ཨ་རིས་ཨུ་རུ་སུས་ད་དུང་ཡང་ཡུག་ཀེ་རན་ལ་བཙན་འཛུལ་བྱེད་སྲིད་སྐོར་བརྗོད་འདུག

དེ་སྔོན་ཨུ་རུ་སུས་ཡུག་ཀེ་རན་ནང་བཙན་འཛུལ་བྱེད་འཆར་མེད་པའི་སྐོར་ལན་མང་ནན་བརྗོད་བྱས་པའི་ཁར་ཁ་སྔོན་ཨུ་རུ་སུའི་བདེ་སྲུང་བློན་ཆེན་གྱིས་“ཁོང་ཚོའི་དམག་མི་ཉུང་དུ་བཏང་ཡོད་’’ཅེས་བརྗོད་ཡོད་ན་ཡང་། ཁོང་ཚོའི་དམག་མི་ཕྱིར་འཐེན་བྱས་པ་རྣམས་ར་སྤྲོད་ཀྱི་གྲངས་འབོར་ཏག་ཏག་མེད་པས་ཨ་རའི་ཕྱོགས་ནས་ཨུ་རུ་སུས་ད་དུང་ཡང་བཙན་འཛུལ་བྱེད་སྲིད་པའི་དོགས་པ་བྱེད་བཞིན་ཡོད་འདུག

ཟླ་༢ པའི་ཚེས་༡༦ ཉིན་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་སྤེལ་གསལ། སྲིད་འཛིན་བྷ་ཌན་གྱིས་”ཨུ་རུ་སུས་དམག་མི་ཕྱིར་འཐེན་བྱས་པ་ཡིན་ཟེར་བ་ནི་གཏམ་བཟང་ཡིན་མོད་ཀྱང་། ཨུ་རུ་སུའི་དམག་མི་ཕྱིར་འཐེན་ཐད་གྲངས་འབོར་ག་ཚོད་བྱས་ཡིན་མིན་ཏག་ཏག་བཤད་མེད་པས། ཡུག་ཀེ་རན་ནང་ད་དུང་ཡང་བཙན་འཛུལ་བྱེད་པའི་ཉེན་ཁ་ཆེན་པོ་ཡོད་ལ། གལ་ཏེ་དམག་འཁྲུག་དེ་བྱུང་ཚེ་བསམ་ཚོད་ལས་འདས་པའི་མིའི་ཚེ་སྲོག་མང་པོ་ཤོར་སྲིད་”ཅེས་བརྗོད་འདུག

ཁ་སྔོན་རེས་གཟའ་མིག་དམར་ཉིན་འཇར་མེ་ནིའི་སྲིད་འཛིན་དང་ཨུ་རུ་སུའི་སྲིད་འཛིན་གཉིས་མཇལ་འཕྲད་བྱུང་སྐབས་སྲིད་འཛིན་ཕུ་ཌན་གྱིས་ཡུག་ཀེ་རན་ནང་བཙན་འཛུལ་བྱེད་འཆར་མེད་’’ཅེས་ཡང་བསྐྱར་བརྗོད་འདུག

ཡུག་ཀེ་རན་ནུབ་ཕྱོགས་(Nato) མཐུན་ཕྱོགས་དམག་གི་སྒྲིག་འཛུགས་ནང་འཛུལ་ཐུབ་པ་བྱུང་ཚེ་ཨུ་རུ་སུ་ལ་མ་འོངས་པར་གང་ས་ཅི་ཐོག་ནས་ཉེན་ཚབས་ཞིག་མཐོང་གི་ཡོད་པས་སྲིད་འཛིན་ཕུ་ཌན་གྱིས་“ཡུག་ཀེ་རན་ནུབ་ཕྱོགས་(Nato) མཐུན་ཕྱོགས་ནང་མི་འཛུལ་བའི་འགན་ལེན་བྱེད་དགོས་’’ཞེས་བརྗོད་འདུག

ཨ་རིའི་སྲིད་འཛིན་བྷ་ཌན་གྱིས་“ཨུ་རུ་སུས་ཡུག་ཀེ་རིན་ནང་བཙན་འཛུལ་བྱས་པར་བརྟེན་ནས། ཨ་རིའི་ཚོང་གི་ཐད་ལ་གྱོང་གུན་བཏང་ན་ཨུ་རུ་སུ་ལ་ཁྲིམས་ཀྱི་ཉེས་པ་ཕོགས་ཀྱི་རེད་’’ཅེས་ཉེན་བརྡ་བཏང་འདུག

ད་ལྟའི་ཆར་ཨ་རི་དང་དབྱིན་ཡུལ། འཇར་མ་ནི་བཅས་ཡོ་རོབ་རྒྱལ་ཁབ་མང་དག་ཅིག་གི་ཡུག་ཀེ་རན་གྱི་གནད་དོན་ཐད་སྔར་ལས་ལྷག་པས་ཐུགས་འཁུར་དང་སེམས་འཚབ་བྱས་ནས་གང་མགྱོགས་གནད་དོན་འདིའི་ཐད་གྲོས་མོལ་ཐོག་ནས་གནས་སྟངས་ཞི་འཇམ་ཡོང་བའི་རེ་བ་བྱེད་བཞིན་ཡོད་འདུག

གསར་འགོད་པ་བདེ་སྒྲོན།