ཨ་རིས་དངོས་སུ་གཞུང་འབྲེལ་ཐོག་ནས་༢༠༢༢ ལོའི་པེ་ཅིང་ཨོ་ལིམ་ཕིག་རྩེད་འགྲན་ཆེན་མོ་བཀག་སྡོམ་བྱེད་འཆར་ཡོད་འདུག 

ཨ་རིས་བདུན་ཕྲག་འདིའི་ནང་དུ་༢༠༢༢ ལོའི་པེ་ཅིང་ཨོ་ལིམ་ཕིག་རྩེད་འགྲན་ཆེན་མོ་གཞུང་འབྲེལ་ཐོག་ནས་བཀག་སྡོམ་(diplomatic boycott of Beijing Olympics) བྱེད་རྒྱུའི་གསལ་བསྒྲགས་སྤེལ་འཆར་ཡོད་འདུག 

ཟླ་འདིའི་ཚེས་༦ ཉིན་རྒྱལ་སྤྱིའི་བརྒྱུད་ལམ་ཁག་ནས་གནས་ཚུལ་སྤེལ་གསལ་ལྟར་ན། བྷ་ཌན་སྲིད་གཞུང་གིས་བདུན་ཕྲག་འདིའི་ནང་དུ་ཨ་རིའི་གཞུང་འབྲེལ་མི་སྣ་གཅིག་ཀྱང་༢༠༢༢ ལོའི་པེ་ཅིང་གི་དགུན་ཁའི་ཨོ་ལིམ་ཕིག་རྩེད་འགྲན་ཆེན་མོར་གཏོང་རྒྱུ་མིན་པའི་གསལ་བསྒྲགས་བྱེད་འཆར་ཡོད་འདུག་ཅིང་། དེ་ལ་བརྟེན་ནས་འཛམ་གླིང་གི་སྟོབས་ཆེན་རྒྱལ་ཁབ་ཨང་དང་པོ་དང་གཉིས་པའི་བར་དུ་འགལ་ཟླ་མུ་མཐུད་ཤུགས་ཆེ་རུ་འགྱུར་ངེས་རེད་འདུག 

ཨ་རིས་གཞུང་འབྲེལ་ཐོག་ནས་པེ་ཅིང་ཨོ་ལིམ་ཕིག་རྩེད་འགྲན་ཆེན་མོ་བཀག་སྡོམ་བྱེད་ཅེས་པའི་གོ་དོན་ནི། གཞུང་འབྲེལ་མི་སྣ་གཅིག་ཀྱང་གཞུང་འབྲེལ་ཐོག་ནས་པེ་ཅིང་ཨོ་ལིམ་ཕིག་རྩེད་འགྲན་ཆེན་མོའི་འགོ་འཛུགས་དང་མཇུག་བསྡུའི་མཛད་སྒོར་མངགས་གཏོང་མི་བྱེད་པ་དེ་ཡིན་འདུག་ཅིང་། དེ་ནི་གཙོ་བོས་རྒྱ་ནག་དང་འཛམ་གླིང་ལ་ཆབ་སྲིད་ཀྱི་བརྡ་ལན་སྤྲོད་ཆེད་ཙམ་ཡིན་འདུག་པས། ཨ་རིའི་རྩེད་འགྲན་པ་རྣམས་རྩེད་འགྲན་ཆེན་མོར་མཉམ་ཞུགས་བྱེད་ཆོག་གི་ཡོད་འདུག 

༢༠༢༢ ལོའི་དགུན་ཁའི་ཨོ་ལིམ་ཕིག་རྩེད་འགྲན་ཆེན་མོ་དེ་ལོ་རྗེས་མའི་ཕྱི་ཟླ་༢ པའི་འགོ་སྟོད་དུ་རྒྱ་ནག་གི་རྒྱལ་ས་པེ་ཅིང་དུ་འཚོགས་གཏན་འཁེལ་ཡོད་ཅིང་། དེ་ནི་༢༠༠༨ ལོའི་དབྱར་ཁའི་ཨོ་ལིམ་ཕིག་རྩེད་འགྲན་ཆེན་མོའི་རྗེས་སུ་རྒྱ་ནག་ཏུ་འཚོགས་གཏན་འཁེལ་བའི་རྒྱལ་སྤྱིའི་རྩེད་མོའི་འགྲན་བསྡུར་ཆེ་ཤོས་དེ་ཆགས་ཀྱི་ཡོད་འདུག

ཡིན་ན་ཡང་། ཨ་རིའི་གྲོས་ཚོགས་འོག་མའི་ཚོགས་གཙོ་ལྕམ་ནན་སི-ཕེ་ལོ་སེ་(Nancy Pelosi) ཡིས་གཙོས་པའི་ཆབ་སྲིད་ཚོགས་པ་གཉིས་ཀའི་འཐུས་མི་ཚོས། རྒྱ་ནག་གིས་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བཞིན་པར་ངོ་རྒོལ་བྱེད་ཆེད་རྩེད་འགྲན་ཆེན་མོ་དེ་བཀག་སྡོམ་བྱེད་དགོས་པའི་བསམ་ཚུལ་ཤུགས་ཆེན་བཏོན་པས། ཨ་རིའི་སྲིད་འཛིན་བྷ་ཌན་གྱིས་ཟླ་བ་གོང་མར་རྒྱལ་སྤྱིའི་རྩེད་འགྲན་ཆེན་མོ་དེ་གཞུང་འབྲེལ་ཐོག་ནས་བཀག་སྡོམ་བྱེད་དགོས་མིན་གྱི་བསམ་གཞིགས་གཏོང་བཞིན་པའི་སྒང་ཡིན་ཚུལ་གསུངས་ཡོད། 

ད་ལྟའི་ཆར་རྒྱ་ནག་དང་མང་གཙོའི་འཛམ་གླིང་གཉིས་ཀྱི་བར་དུ་འགལ་བ་ཇེ་དྲག་དང་ཇེ་མང་དུ་འགྱུར་བཞིན་ཡོད་སྟབས། ༢༠༢༢ ལོའི་པེ་ཅིང་ཨོ་ལིམ་ཕིག་རྩེད་འགྲན་ཆེན་མོ་གཞུང་འབྲེལ་ཐོག་ནས་བཀག་སྡོམ་བྱ་རྒྱུའི་འཆར་གཞི་འཐེན་མཁན་ཨ་རི་གཅིག་པུ་མ་ཡིན་པར། དབྱིན་ཇི་དང་། ཨོ་སི་ཁྲུ་ལི་ཡ། ཁེ་ན་ཌ་བཅས་ཀྱིས་ཀྱང་རྩེད་འགྲན་ཆེན་མོ་དེ་བཀག་སྡོམ་བྱེད་རྒྱུར་བསམ་གཞིགས་གཏོང་བཞིན་ཡོད་འདུག ། 

གསར་འགོད་པ་དཀོན་མཆོག་རབ་བརྟན།