ཨུ་རུ་སུས་ཡུ་ཀེ་རེན་གྱི་གྲོང་ཁྱེར་དྷོང་བྷ་སེ་ནང་དམག་འཐབ་བྱེད་འགོ་བཙུགས་འདུག

ཟླ་འདིའི་ཚེས་༡༩ ཉིན་བརྒྱུད་ལམ་ཁག་ནས་གནས་ཚུལ་སྤེལ་བའི་ནང་། ཡུ་ཀེ་རེན་གྱི་སྲིད་འཛིན་ཛེ་ལེན་སེ་ཀེ་ཡིས་གསལ་བསྒྲགས་ཞིག་སྤེལ་ནས། ཨུ་རུ་སུའི་དམག་གིས་ཡུ་ཀེ་རེན་གྱི་ཤར་ཕྱོགས་ས་ཁུལ་གྱི་གྲོང་ཁྱེར་དྷོང་བྷ་སེ་(Donbas) ནང་དུ་དམག་འཐབ་བྱེད་འགོ་བཙུགས་ཡོད་པ་བརྗོད་འདུག

ཁོང་གིས་མུ་མཐུད་གསུང་དོན་ལ། ཨུ་རུ་སུའི་དམག་གིས་ཡུ་ཀེ་རེན་ཤར་ཕྱོགས་ས་ཁུལ་གྱི་གྲོང་ཁྱེར་དྷོང་བྷ་སེ་ནང་དུ་ཁྲིམས་འགལ་གྱིས་བཙན་འཛུལ་བྱེད་རྒྱུའི་འཆར་གཞི་རྒྱུན་རིང་ནས་བཟོས་ཡོད་པ་མ་ཟད། ཕྱི་ལོ་༢༠༡༤ ལོར་པུ་ཊིན་གྱི་དམག་དཔུང་གིས་ཡུ་ཀེ་རེན་ས་ཁུལ་(Crimea) བཙན་ཟུང་བྱས་པའི་རྗེས། ས་གནས་དེ་ནས་ཨུ་རུ་སུ་ལ་རྒྱབ་སྐྱོར་བྱེད་མཁན་ཡུ་ཀེ་རེན་དང་ཁ་བྲལ་བས་ཡུ་ཀེ་རེན་གྱི་དམག་ལ་དམག་འཐབ་བྱེད་བཞིན་ཡོད་རབས་དང་། དེ་བཞིན་སྲིད་འཛིན་ཛེ་ལེ་སེ་ཀེས་ནན་བརྗོད་བྱེད་དོན་ལ། “ཨུ་རུ་སུའི་དམག་མི་ཡུ་ཀེ་རེན་ནང་དུ་ག་ཚོད་གཏོང་གི་ཡོད་ཀྱང། ང་ཚོས་རང་ཉིད་ཀྱི་རྒྱལ་སྲུང་ཆེད་དམག་འཐབ་བྱེད་རྒྱུ་ཡིན།”

ཡུ་ཀེ་རེན་ཤར་ཕྱོགས་ས་ཁུལ་དུ་ཡོད་པའི་གྲོང་ཁྱེར་(Lugansk) གྱི་སྤྱི་ཁྱབ་པས་བརྗོད་དོན་ལ། ཨུ་རུ་སུའི་དམག་མི་ཕོན་ཆེན་ཞིག་ཡུ་ཀེ་རེན་ཤར་ཕྱོགས་མཐའ་མཚམས་ས་ཁུལ་ནས་ནང་འཛུལ་བཞིན་ཡོད་པ་མ་ཟད། དམག་འཐབ་ཡོ་བྱད་ཕོན་ཆེན་ཞིག་སྐྱེལ་འདྲེན་བྱས་ཡོད་པས། ད་ལྟ་ཡུ་ཀེ་རེན་གྱི་དམག་དཔུང་ས་གནས་དེ་ནས་ཕྱིར་འཐེན་གྱིས་ས་གནས་གཞན་དུ་གནས་སྤོས་བྱེད་བཞིན་ཡོད་པ་མ་ཟད། ས་ཁུལ་དེར་གནས་སྡོད་བྱེད་བཞིན་པའི་མི་སེར་རྣམས་ས་གནས་གཞན་དུ་ཉེན་གཡོལ་བྱེད་བཞིན་ཡོད་ནའང་། ཨུ་རུ་སུའི་དྲག་པོའི་དམག་གིས་མུ་མཐུད་གྲོང་ཁྱེར་ (Mariupol) ནང་མདུན་སྐྱོད་བྱེད་བཞིན་ཡོད་པ་མ་ཟད། གྲོང་ཁྱེར་མཐའ་འཁོར་ཡོངས་ཨུ་རུ་སུའི་དམག་དཔུང་གིས་སྐོར་བཞིན་ཡོད་པ་བརྗོད་འདུག

