ཨུ་རུ་སུའི་སྲིད་འཛིན་ལོ་༢༤ རྗེས་སུ་བྱང་ཀོ་རི་ཡའི་ནང་ཐེངས་དང་པོ་ལྟ་སྐོར་དུ་འགྲོ་བཞིན་འདུག 

ལོ་༢༤ རྗེས་སུ་ཨུ་རུ་སུའི་སྲིད་འཛིན་པུ་ཊིན་བྱང་ཀོ་རི་ཡའི་ནང་ཁ་སང་ལྟ་སྐོར་དུ་ཕྱིན་ཡོད་འདུག་པ་དང་། ཉིན་གཉིས་རིང་བྱང་ཀོ་རི་ཡའི་ནང་ལྟ་སྐོར་དང་བྱང་ཀོ་རི་ཡའི་སྲིད་འཛིན་དང་ཐུག་རྒྱུ་ཡིན་འདུག ཨུ་རུ་སུའི་སྲིད་འཛིན་པུ་ཊིན་བྱང་ཀོ་རི་ཡའི་ནང་འགྲོ་བཞིན་ཡོད་པ་དེ་ལ་ནུབ་ཕྱོགས་རྒྱལ་ཁབ་ཚོས་སྐྱོན་བརྗོད་ཤུགས་ཆེན་བྱེད་ཀྱི་ཡོད་འདུག་ལ། རྒྱ་ནག་ལ་ཡང་ཉེན་བརྡ་ཆེན་པོ་གཏོང་གི་ཡོད་འདུག རྒྱུ་མཚན་ནི་བྱང་ཀོ་རི་ཡ་དང་རྒྱ་ནག་གཉིས་ཀྱིས་ཨུ་རུ་སུའི་ཡུག་རེན་ནང་གི་དམག་འཁྲུག་ལ་རྒྱབ་སྐྱོར་བྱེད་ཀྱི་ཡོད་པའི་རྐྱེན་གྱིས་ཡིན་འདུག 

ཕྱི་ཚེས་༡༨ ཉིན་རྒྱལ་སྤྱིའི་གསར་འགྱུར་ཆེ་ཁག་ནང་གནས་ཚུལ་སྤེལ་གསལ་ལྟར་ན། ཁ་སང་ཕྱི་ཚེས་༡༧ ཉིན་ཨུ་རུ་སུའི་སྲིད་འཛིན་པུ་ཊིན་བྱང་ཀོ་རི་ཡའི་ནང་འབྱོར་ཡོད་འདུག་པ་དང་། ཕྱི་ཚེས་༡༨ དང་༡༩ བཅས་ཉིན་གཉིས་རིང་བྱང་ཀོ་རི་ཡའི་ནང་ལྟ་སྐོར་འགྲོ་རྒྱུ་ཡིན་འདུག ད་ཐེངས་པུ་ཊིན་གྱི་ལྟ་སྐོར་དེ་ནི་ལོ་༢༤ རྗེས་སུ་ཐེངས་དང་པོ་ཆགས་ཡོད་འདུག་པ་དང་།  བྱང་ཀོ་རི་ཡའི་གཞུང་གི་གསར་ཁང་ཁག་གིས། ཨུ་རུ་སུའི་སྲིད་འཛིན་པུ་ཊིན་བྱང་ཀོ་རི་ཡའི་ནང་ལྟ་སྐོར་ཡོང་དོན་ནི་ཚོང་དོན་དང་བདེ་འཇགས་ཀྱི་ཐད་རྒྱལ་ཁབ་གཉིས་བར་མཉམ་ལས་བྱེད་རྒྱུའི་ཆེད་དུ་ཡོང་ཡོད་པ་དང་། ནུབ་ཕྱོགས་རྒྱལ་ཁབ་ཚོས་ཨུ་རུ་སུ་དང་བྱང་ཀོ་རི་ཡ་གཉིས་ཀྱི་གནད་དོན་ལ་ཐེ་གཏོགས་བྱེད་དབང་ཡོད་མ་རེད་ཅེས་རྗོད་ཀྱི་ཡོད་འདུག