ཨུ་རུ་སུ་དང་ཡུག་རེན་གྱི་དམག་འཁྲུག་ཉིན་༩༡ རིང་གི་གསར་གནས་ཆེ་ཁག

ཨུ་རུ་སུ་དང་ཡུག་རེན་གཉིས་ཀྱི་བར་དུ་དམག་འཁྲུག་བྱུང་ནས་ད་བར་ཉིན་གྲངས་དགུ་བཅུ་གོ་གཅིག་ཕྱིན་པའི་ནང་དུ་ཐོན་པའི་གསར་འགྱུར་ཆེ་ཁག་དྲུག

1) ལོ་འདིའི་ཕྱི་ཟླ་གཉིས་པའི་ཚེས་༢༤ ཉིན་ཨུ་རུ་སུ་དང་ཡུག་རེན་བར་གྱི་དམག་འཁྲུག་དེ་འགོ་བཙུགས་ནས་ད་ལྟའི་བར་དུ་ཉིན་གྲངས་༩༡ ཕྱིན་ཡོད་པ་དང་། ཉིན་གྲངས་དེ་དག་གི་རིང་ཡུག་རེན་གྱི་མི་སེར་ཁྲི་གཉིས་དང་ཉིས་སྟོང་ལྷག་དང་ཨུ་རུ་སུའི་མི་མང་ཁྲི་གཅིག་དང་ལྔ་སྟོང་ལྷག་གི་ཚེ་སྲོག་ཤོག་ཡོད་འདུག

2) ཨུ་རུ་སུ་དང་ཡུག་རེན་བར་གྱི་དམག་འཁྲུག་ལ་བརྟེན་ནས་ད་བར་ཡུག་རེན་གྱི་མི་མང་ས་ཡ་དྲུག་ལྷག་ཁྱིམ་མཚེས་རྒྱལ་ཁབ་ཏུ་བྲོས་བྱོལ་ལམ་སྐྱབས་བཅོལ་དུ་ཕྱིན་ཡོད་པ་དང་། མི་མང་ས་ཡ་བརྒྱད་ལྷག་རང་ཁྱིམ་དང་ཁ་བྲལ་དགོས་པ་བྱུང་འདུག་པས། ཁྱོམ་བསྡོམས་མི་མང་ས་ཡ་༡༤ ལྷག་རང་ཁྱིམ་དང་བྲལ་ནས་ས་གནས་གཞན་དུ་གནས་སྤོ་བྱེད་དགོས་པ་བྱུང་འདུག་པས་ཡུ་རོབ་ཁུལ་དུ་དམག་ཆེན་གཉིས་པའི་རྗེས་སུ་སྐྱབས་བཅོལ་བའི་དཀའ་ངལ་ཆེ་ཤོས་སུ་འགྱུར་ཡོད་འདུག

༣) ཨ་རི་དང་ཡུ་རོབ་རྒྱལ་ཁབ་ཁག་གིས་ཨུ་རུ་སུས་ཡུག་རེན་ལ་བཙན་འཛུལ་བྱེད་པ་ཞིག་ལ་ངོས་འཛིན་བྱེད་ཀྱི་ཡོད་ཀྱང་། ཨུ་རུ་སུའི་ངོས་ནས་དེ་ནི་དམིགས་བསལ་དམག་གི་གཤག་བཅོས་ཤིག་ཏུ་ངོས་འཛིན་བྱེད་ཀྱི་ཡོད། གང་ལྟར་དམག་ཆེན་གཉིས་པའི་རྗེས་སུ་ཡུ་རོབ་ཀྱི་རྒྱལ་ཁབ་གཅིག་ལ་དམག་གིས་དཔུང་འཇུག་བྱེད་པའི་ནང་གི་ཆེ་ཤོས་དེ་ཆགས་ཀྱི་ཡོད་འདུག

