ཨབ་གྷན་གྱི་མཐོ་སློབ་ཁག་ཏུ་བུད་མེད་སློབ་མ་རྣམས་བཀག་སྡོམ་བྱས་འདུག
རྒྱལ་སྤྱིའི་ཁྱོན་ཡོངས་ནས་སྐྱོན་བརྗོད་དང་སྡིགས་བསྐུལ་བྱས་མིན་ལ་མ་ལྟོས་པར། ཨབ་གྷན་གྱི་སྲིད་དབང་བཙན་འཕྲོག་བྱེད་མཁན་ཏ་ལི་བྷན་དྲག་སྤྱོད་ཚོགས་པའི་སྲིད་གཞུང་གིས། རྒྱལ་ཁབ་དེའི་བུད་མེད་རྣམས་མཐོ་རིམ་སློབ་གཉེར་ཁང་ཁག་ཏུ་སློབ་གཉེར་བྱེད་མི་ཆོག་པ་བཟོས་འདུག
ཟླ་༡༢ པའི་ཚེས་༢༡ ཉིན་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་སྤེལ་གསལ། ཏ་ལི་བྷན་སྲིད་གཞུང་གི་མཐོ་རིམ་ཤེས་ཡོན་བློན་ཆེན་གྱིས་གསལ་བསྒྲགས་ཤིག་སྤེལ་ནས། རྒྱལ་ཁབ་དེའི་མཐོ་རིམ་སློབ་གཉེར་ཁང་ཁག་ཏུ་བུད་མེད་སློབ་མ་སློབ་གཉེར་བྱེད་རྒྱུར་བཀག་སྡོམ་བྱེད་རྒྱུ་ཡིན་པ་དང་། ཐག་གཅོད་དེ་འཕྲལ་དུ་ལག་བསྟར་བྱེད་རྒྱུ་ཡིན་སྐོར་བརྗོད་འདུག ཏ་ལི་བྷན་དྲག་སྤྱོད་རུ་ཁག་གིས་ཨབ་གྷན་གྱི་སྲིད་དབང་བཙན་འཕྲོད་བྱས་ནས་བཟུང། འབྲིང་རིམ་སློབ་གྲྭའི་བུད་མེད་སློབ་ཕྲུག་རྣམས་ཀྱང་ད་བར་སློབ་གྲྭར་འགྲོ་མ་ཐུབ་པར་ལྷག་ཡོད་པ་རེད་འདུག
ཏ་ལི་བྷན་སྲིད་གཞུང་གི་མཐོ་རིམ་འགོ་ཁྲིད་མང་པོ་ཞིག་གིས། བུད་མེད་རྣམས་ལ་དེང་དུས་ཀྱི་ཤེས་ཡོན་སྤྲོད་རྒྱུར་དགག་བྱ་ཆེན་པོ་བྱེད་ཀྱི་ཡོད་འདུག་པ་དང་། ཏ་ལི་བྷན་གྱིས་རྒྱལ་ཁབ་དེའི་སྲིད་དབང་བཙན་བཟུང་བྱས་པ་ནས་བཟུང་། མཐོ་རིམ་སློབ་གཉེར་ཁང་ཁག་ཏུ་བུད་མེད་རྣམས་དབྱེ་འབྱེད་ཀྱི་ཁྲིམས་སྒྲིག་མང་པོ་ཞིག་འོག་ཏུ་འགྲོ་བཞིན་ཡོད་འདུག དེ་ཡང་བུད་མེད་རྣམས་ལ་མཐོ་སློབ་ཏུ་འཛུལ་སྒོ་ལོགས་སུ་ཡོད་པ། འཛིན་ཁང་ལོགས་སུ་ཡོད་པ། བུད་མེད་སློབ་མ་རྣམས་ལ་སློབ་ཁྲིད་བྱེད་མཁན་བུད་མེད་དགེ་རྒན་ནམ་ཡང་ན་ལོ་ན་རྒན་པའི་སྐྱེས་པའི་དགེ་རྒན་དགོས་ཀྱི་ཡོད་པ་སོགས་བཀག་རྒྱ་མང་པོ་ཞིག་ཡོད་པ་རེད་འདུག་པས། བུད་མེད་
ཁག་ཅིག་གིས་སྔོན་ཚུད་ནས་ཏ་ལི་བྷན་གྱིས་མཐོ་སློབ་ཁག་ཏུ་བུད་མེད་བཀག་སྡོམ་བྱེད་རྒྱུའི་ཚོད་དཔག་བྱས་ཡོད་འདུག