དེ་ཡང་རེས་གཟའ་ཉི་མའི་ཉིན་ཨུ་རུ་སུའི་ཕྱོགས་ནས་ཡུ་ཀེ་རེན་དམག་ལ་མགོ་བཏགས་བྱེད་དགོས་པའི་བཀོད་པ་བྱས་ཡོད་ནའང་། ཡུ་ཀེ་རེན་གྱི་དམག་གིས་ངོས་ལེན་བྱས་མེད་པ་མ་ཟད། མ་ཤི་བར་འཐབ་འཛིང་བྱེད་རྒྱུ་ཡིན་པ་བརྗོད་འདུག

དེ་བཞིན་ཨུ་རུ་སུའི་ངོས་ནས་ཡུ་ཀེ་རེན་གྱི་རྒྱལ་ས་ཀེབ་ཏུ་དམིགས་འབེན་གཙོ་བོ་ཟུང་ནས་མེ་ཤུགས་འཕུར་མདའ་འཕེན་བཞིན་ཡོད་པ་མ་ཟད། དེ་དག་གི་དམིགས་འབེན་གཙོ་བོ་ནི་ཡུ་ཀེ་རེན་ལ་ཨ་རི་དང་ཡུ་རོབ་ཀྱིས་རོགས་སྐྱོར་བྱས་པའི་གོ་མཚོན་གྱི་མཛོད་ཁང་རྣམས་མེད་པ་བཟོ་རྒྱུའི་འཆར་གཞི་ཡིན་པ་བརྗོད་འདུག

ཨ་རིའི་བདེ་སྲུང་ལྷན་ཁང་གིས་བརྗོད་དོན་ལ། ཨུ་རུ་སུས་ཡུ་ཀེ་རེན་ཤར་ཕྱོགས་གྲོང་ཁྱེར་དྷོ་བྷ་སེ་རུ་དམག་འཐབ་བྱེད་རྒྱུ་གྲ་སྒྲིག་བྱེད་བཞིན་པའི་སྐབས་དེར། ཨ་རིའི་ངོས་ནས་ཡུ་ཀེ་རེན་ལ་ཨ་སྒོར་ས་ཡ་༨༠༠ ལྷག་གི་གོ་མཚོན་ཡུ་ཀེ་རེན་ལ་སྐྱེལ་འདྲེན་བྱེད་རྒྱུའི་གྲ་སྒྲིག་ཨང་གསར་ཡོད་པ་བརྗོད་འདུག

དེ་སྔོན་ཕྱི་ཟླ་༢ པའི་ཚེས་༢༤ ཉིན་ཨུ་རུ་སུའི་སྲིད་འཛིན་གྱིས་བརྙན་འཕྲིན་ཐད་གཏོང་བརྒྱུད་ཡུ་ཀེ་རེན་ཤར་ཕྱོགས་ཁུལ་དུ་དམིགས་བསལ་དམག་དོན་བྱ་སྤྱོད་སྤེལ་རྒྱུ་ཡིན་ལུགས་གསལ་བསྒྲགས་བྱས་རྗེས། ཉིན་དེའི་ཞོགས་པར་ཨུ་རུ་སུའི་དྲག་པོའི་དམག་དཔུང་གིས་ཡུ་ཀེ་རེན་ཤར་ཕྱོགས་ཁུལ་དུ་བཙན་འཛུལ་བྱེད་འགོ་ཚུགས་ཡོད་ནའང་། ཡུ་ཀེ་རེན་གྱི་དམག་མིས་ཨུ་རུ་སུའི་དྲག་པོའི་དམག་དཔུང་ལ་དམག་ཐབ་བྱས་ནས་ད་བར་ཟླ་ངོ་༢ ལྷག་གི་རིང་ཕྱོགས་གཉིས་བར་ལ་རྒྱལ་ཕམ་གྱི་ཐག་ཆོད་གང་ཡང་བྱུང་མེད་པ་མ་ཟད། དམག་འཁྲུག་དེའི་རྐྱེན་པས་ཕྱོགས་གཉིས་ཀྱི་དམག་དཔུང་ལ་གྱོང་གུད་ཆེན་པོ་ཕོག་ཡོད།

གསར་འགོད་པ་བསྟན་འཛིན་ཆོས་གྲགས།