ཨ་རྒྱ་གཉིས་ཀྱི་སྲིད་འཛིན་བར་མཇལ་འཕྲད་ཐེངས་ལྔ་པ་བྱེད་འཆར་འདུག

ཟླ་འདིའི་ཚེས་༢༨ ཉིན་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་སྤེལ་གསལ་ལྟར་ན། དེ་རིང་རེས་གཟའ་ཕུར་བུའི་ཉིན་དེར། ཨ་རི་སྲིད་འཛིན་བྷ་ཌན་དང་རྒྱ་ནག་གི་སྲིད་འཛིན་ཞིང་ཅིང་ཕིང་གཉིས་དྲྭ་ལམ་བརྒྱུད་ནས་མཇལ་འཕྲད་ཐེངས་ལྔ་པ་དེ་བྱས་ཏེ། ཨུ་རུ་སུས་ཡུག་རེན་ལ་བཙན་འཛུལ་བྱེད་བཞིན་པའི་གནས་དོན་དང་། ཨ་རི་དང་རྒྱ་ནག་བར་དུ་ལྷག་པའི་ཐེ་ཝན་གྱི་གནས་དོན། དེ་བཞིན་ཨ་རྒྱ་གཉིས་ཀྱི་དཔལ་འབྱོར་གྱི་གནས་སྟངས་སོགས་ཀྱི་ཐོག་ལ་བཀའ་མོལ་གནང་རྒྱུ་ཡིན་པའི་གནས་ཚུལ་སྤེལ་འདུག

ད་ལྟའི་ཆར་རྒྱ་ནག་ལ་ཏོག་དབྱིབས་གཉན་རིམས་དང་འབྲེལ་བའི་དཀའ་ངལ་འཕྲད་བཞིན་པ་དང་། ཉེ་ཆར་གསར་འགྱུར་བརྒྱུད་ལམ་ཁག་ཏུ་ཐོན་པའི་དངུལ་ཁང་དུ་དངུལ་བཅོལ་འཇོག་བྱེད་མཁན་དག་གིས་ངོ་རྒོལ་གྱི་ལས་འགུལ་སྤེལ་ཡོད་པ་མ་ཟད། རྒྱ་ནག་གི་ནང་དུ་དཔལ་འབྱོར་གྱི་དཀའ་ངལ་འཕྲད་བཞིན་པ་དང་། དེ་བཞིན་རྒྱ་ནག་དམར་ཕྱོགས་ཚོགས་པའི་ཚོགས་ཆེན་ཉི་ཤུ་པ་དེ་འཚོགས་ལ་ཉེ་བ་སོགས་ཀྱི་དུས་སུ་འཁེལ་ཡོད་པ་དང་། ལྷག་པར་དུ་ཨ་རི་སྲིད་འཛིན་བྷ་ཌན་སྲིད་འཛིན་དུ་བསྐོས་པ་ནས་བཟུང་ད་བར་ཐེ་ཝན་ལ་གོ་མཚོན་ཐེངས་བཞི་བཙོང་ཡོད་པའི་ཐོག ལོ་འདིའི་སྤྱི་ཟླ་བརྒྱད་པའི་ནང་དུ་ཨ་རི་གྲོས་ཚོགས་འོག་མའི་ཚོགས་གཙོ་ནན་སི་པི་ལོ་སི་ (Nancy Pelosi) ཐེ་ཝན་དུ་ཕེབས་འཆར་ཡང་ཡོད་པ་དང་། གནས་ཚུལ་དེ་དག་གི་ཐོག་ལ་རྒྱ་ནག་གཞུང་གིས་སྐྱོན་འཛུགས་དང་ངོ་རྒོལ་དྲག་པོ་ཐེངས་མང་བྱས་དང་བྱེད་བཞིན་ཡོད་པས། ཐེངས་འདིའི་ཨ་རྒྱ་གཉིས་ཀྱི་སྲིད་འཛིན་བར་གྱི་མཇལ་འཕྲད་དེ་ནི་ཕྱོགས་གཉིས་ཀྱི་འབྲེལ་བ་ཇེ་སྡུག་ཏུ་འགྲོ་བཞིན་ཡོད་པའི་དུས་སུ་འཁེལ་ཡོད་རབས་བརྗོད་འདུག

ཐེངས་འདི་ཨ་རྒྱ་གཉིས་ཀྱི་སྲིད་འཛིན་མཇལ་འཕྲད་ཐོག་ཏུ་ཕྱོགས་གཉིས་ཀྱི་རྩོད་གཞི་ཡོད་པའི་གནད་དོན་ཙམ་མ་ཡིན་པ་མཉམ་ལས་ཀྱི་ཐོག་ལ་བཀའ་མོལ་གནང་རྒྱུ་དང་། གལ་སྲིད་ཨ་རྒྱ་གཉིས་ཀྱི་མཇལ་འཕྲད་ཀྱིས་གནད་དོན་གང་ཡང་ཐག་གཅོད་བྱེད་མི་ཐུབ་རུང་། སྲིད་འཛིན་བར་གྱི་མཇལ་འཕྲད་དེ་ཕྱོགས་གཉིས་ཀྱི་འབྲེལ་བ་མུ་མཐུད་གནས་པ་ལ་ཕན་ཐོགས་ཡོད་རབས་བརྗོད་པའི་གནས་ཚུལ་སྤེལ་འདུག།

གསར་འགོད་པ་བློ་བཟང་རྒྱ་མཚོ།