ཨ་རིས་ཡུག་ཀེ་རན་ནང་དུ་ཡོད་པའི་ཨ་རིའི་མི་སེར་རྣམས་འཕྲལ་དུ་ཕྱིར་ཐོན་དགོས་སྐོར་བརྗོད་འདུག 

ད་ལྟའི་ཆར་ཨུ་རུ་སུ་དང་ཡུག་ཀེ་རན་གྱི་གནད་དོན་དེ་ཛ་དྲག་ཆགས་བཞིན་ཡོད་པའི་སྐབས་དེར། ཨ་རིའི་སྲིད་འཛིན་རྗོ་བྷའེ་ཌན་གྱིས་ཡུག་ཀེ་རན་ནང་ཡོད་པའི་ཨ་རིའི་མི་སེར་རྣམས་འཕྲལ་དུ་རྒྱལ་ཁབ་དེ་ནས་ཕྱིར་ཐོན་དགོས་པ་དང་། གལ་ཏེ་ཨུ་རུ་སུས་ཡུག་ཀེ་རན་ནང་བཙན་འཛུལ་བྱས་ཚེ་ཨ་རིའི་མི་སེར་རྣམས་ཉེན་སྐྱོབ་ཆེད་དུ་དམག་མི་གཏོང་འཆར་མེད་སྐོར་བརྗོད་འདུག 

ཟླ་༢ པའི་ཚེས་༡༡ ཉིན་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་སྤེལ་གསལ། ཚེས་༡༠ ཉིན་ཨུ་རུ་སུ་དང་ཡུག་ཀེ་རན་གཉིས་ཀྱིས་གསལ་བསྒྲགས་ཤིག་སྤེལ་ནས། རྒྱལ་ཁབ་དེ་གཉིས་དང་མཉམ་དུ་ཧྥ་རན་སི་དང་འཇར་མན་བཅས་ནས། ཤར་ཡུག་ཀེ་རན་ནང་དུ་ཨུ་རུ་སུའི་རྒྱབ་སྐྱོར་ཡོད་པའི་གྱེན་ལངས་ཁ་བྲལ་རུ་ཁག་དང་ཡུག་ཀེ་རན་དམག་མི་བར་གྱི་དམག་འཁྲུག་མཚམས་འཇོག་ཡོང་ཆེད་དུ་གྲོས་མོལ་བྱས་ཡོད་ཀྱང་། གྲོས་མོལ་ལ་གྲུབ་འབྲས་ཐོན་ཐུབ་མེད་སྐོར་བརྗོད་འདུག 

ད་ལྟའི་ཆར་ཨུ་རུ་སུ་དང་ཡུག་ཀེ་རན་གྱི་ས་མཚམས་སུ། ཨུ་རུ་སུས་དམག་མི་འབུམ་གཅིག་ལས་མང་བ་སྒྲིག་འཇོག་བྱས་ཡོད་ཀྱང་། ཡུག་ཀེ་རན་ནང་བཙན་འཛུལ་བྱེད་འཆར་མེད་པ་ནན་བརྗོད་བྱེད་བཞིན་ཡོད་ནའང་། ཨ་རི་དང་དབྱིན་ཡུལ་སོགས་(Nato) མཐུན་ཕྱོགས་རྒྱལ་ཁབ་ཚོས་སེམས་འཚབ་ཀྱི་རྣམ་པ་ཆེན་པོ་སྟོན་བཞིན་ཡོད་པ་རེད། ཉེ་ཆར་ཨ་རིའི་སྲིད་འཛིན་རྗོ་བྷའེ་ཌན་གྱིས་གསར་ཁང་ཞིག་གི་བཅར་འདྲིའི་ཐོག་ཏུ། ཨུ་རུ་སུའི་དམག་མི་ནི་འཛམ་གླིང་ནང་དམག་འབོར་ཆེ་ཤོས་ཤིག་ཡིན་པས། ཡུག་ཀེ་རན་དང་ཨུ་རུ་སུ་ཁུལ་གྱི་གནས་སྟངས་མགྱོགས་མྱུར་ངང་ཛ་དྲག་ཆགས་སྲིད་པས། ཡུག་ཀེ་རན་ནང་གི་ཨ་རིའི་མི་སེར་རྣམས་འཕྲལ་དུ་རྒྱལ་ཁབ་དེ་ནས་ཕྱིར་ཐོན་དགོས་སྐོར་བརྗོད་འདུག སྐབས་དེར་གལ་ཏེ་ཨུ་རུ་སུས་ཡུག་ཀེ་རན་ནང་བཙན་འཛུལ་བྱས་ཚེ། ཨ་རིའི་མི་སེར་རྣམས་ཉེན་སྐྱོབ་ཆེད་དུ་དམག་གི་གཏོང་འཆར་ཡོད་མེད་དྲིས་སྐབས། སྲིད་འཛིན་ཁོང་གིས་གལ་སྲིད་ཨ་རིའི་དམག་མི་བཏང་ནས་ཨུ་རུ་སུའི་དམག་མི་དང་དམག་འཐབ་བྱས་ཚེ། འཛམ་གླིང་གི་དམག་ཆེན་འབྱུང་རྒྱུ་ཡིན་པས། གནས་སྟངས་དེ་འདྲ་ཆགས་ཚེ་དམག་མི་གཏོང་འཆར་མེད་པས། ཨ་རིའི་མི་སེར་རྣམས་ཀྱིས་འཕྲལ་དུ་ཡུག་ཀེ་རན་ནས་ཕྱིར་ཐོན་དགོས་སྐོར་བརྗོད་འདུག 

