ཨི་རན་གྱི་དམག་མི་ཞིག་གིས་ཨ་རིའི་མཐོ་རིམ་ལས་བྱེད་གཉིས་ལྐོག་གསོད་བྱེད་འཆར་ཡོད་འདུག 

ཨ་རིའི་ཁྲིམས་ཞིབ་ཁང་གིས་ཨི་རན་གྱི་དམག་མི་ཞིག་ལ། ཨ་རིའི་གཞུང་གི་བདེ་སྲུང་སློབ་སྟོན་པ་ཟུར་པ་ཞིག་གསོད་ཆེད་དུ་འཆར་གཞི་འཐེན་ཡོད་པའི་ཉེས་འཛུགས་བྱས་འདུག དམག་མི་དེས་ཊོམ་སྲིད་གཞུང་སྐབས་ཀྱི་ཕྱི་སྲིད་བློན་ཆེན་ཡང་ལྐོག་གསོད་བྱེད་འཆར་ཡོད་པ་རེད་འདུག 

ཟླ་༨  པའི་ཚེས་༡༡ ཉིན་རྒྱལ་སྤྱིའི་བརྒྱུད་ལམ་ཁག་ཏུ་གནས་ཚུལ་སྤེལ་གསལ། ཨ་རིའི་ཁྲིམས་ཞིབ་ལས་ཁང་གིས་བརྗོད་དོན་ལྟར་ན། ཨི་རན་གྱི་དམག་སྡེ་ཨི་སེ་ལམ་གསར་བརྗེ་སྲུང་སྐྱོབ་རུ་ཁག་གི་ཚོགས་མི་རང་ལོ་༤༥ ཡིན་པ་ཤཱ་རམ་པུར་སཱ་ཧྥེ་ཞེས་པ་ཞིག་གིས། ཨ་རིའི་ནང་དུ་ཡོད་པའི་མི་ཞིག་དང་འབྲེལ་བ་བྱས་ནས། ཊོམ་སྲིད་གཞུང་སྐབས་ཀྱི་བདེ་སྲུང་སློབ་སྟོན་པ་ཟུར་པ་རྗོན་བྷོལ་ཊོན་ལྐོག་གསོད་བྱས་ཚེ། ཨ་སྒོར་འབུམ་གསུམ་སྤྲོད་རྒྱུ་ཡིན་སྐོར་བརྗོད་ནས། ཁོ་གཉིས་བར་དེའི་ཐད་སྐད་ཆ་མང་པོ་བྱུང་ཡོད་འདུག དེ་བཞིན་རྗོན་བྷོལ་ཊོན་ལྐོག་གསོད་བྱས་ཚར་རྗེས་ལས་ཀ་གཉིས་པ་ཞིག་ཡོད་པ་དང་། དེའི་ཆེད་དུ་ཨ་སྒོར་ས་ཡ་གཅིག་སྤྲོད་རྒྱུའི་སྐད་ཆ་ཡང་བྱུང་ཡོད་འདུག གསང་བའི་ལས་ཁུངས་ཁག་གིས་བརྗོད་དོན་ལྟར་ན། ལས་ཀ་གཉིས་པ་དེ་ནི་ཊོམ་སྲིད་གཞུང་སྐབས་ཀྱི་ཕྱི་སྲིད་བློན་ཆེན་མེག་པོམ་པཱི་ལྐོག་གསོད་བྱེད་རྒྱུ་ཡིན་པ་རེད་འདུག 

ཨ་རིའི་ཁྲིམས་ཞིབ་ཁང་གིས་ཨི་རན་གྱི་དམག་མི་དེར་ཉེས་འཛུགས་བྱས་ཡོད་ཀྱང་། ཨི་རན་གཞུང་གིས་ཉེས་འཛུགས་དེ་ནི་རྫུན་མ་ཡིན་པ་དང་། ཁུངས་ལྡན་མེད་པའི་ཉེས་འཛུགས་དེའི་འོག་ཏུ་ཨི་རན་གྱི་མི་སེར་ཐོག་ཏུ་བྱ་སྤྱོད་གང་ཡང་སྤེལ་མི་ཆོག་པའི་ཉེན་བརྡ་བཏང་ཡོད་པ་རེད་འདུག 

དེ་ཡང་ཨ་རིས་བརྗོད་དོན་ལྟར་ན། དེ་སྔོན་ཨ་རིས་ཨི་རན་གྱི་དམག་སྤྱི་ཞིག་ལ་གནམ་ཐོག་ནས་དྲག་རྒོལ་བྱས་ཏེ་དམར་གསོད་བཏང་ཡོད་པས། དེའི་དགྲ་ལན་དུ་ཨི་རན་གྱི་དམག་མི་དེས་དམག་སྤྱིའི་གོ་གནས་དང་མཉམ་པའི་ཨ་རིའི་མཐོ་རིམ་ལས་བྱེད་དམ་ཟུར་པ་ཞིག་ལྐོག་གསོད་བྱས་ཏེ་བརྡ་ལན་དྲག་པོ་སྤྲོད་རྩིས་བྱས་ཡོད་སྐོར་བརྗོད་བཞིན་འདུག 

