ཨུ་བྱང་གཉིས་སུ་ཞིག་ལ་དྲག་རྒོལ་བྱུང་ཡང་ཕན་ཚུན་རོགས་རམ་བྱེད་རྒྱུའི་གྲོས་མཐུན་བཞག་འདུག

ཟླ་འདིའི་ཚེས་༢༠ ་ཉིན་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་སྤེལ་གསལ་ལྟར་ན། ཁ་སང་རེས་གཟའ་ལྷག་པའི་ཉིན་ཨུ་རུ་སུ་དང་བྱང་ཀོ་རི་ཡའི་སྲིད་འཛིན་བར་གལ་སྲིད་རྒྱལ་ཁབ་གང་ཞིག་ལ་དྲག་རྒོལ་བྱུང་ཚེ། ཕན་ཚུན་རོགས་རམ་བྱ་རྒྱུའི་གྲོས་མཐུན་ཞིག་བཞག་ཡོད་པ་དང་། ལྷག་པར་དུ་ཉེ་བའི་ལོ་ཤས་ནང་ཨུ་རུ་སུ་དང་བྱང་ཀོ་རི་ཡའི་བར་གྱི་འབྲེལ་ལམ་ཟབ་ཏུ་ཕྱིན་ཡོད་པའི་གནས་ཚུལ་ཐོན་འདུག

ཕྱི་ལོ་༢༠༡༩ ཟླ་༤ ་པའི་ནང་ཨུ་རུ་སུའི་སྲིད་འཛིན་དང་བྱང་ཀོ་རི་ཡའི་སྲིད་འཛིན་གཉིས་བར་ཕྱོགས་གཉིས་ཀྱི་ལྷན་ཚོགས་ཤིག་ཏུ་ཆེས་ཐོག་མའི་ལྷན་འཛོམས་བྱུང་ཞིང་། ཨ་རི་དང་ལྷོ་ཀོ་རི་ཡའི་རྒྱལ་ཁབ་གཉིས་ཀྱི་སྲིད་འཛིན་བར་མཇལ་འཕྲད་གནང་རྗེས། དམག་དོན་དང་དཔལ་འབྱོར་སོགས་ཀྱི་འབྲེལ་ལམ་བྱེད་ཤུགས་ཆེ་རུ་ཕྱིན་སོང་ཞེས་བརྗོད་འདུག། དེ་ནས་ཕྱི་ལོ་༢༠༢༠ ་ལོར་རྒྱ་ནད་ཀྱི་དབང་གིས་བྱང་ཀོ་རི་ཡས
ཕྱོགས་གཉིས་ཀྱི་མཐའ་མཚམས་དང་། རྒྱ་ནག་དང་བྱང་ཀོ་རུ་ཡའི་བར་གྱི་མཐའ་མཚམས་སྒོ་བརྒྱབ་ཡོད་འདུག

ཕྱི་ལོ་༢༠༢༢ ་ལོར་སྲིད་འཛིན་པུ་ཊིན་གྱིས་དམག་དཔུང་ལ་ཡུག་རེན་ལ་བཙན་འཛུལ་བྱེད་དགོས་པའི་བཀའ་གཏོང་བའི་སྐབས། བྱང་ཀོ་རི་ཡས་བྱ་སྤྱོད་དེ་ནི་ཨ་རི་གཙོས་པའི་ནུབ་ཕྱོགས་པའི་སྲིད་བྱུས་ལ་ངོ་རྒོལ་གྱི་བྱ་སྤྱོད་ཅིག་རེད་ཅེས་བརྗོད་ནས་ཨུ་རུ་སུ་ལ་རྒྱབ་སྐྱོར་བྱས་རྗེས། དེའི་ལན་དུ་ལོ་དེའི་ཕྱི་ཟླ་༣ ་པའི་ནང་། ཨུ་རུ་སུས་མཉམ་འབྲེལ་རྒྱལ་ཚོགས་ཀྱི་བདེ་འཇགས་ལྷན་ཁང་དུ་ཨ་རིས་ཁྱེར་ཡོང་བའི་བྱང་ཀོ་རི་ཡ་ལ་ཉེས་ཆད་མང་དུ་གཏོང་རྒྱུའི་གྲོས་ཆོད་ལ་དགག་བྱ་བྱས་ནས་གྲོས་ཆོད་འགྲོ་བཅུག་མི་འདུག

ན་ནིང་ཟླ་༧ ་པའི་ནང་ཨུ་རུ་སུའི་སྲིད་འཛིན་པུ་ཊིན་གྱིས་ཨུ་རུ་སུའི་རྒྱལ་སྲུང་བློན་ཆེན་བྱང་ཀོ་རི་ཡ་ལ་མངགས་པའི་སྐབས། སྲིད་འཛིན་ཀེམ་ཇོམ་གྱིས་ཁོང་ཉིད་མཚོན་ཆ་འགྲེམས་འཇོག་བྱེད་ས་ལ་ལྟ་སྐོར་དུ་ཁྲིད་ཡོད་འདུག དུས་དེ་ནས་ཟླ་བ་གཉིས་ཀྱི་རྗེས་སུ་བྱང་ཀོ་རི་ཡའི་སྲིད་འཛིན་གྱིས་ཁྱད་ཆོས་ལྡན་པའི་མདེའུ་འགོག་མེ་འཁོར་ལྗང་ཁུ་ལ་བསྡད་ནས་ཨུ་རུ་སུ་ལ་ཕྱིན་ཏེ་ཕྱོགས་གཉིས་བར་གྱི་ལྷན་ཚོགས་ཐེངས་གཉིས་པའི་ནང་ཞུགས་ཤིང་། ལྷན་ཚོགས་ཐོག་ཕྱོགས་གཉིས་བར་དམག་དོན་མཉམ་ལས་དང་ཡུག་རེན་གྱི་དམག་འཁྲུག ཨུ་རུ་སུས་བྱང་ཀོ་རི་ཡའི་འཁོར་སྐར་(Satellite) ་ལས་གཞི་འཕེལ་རྒྱས་གཏོང་བར་རོགས་རམ་བྱེད་རྒྱུ་སོགས་ཀྱི་ཐོག་ལ་གོ་བསྡུར་བྱས་ཡོད་འདུག ཕྱི་ལོ་༢༠༢༣ ་ལོར་བྱང་ཀོ་རི་ཡས་གསང་མྱུལ་འཁོར་སྐར་ཞིག་ཆེས་ཐོག་མ་འཁོར་ལམ་(Orbit)་དུ་བསྐྱལ་ཐུབ་ཡོད་འདུག

