ཨུ་རུ་སུའི་ཁྲིམས་བཟོ་བ་ཞིག་རྒྱ་གར་དུ་གྲོངས་ཡོད་འདུག

ཟླ་འདིའི་ཚེས་༢༧ ཉིན་རྒྱ་གར་གྱི་གསར་འགྱུར་བརྒྱུད་ལམ་ཁག་གིས་གནས་ཚུལ་སྤེལ་གསལ་ལྟར་ན། ཨུ་རུ་སུའི་ཁྲིམས་བཟོ་བ་ཞིག་རྒྱ་གར་དུ་གྲོངས་ཡོད་པ་དང་། ཁོང་ནི་ཚོང་པ་འབྱོར་ལྡན་ཅན་ཞིག་དང་ཨུ་རུ་སུའི་དམག་འཁྲུག་ལ་སྐྱོན་བརྗོད་བྱེད་མཁན་ཞིག་ཡིན་འདུག

པེ་ཝེལ་(Pavel Antov) ནི་ཨུ་རུ་སུའི་ཆིག་སྒྲིལ་ཚོགས་པའི་ཚོགས་མི་དང་ཚོང་པ་འབྱོར་ལྡན་ཅན་ཞིག་ཡིན་འདུག་ལ། ཁོང་ཉིད་གུང་གསེང་དང་སྟབས་བསྟུན་ནས་རྒྱ་གར་དུ་སྤྲོ་འཆམ་དང་། ལྷག་པར་དུ་ཁོང་ཉིད་ལོ་ན་༦༦ ལ་སོན་པའི་སྐྱེ་སྐར་སྲུང་བརྩི་བྱེད་དུ་ཡོང་ཡོད་ཀྱང་། ཟླ་འདིའི་ཚེས་༢༥ ཉིན་རྒྱ་གར་གྱི་ཨོ་དྷི་ཤ་མངའ་སྡེའི་ནང་གི་མགྲོན་ཁང་ཞིག་གི་ཐོག་རྩེག་གསུམ་པའི་སྒེའུ་ཁུང་ནས་ལྷུང་སྟེ་འདས་གྲོངས་སུ་གྱུར་ཡོད་པའི་གནས་ཚུལ་ཐོན་འདུག

མངའ་སྡེའི་ཉེན་རྟོག་པ་ཚོས་ཁོང་ཉིད་འདས་གྲོངས་སུ་ཕྱིན་པའི་གནད་དོན་དེ་ནི་རང་སྲོག་གཅོད་པའི་གྱོད་གཞི་ལ་དོགས་པ་ཡོད་རབས་དང་། ཉེ་ཆར་ཁོང་དང་མཉམ་དུ་ཡོང་མཁན་ལས་རོགས་ཤིག་ཀྱང་འདས་གྲོངས་སུ་ཕྱིན་ཡོད་པས་ཁོང་ལ་སེམས་ངལ་ཆེན་མོོ་ཡོད་པ་དང་། ཁོང་ཉིད་འདས་གྲོངས་སུ་ཕྱིན་པའི་གནས་ཚུལ་ཐོག་ལ་ཕྱོགས་ཡོངས་ནས་རྟོག་ཞིབ་བྱེད་རྒྱུ་ཡིན་རབས་ཀྱི་གནས་ཚུལ་ཁག་ཅིག་གསར་འགྱུར་བརྒྱུད་ལམ་ཁག་ལ་བརྗོད་འདུག

ལོ་འདིའི་ཕྱི་ཟླ་༦ པའི་ནང་ཨུ་རུ་སུས་མེ་ཤུགས་འཕུར་མདའ་ཡིས་ཡུག་རེན་ལ་གཏོར་རྒོལ་དྲག་པོ་བྱས་ཡོད་པ་དང་། སྐབས་དེ་ཁོང་གི་གཏོར་རྒོལ་དེ་ནི་འཇིགས་སྐུལ་རིང་ལུགས་ཀྱི་བྱེད་སྟངས་ཤིག་རེད་ཅེས་སྐྱོན་བརྗོད་ཀྱི་ཡི་གེ་ཞིག་ཁོང་ཉིད་ཀྱི་དྲྭ་ངོས་སུ་སྤེལ་ཡོད་ཀྱང་། དུས་ཡུན་ཐུང་ངུ་ཞིག་གི་རྗེས་སུ་ཁོང་གིས་ཡི་གེ་དེ་མི་གཞན་ཞིག་གིས་སྤེལ་ཡོད་པ་ལས་ཁོང་ཉིད་ཀྱིས་སྤེལ་མེད་རབས་བརྗོད་ནས་བཟོད་གསོལ་ཞུས་ཡོད་པ་མ་ཟད། ཁོང་ནི་སྲིད་འཛིན་པུ་ཊིན་གྱི་རྒྱབ་སྐྱོར་བ་ཡིན་ཞེས་བརྗོད་ཡོད་འདུག

ཟླ་འདིའི་ཚེས་༢༢ ཉིན། ཁོང་ཉིད་མ་གྲོངས་གོང་གི་ཉིན་གཉིས་ཀྱི་སྔོན་ལ་ཁོང་གི་གྲོགས་པོ་(Vladimir Bidenov) ཡང་མགྲོན་ཁང་དེ་རང་དུ་སྙིང་རྩ་འགག་ནས་གྲོངས་ཡོད་འདུག་ལ། ད་ལྟའི་ཆར་ཁོང་དང་མཉམ་དུ་ཡོང་མཁན་མི་གཉིས་པོ་དང་ས་གནས་ཉེན་རྟོག་པ་ཚོས་རྟོག་ཞིབ་བྱེད་བཞིན་ཡོད་པའི་གནས་ཚུལ་ཐོན་འདུག།

གསར་འགོད་པ། བློ་བཟང་རྒྱ་མཚོ།