ཨོ་གླིང་སི་ཌི་ནེས་ས་གནས་བོད་ཀྱི་གཞོན་ནུའི་རྒྱུན་ལས་བརྗེ་ལེན།

ཕྱི་ཟླ་༡༢ ཚེས་༡༤ ཉིན་ཨོ་གླིང་སི་ཌི་ནེས་བོད་ཀྱི་ས་གནས་གཞོན་ནུའི་རྒྱུན་ལས་ལོ་གཉིས་འཁོར་བའི་ཉིན་དང་སྟབས་བསྟུན། རྒྱུན་ལས་གསར་རྙིང་བརྗེ་ལན་དང་རྩིས་སྤྲོད་རྩིས་ལེན་གྱི་མཛད་སྒོ་ཞིག་འཚོགས་སོང་།

སྐབས་དང་པོའི་རྒྱུན་ལས་བརྩོན་འགྲུས་འོད་ཟེར་གྱིས་ཚོགས་ཞུགས་མི་མང་ལ་འཚམས་འདྲི་དང་སྦྲགས་ནས་གསུང་དོན། ས་གནས་གཞུན་ནུ་འདི་ལོ་ངོ་གཉིས་ཀྱི་སྔོན་ལ་རྒྱ་གར་དྷ་སར་གནས་སྡོད་བོད་དོན་འཐབ་རྩོད་པ་བསྟན་འཛིན་བརྩོན་འགྲུས་ཀྱིས་ཨོ་གླིང་ལ་འཚམས་གཟིགས་སྐབས། བོད་ཀྱི་བསྟན་སྲིད་མི་རིགས་ཀྱི་ཆེད་དུ་ཆོས་རིག་འཛིན་སྐྱོང་སྤེལ་གསུམ་བྱེད་པ་དང་། ལྷག་པར་ཆབ་སྲིད་ཐོག་ནས་བོད་དོན་འཐབ་རྩོད་སོགས་ལ་དམིགས་ནས། ཁོང་གིས་རེ་འབོད་དང་རྒྱབ་སྐྱོར་གནང་ནས་ས་གནས་གཞོན་ནུ་དངོས་སུ་བཙུགས་པ་ཞིག་ཡིན་སྐོར་དང་། དེ་བཞིན་ས་གནས་མི་མང་གིས་རྒྱབ་སྐྱོར་གནང་སྐོར། མ་འོངས་པར་ཡང་རྒྱབ་སྐྱོར་གནང་དགོས་སྐོར་སོགས་གསུངས་སོང་།

དེ་བཞིན་རྒྱུན་ལས་གསར་པའི་ཚོགས་གཙོ་བསོད་ནམས་ལྷ་མོས་འཚམས་འདྲི་དང་སྦྲགས་ནས་གསུང་དོན་ལ། རྒྱལ་གཅེས་ལྷག་བསམ་ཅན་གྱི་རྒྱ་ཆེའི་མི་མང་ཡོངས་ཀྱིས་ད་བར་ས་གནས་གཞོན་ནུའི་སྐབས་དང་པོའི་རྒྱུན་ལས་ཚོར་རོགས་རམ་རྒྱབ་སྐྱོར་གནང་བར་བཀའ་དྲིན་ཆེ་ཞུ་བཞིན་ཡོད། དེ་བཞིན་ས་གནས་གཞོན་ནུའི་སྐབས་དང་པོའི་རྒྱུན་ལས་ཡོངས་ཀྱིས་འཐུས་སྒོ་ཚང་བའི་ཕྱག་ལས་རྒྱ་ཆེན་གནང་སྟེ། བོད་དོན་ལུས་འགུལ་གང་མང་སྤེལ་བ་སོགས་ལ་སྙིང་ནས་རྗེས་སུ་ཡི་རངས་བྱེད་ཀྱི་ཡོད་ཅེས་ཚོགས་གཙོ་གསར་པའི་ལས་ཁུར་དང་འབྲེལ་ནས་གསུང་བཤད་གནང་།

