ཨོ་གླིང་རྒྱལ་ཡོངས་བོད་ཀྱི་རྐང་སྤོལ་རུ་ཁག་གསར་འཛུགས།

ཟླ་འདིའི་ཚེས་༥ ཉིན་ཨོ་གླིང་རྒྱལ་ཡོངས་བོད་རིགས་སྤྱི་མཐུན་ཚོགས་པའི་གོ་སྒྲིག་འོག་དྷ་ས་མེག་གྷན་དུ་རྟེན་གཞི་བྱས་པའི་བོད་ཀྱི་གསོལ་མགྲོན་ཁང་གི་ཚོགས་ཁང་དུ་ཨོ་གླིང་རྒྱལ་ཡོངས་བོད་ཀྱི་རྐང་སྤོལ་དང་འབྲེལ་བའི་གསར་འགོད་གསལ་བསྒྲགས་ཤིག་སྤེལ་སོང་།

སྐབས་དེར་ཨོ་གླིང་རྒྱལ་ཡོངས་བོད་ཀྱི་རྩེད་མོའི་འགན་འཛིན་རྟ་མགྲིན་ཚེ་རིང་གིས་ཨོ་གླིང་བོད་ཀྱི་རྒྱལ་ཡོངས་རྩེད་འགྲན་ནི་ཕྱི་ལོ་༢༠༠༩ ལོར་ཨོ་གླིང་གི་རྒྱལ་ས་ཁན་བྷི་རན་བོད་རིགས་གཞོན་སྐྱེས་ཚོས་༧གོང་ས་མཆོག་གི་སྐུའི་འཁྲུངས་སྐར་དང་སྟབས་བསྟུན་ནས་འགོ་འཛུགས་བྱས་ཡོད་པ་དང་། དུས་དེ་ནས་བཟུང་ད་ལྟའི་བར་དུ་ཨོ་གླིང་དུ་ཡོད་པའི་བོད་པའི་གཞོན་སྐྱེས་ཚོས་རྩེད་འགྲན་ཐེངས་བཅུ་ཙམ་བརྩེས་ཡོད་པ་དང་།

རྩེད་འགྲན་སྐབས་བཅུ་པ་དེ་ཕྱི་ལོ་༢༠༡༩ ལོར་བརྩེས་ཡོད་པ་དང་། སྐབས་དེའི་སིལ་སྤོལ་དང་རྐང་སྤོལ་བཅས་རྩེད་མོ་རིགས་གཉིས་ཀྱི་ནང་དུ་མཉམ་ཞུགས་བྱེད་མཁན་རྩེད་འགྲན་པ་ཕོ་མོ་ཁྱོན་བསྡོམས་བརྒྱ་ལྷག་བྱུང་ཡོད་པའི་སྐོར་དང་། རྩེད་འགྲན་དེ་གོ་སྒྲིག་བྱེད་དགོས་དོན་ཡང་གཞོན་སྐྱེས་ཚོའི་ལུས་སེམས་ཀྱི་འཕྲོད་བསྟེན་དང་བོད་མི་ནང་ཁུལ་འཆམ་མཐུན་དང་ཆིལ་སྒྲིལ། དེ་བཞིན་རྩེད་མོ་བརྒྱུད་ནས་བོད་དོན་གོ་རྟོགས་སྤེལ་གྱི་ཡོད་རབས་ཀྱི་ངོ་སྤྲོད་གཏམ་བཤད་གནང་སོང་།

གཞན་ཡང་ཨོ་གླིང་རྒྱལ་ཡོངས་བོད་རིགས་སྤྱི་མཐུན་ཚོགས་པའི་དྲུང་ཆེ་མགུར་འབུམ་རྒྱལ་གྱིས་ཨོ་གླིང་རྒྱལ་ཡོངས་བོད་ཀྱི་རྐང་སྤོལ་རུ་ཁག་གསར་འཛུགས་དང་འབྲེལ་བའི་སྦྲེལ་ཐག་གཅིག་ངོ་སྤྲོད་གནང་བའི་ནང་། ལོ་འདིའི་ཟླ་བའི་བཞི་པའི་ནང་དུ་ཨོ་གླིང་རྒྱལ་ཡོངས་བོད་ཀྱི་རྐང་སྤོལ་རུ་ཁག་གི་རྩེད་འགྲན་པ་དག་འདེམས་ཐོན་བྱུང་ཡོད་པ་དང་། ཐེངས་རྗེས་མའི་རྒྱལ་ཡུམ་ཆེན་མོའི་དྲན་རྟེན་རྐང་སྤོལ་འགྲན་བསྡུར་ཐེངས་༢༧ པའི་ནང་དུ་ཨོ་གླིང་རྒྱལ་ཡོངས་བོད་ཀྱི་རྐང་སྤོལ་རུ་ཁག་མཉམ་ཞུགས་བྱེད་རྒྱུ་ཡི་དམིགས་ཡུལ་བཟུང་ཡོད་པར་བརྟེན། དམིགས་ཡུལ་དེའི་འགྲོ་གྲོན་གྱི་ཆེད་དུ་ཨ་སྒོར་$༤༥,༠༠༠ ལྷག་མཁོ་སྒྲུབ་བྱེད་དགོས་ཀྱི་ཡོད་རབས་བཀོད་འདུག

དེ་བཞིན་མགུར་འབུམ་རྒྱལ་གྱིས་རྩེད་འགྲན་པ་ཚོའི་སྒྲིག་ཆས་དང་གནམ་གྲུ་གླ་ཆ། དེ་བཞིན་སྦྱོང་བརྡར་སྤྲོད་སྐབས་སུ་དཔལ་འབྱོར་དགོས་ཀྱི་ཡོད་པས་བོད་མི་ཚང་མས་རང་ནུས་གང་ལྕོགས་ཀྱིས་རྒྱབ་སྐྱོར་དང་དྲྭ་ཐག་དེ་(https://asf.org.au/projects/tibetan-community-of-australia-(nsw)-inc) བརྒྱུད་ནས་ཞལ་འདེབས་བརྒྱག་པའི་རེ་བ་ཡོད་རབས་ཀྱི་གཏམ་བཤད་གནང་སོང་།

གསར་འགོད་པ། བློ་བཟང་རྒྱ་མཚོ།