ཨ་རིས་ཨུ་རུ་སུས་ཟླ་བ་རྗེས་མར་ཡུག་ཀེ་རན་ལ་བཙན་འཛུལ་བྱེད་སྲིད་སྐོར་བརྗོད་འདུག 

ད་ལྟའི་ཆར་རྒྱལ་སྤྱིའི་ནང་ཨུ་རུ་སུ་དང་ཡུག་ཀེ་རན་གྱི་ས་མཚམས་སུ་ཡོད་པའི་དམག་འཁྲུག་གི་གནས་སྟངས་ལ་དོ་སྣང་ཆེན་པོ་བྱེད་བཞིན་པ་ལྟར། ཨ་རིའི་སྲིད་འཛིན་རྗོ་བྷའེ་ཌན་གྱིས་ཟླ་བ་རྗེས་མར་ཨུ་རུ་སུས་ཡུག་ཀེ་རན་ལ་བཙན་འཛུལ་བྱེད་པའི་སྲིད་པའི་ཉེན་ཁ་ཆེན་པོ་ཡོད་སྐོར་བརྗོད་འདུག 

ཟླ་༡ པོའི་ཚེས་༢༨ ཉིན་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་སྤེལ་གསལ། ཚེས་༢༧ ཉིན་ཨ་རིའི་སྲིད་འཛིན་རྗོ་བྷའེ་ཌན་དང་ཡུག་ཀེ་རན་གྱི་སྲིད་འཛིན་ཛེ་ལན་སཱེ་ཀཱི་གཉིས་ཁ་པར་བརྒྱུད་ནས་སྐད་ཆ་བཤད་ཡོད་འདུག དེའི་རྗེས་སུ་ཨ་རིའི་ཕོ་བྲང་དཀར་པོའི་བསྒྲགས་གཏམ་ནང་དུ། སྲིད་འཛིན་བྷའེ་ཌན་གྱིས་ཡུག་ཀེ་རན་གྱི་སྲིད་འཛིན་ལ། གལ་ཏེ་ཨུ་རུ་སུས་ཡུག་ཀེ་རན་ནང་དུ་བཙན་འཛུལ་བྱས་ཚེ། ཨ་རི་དང་མཐུན་ཕྱོགས་རྒྱལ་ཁབ། དེ་བཞིན་མཐུན་གྲོགས་གཞན་གྱིས་ཐག་ཆོད་པོའི་ཐོག་ནས་ཡ་ལན་སྤྲོད་རྒྱུ་ཡིན་པའི་ཁས་ལེན་བསྐྱར་དུ་བྱས་ཡོད་སྐོར་བརྗོད་འདུག དེ་བཞིན་སྐབས་དེར་ཟླ་བ་རྗེས་མར་ཨུ་རུ་སུས་ཡུག་ཀེ་རན་ལ་བཙན་འཛུལ་བྱེད་པའི་ངེས་པ་ཆེན་པོ་ཡོད་སྐོར་ཡང་བརྗོད་འདུག 

ཡུག་ཀེ་རན་གྱི་སྲིད་འཛིན་ཛེ་ལན་སཱེ་ཀཱི་ཡིས་ཕྱོགས་གཉིས་བར་དུ་ཉེ་བའི་ཆར་ཨུ་རུ་སུ་དང་ཡུག་ཀེ་རན་བར་གྱི་ཛ་དྲག་གནས་སྟངས་ཞི་འཇམ་བཟོ་ཐབས་ཀྱི་འབད་བརྩོན་གང་བྱས་སྐོར་དང་། མ་འོངས་པར་མཉམ་ལས་བྱེད་ཕྱོགས་སྐོར་གྲོས་བསྡུར་བྱུང་སྐོར་བརྗོད་འདུག 

ཨ་རིའི་བརྒྱུད་ལམ་ཞིག་གིས་གནས་ཚུལ་ཡོངས་ཁུངས་མ་བརྗོད་པར། ཨ་རིའི་སྲིད་འཛིན་དང་ཡུག་ཀེ་རན་སྲིད་འཛིན་གཉིས་བར། ཨུ་རུ་སུའི་བཙན་འཛུལ་གྱི་ཉེན་ཁ་དེ་ག་ཚོད་ཡོད་སྲིད་མིན་ཐད་མོས་མཐུན་བྱུང་མེད་འདུག དམག་འཁྲུག་ཆེད་ལས་པ་ཁག་ཅིག་གིས་བརྗོད་དོན་ལ། ད་ལྟའི་ཆར་ཨུ་རུ་སུས་གོ་མཚོན་ལྗིད་ཁོག་ཆེན་པོ་ཡོད་པ་རྣམས་ཕར་འོར་འདྲེན་བྱེད་ཆེད་དུ། ཡུག་ཀེ་རན་ནང་གི་ས་རྣམས་འཁྱགས་པ་རྒྱག་རྒྱུར་ངང་སྒུག་བྱེད་བཞིན་ཡོད་སྲིད་སྐོར་བརྗོད་བཞིན་འདུག 