དེ་ཡང་བདེ་སྲུང་སློབ་སྟོན་པ་ཟུར་པ་རྗོན་བྷོལ་ཊོན་ནི་ཨི་རན་གྱི་སྲིད་གཞུང་ལ་སྡངས་སེམས་ཆེན་པོ་ཡོད་མཁན་ཞིག་ཡིན་ཁར། ཡོངས་གྲགས་ཐོག་ནས་སྲིད་གཞུང་འཕོ་འགྱུར་གཏོང་བར་རྒྱབ་སྐྱོར་བྱེད་མཁན་ཞིག་དང་། ཊོམ་ནས་ཨི་རན་གྱི་རྡུལ་མཚོན་གྲོས་མཐུན་ནས་ཕྱིར་འཐེན་བྱེད་པར་རྒྱབ་སྐྱོར་བྱེད་མཁན་ཞིག་ཡིན་འདུག དེ་བཞིན་ཉེ་ཆར་ཁོང་གིས་དེ་སྔོན་ཁོང་གིས་རྒྱལ་ཁབ་གཞན་ནང་དུ་སྲིད་གཞུང་འཕོ་འགྱུར་གཏོང་ཆེད་དུ་གསང་བའི་ཐེ་བྱུས་བྱེད་མྱོང་ཡོད་སྐོར་བརྗོད་འདུག ཁོང་གིས་ཨ་རིའི་གསང་བ་ལས་ཁུངས་སོགས་ནས་ལྐོག་གསོད་ཀྱི་འཆར་གཞི་དེ་བཀག་འགོག་བྱེད་ཐུབ་པར་ཐུགས་རྗེ་ཆེ་ཞུས་འདུག་པ་དང་། བརྒྱུད་ལམ་ཁག་ཏུ་ཨ་རིའི་ཐོག་ཏུ་ཨི་རན་གྱི་ཉེན་ཚབས་ནི་མུ་མཐུད་གནས་བཞིན་ཡོད་པ། རྗོན་བྷའེ་ཌན་སྲིད་གཞུང་གིས་ཨི་རན་གྱི་རྡུལ་མཚོན་གྲོས་མཐུན་བསྐྱར་གསོ་ཡོང་ཐབས་བྱེད་བཞིན་པ་དེར་སྐྱོན་བརྗོད་བྱས་འདུག དེ་བཞིན་ཁོང་གིས་ཨི་རན་གྱིས་ཁོང་ལྐོག་གསོད་བྱེད་ཆེད་དུ་དངུལ་འབོར་ཉུང་ཉུང་སྤྲོད་རྒྱུ་བྱས་པ་དེར་ངོ་ཚ་པོ་བྱུང་སྐོར་བརྗོད་འདུག 

དེ་བཞིན་འབྲེལ་ཡོད་ལས་བྱེད་གཅིག་གིས་བརྗོད་དོན་ལྟར་ན། ལྐོག་གསོད་ཀྱི་འཆར་གཞི་ནང་ཡོད་པའི་ཕྱི་སྲིད་བློན་ཆེན་ཟུར་པ་མེག་པོམ་པཱི་ལས་གནས་ནས་འཁྱུར་བ་ནས་བཟུང་། ཨ་རིའི་གཞུང་གིས་མུ་མཐུད་ནས་བདེ་སྲུང་ཀྱི་མཐུན་རྐྱེན་སྤྲོད་བཞིན་ཡོད་པ་དང་། ཊོམ་སྲིད་གཞུང་སྐབས་སུ་ཁོང་གིས་ཕྱི་སྲིད་བློན་ཆེན་དང་དེ་བཞིན་དབུས་གསང་བའི་ལས་ཁུངས་ཀྱི་འགན་འཛིན་ལས་ཁུར་ཡང་བཞེས་མྱོང་ཡོད་པས། ཨི་རན་ནས་ཉེན་ཁ་མུ་མཐུད་ཡོད་པ། དེ་བཞིན་ཨ་རིའི་མཐོ་རིམ་ལས་བྱེད་ཟུར་པ་དང་ད་ཡོད་མང་པོ་ཞིག་ལ་ཨི་རན་གྱི་ཉེན་ཁ་ལ་བརྟེན་ནས་བདེ་སྲུང་མཐུན་རྐྱེན་སྦྱོར་བཞིན་ཡོད་སྐོར་བརྗོད་འདུག 

