ཨུ་རུ་སུ་དང་ཡུག་རེན་གྱི་དམག་འཁྲུག་ལས་སློབ་གསོ་གསུམ་ཐོབ་སོང་ཟེར།

ཟླ་འདིའི་ཚེས་༥ ཉིན་བྱང་ཆིངས་རྩ་འཛུགས་ཀྱི་དྲྭ་ངོས་སུ་གནས་ཚུལ་སྤེལ་གསལ་ལྟར་ན། བྱང་ཆིངས་རྩ་འཛུགས་ཀྱི་སྤྱི་ཁྱབ་དྲུང་ཆེ་ནོར་ཝེར་དུ་ཕེབས་ནས་ཡུག་རེན་ལ་རྒྱབ་སྐྱོར་བྱེད་རྒྱུ་གལ་ཆེན་ཡིན་པའི་ཐོག་ལ་གཏམ་བཤད་གནང་ཡོད་པ་དང་། སྐབས་དེ་ཁོང་གིས་ཐེངས་འདི་ཨུ་རུ་སུ་དང་ཡུག་རེན་གྱི་དམག་འཁྲུག་ལས་སློབ་གསོ་གསུམ་ཐོབ་སོང་ཞེས་བརྗོད་འདུག

ཟླ་འདིའི་ཚེས་༥ ཉིན་བྱང་ཆིངས་རྩ་འཛུགས་ཀྱི་སྤྱི་ཁྱབ་དྲུང་ཆེ་ (Jens Stoltenberg) ནོར་ཝེར་ལ་ཕེབས་ནས་ཆེད་ལས་པའི་གླེང་སྟེགས་ཤིག་གི་ཐོག་ལ་གཏམ་བཤད་གནང་ཡོད་པ་དང་། སྐབས་དེར་ཁོང་གིས་ད་ལྟའི་ཆར་གོ་ལ་གཅིག་གྱུར་དང་དམངས་གཙོ་རིང་ལུགས་ཉམས་རྒུད་དུ་འགྲོ་བཞིན་ཡོད་པའི་ཁར། མི་གཅིག་དབང་སྒྱུར་རིང་ལུགས་དར་རྒྱས་སུ་འགྲོ་བཞིན་ཡོད་པས་ད་ལྟའི་འཛམ་གླིང་ནི་སྔ་དང་མི་འདྲ་བ་ཞིག་ཏུ་འགྱུར་བཞིན་ཡོད་པ་དང་། གལ་སྲིད་ཨུ་རུ་སུ་ཐེངས་འདིའི་དམག་འཁྲུག་ལས་རྒྱལ་ཁ་ཐོབ་ཚེ། དེ་ནི་ཡུག་རེན་མི་མང་གི་སྐྱོ་གར་ཙམ་མ་ཟད། མི་གཅིག་དབང་སྒྱུར་རིང་ལུགས་པ་ཚོ་ལ་དམག་ཤུགས་བེད་སྤྱོད་བྱས་ན་སོ་སོ་ལ་གང་དགོས་པ་དེ་རག་གི་ཡོད་པའི་བརྡ་ལན་ཞིག་སྤྲད་ཀྱི་ཡོད་པས་དེ་ནི་ཡུ་རོབ་ཀྱི་ཉེན་ཁ་ཞིག་ཀྱང་རེད་ཅེས་བརྗོད་ཡོད་འདུག་ལ། ཨུ་རུ་སུ་དང་ཡུག་རེན་གྱི་དམག་འཁྲུག་དེ་ག་དུས་མཚམས་འཇོག་བྱེད་ཀྱི་ཡོད་པ་དང་། གང་འདྲ་མཚམས་འཇོག་བྱེད་ཀྱི་ཡོད་པ་སུས་ཀྱང་བརྗོད་ཐབས་བྲལ་ཡང་། དམག་འཁྲུག་ཕལ་མོ་ཆེ་གྲོས་མོལ་གྱིས་མཚམས་འཇུག་བྱེད་ཀྱི་ཡོད་པ་བཞིན། ཐེངས་འདིའི་དམག་འཁྲུག་ཀྱང་གྲོས་མོལ་གྱིས་མཇུག་སྒྲིལ་རྒྱུ་རེད་ཅེས་བརྗོད་ཡོད་འདུག

