ཨ་རིས་ཐེ་ཝན་ལ་ཨ་སྒོར་དུང་ཕྱུར་བཅུ་གཅིག་གི་གོ་མཚོན་ཕྱིར་ཚོང་བྱེད་འཆར།
ཟླ་འདིའི་ཚེས་༣༡ ཉིན་ཐའེ་པེ་དུས་བབ་གསར་ཁང་གིས་གནས་ཚུལ་སྤེལ་བ་ལྟར་ན། ཨ་རིས་ཐེ་ཝན་ལ་རྒྱབ་སྐྱོར་བྱ་རྒྱུའི་ཐད་ཨ་སྒོར་དུང་ཕྱུར་བཅུ་གཅིག་གི་འཕུར་མདེལ་དང་རྭ་ཌར་ (radar) ཕྱིར་ཚོང་བྱ་རྒྱུའི་གྲ་སྒྲིག་བྱེད་བཞིན་ཡོད་པ་མ་ཟད། དེ་ནི་ཉེ་བའི་ལོ་གཉིས་རིང་གོ་མཚོན་ནང་འདྲེན་བྱེད་ཆེ་ཤོས་ཡིན་སྐོར་བརྗོད་འདུག
ཉེ་བའི་ཆར་རྒྱ་ནག་གིས་ཐའེ་ཝན་གྱི་མཚོ་ཁ་དང་མཁའ་ལམ་བཅས་ལ་རྒྱ་ནག་གིས་ལྟ་ཞིབ་གནམ་གྲུ་ (Drone) བེད་སྤྱོད་བྱས་ནས་ཐེ་ཝན་གྱི་རྒྱལ་མཚམས་ས་ཐིག་(greyzone) ལས་བརྒལ་ཏེ་ཐའེ་ཝན་མངའ་ཁོངས་སུ་ནང་འཛུལ་བྱེད་བཞིན་ཡོད་པར་བརྟེན། དོན་རྐྱེན་དེ་དང་འབྲེལ་ནས་ཐེ་ཝན་གྱི་སྲིད་འཛིན་ཚེ་ཨིན་ཝིན་གྱིས་“ང་ཚོས་དམག་འཁྲུག་སློང་གི་མིན། ང་ཚོས་རང་ཉིད་ལ་ཚོད་འཛིན་བྱ་རྒྱུ་ཡིན། འོན་ཀྱང་དེའི་ཐོག་ནས་ང་ཚོས་ཕར་རྒོལ་གྱི་བྱ་ཐབས་སྤྱོད་མི་སྲིད་པ་མཚོན་གྱི་མེད”ཅེས་བརྗོད་ཡོད་པ་མ་ཟད། གལ་སྲིད་རྒྱ་ནག་གིས་ཐའེ་ཝན་མངའ་ཁོངས་སུ་འཛུལ་ཚེ་ཐེ་ཝན་གྱིས་རང་སྲུང་ཆེད་དམག་ཤུགས་ཡོད་ཚད་བེད་སྤྱོད་བྱས་ནས་ཕར་རྒོལ་བྱ་རྒྱུ་ཡིན་པའི་ཉེན་བརྡ་ཡང་བཏང་ཡོད་འདུག
གཞན་ཡང་ད་ལྟའི་ཆར་ཐའེ་ཝན་ལ་རྒྱ་ནག་གིས་བཙན་འཛུལ་བྱ་རྒྱུའི་ཉེན་ཁ་འཕྲད་བཞིན་པར་བརྟེན། ཨ་རིས་ཐའེ་ཝན་ལ་རང་སྲུང་བྱ་རྒྱུའི་ཐད་ཨ་སྒོར་ས་ཡ་༦༥༠ ཡིས་གོ་མཚོན་ཕྱིར་ཚོང་བྱས་པའི་ནང་དེ་སྔོན་བཙོང་པའི་ལྟ་ཞིབ་གོ་མཚོན་ (rader) ཚུད་ཡོད་པ་མ་ཟད། ཨ་སྒོར་ས་ཡ་༩༠ (Sidewinder air-to-air) ༡༠༠ ལྷག་ཙམ་གྱི་མཁའ་གཏད་འཕུར་མདེལ་དང་དམག་གྲུ་གཏོར་རྒོལ་གཏོང་ཆེད་ཀྱི་འཕུར་མདེལ་༦༠ ཡོད་སྐོར་ཨ་རིའི་གཞུང་འབྲེལ་ལས་བྱེད་པས་བརྗོད་ཡོད་འདུག
