ཨུ་རུ་སུས་ན་ཛི་དམག་དཔུང་ཕམ་ཉེས་བཏང་བའི་ཉིན་མོ་སྲུང་བརྩི།

ཟླ་འདིའི་ཚེས་༡༠ ཉིན་བྷི་བྷི་སི་གསར་ཁང་གིས་གནས་ཚུལ་སྤེལ་གསལ་ལྟར་ན། ཚེས་༩ ཉིན་ནི་ཕྱི་ལོ་༡༩༤༥ ལོར་ཨུ་རུ་སུ་སྤྱི་མཐུན་རྒྱལ་ཁབ་ཀྱིས་འཇར་མ་ནིའི་ན་ཛི་དམག་དཔུང་ཕམ་ཉེས་སུ་བཏང་ནས། མི་ལོ་༧༧ འཁོར་བའི་རྒྱལ་ཁའི་ཉིན་མོ་སྲུང་བརྩི་ཞུ་བའི་དུས་ཆེན་གལ་ཆེན་ཞིག་ཆགས་ཡོད་པ་དང་། ཐེངས་འདིའི་མཛད་སྒོའི་སྐབས་སུ་ཨུ་རུ་སུའི་གོ་ཁྲབ་ལྡན་པའི་འགྲུལ་འཁོར་༡༣༡ དང་དམག་མི་༡༡༠༠༠ མཉམ་ཞུགས་བྱས་ཡོད་འདུག

ད་ལྟའི་ཆར་ཨུ་རུ་སུ་དང་ཡུག་རེན་གཉིས་ཀྱི་བར་དུ་དམག་འཁྲུག་འགྲོ་བཞིན་ཡོད་པས་འཛམ་གླིང་གང་ས་ནས་ཐེངས་འདིའི་མཛད་སྒོའི་ཐོག་ཨུ་རུ་སུའི་སྲིད་འཛིན་པུ་ཊིན་གྱི་གཏམ་བཤད་ལ་དོ་སྣང་ཆེན་མོ་བྱས་ཡོད་འདུག

ཨུ་རུ་སུའི་སྲིད་འཛིན་གྱིས་མཛད་སྒོའི་ཐོག་ཏུ་གཏམ་བཤད་གནང་བའི་སྐབས་སུ། ཁྱེད་ཚོས་རྒྱལ་ཁབ་ཀྱི་ཆེད་དུ་འཐབ་འཛིང་བྱེད་ཀྱིི་ཡོད་ལ་རྒྱལ་ཁབ་ཀྱི་བདེ་འཇགས་དང་རྒྱལ་ཁབ་ཀྱི་མ་འོངས་པའི་དོན་དུ་འཐབ་འཛིང་བྱེད་ཀྱི་ཡོད་པའི་སྐོར་གྱི་གསུངས་བཤད་གནང་ཡོད་ཀྱང་། ཐེངས་འདིའི་གསུང་བཤད་ཀྱི་ནང་དུ་ཡུག་རེན་ཞེས་པའི་ཚིག་གཅིག་ཀྱང་བརྗོད་མེད་པའི་གནས་ཚུལ་ཐོན་འདུག་པ་མ་ཟད། ཨ་རི་དང་བྱང་ཆིངས་རྩ་འཛུགས་ཀྱིས་བྱེད་སྟངས་མང་པོས་ཨུ་རུ་སུའི་བདེ་འཇགས་ལ་ཉེན་ཁ་བཟོ་བཞིན་ཡོད་སྐོར་གྱི་སྐྱོན་བརྗོད་ཀྱང་བྱས་ཡོད་འདུག

འདས་པའི་ཉིན་ཁ་ཤས་ཀྱི་གོང་དུ་རྒྱལ་སྤྱིའི་གསར་ཁང་(WION) གིས་གནས་ཚུལ་སྤེལ་གསལ་ལྟར་ན། ཨུ་རུ་སུའི་ལོ་རྒྱུས་ཀྱི་ཁྲོད་དུ་ཡུ་རོབ་ཀྱི་རྒྱལ་ཁབ་ཁག་གཅིག་གིས་ཨུ་རུ་སུ་ལ་བཙན་འཛུལ་ཐེངས་ལྔ་བྱས་མྱོང་ཡོད་པར་བརྟེན། ཨུ་རུ་སུའི་ཡུ་རོབ་ལ་དོགས་ཟོན་དང་ཞེད་སྣང་བྱེད་ཀྱི་ཡོད་པའི་གནས་ཚུལ་སྤེལ་འདུག