ཕྱི་ལོ་༢༠༢༣ ་ཡི་ལོ་མཇུག་ཏུ་ཨུ་རུ་སུ་ལ་གོ་མཚོན་གྱི་དཀའ་ངལ་འཕྲད་བཞིན་པའི་གནས་ཚུལ་རྣམས་གསར་འགྱུར་བརྒྱུད་ལམ་ཁག་ཏུ་ཐོན་པ་དང་། སྐབས་དེར་ཨ་རིས་བྱང་ཀོ་རི་ཡས་ཨུ་རུ་སུ་ལ་གོ་མཚོན་མཁོ་སྤྲོད་བྱས་པར་སྐྱོན་བརྗོད་བྱས་ཡོད་པར་ལྟར། ཉེ་ཆར་ཨུ་རུ་སུའི་སྲིད་འཛིན་བྱང་ཀོ་རི་ཡ་ལ་འཚམས་འདྲི་སྐྱོད་སྐབས། བྱང་ཀོ་རི་ཡས་ཨུ་རུ་སུ་ལ་རྒྱབ་སྐྱོར་བྱས་པར་བསྔགས་བརྗོད་བྱས་ཡོད་འདུག

ཁ་སང་རེས་གཟའ་ལྷག་པའི་ཉིན་ཨུ་རུ་སུ་དང་བྱང་ཀོ་རི་ཡའི་སྲིད་འཛིན་བར་གལ་སྲིད་རྒྱལ་ཁབ་གང་ཞིག་ལ་དྲག་རྒོལ་བྱུང་ཚེ། ཕྱོགས་གཉིས་ཀྱིས་ཕན་ཚུན་རོགས་རམ་བྱེད་རྒྱུའི་གྲོས་མཐུན་ཞིག་ལ་མིང་རྟགས་བཀོད་ཡོད་འདུག རྒྱ་གར་ལ་རྟེན་གཞི་བྱས་པའི་(Fistpost) ་ཞེས་པའི་གསར་ཁང་ཐོག གྲོས་མཐུན་གྱི་ནང་དོན་ཞིབ་ཕྲ་གསལ་པོ་ཤེས་ཀྱི་མེད་ན་ཡང་། གྲང་དམག་མཇུག་བསྒྲིལ་བ་ནས་བཟུང་ཕྱོགས་གཉིས་ཀྱི་འབྲེལ་བ་མཐོ་ཤོས་སུ་ཆགས་པར་མཚོན་ཞེས་དང་། ཐེངས་འདིའི་འཚམས་འདྲི་དང་འབྲེལ་བྱང་ཀོ་རི་ཡའི་སྲིད་འཛིན་གྱིས། རྒྱལ་ཁབ་གཉིས་ཀྱི་འབྲེལ་བ་ནི་དུས་རབས་གོང་མའི་སྐབས་ཀོ་རི་ཡ་དང་ཨུ་རུ་སུ་མཉམ་འབྲེལ་རྒྱལ་ཁབ་བར་གྱི་འབྲེལ་ལམ་དང་བསྡུར་ཐབས་མེད་པར་དར་རྒྱས་ཀྱིས་དུས་རབས་གསར་པ་ཞིག་ལ་ཞུགས་བཞིན་ཡོད་ཅེས་བརྗོད་འདུག

ཨ་རི་གཙོས་པའི་ནུབ་ཕྱོགས་རྒྱལ་ཁབ་ཚོས་བྱང་ཀོ་རི་ཡ་ཟུར་དུ་ཕུད་པ་དང་ཨུ་རུ་སུ་གྲོགས་མེད་ཁེར་རྐྱང་དུ་བཟོ་ཐབས་བྱས་ཀྱང་། ཨུ་རུ་སུ་དང་བྱང་ཀོ་རི་ཡའི་བར་རིག་གཞུང་བརྗེ་ལེན་དང་བཟའ་འབྲུ་མཁོ་སྤྲོད་བྱེད་རེས། དམག་དོན་དང་དཔལ་འབྱོར་སོགས་ཀྱི་ཐོག་མཉམ་ལས་བྱེད་ཤུགས་ཆེ་རུ་ཕྱིན་ནས་ཕྱོགས་གཉིས་བར་གྱི་འབྲེལ་བ་སྔར་ལས་ཇེ་ཆེར་འགྲོ་བཞིན་ཡོད་འདུག།

གསར་འགོད་པ། བློ་བཟང་རྒྱ་མཚོ།