ཐེངས་འདིར་ཨ་རིས་ཐའེ་ཝན་ལ་གོ་མཚོན་ཕྱིར་ཚོང་བྱ་རྒྱུའི་ཐད་ཨ་རིའི་ཕོ་བྲང་དཀར་པོས་རྒྱལ་ཚོགས་ལ་དངོས་སུ་སྙན་སེང་ཞུས་རྗེས་ཡོངས་གྲགས་བྱ་རྒྱུ་ཡིན་སྐོར་ཨ་རིའི་རྒྱལ་སྲུང་ལྷན་ཁང་ནས་བརྗོད་ཡོད་པ་མ་ཟད། ད་ཐེངས་ཀྱི་ཕྱིར་ཚོང་དེ་ནི་ཕྱི་ལོ་༢༠༢༠ ལོའི་ཟླ་༡༠ པའི་ནང་ཨ་སྒོར་དུང་ཕྱུར་༢༤ ཡི་དམག་གྲུ་གཏོར་རྒོལ་གྱི་འཕུར་མདེལ་ཚུད་པའི་གོ་མཚོན་ཕྱིར་ཚོང་བྱས་པ་ཆེ་ཤོས་ཤིག་ཡིན་ལ། ཨ་རིའི་སྲིད་འཛིན་བྷེ་ཌན་གྱིས་སྲིད་དབང་བཟུང་བའི་རྗེས་ཀྱི་གོ་མཚོན་ཕྱིར་ཚོང་བྱེད་ཆེ་ཤོས་ཤིག་ཀྱང་ཡིན་འདུག
ཐེ་ཝན་གྱི་རྒྱལ་སྲུང་དང་བདེ་འཇགས་ཞིབ་འཇུག་པ་སྐུ་ཞབས་སུའུ་ཙེ་ཡུན་ (蘇紫雲)གྱིས་ཨ་རིའི་བསམ་ཚུལ་ལ་གཞིགས་ན། ཕྱི་ལོ་༢༠༢༧ གོང་ལ་རྒྱ་ནག་གིས་ཐའེ་ཝན་ལ་འཇབ་རྒོལ་བྱེད་སྲིད་པའི་ཚོད་དཔག་བྱེད་བཞིན་ཡོད་པས། ཐའེ་ཝན་གྱི་ཚད་གཞི་ངེས་ཅན་གྱི་རྒྱལ་སྲུང་སྔོན་རྩིས་ཀྱིས་དགོས་ངེས་ཀྱི་གོ་མཚོན་ཉོ་སྒྲུབ་ལ་རྒྱབ་སྐྱོར་བྱེད་ཐབས་མེད་སྟབས། དུས་ཐོག་ཏུ་བཀོད་སྒྲིག་བྱས་ནས་རྒྱ་ནག་གི་འཇིགས་སྐུལ་ཆུང་དུ་གཏོང་དགོས་སྐོར་བརྗོད་འདུག
དེ་བཞིན་ཟླ་འདིའི་ཚེས་༣ དང་ཚེས་༡༤ ཉིན་ཨ་རིའི་གྲོས་ཚོགས་གོང་འོག་གཉིས་ཀྱི་སྐུ་ཚབ་ཚོགས་ཆུང་ཐེངས་གཉིས་བསྟུད་མར་ཐའེ་ཝན་ནང་གཟིགས་སྐོར་དུ་ཕེབས་རྗེས། ཐའེ་ཝན་དང་རྒྱ་ནག་བར་གྱི་གནས་སྟངས་ཛ་དྲག་ཏུ་ཕྱིན་པ་མ་ཟད། རྒྱ་ནག་གིས་ཐའེ་ཝན་གྱི་མཚོ་ཁའི་ཉེ་འགྲམ་དུ་མེ་སྒྱོགས་དང་མེ་ཤུགས་འཕུར་མདའ་སོགས་འཕངས་ནས་དམག་སྦྱོང་བྱས་ཡོད་མ་ཟད། ཉེ་ལམ་རྒྱ་ནག་གི་གནམ་དམག་དང་མཚོ་དམག་སོགས་ཀྱིས་ཐའེ་ཝན་རྒྱལ་མཚམས་སུ་ཡང་ཡང་སུན་གཙེར་བཟོ་བཞིན་ཡོད་འདུག།།
གསར་འགོད་པ། ཆོས་གྲགས།