༤) རྒྱལ་ཁབ་གཉིས་བར་གྱི་འཐབ་འཛིང་དེ་འགོ་བཙུགས་ནས་ད་ལྟའི་བར་དུ་ཨ་རི་དང་དབྱིན་ཇི་། འཇར་མ་ནི་དང་ཁན་ན་ཊ། ཅེག་སྤྱི་མཐུན་རྒྱལ་ཁབ་དང་ཧྥིན་ལན་ཊི། ཉི་ཧོང་དང་ཧྥ་རན་སི་སོགས་ཀྱིས་ཡུག་རེན་ལ་དམག་གི་གོ་མཚོན་མཁོ་སྤྲོད་བྱས་པ་དང་། དེ་བཞིན་རྒྱལ་ཁབ་དང་རྒྱལ་སྤྱིའི་ཚོགས་སྡེ་མང་པོས་ཡུག་རེན་ལ་དཔལ་འབྱོར་གྱི་རོགས་རམ་བྱས། ཕྱོགས་གཞན་ཞིག་ནས་ཡུ་རོབ་མཐུན་ཚོགས་ཀྱིས་ཨུ་རུ་སུ་ལ་ཉེས་ཆད་ཐེངས་ལྔ་བཅད་ཡོད་པ་དང་དེ་བཞིན་ཨ་རི་དང་ཡུ་རོབ་ཀྱི་རྒྱལ་ཁབ་ཁག་གཅིག་དང་ཉི་ཧོང་སོགས་ཀྱིས་ཀྱང་ཨུ་རུ་སུ་ལ་དཔལ་འབྱོར་གྱི་ཉེས་ཆད་བཅད་ཡོད་ཀྱང་། དམག་འཁྲུག་མཚམས་འཇོག་བྱེད་མ་ཐུབ་པར་མུ་མཐུད་བཞིན་པ་རེད་ལ། ཡུ་རོབ་ཀྱིས་རྒྱལ་ཁབ་དང་ཚོགས་སྡེ་མང་པོས་ཨུ་རུ་སུའི་དངུལ་སྒོར་སྤྱོད་ནས་ཨུ་རུ་སུའི་རྩ་ནས་སོལ་རླངས་ཉོས་དང་ཉོ་བཞིན་པ་རེད་འདུག

༥) ཨུ་རུ་སུ་དང་ཡུག་རེན་བར་གྱི་དམག་འཁྲུག་ལ་བརྟེན་ནས་ཨུ་རུ་སུའི་ཁྱིམ་མཚེས་རྒྱལ་ཁབ་ཧྥི་ལན་ཌ་དང་། སི་ཝེ་ཌན་གཉིས་ཀྱིས་རང་ཉིད་ཀྱི་རྒྱལ་ཁབ་བདེ་འཇགས་ལ་སེམས་ཚབ་དང་སྲུང་སྐྱོབ་ཀྱི་ཆེད་དུ་བྱང་ཆིངས་རྩ་འཛུགས་ཀྱི་ནང་དུ་མཉམ་ཞུགས་བྱེད་རྒྱུའི་གསལ་བསྒྲགས་བཏང་ཡོད་ལ། ཡུག་རེན་གྱི་ཁྱིམ་མཚེས་རྒྱལ་ཁབ་མོ་ཊོ་ཝ་(MOLDOVA) ནི་ཡུ་རོབ་ཀྱི་ལུང་པ་སྐྱོ་ཤོས་གྲལ་ཞིག་ཡིན་པ་དང་། རྒྱལ་ཁབ་ཀྱི་བདེ་འཇག་གི་དོན་དུ་ཡུ་རོབ་མཐུན་ཚོགས་ཀྱི་ནང་དུ་མཉམ་ཞུགས་བྱེད་རྒྱུའི་སྙན་ཞུ་ཕུལ་ཡོད་ལ། དེ་བཞིན་ཇོ་ཇི་ཡ(GEOGIA) ཡིས་ཀྱང་ཡུ་རོབ་མཐུན་ཚོགས་ཀྱི་ནང་དུ་མཉམ་ཞུགས་བྱེད་རྒྱུའི་སྙན་ཞུ་ཕུལ། ཡུག་རེན་ལ་ཨུ་རུ་སུས་བཙན་འཛུལ་བྱེད་བཞིན་པར་རྒྱ་ནག་གིས་ཐེ་ཝན་ལ་བཙན་འཛུལ་བྱེད་སྲིད་པར་ཐེ་ཝན་གྱིས་སེམས་ཚབ་བྱེད་བཞིན་པ་དང་། ལྷག་པར་དུ་ཨ་རིས་དེའི་ཐོག་ལ་ལམ་ཕྱོགས་ཇི་ལྟར་འཛིན་མིན་ཐོག་ལ་སེམས་ཚབ་བྱེད་བཞིན་ཡོད།

༦) ཟླ་འདིའི་ཚེས་༢༡ ཉིན་ཨུ་རུ་སུས་ཡུག་རེན་གྱི་གྲོང་ཁྱེར་མ་རེའུ་པོལ་བླངས་ཟིན་པ་དང་། དེ་ནི་ད་ལྟའི་བར་ཨུ་རུ་སུའི་རྒྱལ་ཁ་ཆེ་ཤོས་སུ་གྱུར་བའི་གནས་ཚུལ་གསར་འགྱུར་ཁག་ཏུ་ཐོན་ཡོད། ད་ལྟའི་ཆར་ཡུག་རེན་གྱི་གྲོང་ཁྱེར་གཞན་དུ་དམག་འཁྲུག་མུ་མཐུད་ལངས་བཞིན་ཡོད་འདུག །

གསར་འགོད་པ་བློ་བཟང་རྒྱ་མཚོ།