ཨབ་གྷ་ནི་སི་ཐན་གྱི་གནས་སྟངས་ལ་བརྟེན་ནས་ཨ་རིས་རྒྱ་ནག་ལ་ཁ་གཏད་གཅོག་རྒྱུར་འབད་བརྩོན་ཆེ་རུ་གཏོང་ངེས་ཟེར།

 རྒྱལ་སྤྱིའི་ཆབ་སྲིད་ཉམས་ཞིབ་པ་ཚོས། ཨ་རིས་དམག་དཔུང་ཕྱིར་འཐེན་བྱས་ཏེ་ཨབ་གྷ་ནི་སི་ཐན་གྱི་གཞུང་ཏ་ལི་བྷན་(Taliban) གྱི་ལག་ཏུ་ཤོར་བའི་གནས་སྟངས་ལ་སྐྱོན་བརྗོད་ཚབས་ཆེན་འཕོག་བཞིན་པར་བརྟེན། ཨ་རིས་རྒྱ་ནག་ལ་ཁ་གཏད་གཅོག་མཁན་གྱི་མཐུན་གྲོགས་ཚོའི་སྟོབས་ཤུགས་སྲ་བརྟན་དང་རྒྱ་སྐྱེད་ཆེད་འབད་བརྩོན་ཆེ་རུ་གཏོང་ངེས་ཚུལ་བཤད་འདུག 

ཨ་རིས་ཨབ་གྷ་ནི་སི་ཐན་ནས་དམག་དཔུང་ཕྱིར་འཐེན་བྱེད་པའི་དམིགས་ཡུལ་ནི། རྒྱ་ནག་དམར་ཤོག་སྲིད་གཞུང་གི་ཆབ་སྲིད་དང་དཔལ་འབྱོར་གྱི་ཤུགས་རྐྱེན་ཆེ་རུ་འགྲོ་སའི་གླིང་ཆེན་ཨེ་ཤི་ཡ་དང་། ཞི་བདེ་རྒྱ་མཚོའི་ཁུལ་དུ་རིག་པ་བསྒྲིམས་ནས་རྒྱ་ནག་ལ་ཁ་གཏད་གཅོག་པའི་ཆེད་དུ་ཡིན། ཡིན་ན་ཡང་། དམག་དཔུང་ཕྱིར་འཐེན་བྱེད་ཚུལ་དང་། ཏ་ལི་བྷན་གྱིས་མགྱོགས་མྱུར་ཨབ་གྷ་ནི་སི་ཐན་བཙན་གྱིས་བཟུང་བའི་གནས་སྟངས་འོག ཨ་རི་ལ་སྐྱོན་བརྗོད་དང་འཁང་ར་ཚབས་ཆེན་ཕོག་པ་མ་ཟད། ཐ་ན་ཨ་རིའི་སྲིད་གཞུང་ལ་ཡིད་ཆེས་བྱེད་ཐུབ་མིན་གྱི་དོགས་འདྲི་བྱེད་མཁན་ཡང་མང་དུ་འགྲོ་བཞིན་ཡོད། 

རྒྱ་ནག་གཞུང་གིས་གོ་སྐབས་དེ་དམ་འཛིན་བྱས་ཏེ་ཨ་རི་ལ་སྐྱོན་བརྗོད་དང་། ཨ་རི་དང་འབྲེལ་བའི་རྫུན་བསྒྲགས་བྱེད་ཤུགས་ཆེ་རུ་གཏོང་བཞིན་ཡོད་ལ། ལྷག་པར་དུ་ཐའེ་ཝན་གྱིས་ཨ་རིར་བློ་གཏད་དང་ཡིད་ཆེས་བྱས་ན། འགྲོ་ས་ཨབ་གྷ་ནི་སི་ཐན་དང་གཅིག་པ་ཆགས་རྒྱུ་ཡིན་སྐོར་སྒྲོག་བཞིན་འདུག 

འོན་ཀྱང་། སྲིད་འཛིན་བྷ་ཌན་གྱིས་ཟླ་འདིའི་ཚེས་ ༢༠ ཉིན་སྤེལ་བའི་གཏམ་བཤད་ཅིག་གི་ནང་དུ། ཁོང་གིས་ཨ་རིའི་མཐུན་གྲོགས་རྒྱལ་ཁབ་ཚོས་ཨ་རི་ལ་ཡིད་ཆེས་བློ་གཏད་བྱེད་ཐུབ་མིན་གྱི་དོགས་འདྲི་བྱེད་དགོས་པའི་གནས་སྟངས་ཆགས་མེད་སྐོར་བརྗོད་པའི་ཐོག བྷ་ཌན་སྲིད་གཞུང་གི་འགོ་ཁྲིད་རྣམས་མཐུན་གྲོགས་རྒྱལ་ཁབ་ཚོའི་ཡིད་ཆེས་ཡོང་ཐབས་ལ་བྲེལ་བཞིན་ཡོད་སྐོར་བརྗོད། 