སྲིད་འཛིན་པུ་ཊིན་གྱིས་བྱང་ཀོ་རི་ཡའི་བདེ་འཇགས་ལ་ཨ་རིས་གནོན་ཤུགས་སྤྲད་པ་དང་། འཇིགས་སྐུལ་བྱེད་པ་སོགས་ལ་མཐའ་གཅིག་ཏུ་ངོ་རྒོལ་ཡོད་པ་དང་བྱང་ཀོ་རི་ཡའི་རྒྱལ་ཁབ་ཀྱི་མངོན་འདོད་སྲུང་སྐྱོབ་ཐད་ཨུ་རུ་སུའི་ངོས་ནས་རྒྱབ་སྐྱོར་ཡོད་བརྗོད་ཡོད་འདུག ཨ་རིའི་གཞུང་གིས་ཨུ་རུ་སུ་དང་བྱང་ཀོ་རི་ཡ་གཉིས་ཀྱི་འབྲེལ་ལམ་ཐད་བློ་འཚབ་ཆེན་པོ་ཡོད་པ་དང་། བྱང་ཀོ་རི་ཡ་དང་ཨུ་རུ་སུ་གཉིས་བར་གོ་མཚོན་གྱི་ཚོང་འབྲེལ་གྲོས་མཐུན་ལ་མིང་རྟགས་འགོད་སྲིད་པའི་ཉེན་ཁ་ཡོད་པར་བརྗོད་ཡོད་འདུག ཐེངས་འདིར་ཨུ་རུ་སུའི་སྲིད་འཛིན་དང་ལྷན་དུ་ཨུ་རུ་སུའི་བདེ་སྲུང་བློན་ཆེན་དང་། ཕྱི་འབྲེལ་བློན་ཆེན་བཅས་ཀྱང་ཡོད་འདུག་ལ། བདུན་ཕྲག་སྔོན་མར་བྱང་ཀོ་རི་ཡའི་སྲིད་འཛིན་ཀིམ་ཇོན་གྱིས་ད་ཆར་ཨུ་རུ་སུ་དང་བྱང་ཀོ་རི་ཡ་གཉིས་ཀྱི་དམག་དོན་ཐད་ཀྱི་འབྲེལ་ལམ་ནི་ཁ་འབྲལ་ཐབས་མེད་པའི་འབྲེལ་ལམ་བརྟན་པོ་ཆགས་ཡོད་པར་བརྗོད་ཡོད་འདུག དེ་སྔོན་བྱང་ཀོ་རི་ཡའི་སྲིད་འཛིན་ཀིམ་ཇོན་ཨུ་རུ་སུ་ལ་ལྟ་སྐོར་འགྲོ་དུས་སྲིད་འཛིན་པུ་ཊིན་གྱིས་བྱང་ཀོ་རི་ཡ་དང་ཨུ་རུ་སུ་གཉིས་བར་དམག་དོན་ཐད་མཉམ་ལས་བྱེད་རྒྱུའི་འདུན་པ་ཡོད་པར་བརྗོད་ཡོད་འདུག་ལ། ཀིིམ་ཇོན་གྱིས་ཀྱང་སྲིད་འཛིན་པུ་ཊིན་ལ་ཡུག་རེན་ནང་གི་དམག་འཁྲུག་ཁྲོད་རྒྱལ་ཁ་ཐོབ་པའི་རེ་བ་ཡོད་པར་བརྗོད་ཡོད་འདུག ཨ་རིའི་ཕོ་བྲང་དཀར་པོའི་མགྲིན་ཚབ་པས་ཨུ་རུ་སུ་དང་བྱང་ཀོ་རི་ཡའི་འགོ་ཁྲིད་གཉིས་ཐུག་འཕྲད་བྱས་པར་བློ་འཚབ་མེད་ཀྱང་། ཐུག་འཕྲད་དེའི་བརྒྱུད་ནས་གོ་མཚོན་གྱི་ཚོང་འབྲེལ་བྱེད་རྒྱུའི་ཉེན་ཁ་ཡོད་པས་བློ་འཚབ་ཡོད་ཅེས་བརྗོད་འདུག དེ་བཞིན་(Cambridge University)གཙུག་ལག་སློབ་གྲྭ་ཆེན་མོའི་ཀོ་རི་ཡའི་ས་ཁམས་ཆབ་སྲིད་སྐོར་གྱི་ཉམས་ཞིབ་པ་(John