ཨ་རིས་འཇིགས་སྐུལ་ཚོགས་པར་དྲག་རྒོལ་བྱས་པའི་ཁྲོད་དུ་མི་མང་དཀྱུས་མའི་ཚེ་སྲོག་ཤོར་ཡོད་འདུག 

ཨ་རིས་བརྗོད་དོན་ལྟར་ན་ཨབ་གྷན་གྱི་གནམ་ཐང་དུ་འཇིགས་སྐུལ་རིང་ལུགས་པའི་དྲག་རྒོལ་ཆེན་པོ་ཞིག་བཀག་འགོག་ཆེད་དུ་གནམ་ཐོག་ནས་ཚོགས་པ་དེའི་རླངས་འཁོར་ལ་དྲག་རྒོལ་བྱས་ཡོད་འདུག འོན་ཀྱང་དྲག་རྒོལ་དེའི་ཁྲོད་མི་མང་དཀྱུས་མ་མང་པོ་ཞིག་གི་ཚེ་སྲོག་ཤོར་ཡོད་པ་རེད་འདུག 

ཟླ་༨ པའི་ཚེས་༣༠ ཉིན་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་སྤེལ་གསལ། ཚེས་༢༩ ཉིན་ཨབ་གྷ་ནི་སེ་ཐན་གྱི་རྒྱལ་ས་ཀ་བྷུལ་རྒྱལ་སྤྱིའི་གནམ་ཐང་ཉེ་འགྲམ་དུ། ཨ་རིའི་དམག་གིས་ཁ་ལོ་བ་མེད་པའི་གནམ་གྲུ་ཌེ་རོན་(Drone)ཞིག་བཏང་ནས། རླངས་འཁོར་ཞིག་ལ་གཏོར་རྒོལ་བྱས་པ་དང་མཉམ་དུ་ཁ་ཆེ་འཇིགས་སྐུལ་རིང་ལུགས་པའི་ཚོགས་མི་གཉིས་བསད་ཡོད་འདུག ཨ་རིས་བརྗོད་དོན་ལྟར་ན་རླངས་འཁོར་དེའི་ནང་འབར་རྫས་མང་པོ་བཞག་ཡོད་པ་དང་། འཇིགས་སྐུལ་རིང་ལུགས་པ་གཉིས་ཀྱིས་རླངས་འཁོར་དེ་གནམ་ཐང་དུ་ཨབ་གྷན་ནས་ཉེན་གཡོལ་འགྲོ་བཞིན་པའི་མི་ཚོགས་དཀྱིལ་དུ་བཏང་ནས། འབར་རྫས་གཏོར་འཆར་ཡོད་པས། དེ་བཀག་འགོག་ཆེད་དུ་རླངས་འཁོར་དེར་གཏོར་རྒོལ་བྱས་པ་ཡིན་སྐོར་བརྗོད་འདུག 

དེ་ཡང་རླངས་འཁོར་དེའི་ནང་དུ་འབར་རྫས་མང་པོ་ཡོད་པས་གཏོར་རྒོལ་ཁྲོད་དུ་འབར་རྫས་ཀྱི་གས་འཐོར་ཆེན་པོ་བྱུང་ནས། ཉེ་འཁོར་གྱི་མི་མང་དཀྱུས་མ་ཉུང་མཐར་༦ ཡི་ཚེ་སྲོག་ཤོར་ཡོད་པ་དང་། དེའི་ནང་ཕྲུ་གུ་ཁ་ཤས་ཀྱང་ཡོད་པ་རེད་འདུག 

ཚེས་༢༦ ཉིན་ཀ་བྷུལ་གྱི་གནམ་ཐང་དུ་ཁ་ཆེ་འཇིགས་སྐུལ་རིང་ལུགས་པས་འབར་རྫས་ཀྱི་དྲག་རྒོལ་བྱས་ཏེ། མི་གྲངས་༡༧༥ བསད་ཡོད་པ་དང་། དེའི་ནང་ཨ་རིའི་དམག་མི་༡༣ ཡོད་པ་རེད་འདུག ཨ་རིའི་གཞུང་གིས་དྲག་རྒོལ་དེ་སྤེལ་མཁན་འཇིགས་སྐུལ་ཚོགས་པ་དེར་རྒོལ་ལན་སློག་རྒྱུ་ཡིན་སྐོར་བརྗོད་ནས། ཚེས་༢༧ ཉིན་ཨབ་གྷན་གྱི་ཤར་ཕྱོགས་སུ་གནམ་ཐོག་ནས་དྲག་རྒོལ་བྱས་ནས། འཇིགས་སྐུལ་ཚོགས་པའི་ཚོགས་མི་གལ་ཆེན་གཉིས་བསད་ཡོད་ཚུལ་བརྗོད་འདུག 

