ཨུ་རུ་སུས་ཡུ་ཀེ་རེན་ལ་དངོས་སུ་དྲག་པོའི་བཙན་འཛུལ་བྱེད་འགོ་ཚུགས་འདུག

དེ་རིང་ཡུ་ཀེ་རེན་གྱི་སྲིད་འཛིན་ཝོ་ལོ་ཌི་མིར་ཇེ་ལེན་སེ་ཀེ་ (Volodymyr Zelensky) ཡིས་ཨུ་རུ་སུའི་དམིགས་འབེན་གཙོ་བོ་དེ་ང་རང་ཡིན་པས། ད་ལྟའི་འཆར་ང་ཡུ་ཀེ་རེན་གྱི་རྒྱལ་ས་ཀེབ་ (Kyiv) ནས་ཕྱིར་འཐེན་བྱེད་རྒྱུ་མིན་པ་དང་། ནུབ་ཕྱོགས་རྒྱལ་ཁབ་ཀྱིས་ཨུ་རུ་སུ་ལ་དཔལ་འབྱོར་གྱི་ཉེས་ཆད་ཁོ་ན་མ་ཡིན་པར་གནོན་ཤུགས་འཕར་མ་སྤྲོད་དགོས་ཞེས་རེ་སྐུལ་གནང་འདུག

ཁ་སང་ཚེས་༢༤ ཉིན་ཨུ་རུ་སུའི་སྲིད་འཛིན་གྱིས་ཡུ་ཀེ་རེན་དུ་དམིགས་བསལ་དམག་དོན་བྱ་སྤྱོད་སྤེལ་རྒྱུ་ཡིན་ལུགས་གསལ་བསྒྲགས་བྱས་རྗེས། ཡུ་ཀེ་རེན་གྱི་རྒྱལ་ས་དང་གྲོང་ཁྱེར་ཁག་ཅིག་ནང་དུ་བཙན་འཛུལ་བྱེད་འགོ་བཙུགས་ནས་ད་བར་ཡུ་ཀེ་རེན་གྱི་དམག་མི་དང་མི་སེར་༡༣༧ ལྷག་གི་ཚེ་སྲོག་ཤོར་ཡོད་པ་དང་མི་གྲངས་༣༡༦ ལྷག་ལ་རྨས་སྐྱོན་ཕོག་ཡོད་པ་དང་། ཡུལ་མི་སྟོང་ཕྲག་མང་པོ་ཞིག་བྲོས་བྱོལ་དུ་འགྲོ་བཞིན་ཡོད་འདུག

ཟླ་འདེའི་ཚེས་༢༤ ཉིན་ཨུ་རུ་སུའི་སྲིད་འཛིན་གྱིས་བརྙན་འཕྲིན་ཐད་གཏོང་བརྒྱུད་ཡུ་ཀེ་རེན་ཤར་ཕྱོགས་ཁུལ་དུ་དམིགས་བསལ་དམག་དོན་བྱ་སྤྱོད་སྤེལ་རྒྱུ་ཡིན་ལུགས་གསལ་བསྒྲགས་བྱས་རྗེས། ཉིན་དེའི་ཞོགས་པར་ཨུ་རུ་སུའི་དྲག་པོའི་དམག་དཔུང་གིས་ཡུ་ཀེ་རེན་ཤར་ཕྱོགས་ཁུལ་དུ་བཙན་འཛུལ་བྱེད་འགོ་ཚུགས་ཡོད་པ་མ་ཟད། ཡུ་ཀེ་རེན་གྱི་རྒྱལ་ས་ཀེབ་དང་གྲོང་ཁྱེར་ཁག་དུ་གནས་པའི་དམག་སྒར་དང་གནམ་ཐང་། དེ་བཞིན་གོ་མཛོད་ཁང་བཅས་ལ་མེ་ཤུགས་འཕུར་མདའ་དང་འབར་རྫས་གཡུགས་ཏེ་གཏོར་རྒོལ་བཏང་ཡོད་ལུགས་དང་། དེ་རིང་བར་ཁྱོན་ཡུ་ཀེ་རེན་གྱི་དམག་མི་དང་མི་སེར་༡༣༧ ལྷག་གི་ཚེ་སྲོག་ཤོར་ཡོད་པ་དང་མི་གྲངས་༣༡༦ ལྷག་ལ་རྨས་སྐྱོན་ཕོག་ཡོད་འདུག

