ཨུ་རུ་སུའི་དམག་འཁྲུག་ཁྲོད་ཡོད་པའི་རྒྱ་གར་བ་རྣམས་གློད་བཀྲོལ་གཏོང་རྒྱུའི་ཁས་ལེན་བྱས་ཡོད་འདུག

རྒྱ་གར་ནས་མི་མང་པོ་ཞིག་ཨུ་རུ་སུའི་ནང་ལས་ཀ་ཆེད་དུ་འགྲོ་མཁན་བྱུང་ཡོད་འདུག་པ་དང་། ཕྱིས་སུ་ཨུ་རུ་སུ་དང་། ཡུག་རེན་གཉིས་བར་དམག་འཁྲུག་འགོ་འཛུགས་བྱས་ནས་རྒྱ་གར་གྱི་མི་མང་པོ་ཞིག་ཨུ་རུ་སུས་བཙན་གྱིས་དམག་འཁྲུག་ཁྲོད་བཏང་བའི་རྐྱེན་གྱིས། རྒྱ་གར་བ་མང་པོ་ཞིག་དམག་སར་ཤི་རྨས་བྱུང་ཡོད་པ་དང་། ད་ཆར་རྒྱ་གར་གཞུང་གིས་ཨུ་རུ་སུ་དང་འབྲེལ་བ་བྱས་ནས་རྒྱ་གར་གྱི་དམག་མི་རྣམས་ཕྱིར་རྒྱ་གར་ལ་གཏོང་རྒྱུའི་ཁས་ལེན་བྱས་ཡོད་པར་བརྗོད་ཡོད་འདུག 

ཕྱི་ཚེས་༡༠ ཉིན་སྦི་སྦི་སི་གསར་ཁང་གིས་གནས་ཚུལ་སྤེལ་གསལ་ལྟར་ན། རྒྱ་གར་གྱི་ཕྱི་སྲིད་བློན་ཆེན་གྱིས་བརྗོད་དོན་ལ། རྒྱ་གར་གྱི་མི་སེར་ཨུ་རུ་སུའི་དམག་སར་ཡོད་མཁན་དག་ཨུ་རུ་སུས་གང་མགྱོགས་གློད་བཀྲོལ་གཏོང་རྒྱུ་ཡིན་པར་བརྗོད་ཡོད་འདུག གསལ་བསྒྲགས་དེ་ཉེ་ཆར་རྒྱ་གར་གྱི་སྲིད་བློན་མོ་དྷིའི་ཨུ་རུ་སུ་ལ་ལྟ་སྐོར་ཕྱིན་ནས་ལྟ་སྐོར་གྱི་ཉིན་མཐའ་མར་ཨུ་རུ་སུས་བརྗོད་ཡོད་འདུག སྲིད་བློན་མོ་དྷི་ཨུ་རུ་སུ་ལ་ལྟ་སྐོར་འགྲོ་སྐབས་ཨུ་རུ་སུའི་སྲིད་འཛིན་པུ་ཊིན་དང་ལྷན་དུ་གནད་དོན་དེའི་སྐོར་གླེང་སློང་བྱས་ཡོད་འདུག དེ་སྔོན་རྒྱ་གར་གཞུང་གིས་ཨུ་རུ་སུའི་གཞུང་ལ་ཞུ་གཏུག་བྱས་ཡོད་འདུག་པ་དང་། རྒྱ་གར་གྱི་མི་སེར་རྣམས་དམག་སར་མི་གཏོང་རྒྱུ་བྱས་ཡོད་འདུག་ཀྱང་། ཕྱིས་སུ་རྒྱ་གར་གྱི་མི་སེར་དག་དམག་སར་བཏང་ནས་ཉེ་ཆར་རྒྱ་གར་གྱི་མི་སེར་བཞི་ཤི་རྨས་བྱུང་ཡོད་འདུག
