ཨུ་རུ་སུ་དང་ཡུག་རེན་གཉིས་ཀྱིས་མུ་མཐུད་གྲོས་མོལ་བྱེད་འཆར་འདུག

ཟླ་འདིའི་ཚེས་༡༥ ཉིན་ཨུ་རུ་སུས་ཡུག་རེན་ལ་དམག་འཁྲུག་བྱས་ནས་ཉིན་གྲངས་ཉི་ཤུ་པ་དེ་འགྲོ་བཞིན་ཡོད་པ་དང་། དབྱིན་ཇིའི་གསར་ཤོག་The Guardian ཞེས་པའི་ཐོག་ཨུ་རུ་སུ་ཡིས་ཡུག་རེན་ལ་དམག་འཁྲུག་བྱེད་པའིི་དུས་ཡུན་རིང་རྒྱ་ནག་གིས་ཨུ་རུ་སུ་ལ་དཔལ་འབྱོར་དང་དངུལ་རྩིས་ཀྱི་རྒྱབ་སྐྱོར་བྱེད་རྒྱུ་ཐག་གཅོད་ཟིན་པ་དང་། ད་ལྟའི་ཆ་དམག་གིི་ཁོ་ཆས་གཏོང་དགོས་མིན་ལྟ་བཞིན་པས་ཨ་རིིའི་ཕྱོགས་ནས་དེ་ལ་སེམས་འཚབ་བྱེད་བཞིན་ཡོད་པ་བཅས་བཀོད་འདུག

གཞན་ཡང་ཨུ་རུ་སུ་དང་ཡུག་རེན་གྱི་གྲོས་མོལ་ནི་དེ་རིང་རེས་གཟའ་མིག་དམར་ཉིན་མུ་མཐུད་བྱེད་འཆར་ཡོད་པ་དང་། ཁ་སང་རེས་གཟའ་ཟླ་བའི་མཚན་མོ་དེར་ཡུག་རེན་སྲིད་འཛིན་གྱིས་གཏམ་བཤད་ཅིག་གནང་བའི་ཁྲོད་ཁོང་གིས་ཨུ་རུ་སུའི་དམག་མི་ལ་མགོ་བཏགས་བྱེད་རྒྱུའི་འབོད་སྐུལ་ཞུས་ཡོད་པ་མ་ཟད། ཁོང་གིས་ཁོང་ཚོ་དང་ཐད་ཀར་གཏམ་བཤད་ཅིག་གནང་བའི་སྐབས། ཨུ་རུ་སུའི་དམག་མི་རྣམས་ལ་ཁྱེད་ཚོ་སུའི་ཆེད་དུ་ཤི་བཞིན་ཡོད་དམ་ཞེས་དྲིས་པ་དང་། གལ་སྲིད་ཁྱེད་ཚོས་ང་ཚོའི་སྟོབས་ཤུགས་ལ་མགོ་བཏགས་བྱས་པ་ཡིན་ན་ང་ཚོས་ཁྱེད་ཚོ་ལ་འགྲོ་བ་མིི་ཞིག་ལ་ལྟ་སྐྱོང་ཇི་ལྟར་དགོས་པ་བཞིིན་ཆེ་མཐོང་དང་ལྡན་པའི་ཐོག་ནས་ལྟ་སྐྱོང་བྱེད་རྒྱུ་ཡིན་ཞེས་བརྗོད་འདུག

རྒྱ་གར་གྱི་གསར་ཤོག་The Indian Express གིས་གནས་ཚུལ་བཀོད་གསལ་ལྟར་ན། ཁ་སང་རེས་གཟའ་ཟླ་བའི་ཕྱི་དྲོ་རྒྱལ་ཁབ་ཉེར་བདུན་ལས་གྲུབ་པའི་ཡོ་རོབ་གནའ་འབྲེལ་མཐུན་ཚོགས་ཀྱིས་ཨུ་རུ་སུས་ཡུག་རེན་ལ་བཙན་འཛུལ་བྱེད་པ་དེ་ལ་ཉེས་ཆད་ཐེངས་བཞི་པ་འགེལ་རྒྱུ་ཡི་བཀའ་ཁྲོལ་གནང་བ་གསལ་བསྒྲགས་གནང་འདུག ཉེས་ཆད་ཀྱི་གསལ་བསྒྲགས་དེ་ནི་ཡོ་རོབ་མནའ་འབྲེལ་རྒྱལ་ཁབ་ཕན་ཚུན་གྲོས་མོལ་བྱས་ནས་བཀའ་ཁྲོལ་བྱུང་བ་དང་དེའི་དམིགས་ས་ནི་ཡུག་རེན་ལ་བཙན་འཛུལ་བྱེད་མཁན་གྱི་ནང་དུ་ཚུད་པའི་ཚོགས་སྡེ་དང་མི་སྒེར། དེ་བཞིན་ཨུ་རུ་སུའི་དཔལ་འབྱོར་སྡེ་ཁག་ཁ་ཤས་ཡིན་ཞེས་བཀོད་འདུག་ལ། ད་ལྟའི་ཆར་ཡོ་རུབ་ཀྱིས་བཀག་འགོག་དེ་ནི་མི་སྒེར་པ་༨༦༢ དང་ཚོགས་སྡེ་༥༣ ལ་བཀག་ཡོད་པ་གསལ་འདུག །

གསར་འགོད་པ་བློ་བཟང་རྒྱ་མཚོ།