ཨ་རིས་བྱང་ཀོ་རི་ཡར་འཁྲུག་སློང་གི་བྱ་སྤྱོད་རིགས་མཚམས་འཇོག་བྱེད་པའི་རེ་སྐུལ་བྱས་འདུག 

ཨ་རིའི་སྐུ་ཚབ་ཀྱིས་བྱང་ཀོ་རི་ཡ་ཡིས་མེ་ཤུགས་འཕུར་མདའ་ཚོད་ལྟ་དེའི་རིགས་མཚམས་འཇོག་བྱས་ཏེ། ཁུལ་དེའི་བརྟན་ལྷིང་ལ་ཉེན་ཚབས་མི་བཟོ་བ་དང་། དེ་ལས་གྲོས་མོལ་ལ་བསྐྱར་དུ་ཞུགས་དགོས་པའི་རེ་སྐུལ་བྱས་འདུག་ཀྱང་། བྱང་ཀོ་རི་ཡས་ཁས་ལེན་བྱས་མི་འདུག 

ཟླ་༡༠ པའི་ཚེས་༢༥ ཉིན་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་སྤེལ་གསལ། ཉེ་བའི་ཆར་ཨ་རིའི་བྱང་ཀོ་རི་ཡའི་ལས་དོན་ཐོག་གི་སྐུ་ཚབ་མཐོ་ཤོས་སུང་ཀེམ་གྱིས་ལྷོ་ཀོ་རི་ཡར་སླེབས་ནས། རྒྱལ་ཁབ་དེའི་འགོ་ཁྲིད་དང་ཐུག་འཕྲད་ཀྱིས་ཚོགས་འདུ་འཚོགས་འདུག ཚེས་༢༤ ཉིན་སྐུ་ཚབ་སུང་ཀེམ་གྱིས་གསར་འགོད་པ་ཚོར་བརྗོད་དོན་ལ། ཨ་རིས་བྱང་ཀོ་རི་ཡ་ཡིས་འཁྲུག་སློང་དང་བརྟན་ལྷིང་མེད་པར་བཟོ་བའི་མེ་ཤུགས་འཕུར་མདའི་ཚོད་ལྟ་དེ་རིགས་མཚམས་འཇོག་བྱས་ཏེ། གྲོས་མོལ་ལ་བསྐྱར་དུ་ཞུགས་པའི་རེ་སྐུལ་བྱེད་ཀྱི་ཡོད་པ་དང་། ཨ་རིས་བྱང་ཀོ་རི་ཡ་དང་ཆ་རྐྱེན་གང་ཡང་མེད་པའི་ཐོག་ནས་གྲོས་མོལ་བྱེད་རྒྱུར་གྲ་སྒྲིག་ཡོད་ཁར། བྱང་ཀོ་རི་ཡར་གནོད་འཚེ་བྱེད་པའི་ཀུན་སློང་གང་ཡང་མེད་པ་གསལ་པོ་བཟོས་ཟིན་སྐོར་བརྗོད་འདུག 

དེ་བཞིན་ཁོང་གིས་མེ་ཤུགས་འཕུར་མདའི་ཚོད་ལྟ་དེ་རིགས་ནི་སེམས་འཚབ་སྐྱེ་གཞི་ཡིན་ཁར། ཀོ་རི་ཡའི་མཚོ་གླིང་ཁུལ་དུ་ཞི་བདེ་རྒྱུན་གནས་ཐུབ་པའི་ལས་དོན་ལ་ལྡོག་ཕྱོགས་ཀྱི་ཤུགས་རྐྱེན་སྤྲོད་ཀྱི་ཡོད་སྐོར་བརྗོད་འདུག 

བདུན་ཕྲག་སྔོན་མའི་རེས་གཟའ་མིག་དམར་ཉིན་བྱང་ཀོ་རི་ཡས། མཚོ་འོག་གྲུ་གཟིངས་ནས་མེ་ཤུགས་འཕུར་མདའ་ཞིག་བཏང་ནས་ཚོད་ལྟ་བྱས་འདུག་པ་དང་། དེ་ནི་ཉེ་བའི་ཆར་རྒྱལ་ཁབ་དེས་མེ་ཤུགས་འཕུར་མདའ་ཚོད་ལྟ་བྱས་པ་ཐེངས་ལྔ་པ་ཆགས་ཀྱི་ཡོད་ཁར། ཕྱི་ལོ་༢༠༡༩ ལོ་ནས་ད་བར་མཚོ་འོག་ཏུ་མེ་ཤུགས་ཕུར་མདའ་ཚོད་ལྟ་བྱས་པ་ཐེངས་དང་པོ་ཆགས་ཀྱི་ཡོད་འདུག ལྷོ་ཀོ་རི་ཡས་མཚོ་འོག་མེ་ཤུགས་འཕུར་མདའ་དེ་ཡར་རྒྱས་གཏོང་དགོས་པའི་རིམ་པ་ལ་ཡོད་པ་ཤེས་རྟོགས་བྱུང་སྐོར་བརྗོད་འདུག གལ་ཏེ་མཚོ་འོག་གི་མེ་ཤུགས་འཕུར་མདའ་བཟོ་སྐྲུན་ལ་གྲུབ་འབྲས་ཐོན་ཚེ། གོ་མཚོན་དེ་རིགས་བཀོལ་སྤྱོད་བྱེད་སྐབས་ཕ་རོལ་དགྲ་བོས་སྔོན་ཚུད་ནས་ཤེས་རྟོགས་ཐུབ་རྒྱུ་ཁག་ཙམ་ཡོད་འདུག 