བདུན་འདིའི་གཟའ་མིག་དམར་ཉིན་རྒྱ་གར་གྱི་ཕྱི་འབྲེལ་དྲུང་ཆེ་(Vinay Kwatra )ཡིས་སྲིད་བློན་མོ་དྷི་ཨུ་རུ་སུ་ལ་ལྟ་སྐོར་འགྲོ་དུས་གནད་དོན་དེའི་སྐོར་ཞུ་གཏུག་ནན་ཏན་བྱས་ཡོད་པ་དང་། རྒྱ་གར་གྱི་མི་སེར་དམག་སར་མགོ་སྐོར་བཏང་ནས་ཁྲིད་པ་དག་གང་མགྱོགས་གློད་དགོས་པར་བརྗོད་ཡོད་ཚུལ་བཤད་ཡོད་འདུག ད་ཆར་ཨུ་རུ་སུའི་གཞུང་གིས་གང་མགྱོགས་གློད་བཀྲོལ་གཏོང་རྒྱུའི་ཁས་ལེན་བྱས་ཡོད་འདུག་ལ། ད་དུང་ཕྱི་འབྲེལ་དྲུང་ཆེ་ཡིས་ཨུ་རུ་སུའི་དམག་ས་ལ་ཁྱོན་རྒྱ་གར་བ་༣༥ ནས་༥༠ བར་ཡོད་པ་དང་། རྒྱ་གར་བ་༡༠ རང་རང་གི་ཁྱིམ་ལ་འབྱོར་ཡོད་པར་བརྗོད་ཡོད་འདུག རྒྱ་གར་བ་མང་ཆེ་བ་ནི་རྒྱ་གར་གྱི་ནང་མི་སྐྱོ་བོ་ནས་ཡིན་པ་དང་། ཨུ་རུ་སུའི་ནང་ལས་ཀའི་ཆེད་དུ་ཕྱིན་ནས་ཕྱིས་སུ་དམག་སར་བཙན་གྱིས་བཏང་ཡོད་འདུག ཨུ་རུ་སུའི་དམག་སར་ཡོད་པའི་རྒྱ་གར་བ་རྣམས་ཀྱིས་རྒྱ་གར་གཞུང་ལ་ཞུ་གཏུག་ཐེངས་མང་བྱས་རྗེས་ད་ཆར་རྒྱ་གར་བ་རྣམས་དམག་ས་ནས་ཕྱིར་རང་ཁྱིམ་དུ་ལོག་ཐུབ་རྒྱུ་ཡིན་འདུག རྒྱ་གར་གྱི་ཕྱི་འབྲེལ་ལས་ཁུངས་ནས་རྒྱ་གར་བ་སུ་འདྲ་ཞིག་ཨུ་རུ་སུའི་ནང་ལས་ཀ་ཡོད་ཚུལ་སོགས་ཀྱི་གནས་ཚུལ་ལ་བརྟེན་ནས་ཨུ་རུ་སུའི་ནང་འགྲོ་མི་ཉེན་པ་དང་། ངེས་པར་དུ་གཟབ་གཟབ་བྱེད་རྒྱུ་གལ་ཆེན་ཡིན་པ། དམག་འཁྲུག་དེ་འདྲའི་ནང་མཉམ་ཞུགས་བྱེད་མི་རུང་བ་སོགས་བརྗོད་ཡོད་འདུག 

འདི་ལོའི་ཕྱི་ཟླ་༣ པ་ནས་ཨུ་རུ་སུས་རྒྱ་གར་བ་མང་པོ་ཞིག་དམག་འཁྲུག་ནང་བཙན་གྱིས་བཏང་ཡོད་འདུག ཉེ་ཆར་སྲིད་བློན་མོ་དྷི་ཨུ་རུ་སུའི་ནང་ཉིན་གྲངས་གཉིས་ཀྱི་རིང་ལྟ་སྐོར་འགྲོ་སྐབས་ཨུ་རུ་སུ་དང་རྒྱ་གར་གཉིས་བར་གྱི་གནད་དོན་དུ་མའི་སྐོར་གྲོས་མོལ་བྱས་ཡོད་འདུག་ལ། འབྱུང་འགྱུར་ཕྱི་ལོ་༢༠༣༠ བར་རྒྱལ་ཁབ་གཉིས་བར་ཨ་སྒོར་ཐེར་འབུམ་༡༠༠ ཙམ་གྱི་ཚོང་འབྲེལ་ཡོང་ཐབས་བྱེད་རྒྱུ་ཡིན་པར་བརྗོད་ཡོད་འདུག སྲིད་བློན་མོ་དྷི་ཨུ་རུ་སུར་ལྟ་སྐོར་ཕྱིན་པ་དེ་མོ་དྷིའི་སྲིད་བློན་གྱི་དུས་ཡུན་གསུམ་པར་ཕྱིའི་རྒྱལ་ཁབ་ལ་ལྟ་སྐོར་ཐེངས་དང་པོ་དེ་ཡིན་འདུག
