ཨོ་སི་ཁྲུ་ལི་ཡའི་སྲིད་གཞུང་གིས་རྒྱལ་མཚམས་ཀྱི་སྒོ་ཕྱི་ཟླ་༡༡ ནས་འབྱེད་འཆར་ཡོད་འདུག
ཨོ་སི་ཁྲུ་ལི་ཡས་ཝུའུ་ཧན་ཏོག་དབྱིབས་ནད་ཡམས་(Covid-19) འགོག་ཆེད་ཟླ་བ་བཅོ་བརྒྱད་རིང་རྒྱལ་མཚམས་དམ་པོར་བསྡམས་རྗེས། ཟླ་བ་རྗེས་མ་ནས་སྔོན་འགོག་གི་ཁབ་བརྒྱབ་ཟིན་པའི་མི་རྣམས་ཡོང་དུ་འཇུག་འཆར་ཡོད་འདུག
ཨོ་སི་ཁྲུ་ལི་ཡ་ནི་ནད་ཡམས་སྔོན་འགོག་ཆེད་དུ་རྒྱལ་མཚམས་དམ་ཤོས་སྡོམ་མཁན་གྱི་རྒྱལ་ཁབ་ཅིག་ཆགས་ཡོད་དེ། ད་ལྟའི་ཆར་དམིགས་བསལ་གྱི་ཆོག་མཆན་ཡོད་པའི་མི་དང་མི་སེར་ཁོ་ན་ལས་རྒྱལ་ཁབ་ནང་ལ་ཡོང་དུ་འཇུག་གི་མེད་ལ། དེ་བཞིན་དམིགས་བསལ་གྱི་ཆོག་མཆན་མེད་པར་ཨོ་སི་ཁྲུ་ལི་ཡ་ནས་ཕྱིའི་རྒྱལ་ཁབ་ཏུའང་འགྲོ་མི་ཆོག་པ་བཟོས་ཡོད།
ཨོ་སི་ཁྲུ་ལི་ཡའི་གཞུང་གིས་ཐོག་མར་ནད་ཡམས་བཀག་འགོག་ཆེད་དུ་རྒྱལ་མཚམས་བསྡམས་ནས་འགྲུལ་པ་འགྲོ་འོང་མི་ཆོག་པའི་སྒྲིག་ཁྲིམས་དམ་པོ་དེ་གཏན་ལ་ཕབ་དུས། དེར་མི་མང་རྣམས་ཀྱིས་དགའ་བསུ་དང་རྒྱབ་སྐྱོར་ཤུགས་ཆེན་བྱས་ན་ཡང་། སྲིད་བྱུས་དེ་ཁྱིམ་ཚང་མང་པོ་ཞིག་གི་ནང་མི་འདུ་འཛོམས་བྱེད་དུ་མི་འཇུག་པའི་བཀག་རྡོར་གྱུར་བར་བརྟེན། ད་ལྟའི་ཆར་དེར་དགག་པ་དང་སྐྱོན་བརྗོད་བྱེད་མཁན་ཇེ་མང་དུ་གྱུར་ནས་གཞུང་ལ་གནོན་ཤུགས་གསར་པ་ཞིག་འཕྲད་བཞིན་ཡོད་འདུག
སྲིད་བློན་མོ་རེ་སོན་(Scott Morrison) གྱིས་དེ་རིང་རེས་གཟའ་པ་སངས་ཉིན་སྤེལ་བའི་གསལ་བསྒྲགས་ནང་། ཁོང་གིས་ཟླ་བ་རྗེས་མའི་བར་དུ་མི་འབོར་གྱི་བརྒྱ་ཆ་༨༠ ཙམ་ལ་སྔོན་འགོག་གི་སྨན་ཁབ་རྒྱག་ཐུབ་པའི་རེ་བ་བྱེད་ཀྱི་ཡོད་པ་དང་། དེ་ལྟར་བྱུང་ན་མི་མང་རྣམས་ལ་བསྐྱར་དུ་འགྲུལ་བཞུད་ཀྱི་རང་དབང་ལོངས་སུ་སྤྱོད་རྒྱུ་རག་ངེས་སྐོར་བརྗོད་ཡོད་འདུག
རྒྱལ་མཚམས་ཀྱི་སྒོ་འབྱེད་པ་དང་སྦྲགས། ཉིན་༡༤ ལ་མགྲོན་ཁང་དུ་ཟུར་བཀག་ཏུ་སྡོད་དགོས་པའི་་སྒྲིག་ཁྲིམས་ཀྱང་ལྷོད་དུ་བཏང་ནས། འགོག་ཁབ་བརྒྱབ་ཟིན་པའི་འགྲུལ་པ་རྣམས་ལ་ཉིན་བདུན་རིང་ཁྱིམ་དུ་ཟུར་བཀག་བྱས་ན་ཆོག་པ་བཟོ་འཆར་ཡོད་འདུག
མངའ་སྡེ་རེ་རེའི་ནད་ཡམས་ཀྱི་གནས་སྟངས་མི་འདྲ་བའི་དབང་གིས། རྒྱལ་མཚམས་ཀྱི་སྒོ་འབྱེད་པའི་དུས་ཚོད་དེ་ཅུང་མི་འདྲ་བ་ཆགས་སྲིད་ན་ཡང་། ཐོག་མར་སྒོ་འབྱེད་མཁན་དེ་ནིའི་སོ་ཐི་ཝལ་(New South Wales) ཡིན་པའི་སྔོན་དཔག་བྱེད་ཀྱི་ཡོད་འདུག །
གསར་འགོད་པ་དཀོན་མཆོག་རབ་བརྟན།