ཕྱི་ལོ་༢༠༡༥ ལོར་ཨི་རན་རྒྱལ་ཁབ་ཀྱིས་རྡུལ་མཚོན་བཟོ་སྐྲུན་ལས་གཞི་མཚམས་འཇོག་ཡོང་ཆེད་དང་། དཀྱིལ་ཤར་ཡུལ་གྲུའི་ནང་མཚོན་ཆ་མཁོ་སྒྲུབ་ཀྱི་འགྲན་སྡུར་དང་དམག་འཁྲུག་གི་ཉེན་ཚབས་ཆུང་དུ་གཏོང་ཆེད། ཨ་རི་དང་དབྱིན་ཡུལ། ཧྥ་རན་སི། འཇར་མན། རྒྱ་ནག ཨུ་རུ་སུ་བཅས་དང་ཨི་རན་བར་གྲོས་མཐུན་ཞིག་བཞག་ནས་མིང་རྟགས་བཀོད་ཡོད་པ་དང་། དེའི་ནང་ཨི་རན་གྱིས་ལོ་༡༥ བར་རྡུལ་མཚོན་བཟོ་སྐྲུན་མཚམས་འཇོག་བྱ་རྒྱུ་དང་། རྡུལ་མཚོན་བཟོ་སྐྲུན་ཆེད་དགོས་མཁོ་ཆེ་བའི་གཏེར་ཁ་ཡུ་རན་ནེམ་གསོག་འཇོག་ཚད་བཀག་བཟོ་རྒྱུ་ཁས་ལེན་བྱེད་དགོས་པ་དང་། དེ་དང་བསྟུན་ནས་ཨ་རི་དང་ཡུ་རོབ་མཐུན་ཚོགས་ཀྱིས་ཨི་རན་ལ་བཀལ་བའི་དཔལ་འབྱོར་ཉེས་ཆད་ཕྱིར་འཐེན་བྱ་རྒྱུ་ཁས་ལེན་བྱས་ཡོད་འདུག་ཀྱང་། ཨ་རིའི་སྲིད་འཛིན་དུ་ཌོ་ནལ་ཊོམ་བདམས་ཐོན་བྱུང་བ་ནས་བཟུང་། གྲོས་མཐུན་དེ་ནི་ནོར་འཁྲུལ་ཅན་ཞིག་ཡིན་པ་དང་། དེ་བཟོ་བཅོས་མ་བྱས་ཚེ་ཨ་རི་ཕྱིར་འཐེན་བྱ་རྒྱུའི་སྡིགས་ར་ཐེངས་མང་བསྐུལ་ཡོད་པ་ལྟར། ཕྱི་ལོ་༢༠༡༨ ལོའི་ཟླ་༥ པའི་ཚེས་༨ ཉིན་སྲིད་འཛིན་ཊོམ་གྱིས་མཐུན་ཕྱོགས་རྒྱལ་ཁབ་ཁག་གི་རེ་སྐུལ་ལ་མ་ལྟོས་པར། ཨ་རི་གྲོས་མཐུན་དེ་ནས་ཕྱིར་འཐེན་བྱས་ནས་ཨི་རན་ལ་དཔལ་འབྱོར་ཉེས་ཆད་བཏང་ནས་རྒྱལ་ཁབ་གཉིས་བར་གྱི་འབྲེལ་ལམ་སྡུག་ཏུ་ཕྱིན་ཡོད་པ་མ་ཟད། ཨི་རན་ལ་དཀའ་ངལ་མང་པོ་ཞིག་འཕྲད་ཡོད་འདུག་པས། ཨི་རན་གྱིས་ཀྱང་གཏེར་ཁ་ཡུ་རན་ནེམ་གསོག་འཇོག་གི་ཚད་བཀག་ལས་མང་བ་གསོག་སྒྲུབ་བྱེད་འགོ་བཙུགས་ཡོད་པ་རེད་འདུག 

ད་ལྟའི་ཆར་ཨ་རིའི་སྲིད་གཞུང་གསར་པས་ཨི་རན་གྱི་རྡུལ་མཚོན་གྲོས་མཐུན་དེ་བསྐྱར་གསོ་ཡོང་ཆེད་དུ་གྲོས་མོལ་བྱེད་རྒྱུར་གྲ་སྒྲིག་ཡིན་སྐོར་བརྗོད་ཡོད་པ་དང་། ཡུ་རོབ་མཐུན་ཚོགས་ཀྱིས་ཀྱང་ལས་དོན་དེར་རྒྱབ་སྐྱོར་གང་ཡོང་བྱེད་བཞིན་ཡོད་པའི་གནས་ཚུལ་འདུག །

གསར་འགོད་པ་སྐལ་བཟང་དོན་གྲུབ།