དེ་བཞིན་ཁོང་གིས་ཨུ་རུ་སུ་དང་ཡུག་རེན་གཉིས་ཀྱི་དམག་འཁྲུག་ལས་སློབ་གསོ་གསུམ་ཞིག་རག་ཡོད་པའི་སྐོར་ལ་གསུང་དོན། སློབ་གསོ་དང་པོ་དེ་བྱང་ཆིངས་རྩ་འཛུགས་ཀྱིས་འགོག་སྲུང་གི་ཐད་མ་དངུལ་སྔ་ལས་མང་པ་གཏོང་དགོས་པ་དང་། དམག་མི་ཚོ་ལ་དེང་རབས་ཀྱི་མཚོན་ཆ་ལྡན་དགོས་པ་དང་། སྦྱོང་བརྡར་ལེགས་པོ་བྱེད་དགོས་པ་དང་དེ་ལ་དངུལ་གྱི་འགྲོ་སོང་གཏོང་དགོས་ཀྱི་ཡོད་པ་དེ་ཡིན་རབས་དང་། སློབ་གསོ་གཉིས་པ་ནི་མི་གཅིག་དབང་སྒྱུར་རིང་ལུགས་པ་ལ་བརྟེན་མི་རུང་བ་དང་། ཉེ་བའི་ལོ་ཁ་ཤས་ཀྱི་སྔོན་དུ་ཨུ་རུ་སུའི་རྩ་ནས་སྣུམ་དང་སོལ་རླངས་ཉོ་རྒྱུ་ནི་ཚོང་དོན་ཁོ་ནའི་གནད་དོན་ཞིག་ལ་ཆ་འཇོག་བྱས་ཡོད་རུང་། དོན་དངོས་ཐོག་དེ་ནི་ཆབ་སྲིད་ཀྱི་གནད་དོན་ཞིག་ཡིན་པ་མ་ཟད། ཡུ་རོབ་ཀྱི་བདེ་འཇགས་ཀྱི་གནད་དོན་ཞིག་ཡིན་པས་ཚོང་ལས་ཀྱང་ཆབ་སྲིད་ཡིན་པར་བརྟེན། རྒྱ་ནག་གཙོས་པའི་མི་གཅིག་དབང་སྒྱུར་རིང་ལུགས་པ་ཚོ་ལ་བརྟེན་རྒྱུའི་ནོར་འཁྲུལ་ཡང་བསྐྱར་བཟོ་མི་རུང་བ་དེ་ཡིན་ཞེས་དང་།

སློབ་གསོ་གསུམ་པ་དེ་ནི་མི་གཅིག་དབང་སྒྱུར་རིང་ལུགས་པ་ཚོས་མཉམ་ལས་བྱེད་ཀྱི་ཡོད་པ་དང་། ཨུ་རུ་སུས་ཡུག་རེན་ལ་བཙན་འཛུལ་མ་བྱས་གོང་། ཨུ་རུ་སུའི་སྲིད་འཛིན་དང་རྒྱ་ནག་གི་སྲིད་འཛིན་བར་ཐུག་འཕྲད་བྱས་ཡོད་པ་དང་། སྐབས་དེ་ཁོང་གཉིས་ཐབས་བྱུས་ཀྱི་རོགས་ཟླ་ཡིན་ཞེས་གསལ་བསྒྲགས་སྤེལ་ཡོད་པ་དང་། ད་ལྟའི་ཆར་ཨུ་རུ་སུ་དང་རྒྱ་ནག་གཉིས་ཀྱིས་དམག་དོན་ཙམ་དུ་མ་ཟད། དཔལ་འབྱོར་ཐོག་སྔ་ལས་ལྷག་མཉམ་ལས་བྱེད་བཞིན་ཡོད་པ་དང་། ལྷག་པར་དུ་ཨུ་རུ་སུས་བྱང་ཀོ་རི་ཡ་དང་ཨེ་རན་སོགས་དང་མཉམ་དུ་ཡང་འབྲེལ་བ་བཟོ་བཞིན་ཡོད་པས། དམངས་གཙོ་དང་རང་དབང་ལ་གུས་བརྩི་བྱེད་མཁན་ཚོ་མཉམ་དུ་ལངས་དགོས་རྒྱུ་དེ་གལ་འགངས་ཆེན་མོ་རེད་ཅེས་བརྗོད་ཡོད་འདུག།

གསར་འགོད་པ། བློ་བཟང་རྒྱ་མཚོ།