ཨུ་རུ་སུའི་གཞུང་ཚབ་པས་ཡུག་རེན་གྱི་དཀའ་རྙོག་དེ་ཉིན་གཅིག་ནང་སེལ་ཐུབ་ཀྱི་མ་རེད་ཅེས་བརྗོད།

ཟླ་འདིའི་ཚེས་༢ ་ཉིན་རྒྱལ་སྤྱིའི་གསར་འགྱུར་བརྒྱུད་ལམ་ཁག་ཏུ་གནས་ཚུལ་སྤེལ་གསལ་ལྟར་ན། ཨུ་རུ་སུའི་མཉམ་འབྲེལ་རྒྱལ་ཚོགས་ཀྱི་གཞུང་ཚབ་པས་ཡུག་རེན་གྱི་དཀའ་རྙོག་དེ་ཉིན་གཅིག་ནང་སེལ་ཐུབ་ཀྱི་མ་རེད་ཅེས་བརྗོད་ཡོད་པའི་གནས་ཚུལ་ཐོན་འདུག

བདུན་ཕྲག་སྔོན་མའི་ནང་། ཨ་རིའི་སྲིད་འཛིན་འོས་མི་གཉིས་ཀྱི་བར་བགྲོ་གླེང་ཐོག་མ་དེ་བྱེད་སྐབས། སྲིད་འཛིན་ཟུར་པ་ཊོམ་ཕུས་གལ་སྲིད་ཁོང་ཉིད་ཨ་རིའི་སྲིད་འཛིན་དུ་འདེམས་ཐོན་བྱུང་བ་ཡིན་ན། ཆུ་ཚོད་༢༤ ནང་དམག་འཁྲུག་མཇུག་སྒྲིལ་ཐུབ་ཅེས་དང་། གལ་སྲིད་ཨ་རི་ལ་ཨུ་རུ་སུའི་སྲིད་འཛིན་གྱིས་བརྩི་བཀུར་བྱེད་སའི་སྲིད་འཛིན་ཚད་ལྡན་ཞིག་ཡོད་ན། ཨུ་རུ་སུས་ཕྱི་ལོ་༢༠༢༢ ལོར་ཡུག་རེན་ལ་བཙན་འཛུལ་བྱེད་སྲིད་ཀྱི་མ་རེད་ཅེས་བརྗོད་འདུག

གནས་ཚུལ་དེ་དང་འབྲེལ་ཁ་སང་རེས་གཟའ་ཟླ་བའི་ཉིན་གསར་འགོད་པས་ཨུ་རུ་སུའི་མཉམ་འབྲེལ་རྒྱལ་ཚོགས་ཀྱི་གཞུང་ཚབ་པ་ལ་བཅར་འདྲི་བྱེད་སྐབས། ཁོང་གིས་ཡུག་རེན་གྱི་དཀའ་རྙོག་དེ་ཉིན་གཅིག་གི་ནང་སེལ་ཐུབ་ཀྱི་མ་རེད་ཅེས་ལན་འདེབས་བྱས་ཡོད་པ་དང་། དེ་བཞིན་ཁོང་གིས་ནུབ་ཕྱོགས་པ་ཚོས་ཕྱི་ལོ་༢༠༢༢ ཟླ་༤ པའི་ཞི་བདེའི་གྲོས་མཐུན་ལ་བཀག་འགོག་བྱས་ཤིང་། ཡུག་རེན་ལ་ཨུ་རུ་སུ་དང་མུ་མཐུད་འཐབ་འཛིང་བྱེད་དགོས་པའི་བཀའ་བཏང་བར་སྐྱོན་བརྗོད་བྱས་ཡོད་འདུག

གཞན་ཡང་། ཁོང་གིས་ད་ལྟའི་ཆར་ཡུག་རེན་གྱི་སྲིད་འཛིན་གྱིས་ཞི་བདེའི་འཆར་གཞི་ཟེར་བ་ཞིག་ཁྱེར་ནས་འགྲོ་བཞིན་པ་རེད། དེ་ནི་ཞི་བདེའི་འཆར་གཞི་མ་རེད། བཞད་གད་སློང་བྱེད་ཅིག་རེད། ཟླ་བ་སྔོན་མའི་ནང་སུད་སི་ལ་ཡུག་རེན་གྱི་དམག་འཁྲུག་མཇུག་སྒྲིལ་བའི་ཆེད་རྒྱལ་ཁབ་༨༠ ལྷག་གི་སྐུ་ཚབ་འཛོམས་ནས་གྲོས་བསྡུར་བྱས་ཡོད་ཀྱང་། ཡར་རྒྱས་འགྲོ་བཞིན་པའི་རྒྱལ་ཁབ་གལ་ཆེན་ཁ་ཤས་མཉམ་ཞུགས་བྱས་མེད་པ་དང་ཨུ་རུ་སུ་ཡང་ཚོགས་ཆེན་དེར་མཉམ་ཞུགས་བྱས་མེད་ཅེས་བརྗོད་འདུག

ལྷག་པར་དུ་ཟླ་འདིའི་ཚེས་༡༤ ་ཉིན་ཨུ་རུ་སུའི་སྲིད་འཛིན་པུ་ཊིན་གྱིས། གལ་སྲིད་ཡུག་རེན་གྱིས་དམག་དཔུང་དག་ཕྱི་ལོ་༢༠༢༢ ལོར་ཨུ་རུ་སུས་དབང་བསྒྱུར་བྱས་པའི་ས་ཁུལ་བཞི་ནས་ཕྱིར་འཐེན་བྱེད་འགོ་བཙུགས་པ་དང་བྱང་ཆིངས་སྒྲིག་འཛུགས་ནང་ཞུགས་རྒྱུའི་འཆར་གཞི་དོར་ཚེ། ཨུ་རུ་སུས་འཕྲལ་དུ་དམག་འཁྲུག་མཚམས་འཇོག་རྒྱུའི་བཀའ་བཏང་ནས་གྲོས་མོལ་བྱེད་འགོ་འཛུགས་རྒྱུ་ཡིན་ཞེས་པའི་སྐད་ཆ་དེ་གསལ་སྟོན་བྱས་ཡོད་འདུག།

གསར་འགོད་པ། བློ་བཟང་རྒྱ་མཚོ།