དེ་རྗེས་ཨོ་གླིང་རྒྱལ་ཡོངས་བོད་རིགས་མཐུན་ཚོགས་ཀྱི་ཚོགས་གཙོ་མྱི་རྒན་གྱིས་གསུང་དོན། ཁོང་གིས་གཞོན་ནུའི་སྒྲིག་འཛུགས་ལ་རྒྱབ་སྐྱོར་ཡོད་སྐོར་དང་། ད་ལྟ་བར་དུ་བཙན་བྱོལ་ནང་ཁྲི་ཟུར་བསོད་ནམས་སྟོབ་རྒྱལ་དང་རྒྱ་རི་བློ་གྲོས་རྒྱལ་མཚན་སོགས་དཔེ་རུ་དྲངས་ཏེ། ཁོང་ཚོས་དང་པོ་གཞོན་ནུའི་སྒྲིགས་འཛུགས་ཀྱི་ཕྱག་ལས་གང་མང་གནང་བ་དང་མཉམ་མྱོང་རིམ་བསགས་བྱས་ནས་ད་ལྟ་བཙན་བྱོལ་སྤྱི་ཚོགས་ཀྱི་གལ་ཆེན་མི་སྣ་ཤ་སྟག་ཆགས་ཡོད་པ་རེད། དེ་བཞིན་ཁྱེད་ཅག་བོད་ཀྱི་ན་གཞོན་རྣམས་ཀྱིས་ཀྱང་དེ་བཞིན་མིག་དཔེ་བཟང་པོར་བལྟ་དགོས་པ་གལ་ཆེན་ཡིན་སྐོར་སོགས་གསུངས་སོང་།

དེ་བཞིན་ད་ལྟའི་བོད་རིགས་མཐུན་ཚོགས་ཀྱི་ཕུར་བུ་བཀྲ་ཤིས་གྱིས་ལོ་ལྟར་རྒྱ་གར་ནས་འདི་གར་ལོ་ལྟར་བོད་མི་གང་མང་ཡོང་བཞིན་ཡོད་པ་རེད། ས་གནས་བོད་མི་ཚོས་ཁོང་ཚོར་རོགས་རམ་སྣེ་ལེན་རྒྱབ་སྐྱོར་ཡག་པོ་བྱེད་དགོས་སྐོར་གསུངས་སོང་།

དེ་རྗེས་ཉིན་དེར་མགྲོན་འབོད་བྱས་པའི་ཨོ་གླིང་བོད་ཀྱི་གཞས་པ་གྲགས་ཆེན་བསྟན་འཛིན་ཆོས་རྒྱལ་སོགས་ཀྱིས་གཞས་སྣ་འཁྲབ་སྟོན་བྱས་པ་དང་། ཚོགས་འདུ་གྲོལ་ཡོད་པ་རེད།

འོན་ཀྱང་མི་མང་གང་འཚམས་ཕྱིན་པའི་རྗེས་ས་གནས་བོད་མི་གཞོན་སྐྱེས་ཁག་ཅིག་འཁྲུག་པ་ཤོར་བའི་གནས་ཚུལ་ཞིག་བྱུང་ཡོད་པ་དང་། ད་ལྟ་གཞོན་ནུའི་རྒྱུན་ལས་གསར་རྙིང་གཉིས་ཀྱིས་ནང་འཁྲུག་རྙོག་གླེང་བྱུང་བའི་གཞོན་སྐྱེས་དེ་དག་དང་ནང་མི་ཁག་གི་བར་འདུམ་སྒྲིག་བྱེད་མུས་སུ་ཡོད་འདུག

སི་ཌི་ནེས་བོད་ཀྱི་ས་གནས་གཞོན་ནུའི་སྐབས་གཉིས་པའི་རྒྱུན་ལས་ལས་རྣམས་ནི། ཚོགས་གཙོ་བསོད་ནམས་ལྷ་མོ་དང་། ཚོགས་གཞོན་བསྟན་འཛིན་བདེ་སྐྱིད། སྤྱིན་པ། འཇིགས་མེད་སོགས་ཡིན་པ་རེད།།