ཆེད་བརྗོད།
ཉེ་ཆར་སྐབས་བཅུ་བདུན་པའི་གྲོས་ཚོགས་ཚོགས་དུས་གཉིས་པ་ལས་བསྡོམས་གྲོས་ཚོགས་ནང་གངས་ལྗོངས་དཔལ་འབྱོར་ཞབས་ཞུ་ཁང་སོགས་དཔལ་འབྱོར་དང་འབྲེལ་བའི་བགྲོ་གླེང་མང་པོ་བྱུང་ཡོད་པ་དང་། སྲིད་སྐྱོང་སྤེན་པ་ཚེ་རིང་གིས་དཔལ་འབྱོར་དང་འབྲེལ་བའི་ཐོག་ནས་ཚིག་གཅིག་ཡང་ཡང་གསུངས་སོང་བ་ནི། “ཨར་ག་པར་རྟེན་གྱི་རེད་”ཅེས་པ་དེ་རེད། དེ་ནི་གཙོ་བོ་གངས་ལྗོངས་དཔལ་འབྱོར་ཞབས་ཞུ་ཁང་ལ་དཔལ་འབྱོར་གྱི་ཐོག་ནས་ཉེན་ཁ་ཆེ་བའི་གཡང་གཟར་ཞིག་ཡིན་པ་དང་། ལྷག་པར་དུ་ཁོང་རྒྱ་ཆེའི་མི་མང་གིས་ཆབ་སྲིད་ཀྱི་ལས་ཀ་བྱེད་པར་བདམས་པ་ལས། ཚོང་རྒྱག་པར་བདམས་པ་མ་རེད་ཅེས་ཀྱང་གསུངས་སོང་། དེ་བཞིན་གནད་དོན་ཆེ་ཆུང་མང་པོ་ཞིག་གི་ཐོག་ལ་དཔལ་འབྱོར་གྱི་ཐོག་ནས་མ་འོངས་པར་མུ་མཐུད་འགྲོ་སོང་གཏོང་ཐུབ་དང་མི་ཐུབ་ཀྱི་ཐོག་ནས་“ཨར་ག་པར་རྟེན་གྱི་རེད་”ཅེས་ཚིག་འདི་བེད་སྤྱོད་ཡང་ཡང་བཏང་སོང་ལ། དེ་ནི་སྔོན་མ་ནས་འགོ་འཛུགས་ཟིན་པའི་ལས་གཞི་མང་པོ་ཞིག་སྒོ་རྒྱག་དགོས་པའི་རྒྱུ་མཚན་དུ་བགྲང་ཡོད།
དེ་བཞིན་ལོ་ལྟར་ཨ་རིར་ན་གཞོན་དྲག་འདེམས་ཀྱིས་སློབ་སྦྱོང་དུ་གཏོང་བཞིན་ཡོད་པ་དང་། དེ་དག་ལ་སློབ་ཡོན་དང་ལམ་གྲོན་ཚང་མ་བོད་མིའི་སྒྲིག་འཛུགས་ནས་མཐུན་འགྱུར་གནང་གི་ཡོད། སྔོན་མ་དེ་དག་ཚང་མ་ཕྱིར་ངེས་པར་དུ་ལོག་དགོས་པ་ཁྲིམས་ཐོག་ནས་གན་རྒྱ་འཇོག་དགོས་པ་དང་། ཕྱིར་རྒྱ་གར་དུ་ལོག་ནས་བོད་མིའི་སྤྱི་ཚོགས་ནང་ཉུང་མཐར་ལོ་གཉིས་ལས་ཀ་བྱེད་དགོས་པའི་ཁས་ལེན་བྱེད་དགོས་པ་རེད། བཀའ་བློན་ཁྲི་པ་མཁས་དབང་ཟམ་གདོང་རིན་པོ་ཆེ་ཡིན་པའི་སྐབས་སུ་བཙན་བྱོལ་བོད་གཞུང་གིས་ཨ་རིར་ཆེད་གཉེར་སློབ་སྦྱོང་དུ་བཏང་ནས་ཕྱིར་མ་ལོག་པ་དེ་དག “སྤྱི་སྐལ་སྒེར་སྤྱོད་”བྱེད་མཁན་རེད་ཅེས་ཡོངས་ཁྱབ་ཏུ་གསལ་བསྒྲགས་ཀྱང་སྤེལ་མྱོང་བ་དང་། ད་ལྟ་སྲིད་སྐྱོང་སྤེན་པ་ཚེ་རིང་གི་ངོས་ནས་ཕྱིར་ལོག་ཀྱང་ཆོག་ལ་མ་ལོག་ཀྱང་ཆོག་པ་ཞིག་བཟོས་ཡོད་པ་དང་། དེ་ལྟར་བཟོ་དགོས་པའི་རྒྱུ་མཚན་ནི་ཨ་རིར་མཐོ་རིམ་སློབ་སྦྱོང་བྱས་ནས་ཕྱིར་ལོག་ཡོང་ན་བོད་མིའི་སྒྲེིག་འཛུགས་ཀྱིས་དེ་དག་ལ་གླ་ཆ་སྤྲད་དགོས་པས། “ཨར་ག་པར་རྟེན་གྱི་རེད་”ཅེས་ཀྱང་གསུངས་སོང་།
དེ་དང་དེས་མཚོན་པའི་ལས་གཞི་མང་པོ་ཞིག་སྒོ་བརྒྱབ་ཡོད་པ་དང་། སྒོ་རྒྱག་དོན་ཡང་དཔལ་འབྱོར་དང་འབྲེལ་བའི་ཐོག་ནས་ཡིན་ཚུལ་གསུངས་འདུག བོད་མིའི་སྒྲིག་འཛུགས་སྤྱི་ཡོངས་བརྒྱ་ཆ་༩༠ ལྷག་རོགས་དངུལ་ལ་བརྟེན་དགོས་པ་དང་། རོགས་དངུལ་རག་ཐུབ་པའི་ལས་ཁུངས་ནང་སྲིད་དང་། ཤེས་རིག འཕྲོད་བསྟེན། ཆོས་རིག དཔལ་འབྱོར་བཅས་ཚང་མ་བདེ་དོན་ཚོགས་པ་དང་། ཡིད་ཆེས་དགེ་རྩའི་འོག་དེབ་སྐྱེལ་བྱས་པ་འབའ་ཞིག་ཡིན་པས། ཚོགས་པ་འདི་དག་གི་མིང་ཐོག་ནས་རོགས་དངུལ་རག་པ་དེ་དག་ཀྱང་ལོ་སོ་སོར་ཡོང་འབབ་ཀྱི་བརྒྱ་ཆ་༨༥ འགྲོ་སོང་མ་བཏང་ན་མི་ཆོག་པ་དེ། རྒྱ་གར་གཞུང་གི་ཁྲིམས་ཐོག་ནས་གཏན་འབེབས་ཡིན་པ་དང་། དེ་ལྟར་མ་བྱུང་ན་ཁྲལ་འབབ་བརྒྱ་ཆ་ཆེན་པོ་སྤྲོད་དགོས། དེར་བརྟེན་དཔལ་འབྱོར་འདུ་འགོད་ཐུབ་ནའང་འགྲོ་སོང་གཏོང་དགོས་པ་ལས་གསོག་འཇོག་བྱེད་མི་ཆོག་པས། མ་འོངས་པར་རོགས་ཚོགས་འགག་པའམ། ཁྲིམས་ཐོག་ནས་རོགས་དངུལ་ལེན་མི་ཐུབ་པ་ཞིག་ཆགས་ན་དངོས་གནས་ཨར་མི་རྟེན་པའི་དུས་ཚོད་ཅིག་འཆར་ངེས་རེད།
ལས་གཞི་ཁ་ཤས་ཚོང་ལས་དང་འབྲེལ་བའི་ཐོག་ནས་ཁེ་འབབ་བཟོ་ཐུབ་པ་ཞིག་བྱུང་ན། མ་འོངས་པར་དེའི་ཐོག་ལ་ནུས་པ་དང་ཤུགས་རྐྱེན་ཐེབས་ཐུབ་པའི་རེ་བ་ཡོད་པ་ལས། རོགས་ཚོགས་ཁོ་ན་ལ་བརྟེན་ནས་རང་ཁ་རང་གསོ་ཐུབ་པའི་ཐབས་ལམ་ཞིག་མེད་པ་མ་ཟད། རོགས་ཚོགས་གཅིག་པུ་ལ་བརྟེན་པའི་འཚོ་ཐབས་དེ་ལ་རང་ཁ་རང་གསོ་ཞེས་པའི་ཐ་སྙད་དེ་ཡང་འཇུག་ཐབས་གཏན་ནས་མེད། ད་ལྟའི་བཀའ་ཤག་གི་ངོས་ནས་གངས་ལྗོངས་དཔལ་འབྱོར་ཞབས་ཞུ་ཁང་སྒོ་རྒྱག་རྒྱུའི་གྲས་སུ་ཡོད་པ་དང་། ན་གཞོན་ཚོང་ལས་རམ་འདེགས་ལས་གཞི་དང་། སྣར་ཐང་པར་ཁང་སོགས་སྤྱི་ཚོགས་ནང་དཔལ་འབྱོར་འདུ་འགོད་ཀྱི་ཐོག་ལ་ནུས་པ་ཆེན་པོ་འདོན་ཐུབ་པའི་རེ་བ་ཡོད་པ་རྣམས་སྒོ་བརྒྱབ་ན་རང་ཁ་རང་གསོ་བྱ་རྒྱུའི་འཆར་གཞི་ནི་མོ་གཤམ་གྱི་བུ་དང་། རི་བོང་གི་རྭ་ཞེས་པ་ལྟར་ཡོང་མི་སྲིད་པ་ཞིག་ཏུ་གྱུར་ཡོད། གནད་དོན་འདི་ནི་མ་འོངས་པར་ལོ་ལྔ་དང་ལོ་བཅུའི་ནང་བཙན་བྱོལ་སྤྱི་ཚོགས་དང་བོད་མིའི་སྒྲིག་འཛུགས་ལ་འཕྲད་སྲིད་པའི་དཀའ་ངལ་ཞིག་ཏུ་གྱུར་ཡོད།
མདོར་ན་སྲིད་སྐྱོང་དང་བཀའ་ཤག་སྐབས་སོ་སོར་འཛིན་སྐྱོང་གི་ལས་དོན་ཐག་གཅོད་བྱེད་པའི་འགན་དབང་ཡོད་པ་དང་། ཚོང་ལས་དང་འབྲེལ་བའི་ལས་གཞི་ཁག་ལ་དཀའ་ཁག་དང་གདོང་ལེན་བྱེད་དགོས་པ་མང་དག་ཅིག་ཡོད་པས། མི་མང་གིས་རེ་བ་བརྒྱབ་ནས་བདམས་པའི་སྲིད་སྐྱོང་ཞིག་ལ་མཚོན་ན་སེམས་ཁྲལ་དང་སྐུ་ངལ་མང་པོ་ཡོད་པ་སྨྲོས་མི་དགོས་པ་རེད། འགྱུར་བ་ག་རེ་བཏང་ཡང་སྒྲིག་འཛུགས་དང་མི་མང་གི་ཆེད་དུ་ཡིན་དགོས་པ་ལས། ལས་གཞི་དེ་དག་འགོ་འཛུགས་མཁན་དང་། འབད་བརྩོན་བྱེད་མཁན་སུ་ཡིན་མིན་ཙམ་ལ་བརྟེན་ནས་ལས་འཆར་སྒོ་རྒྱག་པ་ཞིག་མིན་པའི་རེ་བ་ཡོད་ལ། གལ་སྲིད་ཡིན་པའི་དབང་དུ་བཏང་ན་ཙི་ཙི་ལ་བསམ་ངན་བྱས་ནས་ཁང་གོག་མེ་ལ་བསྲེག་པ་ལྟ་བུ་རེད། རྒྱུན་རིང་འགྲོ་དགོས་པའི་ལས་གཞི་ཆེ་ཁག་ཚང་མ་ལ་སྲིད་སྐྱོང་དང་བཀའ་ཤག་སྐབས་རེ་རེས་རྦད་དེ་འགྱུར་བ་བཏང་ན། ལོ་ལྔའི་རིང་ལས་གཞི་དེ་དག་དངོས་སུ་ལག་བསྟར་བྱེད་པར་དཀའ་ལས་བོད་མིའི་སྒྲིག་འཛུགས་ཀྱི་ལས་གཞི་ཁག་ཚོད་ལྟ་བྱེད་ཡུལ་ཙམ་ལས་མི་མང་ལ་ཕན་ཐོགས་པ་ཞིག་ཡོང་རྒྱུ་ཁག་པོར་གྱུར་འདུག།།