དེ་ཡང་ཨ་རི་གཙོས་པའི་མཐུན་ཕྱོགས་རྒྱལ་ཁབ་ཁག་གི་དམག་མི་རྣམས་ལོ་ངོ་༢༠ ཡི་རྗེས་སུ་ཨབ་གྷན་ནས་ཕྱིར་འཐེན་བྱེད་བཞིན་ཡོད་པ་དང་བསྟུན། དྲག་སྤྱོད་ཚོགས་པ་ཏ་ལི་བྷན་གྱིས་ཨབ་གྷན་གཞུང་དང་དམག་འཐབ་བྱས་ཏེ། ཟླ་༨ པའི་ཚེས༡༥ ཉིན་ཨབ་གྷན་གྱི་སྲིད་གཞུང་བཙན་བཟུང་བྱས་ཐུབ་ཡོད་པ་རེད། དེ་ལ་བརྟེན་ནས་ཨབ་གྷན་གྱི་མི་མང་ཕོན་ཆེན་ཀ་བྷུལ་གནམ་ཐང་བརྒྱུད་ནས་རྒྱལ་ཁབ་གཞན་ལ་བྲོས་བྲོལ་འགྲོ་ཐབས་བྱེད་བཞིན་ཡོད། 

དེ་སྔོན་ཕྱི་ལོ་༡༩༩༦ ནས་༢༠༠༡ བར་ཏ་ལི་བྷན་གྱིས་སྲིད་དབང་བཟུང་བའི་སྐབས་སུ། ཁ་ཆེའི་ཁྲིམས་ལུགས་ཤཱ་རི་ཡ་ཁྲིམས་ལུགས་ལྟར་ཁྲིམས་འགལ་རྣམས་ལ་ཉེས་ཆད་གཏོང་རྒྱུར་རྒྱབ་སྐྱོར་བྱས་ཡོད་པ་དང་། དུས་སྐབས་དེའི་རིང་བུད་མེད་ཀྱི་ཐོབ་ཐང་ཤིན་ཏུ་ཆུང་ཆུང་ཡིན་པས། འགྲོ་བ་མིའི་ཐོབ་ཐང་ཚོགས་པ་མང་པོ་ཞིག་གིས་དུས་ངན་དེ་བསྐྱར་ལོག་ཡོང་སྲིད་པའི་སེམས་འཚབ་བྱེད་བཞིན་འདུག 

རྒྱལ་སྤྱིའི་བརྒྱུད་ལམ་ཨལ་ཇི་ཛ་ར་ཐོག་ཏུ་གནས་ཚུལ་སྤེལ་བར་གཞིགས་ན། དྲག་སྤྱོད་ཚོགས་པ་ཏ་ལི་བྷན་གྱིས་ཁ་ཆེ་འཇིགས་སྐུལ་རིང་ལུགས་པའི་ཚོགས་པ་དེར་དམག་འཐབ་བྱེད་མྱོང་ཡོད་འདུག་པ་དང་། དེ་བཞིན་ལོ་སྔོན་མར་ཨ་རི་དང་གྲོས་མོལ་སྐབས་སུ་ཏ་ལི་བྷན་གྱིས་ཨབ་གྷན་དེ་འཇིགས་སྐུལ་རིང་ལུགས་པའི་གཞི་རྟེན་ཆགས་འཇུག་རྒྱུ་མིན་པའི་ཁས་ལེན་བྱས་ཡོད་པ་རེད་འདུག །

གསར་འགོད་པ་སྐལ་བཟང་དོན་གྲུབ།