དབྱིན་ཡུལ་གྱིས་ཡུག་ཀེ་རན་ལ་དམག་ཆས་སོགས་ཀྱི་མཐུན་སྦྱོར་ཆེན་པོ་བྱེད་བཞིན་ཡོད་པ་དང་། བཅར་འདྲི་ཞིག་གི་ཐོག་ཏུ་གལ་ཏེ་ཨུ་རུ་སུས་ཡུག་ཀེ་རན་ལ་བཙན་འཛུལ་བྱས་ཚེ། དབྱིན་ཡུལ་ནས་ཡུག་ཀེ་རན་གྱི་གྱེན་ལངས་ལ་དམག་གི་རྒྱབ་སྐྱོར་གཏོང་འཆར་ཡོད་མེད་དྲིས་སྐབས། དབྱིན་ཡུལ་གྱི་སྲིད་བློན་བྷེ་རཱེ་སི་རྗོན་སོན་གྱིས་ཐག་གཅོད་དེ་འདྲ་བྱེད་སྲིད་སྐོར་དང་། འོན་ཀྱང་ད་ལྟའི་ཆར་གྲོས་མོལ་ཐོག་ནས་གནས་སྟངས་ཞི་འཇམ་བཟོ་ཐབས་དེ་ཡག་ཤོས་ཡིན་སྐོར་བརྗོད་འདུག 

ཡུག་ཀེ་རན་གཞུང་གིས་ཨུ་རུ་སུས་ཉེ་ཁུལ་གྱི་མཚོ་གཉིས་ཀྱི་ནང་དུ་དམག་གྲུ་སོགས་བཏང་ནས། མཚོ་ལམ་བཀག་ཡོད་པའི་ངོ་རྒོལ་བྱས་འདུག དེ་ཡང་ཨུ་རུ་སུས་མཚོ་དེ་གཉིས་ཀྱི་ནང་དུ་དམག་སྦྱོང་བྱེད་འཆར་ཡོད་འདུག་པས། ཉེ་ཁུལ་དུ་མཚོ་འགྲུལ་བྱེད་མཁན་ཚོར་ཉེན་བརྡ་བཏང་ཡོད་པ་རེད། 

ཨུ་རུ་སུས་ཤར་ཡུ་རོབ་ཁུལ་དུ་(NATO) མཐུན་ཕྱོགས་ཀྱི་དབང་ཤུགས་རྒྱ་སྐྱེད་གཏོང་རྒྱུར་འགོག་རྒོལ་བྱེད་བཞིན་ཡོད་ཁར། ཡུག་ཀེ་རན་རྒྱལ་ཁབ་དེ་མཐུན་ཕྱོགས་དེའི་ཚོགས་མིར་ནམ་ཡང་ཆགས་མི་ཆོག་པའི་ཉེན་བརྡ་གཏོང་བཞིན་ཡོད་ཁར། ནུབ་ཕྱོགས་ཀྱི་རྒྱལ་ཁབ་ཚོས་ཡུག་ཀེ་རན་སོགས་ཤར་ཡུ་རོབ་ཁུལ་དུ་གོ་མཚོན་སོགས་བཏང་ནས། བརྟན་ལྷིངས་མེད་པ་བཟོ་ཐབས་བྱེད་བཞིན་ཡོད་པའི་སྐྱོན་བརྗོད་དང་། ཡུག་ཀེ་རན་ལ་བཙན་འཛུལ་བྱེད་པའི་འཆར་གཞི་མེད་སྐོར་བརྗོད་འདུག འོན་ཀྱང་ཨ་རི་སོགས་ནས་ཨུ་རུ་སུའི་དགོས་འདུན་དེར་ཁས་ལེན་བྱེད་ཀྱི་མེད་ཁར། ཉེ་ཆར་དབྱིན་ཡུལ་གྱི་སྲིད་བློན་བྷོ་རེ་སེའི་ཇོན་སོན་གྱིས་ཨུ་རུ་སུའི་སྲིད་འཛིན་པུ་ཀྲེན་ལ། ཡུ་རོབ་ཀྱི་མང་གཙོའི་རྒྱལ་ཁབ་ཚང་མར་ནཱེ་ཊོ་(NATO) ཡི་ཚོགས་མིར་ཞུགས་རྒྱུའི་ཐོབ་ཐང་ཡོད་སྐོར་བརྗོད་འདུག 

གལ་ཏེ་ཨུ་རུ་སུས་ཡུག་ཀེ་རན་ལ་བཙན་འཛུལ་བྱས་ཚེ། ཡུ་རོབ་ཁུལ་དུ་གནས་སྟངས་ཛ་དྲག་ཆགས་ཉེན་ཡོད་པ་རེད་འདུག །

གསར་འགོད་པ་སྐལ་བཟང་དོན་གྲུབ།