བྱང་ཆིངས་རྩ་འཛུགས་ནི་དམག་ཆེན་གཉིས་པའི་རྗེས་ཀྱི་ཕྱི་ལོ་༡༩༤༩ ལོར་གསར་འཛུགས་བྱས་ཡོད་པ་དང་། ཕྱི་ལོ་༡༩༩༠ ལོ་ལ་བྱང་ཆིངས་རྩ་འཛུགས་ཀྱིས་ཚོགས་མི་ཇེ་མང་དུ་གཏོང་རྒྱུ་མིན་པའི་ཁས་ལེན་བྱས་ཡོད་ཀྱང་། ད་ལྟའི་བར་དུ་བྱང་ཚིངས་རྩ་འཛུགས་ཀྱིས་ཚོགས་མི་གསར་བསྡུ་བྱེད་རྒྱུ་ལ་མཚམས་འཇོག་གཏན་ནས་བྱེད་མེད་པའི་གནས་ཚུལ་སྤེལ་འདུག

དེ་བཞིན་ཡུག་རེན་གྱི་སྲིད་འཛིན་གྱིས་ཀྱང་དྲ་ཐོག་ལ་བརྙན་ཞིག་སྤེལ་ཡོད་པ་དང་། བརྙན་དེའི་ནང་དུ་ཁོང་གིས་དམག་ཆེན་གཉིས་པའི་སྐབས་སུ་ཡུག་རེན་བ་ས་ཡ་༨ ལྷག་གི་ཚེ་སྲོག་ཤོར་ཡོད་པས། ང་ཚོས་ང་ཚོའི་མི་རབས་གོང་མ་ཚོས་གང་བྱས་པ་དེ་ནམ་ཡང་བརྗེད་མི་སྲིད་པ་དང་། དེ་རིང་འཇར་མ་ནིའི་ན་ཛི་དམག་དཔུང་ཕམ་ཉེས་སུ་བཏང་པའི་ཉིན་མོ་དེ་ང་ཚོས་ད་དུང་རྒྱལ་ཁ་གཞན་ཞིག་གི་དོན་དུ་འཐབ་འཛིང་བྱེད་ཀྱི་ཡོད་ཅེས་དང་། ཡུག་རེན་གྱི་ནང་དུ་གང་མགྱོགས་རྒྱལ་ཁའི་ཉིན་མོ་གཉིས་པ་ཞིག་ཡོང་རྒྱུ་རེད་ཅེས་བརྗོད་འདུག

ཨུ་རུ་སུ་དང་ཡུག་རེན་གཉིས་ཀྱི་བར་དུ་དམག་འཁྲུག་བརྒྱབ་ནས་ཟླ་བ་གསུམ་པ་དེ་འགྲོ་བཞིན་ཡོད་པ་དང་། འདས་པའི་བདུན་ཕྲག་ཁ་ཤས་ཀྱི་སྔོན་དུ་ཡུག་རེན་སྲིད་འཛིན་གྱི་ཨུ་རུ་སུ་དང་ཞི་མོལ་ཡོང་རྒྱུའི་བཀའ་མོལ་གནང་ཡོད་ཀྱང་། ད་ལྟའི་ཆར་རྒྱལ་ཁ་ཐོབ་རྒྱུའི་ཐོག་ལ་སྐད་ཆ་བཤད་ཀྱི་ཡོད་པས་ཁོང་ལ་གདེངས་ཚོད་གསར་པ་ཞིག་བསླེབ་ཡོད་པའི་གནས་ཚུལ་སྤེལ་འདུག །

གསར་འགོད་པ་བློ་བཟང་རྒྱ་མཚོ།