ཨོ་སི་ཁྲུ་ལི་ཡས་ཀྱང་༢༠༢༢ ལོའི་པེ་ཅིང་ཨོ་ལིམ་ཕིག་རྩེད་འགྲན་ཆེན་མོར་གཞུང་འབྲེལ་མི་སྣ་འགྲོ་རྒྱུ་བཀག་སྡོམ་བྱས་འདུག

 ཨ་རིའི་རྗེས་སུ། ཨོ་སི་ཁྲུ་ལི་ཡས་༢༠༢༢ ལོའི་པེ་ཅིང་ཨོ་ལིམ་ཕིག་རྩེད་འགྲན་ཆེན་མོ་གཞུང་འབྲེལ་ཐོག་ནས་བཀག་སྡོམ་(diplomatic boycott of Beijing Olympics) བྱས་པ་ཡིན་པའི་གསལ་བསྒྲགས་སྤེལ་འདུག་པ་མ་ཟད། རྒྱ་ནག་གི་རྩེད་འགྲན་ཆེན་མོ་དེར་ངོ་རྒོལ་གྱི་རྣམ་འགྱུར་སྟོན་མཁན་གྱི་རྒྱལ་ཁབ་མང་དུ་འགྲོ་བཞིན་འདུག 

ཟླ་འདིའི་ཚེས་༨ ཉིན་ཨོ་སི་ཁྲུ་ལི་ཡའི་སྲིད་བློན་སི་ཀོ་ཋི-མོ་རེ་སོན་(Scott Morrison) གྱིས་ཨོ་སི་ཁྲུ་ལི་ཡའི་གཞུང་འབྲེལ་མི་སྣ་གཅིག་ཀྱང་༢༠༢༢ ལོའི་པེ་ཅིང་ཨོ་ལིམ་ཕིག་རྩེད་འགྲན་ཆེན་མོར་གཞུང་འབྲེལ་ཐོག་ནས་གཏོང་རྒྱུ་མིན་པའི་གསལ་བསྒྲགས་བྱས་འདུག་ཅིང་། དེའི་རྒྱུ་མཚན་ནི་རྒྱ་ནག་གིས་ཤར་ཏུར་ཀི་སི་ཐན་དུ་འགྲོ་བ་མིའི་ཐོབ་ཐང་རྩིས་མེད་རྡོག་རོལ་གཏོང་བཞིན་པ་དང་། དེ་མིན་གྱི་གནད་དོན་གཞན་མང་པོ་དང་འབྲེལ་ཡོད་པའི་འགྲེལ་བརྗོད་བྱས་ཡོད་འདུག 

གཞུང་འབྲེལ་གསར་འགོད་གསལ་བསྒྲགས་དེའི་ཐོག ཨོ་སི་ཁྲུ་ལི་ཡའི་སྲིད་བློན་ཁོང་གིས་ཉེ་བའི་ལོ་ཤས་ནང་ཨོ་རྒྱའི་འབྲེལ་ལམ་ཇེ་སྡུག་ཇེ་ཞན་དུ་འགྲོ་བཞིན་པའི་གནས་སྟངས་འོག ཨོ་སི་ཁྲུ་ལི་ཡས་༢༠༢༢ ལོའི་པེ་ཅིང་ཨོ་ལིམ་ཕིག་རྩེད་འགྲན་ཆེན་མོ་བཀག་སྡོམ་བྱས་པ་དེ་“ཧ་ལས་དགོས་པའི་”གནས་ཚུལ་ཞིག་ཆགས་ཀྱི་མེད་སྐོར་གསུངས་པའི་ཁར། “ངས་འདི་བྱེད་དགོས་པའི་རྒྱུ་མཚན་ནི། འདི་ཨོ་སི་ཁྲུ་ལི་ཡའི་རྒྱལ་ཁབ་ཀྱི་ཁེ་ཕན་དང་འབྲེལ་ཡོད་པ་མ་ཟད། ཀུན་སྤྱོད་ཀྱི་ཐོག་ནས་བྱེད་དགོས་ངེས་ཤིག་ཀྱང་རེད་”ཅེས་བསྣན་ཡོད་འདུག 