ཨ་རིའི་སྲིད་འཛིན་རྗོ་བྷའེ་ཌན་སྲིད་གཞུང་གིས་བྱང་ཀོ་རི་ཡ་དང་གྲོས་མོལ་བྱེད་འདོད་ཡོད་སྐོར་བརྗོད་ཡོད་ཀྱང་། ད་བར་བྱང་ཀོ་རི་ཡས་ཨ་རིའི་སྐད་ཆ་དེར་ངོས་ལེན་བྱས་མེད་པ་དང་། ཨ་རི་དང་ལྷོ་ཀོ་རི་ཡ་གཉིས་ཀྱིས་གྲོས་མོལ་སྐོར་བཤད་ཀྱི་ཡོད་ཀྱང་ཕྱོགས་གཉིས་བར་གྱི་དམག་སྦྱོང་བསྟུད་མར་བྱས་ནས་ཉེན་ཚབས་བཟོ་བཞིན་ཡོད་པའི་ཉེས་འཛུགས་བྱེད་ཀྱི་ཡོད་པས། ཐེངས་འདིར་བྱང་ཀོ་རི་ཡའི་མགྲིན་ཚབ་པས་བརྗོད་དོན་ལ། བྱང་ཀོ་རི་ཡའི་རང་སྲུང་གི་ལས་དོན་ལ་ཨ་རིས་ཡ་ལན་རྒྱུ་མཚན་དང་མི་མཐུན་པ་སྤྲད་ཡོད་པ་དང་། ཨ་རིས་རང་ངོས་ནས་གོ་མཚན་དེ་རིགས་བཟོ་སྐྲུན་དང་ཚོད་ལྟ་བྱས་ཟིན་པའམ་བྱེད་བཞིན་ཡོད་ཀྱང་། བྱང་ཀོ་རི་ཡས་དེ་ལྟར་བྱེད་པར་སྐྱོན་བརྗོད་བྱེད་པ་ནི་ཁ་ཞེ་མི་མཚུངས་པའི་བྱེད་ལས་ཡིན་པས། དེ་ནི་དོགས་པ་སྐྱེ་འོས་པ་ཞིག་དང་། གལ་ཏེ་ཨ་རི་བྱ་སྤྱོད་ནོར་བར་འཇུག་ཚེ་མཇུག་འབྲས་ཚབས་མྱོང་སྲིད་སྐོར་བརྗོད་འདུག 

ལྷོ་ཀོ་རི་ཡའི་རྡུལ་མཚོན་གྲོས་མོལ་གྱི་སྐུ་ཚབ་ཀྱིས། ཐེངས་འདིར་ཨ་རིའི་སྐུ་ཚབ་དང་ཐུག་འཕྲད་བྱས་ཏེ། ལྷོ་བྱང་ཀོ་རི་ཡ་གཉིས་བར་གྱི་དམག་འཁྲུག་གི་གནས་བབ་དེ་གཞུང་འབྲེལ་ནས་མཇུག་བསྒྲིལ་བ་ཡིན་པའི་གསལ་བསྒྲགས་བྱེད་ཐུབ་པ་ཡོང་རྒྱུའི་སྐོར་གྲོས་བསྡུར་ལྷུག་པོ་བྱས་སྐོར་བརྗོད་འདུག ལྷོ་ཀོ་རི་ཡས་གསལ་བསྒྲགས་དེ་ནི་ཕྱོགས་གཉིས་བར་གྲོས་མོལ་བྱེད་ཆེད་དུ་བཟང་ཕྱོགས་ཀྱི་རྣམ་འགྱུར་ཞིག་ལ་ངོས་འཛིན་བྱེད་བཞིན་འདུག །

གསར་འགོད་པ་སྐལ་བཟང་དོན་གྲུབ།