ཐེངས་འདིར་དངོས་སུ་བུད་མེད་རྣམས་ལ་མཐོ་རིམ་ཤེས་ཡོན་གྱི་གོ་སྐབས་མེད་པ་བཟོས་པར། ཨ་རིས་སྐྱོན་བརྗོད་ཆེན་པོ་བྱས་ནས། བྱ་སྤྱོད་དེ་ལ་བརྟེན་ནས་ཏ་ལི་བྷན་ལ་མཇུག་འབྲས་ཡག་པོ་ཡོང་རྒྱུ་མིན་པ། ཏ་ལི་བྷན་གྱིས་ཨབ་གྷན་ནང་གི་མི་མང་ཚང་མའི་ཐོབ་ཐང་ལ་གུས་བརྩི་མ་བྱས་པའི་བར་དུ། རྒྱལ་སྤྱིའི་ཚོགས་སྡེའི་ཁྲིམས་མཐུན་གྱི་ཚོགས་མི་ཆགས་ཐུབ་རྒྱུ་མིན་སྐོར་བརྗོད་འདུག མཉམ་འབྲེལ་རྒྱལ་ཚོགས་ཀྱིས་ཤེས་ཡོན་ནི་འགྲོ་བ་མིིའི་གཞི་རྩའི་ཐོབ་ཐང་ཡིན་པ་དང་། ཨབ་གྷན་གྱི་བུད་མེད་རྣམས་ལ་ཤེས་ཡོན་གྱི་ཐོབ་ཐང་མ་སྤྲད་པ་དེ་ནི་ཨབ་གྷན་གྱི་མ་འོངས་མདུན་ལམ་ལ་གནོད་སྐྱོན་ཐེབས་རྒྱུ་ཡིན་སྐོར་བརྗོད་འདུག
ཨབ་གྷན་གྱི་དཔལ་འབྱོར་དེ་ཕྱིའི་རྒྱལ་ཁབ་ཁག་གི་རོགས་དངུལ་ལ་ཤུགས་ཆེན་བརྟེན་གྱི་ཡོད་འདུག་པ་དང་། ཏ་ལི་བྷན་གྱིས་ཨབ་གྷན་གྱི་འབྲིང་རིམ་སློབ་གྲྭ་ཁག་ཏུ་བུད་མེད་སློབ་ཕྲུག་རྣམས་བཀག་སྡོམ་བྱས་པ་ནས་བཟུང་། རོགས་དངུལ་ཚོགས་པ་མང་པོ་ཞིག་གིས་རོགས་དངུལ་ཕྱེད་ཀའམ་ཆ་ཚང་ཕྱིར་འཐེན་བྱས་ཡོད་པ་རེད་འདུག
ལོ་སྔོན་མར་ཏ་ལི་བྷན་སྲིད་གཞུང་གི་བཟང་སྤྱོད་གོང་འཕེལ་དང་ངན་སྤྱོད་སྔོན་འགོག་གི་ལས་ཁང་ཞེས་པ་དེས་ལམ་སྟོན་གསལ་བསྒྲགས་ཤིག་སྤེལ་ཏེ། བུད་མེད་ཁེར་རྐྱང་ཞིག་རྒྱང་ཐག་ཀི་ལོ་མི་ཊར་༧༢ ལས་མང་བ་འགྲུལ་སྐྱོད་བྱེད་མི་ཆོག་པ་དང་། གལ་ཏེ་འགྲུལ་སྐྱོད་བྱེད་དགོས་ཚེ་བུད་མེད་དེའི་མཉམ་དུ་སྤུན་མཆེད་ཉེ་བོ་ཡིན་པའི་སྐྱེས་པ་ཞིག་ངེས་པར་དུ་འགྲུལ་སྐྱོད་བྱེད་དགོས་པ། འགྲུལ་སྐྱོད་སྐབས་སུ་བུད་མེད་ཚོའི་མགོ་རས་ངེས་པར་དུ་གྱོན་དགོས་པ། གལ་ཏེ་མགོ་རས་གྱོན་མེད་ཚེ་ཁ་ལོ་བ་ཚོས་བུད་མེད་དེ་རླངས་འཁོར་ནང་དུ་འཛུལ་འཇུག་མི་ཆོག་པའི་གསལ་བསྒྲགས་བྱས་ཡོད་ཁར། ཉེ་ཆར་སྐྱེས་མོལ་ཚལ་དང་ཆུ་རྐྱལ་ཁང་། ལུས་སྦྱོང་ཁང་བཅས་ལ་བུད་མེད་ཡོང་ཆོག་གི་མེད་པ་བཟོས་ཡོད་འདུག
ལོ་སྔོན་མར་ཨ་རི་གཙོས་པའི་མཐུན་ཕྱོགས་རྒྱལ་ཁབ་ཁག་གི་དམག་མི་རྣམས་ལོ་ངོ་༢༠ ཡི་རྗེས་སུ་ཨབ་གྷ་ནི་སེ་ཐན་ནས་ཕྱིར་འཐེན་བྱས་པ་དང་བསྟུན། རྒྱལ་ཁབ་དེའི་གྱེན་ལངས་དྲག་སྤྱོད་རུ་ཁག་ཏ་ལི་བྷན་གྱིས་དམག་འཐབ་དཔྱད་ཞིབ་པ་མང་པོ་ཞིག་གིས་ཚོད་དཔག་ལས་བརྒལ་ནས། གལ་གནད་ཆེ་བའི་གྲོང་ཁྱེར་ཆེ་ཁག་མང་པོ་ཞིག་དུས་ཡུན་ཐུང་ཐུང་ནང་བཙན་བཟུང་བྱས་ནས་མཐའ་མ་དེར་རྒྱལ་ས་ཡང་བཙན་འཛུལ་བྱས་ཏེ་སྲིད་གཞུང་བཙན་འཕྲོག་བྱས་ཡོད་པ་རེད།།
གསར་འགོད་པ་སྐལ་བཟང་དོན་གྲུབ།
