བཞིན་པའི་སྒང་ཡིན། 

ད་ལྟའི་ཆར་ཐའེ་ཝན་དང་དངོས་སུ་གཞུང་འབྲེལ་ཡོད་པའི་རྒྱལ་ཁབ་༡༥ ལས་མེད་རུང་། ཐའེ་ཝན་དུ་རྒྱལ་ཁབ་མང་པོའི་སྐུ་ཚབ་དོན་གཅོད་ཁང་ཡོད་པ་དང་། དམར་ཤོག་རྒྱ་ནག་དང་མང་གཙོའི་འཛམ་གླིང་གཉིས་ཀྱི་བར་དུ་འགལ་ཟླ་ཤུགས་ཆེ་རུ་འགྲོ་བཞིན་པར་བརྟེན། ཐའེ་ཝན་གལ་གནད་དུ་མཐོང་ནས་ཐའེ་ཝན་ལ་རྒྱབ་སྐྱོར་བྱེད་མཁན་གྱི་རྒྱལ་ཁབ་ཇེ་མང་དུ་འགྱུར་བཞིན་ཡོད་འདུག། ། 

གསར་འགོད་པ་དཀོན་མཆོག་རབ་བརྟན།