ཟླ་འདིའི་ཚེས་༡༨ ཉིན་ཨ་རིའི་ཕྱི་སྲིད་ལས་ཁུངས་ཀྱི་མགྲིན་ཚབ་པ་ནེ་ཌི-ཕི་ར་སི་(Ned Price) ཡིས་བྷ་ཌན་སྲིད་གཞུང་གིས་ཞི་བདེ་རྒྱ་མཚོའི་ཁུལ་དུ་སྲིད་གཞུང་གོང་མ་གང་ལས་ཀྱང་ལྷག་པའི་མ་འཇོག་དང་མཐུན་སྦྱོར་བྱེད་ཀྱི་ཡོད་སྐོར་བཤད་པ་མ་ཟད། “ཐའེ་ཝན་དང། ཨེ་སི་རིལ། དེ་མིན་ང་ཚོ་དང་སྲ་བརྟན་གྱི་མཛའ་འབྲེལ་ཡོད་པའི་རྒྱལ་ཁབ་གཞན་སུ་འདྲ་ཞིག་ཡིན་རུང་། ང་ཚོ་མཐུན་གྲོགས་རྒྱལ་ཁབ་ཚོ་དང་ལྷན་དུ་ལངས་ངེས་རེད་”ཅེས་བརྗོད་ཡོད། 

དེ་བཞིན། ཨ་རིའི་སྲིད་འཛིན་གཞོན་པ་ཁ་མ་ལ-ཧ་རེ་སི་(Kamala Harris) ཁ་སང་རེས་གཟའ་ཉི་མའི་ཉིན་སིང་གྷ་པུར་(Singapore) དུ་འབྱོར་ཞིང་། དེ་ནས་ལྷོ་ཤར་ཨེ་ཤི་ཡའི་རྒྱལ་ཁབ་ཁག་ཏུ་འཚམས་གཟིགས་སུ་སྐྱོད་གཏན་འཁེལ་བ་དེའང་ཆེད་དུ་རྒྱ་ནག་ལ་ཁ་གཏད་བཅག་ནས། རྒྱལ་ཁབ་དེ་དག་གི་ནང་དུ་ཨ་རིའི་དབང་ཤུགས་རྒྱ་སྐྱེད་གཏོང་ཆེད་ཡིན་པ་གསལ་པོར་གྱུར་ཡོད།

རྒྱལ་སྤྱིའི་ཆབ་སྲིད་ཉམས་ཞིབ་པ་ཚོས་བརྗོད་པ་ལྟར་ན། ཨ་རིའི་དམག་དཔུང་ཨབ་གྷ་ནི་སི་ཐན་ནས་ཕྱིར་འཐེན་བྱས་པར་བརྟེན་ནས་བྷ་ཌན་སྲིད་གཞུང་ལ་སྐྱོན་བརྗོད་ཚབས་ཆེན་ཕོག་པ་དེས། བྷ་ཌན་སྲིད་གཞུང་ལ་ཨེ་ཤ་ཡའི་ནང་དུ་མཐུན་གྲོགས་རྒྱལ་ཁབ་ཚོའི་སྟོབས་ཤུགས་སྲ་བརྟན་དང་རྒྱ་སྐྱེད་བྱས་ཏེ་རྒྱ་ནག་ལ་ཁ་གཏད་གཅོག་པའི་གནོན་ཤུགས་ལྡབ་ཀྱིས་ཆེ་རུ་བཏང་ཡོད་འདུག 

ཐའེ་ཝན་ཆབ་སྲིད་ཉམས་ཞིབ་ཁང་(Taiwan Think Tank) གི་སྤྱི་ཁྱབ་འགན་འཛིན་གཞོན་པ་ཌོན་(Dong Siqi) གྱིས་བྷ་ཌན་སྲིད་གཞུང་“གིས་ཞི་བདེ་རྒྱ་མཚོའི་ཁུལ་དུ་རིག་པ་བསྒྲིམས་ནས་རྒྱ་ནག་གི་ཉེན་ཁ་སྣ་ཚོགས་ལ་གདོང་ལེན་བྱེད་ངེས་རེད་”ཅེས་བརྗོད་འདུག་ལ། དེ་བཞིན་ཨ་རིའི་ཉམས་ཞིབ་པ་ཨན-ཨེ་ས་ཋ་ཏོན་(Ian Easton) གྱིས་ཨབ་གྷ་ནི་སི་ཐན་ནས་ཨ་རི་ལ་བསླབ་བྱ་འགའ་ཐོབ་ཡོད་ཅིང་། དེ་དག་གི་ཁྲོད་ནས་གཅིག་ནི་“ཨ་རིས་མཐུན་གྲོགས་ཀྱི་སྲིད་གཞུང་གཞན་ཞིག་བརླག་མི་ཉན་པ་དེ་རེད་”ཅེས་བརྗོད་འདུག ། 

གསར་འགོད་པ་དཀོན་མཆོག་རབ་བརྟན།