ཨ་རིའི་སྲིད་འཛིན་བྷའེ་ཌན་གྱིས། ཨུ་རུ་སུས་ཡུ་ཀེ་རན་དུ་དྲང་བདེན་མིན་པའི་བཙན་འཛུལ་བྱས་ཏེ་མི་མང་གིས་དཀའ་སྡུག་མྱོང་བཞིན་ཡོད་པ་དེར། ཁོང་གིས་ཡུ་ཀེ་རེན་མི་མང་ཆེད་དུ་སྨོན་ལམ་རྒྱག་བཞིན་ཡོད་སྐོར་དང་། ཨ་རི་དང་མཐུན་ཕྱོགས་རྒྱལ་ཁབ་ཁག་གི་ཨུ་རུ་སུའི་བཙན་འཛུལ་བྱ་སྤྱོད་དེར་ཡ་ལན་སློག་གི་ཡིན་པ་མ་ཟད། ཨུ་རུ་སུས་བཙན་འཛུལ་གྱི་བྱ་སྤྱོད་དེས་མིའི་ཚེ་སྲོག་མང་པོ་ཤོར་གྱི་ཡོད་པར་བརྟེན། རྐྱེན་ངན་དེ་དག་གི་འགན་འཁྲི་ཡོངས་རྫོགས་ཨུ་རུ་སུས་ལེན་དགོས་ཞེས་གསུངས་འདུག དེ་བཞིན་ཡུ་རོབ་མཐུན་ཚོགས་ཀྱིས་ཡུ་ཀེ་རེན་ལ་རྒྱབ་སྐྱོར་ཡོད་སྐོར་དང་། ཨུ་རུ་སུས་དྲག་པོའི་དམག་མི་རྣམས་ཡུ་ཀེ་རེན་ནས་ཕྱིར་འཐེན་བྱེད་དགོས་སྐོར་གསུངས་འདུག

མཇར་མི་ནི་སྲིན་འཛིན་གྱིས་ཨུ་རུ་སུས་ཡུ་ཀེ་རེན་དུ་དྲག་པོའི་བཙན་འཛུལ་བྱེད་པ་དེ་ནི་རྒྱུ་མཚན་གང་ཡང་མེད་པ་དང་། གནད་དོན་དེའི་རྐྱེན་གྱིས་ནུབ་ཕྱོགས་རྒྱལ་ཁབ་ཁག་གིས་ཨུ་རུ་སུ་ནས་ནང་འདྲེན་བྱེད་བཞིན་པའི་རྡོ་སོལ་དང་། སྣུམ། རླངས་རྫས་བཅས་ཉོ་ཚོང་མཚམས་འཇོག་བྱེད་སྲིད་པས། དེ་ནི་ཨུ་རུ་སུ་ལ་མཚོན་ན་དཔལ་འབྱོར་གྱི་གྱོང་གུད་ཆེན་པོ་ཡིན་སྐོར་དང་། དབྱིན་ཡུལ་གྱི་སྲིད་བློན་བྷོ་རེ་སེ་ཇོན་སོང་ (Boris Johnson) གིས་ཀྱང་ཨུ་རུ་སུས་ཡུ་ཀེ་རེན་དུ་དྲག་པོའི་བཙན་འཛུལ་བྱེད་བཞིན་པ་དེར་སེམས་འཚབ་ཡོད་ལུགས་དང་། དབྱིན་ཡུལ་གྱི་ངོས་ནས་གནད་དོན་དེའི་ཆེད་མཐུན་ཕྱོགས་རྒྱལ་ཁབ་ཁག་དང་མཉམ་འབྲེལ་གྱིས་གོ་བསྡུར་བྱས་ནས་ཨུ་རུ་སུ་ལ་གདོང་ལེན་བྱེད་རྒྱུ་ཡིན་ཞེས་གསུངས་འདུག