Nilsson)ཟེར་བ་དེས། ད་ཆར་ཨུ་རུ་སུའི་སྲིད་འཛིན་པུ་ཊིན་གྱིས་སྔོན་གྲང་དམག་སྐབས་ཀྱི་ཨུ་རུ་སུའི་མཐུན་གྲོགས་བྱང་ཀོ་རི་ཡ་དང་ལྷན་དུ་འབྲེལ་ལམ་ཟབ་དུ་བཏང་ནས་ཨ་རི་གཙོས་པའི་ནུབ་ཕྱོགས་རྒྱལ་ཁབ་ཚོ་ལ་ཁ་གཏད་གཅོག་ཐབས་བྱེད་ཀྱི་ཡོད་པ་དང་། དེ་བཞིན་དམངས་གཙོའི་རྒྱལ་ཁབ་ཚོས་རང་རང་གི་དམངས་གཙོ་སྲུང་སྐྱོབ་བྱེད་བཞིན་པའི་སྐབས་འདིར། པུ་ཊིན་གྱིས་གོ་ལའི་བདེ་འཇགས་ལ་གནོད་འཚེ་གཏོང་ཐབས་ཆེད་དཀྱིལ་ཤར་ཡུལ་གྲུ་ཁག་དང་། ཨེ་ཤེ་ཡ། ཡུག་རེན་བཅས་ཀྱི་བདེ་འཇགས་ལ་གནོད་པའི་བྱ་སྤྱོད་སྤེལ་གྱི་ཡོད་རེད་ཅེས་བརྗོད་འདུག ཨུ་རུ་སུ་དང་བྱང་ཀོ་རི་ཡ་གཉིས་བར་སྔར་ལོ་རྒྱུས་ཐོག་ནས་འབྲེལ་བ་ཡོད་པ་ཞིག་ཡིན་འདུག་ལ། དམིགས་བསལ་ཨུ་རུ་སུས་ཡུག་རེན་ལ་བཙན་འཛུལ་བྱེད་འགོ་བཙུགས་པ་ནས་བཟུང་བྱང་ཀོ་རི་ཡ་དང་འབྲེལ་ལམ་ཡག་ཏུ་ཕྱིན་ཡོད་འདུག ཨུ་རུ་སུ་དང་བྱང་ཀོ་རི་ཡ་གཉིས་བར་གོ་མཚོན་དང་བཟའ་འབྲུའི་ཚོང་འབྲེལ་བྱེད་ཀྱི་ཡོད་འདུག་པ་དང་། ཨུ་རུ་སུའི་སྲིད་འཛིན་པུ་ཊིན་བྱང་ཀོ་རི་ཡའི་ནང་ལྟ་སྐོར་ཚར་རྗེས། ཝེ་ཐི་ནམ་རྒྱལ་ཁབ་ནང་ལྟ་སྐོར་འགྲོ་འཆར་འདུག་པ་དང་། ཝེ་ཐི་ནམ་ལ་ཕྱིན་ནས་ཚོང་འབྲེལ་སྐོར་གྲོས་བསྡུར་བྱེད་རྒྱུ་ཡིན་འདུག བྱང་ཆིངས་སྒྲིག་འཛུགས་ཀྱི་འགོ་གཙོ་(Jens Stoltenberg)ཟེར་བ་དེས། གཟའ་ཟླ་བའི་ཉིན་ཨུ་རུ་སུ་ལ་མཉམ་འབྲེལ་རྒྱལ་ཚོགས་ཀྱིས་དཔལ་འབྱོར་ཉེས་ཆད་ག་ཚད་བཅད་ཀྱང་། པུ་ཊིན་བྱང་ཀོ་རི་ཡ་ལ་འགྲོ་དོན་ནི་ཨུ་རུ་སུ་ལ་ད་ཆར་གོ་མཚོན་མེད་པས།  དབང་ཆ་གཅིག་བསྡུའི་རིང་ལུགས་པའི་སྲིད་གཞུང་དག་ནས་གོ་མཚོན་རོགས་རམ་རག་ཐབས་ཆེད་དུ་ལྟ་སྐོར་འགྲོ་ཡི་ཡོད་རེད་ཅེས་དང་། དེ་བཞིན་རྒྱ་ནག་གཞུང་གི་ངོས་ནས་ཨུ་རུ་སུ་ལ་གོ་མཚོན་གྱི་རོགས་རམ་བྱས་ན་མཇུག་འབྲས་ངན་པ་ཡོང་རྒྱུ་ཡིན་པའི་ཉེན་བརྡ་བཏང་ཡོད་འདུག 

གསར་འགོད་པ། བསོད་ནམས་ཕུན་ཚོགས།