ཨོ་གླིང་ཆུ་བཞི་སྒང་དྲུག་གི་གོ་སྒྲིག་འོག་༧གོང་ས་སྐྱབས་མགོན་ཆེན་པོ་མཆོག་གི་ཞབས་རིམ་ཞིག་ཚོགས་འདུག

སྤྱི་ཟླ་ ༨ ཚེས་ ༡༠ ཉིན་ཨོ་གླིང་མདོ་ཁམས་ཆུ་བཞི་སྒང་དྲུག་གི་གོ་སྒྲིག་འོག་༧གོང་ས་སྐྱབས་མགོན་ཆེན་པོ་མཆོག་གི་སྐུའི་ཞབས་རིམ་ཞིག་ཚོགས་ཡོད་འདུག

༧གོང་ས་སྐྱབས་མགོན་ཆེན་པོ་མཆོག་གི་སྐུ་ཚེའི་ཞབས་རིམ་ཚོགས་མགོན་དུ་བོད་མི་མང་སྤྱི་འཐུས་མཁན་པོ་འཇམ་དཔལ་བསྟན་འཛིན་མཆོག་གདན་ཞུས་ལྟར་ཕེབས་ཡོད་པ་དང་། གཞན་ཡང་སྤྲུལ་སྐུ་ཆོས་ཉིད་དང་། མཁན་པོ་ཚེ་རིང་བཀྲ་ཤིས་སོགས་མང་ཚོགས་མང་པོ་ཞིག་མཉམ་འཛོམས་བྱུང་ཡོད་པ་དང་། ཞབས་རིམ་དུ་བཛྲ་དང་། སྒྲོལ་མ། སྨན་བླའི་གཟུངས་སྔགས། ༧རྒྱལ་བའི་ཞབས་བརྟན་བཅས་གསོག་སྒྲུབ་གནང་བ་མ་ཟད།

རྒྱུན་ལས་ནས་རེ་སྐུལ་ཞུས་དོན་བཞིན་མཁན་པོ་འཇམ་དཔལ་བསྟན་འཛིན་ནས། དེར་འདུས་མང་ཚོགས་ལ་ང་ཚོ་འདི་གར་མི་རིགས་སྣ་ཚོགས་མཉམ་གནས་བྱེད་བཞིན་ཡོད་དུས་གྲང་ཉུང་མི་རིགས་ཀྱི་རིག་གཞུང་རྣམས་རྒྱ་མཚོར་ཁ་བ་བབས་པ་བཞིན་གཏན་དུ་ཡལ་བའི་ཉེན་ཁ་ཡོད་དུས། བོད་མི་རིགས་ཀྱི་ཐུན་མིན་སྲོལ་རྒྱུན་རིག་གཞུང་རྒྱུན་འཛིན་དགོས་གལ་དང་། མི་རིགས་ཀྱི་ལ་རྒྱ། མི་རིགས་ལ་བཅངས་པའི་ལྷག་བསམ་འཆང་དགོས་པ་ལས། གང་ཡང་ཐོབ་རྒྱུ་མེད་པའི་ཞེན་ཁོག་སྐམ་པོས་གང་བྱུང་བྱེད་མི་རུང་བ་མ་ཟད། བོད་པའི་འཐབ་རྩོད་ནུས་མེད་དུ་གཏོང་ཞིང་བོད་མི་ཁ་བྲལ་དུ་འགྲོ་བའི་བྱ་སྤྱོད་ངན་པ་བྱེད་མི་རུང་ཚུལ། བུ་རབས་ཚ་རྒྱུད་རྣམས་ལ་མི་རིགས་རང་གི་སྐད་དང་། ཡི་གེ། སྲོལ་རྒྱུན་སོགས་ཚད་ལྡན་སློབ་སྦྱོང་སྤྲད་ནས་བོད་མི་དག་མ་རེ་ངེས་པར་བསྐྱེད་བསྲིང་ཐུབ་ཐབས་ལ་ཕ་མ་ཚོས་འགན་ཁུར་ཆེ་ཙམ་ལེན་དགོས་ཚུལ་སོགས་བཀའ་སློབ་ཟབ་རྒྱས་གནང་བ་མ་ཟད། དྲི་བ་ཁག་ལ་དྲིས་ལན་ཡང་གནང་ཡོད།

རྗེས་སོར་༧གོང་ས་མཆོག་གི་སྐུ་ཚེའི་ཞབས་རིམ་ལེགས་གྲུབ་བྱུང་བའི་དགའ་སྟོན་དུ་མང་ཚོགས་ནས་སྐོར་གཞས་སྣ་མང་འཁྲབ་སྟོན་གྱིས་མཛད་སྒོ་མཇུག་བསྒྲིལ་ཡོད། 

གནས་ཚུལ་དང་པར་རིས་མི་ཉག་ཕོ་རྒོད་བརྩོན་འགྲུས་ནས་མཁོ་སྤྲོད་གནང་།