ཡུ་ཀེ་རེན་གྱི་སྲིད་འཛིན་ཝོ་ལོ་ཌི་མིར་ཇེ་ལེན་སེ་ཀེས་གནད་དོན་དེ་དང་འབྲེལ་བའི་ཐོག་བསྒྲགས་གཏམ་སྤེལ་བའི་ནང་། ཨུ་རུ་སུས་ཡུ་ཀེ་རེན་ནང་དུ་དྲག་པོའི་བཙན་འཛུལ་བྱེད་མུས་ཡིན་པ་དང་། ཡུ་ཀེ་རེན་གྱི་ངོས་ནས་རང་ཉིད་ཀྱི་རྒྱལ་སྲུང་ཆེད་དམག་འཐབ་བྱེད་རྒྱུའི་གྲ་སྒྲིག་ཨང་གསར་ཡོད་ལ། ཨུ་རུ་སུའི་དྲག་པོའི་དམག་ལ་གདོང་ལེན་བྱེད་རྒྱུ་ཡིན་སྐོར་དང་། ད་ལྟ་ཡུ་ཀེ་རེན་ས་མཚམས་ཁུལ་དུ་ཨུ་རུ་སུའི་དམག་མི་འབུམ་༢ ཙམ་དང་། དམག་འཐབ་ཡོ་བྱད་སྟོང་ཕྲག་མང་པོ་གྲ་སྒྲིག་ཡོད་པ་མ་ཟད། ཡུ་ཀེ་རེན་གྱི་མཐའ་མཚམས་ས་ཁུལ་ཁག་ནས་བཙན་འཛུལ་བྱེད་མུས་ཡིན་འདུག

དེ་བཞིན་ཨུ་རུ་སུ་དང་ཡུ་ཀེ་རེན་གྱི་གནད་དོན་དེའི་ཆེད། རྒྱལ་སྤྱིའི་གསར་འགོད་པས་རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ཧཱ་ཅོན་ཡེན་ (Hua Chunying) ལ་རྒྱ་ནག་ངོས་ནས་ལྟ་སྟངས་གང་འདྲ་ཡོད་མིན་སྐོར་ལ་དྲི་བ་ཐེངས་མང་གཏོང་སྐབས། ཁོང་མོ་དྲི་བ་དེར་གཡོལ་ཐབས་བྱེད་པ་ལས་ལན་གང་ཡང་བརྒྱབ་མི་འདུག་ཀྱང་། གསར་འགོད་པ་གཅིག་ལ་ལན་འདེབས་སྐབས། མོས་ད་ལྟའི་དམག་འཁྲུག་དེ་ནི་ཨ་རིས་མེ་སྤར་བ་ཡིན་ལུགས་བརྗོད་འདུག

ཐེངས་འདེའི་ཨུ་རུ་སུས་དམག་འཁྲུག་བྱེད་དགོས་དོན་གཙོ་བོ་ནི་རང་ཉིད་ཀྱི་ཁྱིམ་མཚེས་རྒྱལ་ཁབ་མང་དག་ཅིག་ཡུ་རོབ་མཐུན་ཚོགས་ནང་ཞུགས་ཏེ། ཨུ་རུ་སུའི་ཤུགས་རྐྱེན་ཇེ་ཉུང་དང་ནུབ་ཕྱོགས་ཀྱི་ཤུགས་རྐྱེན་ཇེ་ཆེར་འགྲོ་བཞིན་པ་དེ་བཀག་འགོག་ཆེད་ཐབས་ཇུས་བྱེད་པ་ལ་ངོས་འཛིན་བྱེད་བཞིན་ཡོད་འདུག སྤྱིར་ཨུ་རུ་སུ་དང་ཡུ་ཀེ་རན་གྱི་དཀའ་རྙོག་དེ་ཕྱི་ལོ་ ༢༠༡༤ ནས་འགོ་འཛུགས་ཀྱིས་ད་བར་རྒྱལ་སྤྱིའི་དཀའ་རྙོག་ཅིག་ཏུ་འགྱུར་ཡོད་འདུག །

གསར་འགོད་པ། ཆོས་གྲགས།