མོ་དྷི་ཨུ་རུ་སུ་ལ་ཕྱིན་པ་དེ་དང་བྱང་ཆིངས་སྒྲིག་འཛུགས་བཙུགས་ནས་ལོ་༧༥ འཁོར་བའི་ཚོགས་འདུ་གཉིས་དུས་གཅིག་པ་ཆགས་ཡོད་པར་བརྟེན། ཨ་རིའི་ཕོ་བྲང་དཀར་པོའི་མགྲིན་ཚབ་པ་(Matthew Miller)ཟེར་བ་དེས་རྒྱ་གར་གྱི་ངོས་ནས་ཨུ་རུ་སུ་དང་ཡུག་རེན་གཉིས་བར་གྱི་དམག་འཁྲུག་མཚམས་འཇོག་ཐབས་བྱེད་དགོས་པ་དང་། རྒྱ་གར་གྱིས་ཨུ་རུ་སུ་དང་ལྷན་དུ་འབྲེལ་ལམ་ཡག་ཏུ་བཏང་བ་ནི་བློ་ཕམ་ཡོད་པར་བརྗོད་ཡོད་འདུག
དེ་བཞིན་ཡུག་རེན་གྱི་སྲིད་འཛིན་གྱིས་འཛམ་གླིང་ནང་དམངས་གཙོའི་རྒྱལ་ཁབ་ཆེ་ཤོས་ཀྱི་འགོ་ཁྲིད་མོ་དྷི་ཡིས་མི་མང་སྟོང་ཚོ་མང་པོ་གསོད་མཁན་ཉེས་ཅན་པ་ཞིག་དང་འཐམས་པ་ནི་ཧ་ཅང་གིས་བློ་ཕམ་བྱུང་ཞེས་(X)ཡང་ན་(Twitter)་ཐོག་བཀོད་ཡོད་འདུག འོན་ཀྱང་། སྲིད་བློན་མོ་དྷི་ཡིས་ཨུ་རུ་སུའི་སྲིད་འཛིན་དང་ཐུག་དུས་དམག་འཁྲུག་མཚམས་འཇོག་བྱས་ན་རྒྱ་གར་གྱི་ངོས་ནས་རོགས་རམ་གང་དགོས་པ་དེ་བྱེད་རྒྱུའི་གྲ་སྒྲིག་ཡོད་ཅེས་དང་། སྤྱི་ཚོགས་ཁྲོད་དམག་འཁྲུག་དང་འཇིགས་སྐུལ་རིང་ལུགས་པའི་དྲག་རྒོལ་བྱེད་པ་སོགས་འགྲོ་བ་མིའི་རིགས་ལ་གནོད་འཚེའི་རིགས་འབྱུང་དུས། བྱིས་པ་མང་པོ་ཤི་རྨས་བྱུང་བ་སོགས་ཧ་ཅང་གིས་བློ་ཕམ་ཡོང་གི་འདུག་ཅེས་བརྗོད་ཡོད་འདུག དེ་དག་བརྗོད་དགོས་དོན་ནི་མོ་དྷི་ཨུ་རུ་སུ་ལ་མ་ཕྱིན་སྔོན་དུ་ཨུ་རུ་སུས་ཡུག་རེན་གྱི་བྱིས་པའི་སྨན་ཁང་ཞིག་ལ་གཏོར་རྒོལ་དྲག་པོ་བྱས་ནས་བྱིས་པ་མང་པོ་ཤི་རྨས་བྱུང་ཡོད་འདུག།

གསར་འགོད་པ། བསོད་ནམས་ཕུན་ཚོགས།