ཨུ་རུ་སུས་ཤར་ཡུ་རོབ་ཁུལ་དུ་(NATO) མཐུན་ཕྱོགས་ཀྱི་དབང་ཤུགས་རྒྱ་སྐྱེད་གཏོང་རྒྱུར་འགོག་རྒོལ་བྱེད་བཞིན་ཡོད་ཁར། ཡུག་ཀེ་རན་རྒྱལ་ཁབ་དེ་མཐུན་ཕྱོགས་དེའི་ཚོགས་མིར་ནམ་ཡང་ཆགས་མི་ཆོག་པའི་ཉེན་བརྡ་གཏོང་བཞིན་ཡོད་པ་རེད། ཉེ་ཆར་ཨ་རི་དང་ཨུ་རུ་སུའི་བར་གྲོས་མོལ་བྱེད་སྐབས་ཨ་རིས་ཨུ་རུ་སུའི་དགོས་འདུན་དེར་ཁས་ལེན་བྱས་མེད་པས། ཨུ་རུ་སུས་མ་འོངས་པར་རེ་བ་བཟང་པོ་བྱེད་པའི་རྒྱུ་མཚན་མང་པོ་མེད་ཀྱང་། ཕྱོགས་གཉིས་ཀྱི་ཁེ་ཕན་ཆེད་དུ་གྲོས་མོལ་མུ་མཐུད་ནས་བྱེད་པའི་གོ་སྐབས་ཡོད་སྐོར་བརྗོད་འདུག 

ཨ་རི་གཙོས་པའི་མཐུན་ཕྱོགས་རྒྱལ་ཁབ་དང་ནུབ་ཕྱོགས་རྒྱལ་ཁབ་མང་པོ་ཞིག་གིས། གལ་ཏེ་ཨུ་རུ་སུས་ཡུག་ཀེ་རན་ལ་བཙན་འཛུལ་བྱས་ཚེ་དཔལ་འབྱོར་ཉེས་ཆད་གཏོང་རྒྱུ་ཡིན་པའི་ཉེན་བརྡ་གཏོང་བཞིན་ཡོད་ཁར། ཨུ་རུ་སུས་འཇར་མན་དང་ཡུ་རོབ་ཀྱི་རྒྱལ་ཁབ་ཁག་ལ་སྣུམ་སོགས་ཐད་ཀར་འོར་འདྲེན་བྱེད་ཆེད་ཀྱི་སྦུབས་མདོང་རྒྱང་ཐག་ཀི་ལོ་མི་ཊར་༡༢༢༥ ལྷག་ཡོད་པ་ཞིག་བཟོས་པ་དེ་ད་ལྟ་དངོས་སུ་ལས་དོན་འགོ་འཛུགས་བྱེད་རྒྱུ་ཡིན་པས། རྒྱལ་ཁབ་མང་པོ་ཞིག་གིས་ཚོང་ལས་དེར་རྒྱབ་སྐྱོར་བྱེད་རྒྱུ་མིན་པའི་ཉེན་བརྡ་གཏོང་མཁན་ཡང་མང་པོ་ཡོད་འདུག་པས། གལ་ཏེ་དེ་ལྟར་བྱུང་ཚེ་ཨུ་རུ་སུའི་དཔལ་འབྱོར་ལ་གནོད་སྐྱོན་ཆེན་པོ་ཐེབས་རྒྱུ་ཡིན་འདུག 

ཨུ་རུ་སུས་ནུབ་ཕྱོགས་ཀྱི་རྒྱལ་ཁབ་ཚོས་ཨུ་རུ་སུ་དང་ཡུག་ཀེ་རན་སོགས་ཤར་ཡུ་རོབ་ཁུལ་དུ་གོ་མཚོན་སོགས་བཏང་ནས། བརྟན་ལྷིངས་མེད་པ་བཟོ་ཐབས་བྱེད་བཞིན་ཡོད་པའི་སྐྱོན་བརྗོད་དང་། ཡུག་ཀེ་རན་ལ་བཙན་འཛུལ་བྱེད་པའི་འཆར་གཞི་མེད་སྐོར་བརྗོད་འདུག

ཕྱི་ལོ་༢༠༡༤ ལོ་ནས་ཡུག་ཀེ་རན་གྱི་ཤར་ཕྱོགས་སུ་ཨུ་རུ་སུའི་རྒྱབ་སྐྱོར་ཡོད་པའི་ཁ་བྲལ་རུ་ཁག་དང་། ཡུག་ཀེ་རན་གྱི་དམག་མི་བར་དམག་འཁྲུག་བརྒྱབ་ཡོད་པ་དང་། ད་ལྟའི་ཆར་དམག་འཁྲུག་གནས་སྐབས་མཚམས་འཇོག་བྱེད་པའི་མོས་མཐུན་ཡོད་ཀྱང་། མོས་མཐུན་དེ་ག་དུས་བར་གནས་མིན་བརྗོད་དཀའ་བ་ཡིན་འདུག ཕྱོགས་གཉིས་བར་གྱི་དམག་འཁྲུག་དང་བསྟུན་ནས་ཕྱི་ལོ་༢༠༡༤ ལོར་ཨུ་རུ་སུའི་དམག་གིས་ཡུག་ཀེ་རན་ནང་གི་ཁཱེ་རེ་མཱི་ཡར་བཙན་འཛུལ་བྱས་ཡོད་པས། ཕྱི་ལོ་༢༠༡༥ ལོ་ནས་ཡུག་ཀེ་རན་ནང་དུ་དབྱིན་ཡུལ་གྱི་དམག་མི་འགྲེམས་འཇོག་བྱེད་འགོ་བཙུགས་ཡོད་པ་དང་། ཐེངས་འདིར་དམག་མིའི་རུ་ཁག་ཆུང་ཆུང་ཞིག་སྣོན་མར་གཏོང་རྒྱུ་ཡིན་འདུག །

གསར་འགོད་པ་སྐལ་བཟང་དོན་གྲུབ།