ཁ་སང་ཨ་རིས་རྒྱ་ནག་གི་འགྲོ་བ་མིའི་ཐོབ་ཐང་གི་གནས་སྟངས་ལ་ངོ་རྒོལ་བྱེད་པའི་ཆེད་དུ་ཨ་རིའི་གཞུང་འབྲེལ་མི་སྣ་གཅིག་ཀྱང་༢༠༢༢ ལོའི་པེ་ཅིང་ཨོ་ལིམ་ཕིག་རྩེད་འགྲན་ཆེན་མོར་གཏོང་རྒྱུ་མིན་པའི་གསལ་བསྒྲགས་སྤེལ་རྗེས། རྒྱ་ནག་གིས་ཕྱོགས་གཅིག་ནས་ཨ་རིའི་མི་སྣ་རྣམས་གདན་འདྲེན་ཡང་ཞུས་མེད་ཅེས་བཤད་དེ་གནད་དོན་གལ་ཆུང་གི་མདོག་བསྟན་ན་ཡང་། ཕྱོགས་གཞན་ཞིག་ནས་གཞུང་འབྲེལ་མི་སྣ་མི་གཏོང་བའི་ཨ་རིའི་ཐག་གཅོད་དེར་ཡ་ལན་དྲག་པོ་སློག་རྒྱུ་ཡིན་པའི་ཐ་ཚིག་བསྒྲགས་ཡོད་འདུག 

རྒྱལ་ཁབ་གཅིག་གིས་གཞུང་འབྲེལ་ཐོག་ནས་པེ་ཅིང་ཨོ་ལིམ་ཕིག་རྩེད་འགྲན་ཆེན་མོ་བཀག་སྡོམ་བྱེད་ཅེས་པའི་གོ་དོན་ནི། རྒྱལ་ཁབ་དེའི་གཞུང་འབྲེལ་མི་སྣ་གཅིག་ཀྱང་གཞུང་འབྲེལ་ཐོག་ནས་པེ་ཅིང་ཨོ་ལིམ་ཕིག་རྩེད་འགྲན་ཆེན་མོའི་འགོ་འཛུགས་དང་མཇུག་བསྡུའི་མཛད་སྒོར་མངགས་གཏོང་མི་བྱེད་པ་དེ་ཡིན་འདུག་ཅིང་། དེ་ནི་གཙོ་བོ་རྒྱ་ནག་དང་འཛམ་གླིང་ལ་ཆབ་སྲིད་ཀྱི་བརྡ་ལན་དང་རྣམ་འགྱུར་སྟོན་ཆེད་ཡིན་འདུག་པས། རྒྱལ་ཁབ་དེའི་རྩེད་འགྲན་པ་རྣམས་རང་མོས་ལྟར་མུ་མཐུད་རྩེད་འགྲན་ཆེན་མོའི་ནང་དུ་མཉམ་ཞུགས་བྱེད་ཆོག་གི་ཡོད་འདུག 

༢༠༢༢ ལོའི་དགུན་ཁའི་ཨོ་ལིམ་ཕིག་རྩེད་འགྲན་ཆེན་མོ་དེ་ལོ་རྗེས་མའི་ཕྱི་ཟླ་༢ པའི་འགོ་སྟོད་དུ་རྒྱ་ནག་གི་རྒྱལ་ས་པེ་ཅིང་དུ་འཚོགས་གཏན་འཁེལ་ཡོད་ཅིང་། དེ་ནི་༢༠༠༨ ལོའི་དབྱར་ཁའི་ཨོ་ལིམ་ཕིག་རྩེད་འགྲན་ཆེན་མོའི་རྗེས་སུ་རྒྱ་ནག་ཏུ་འཚོགས་གཏན་འཁེལ་བའི་རྒྱལ་སྤྱིའི་རྩེད་མོའི་འགྲན་སྡུར་ཆེ་ཤོས་དེ་ཆགས་ཀྱི་ཡོད་འདུག

ཡིན་ན་ཡང་། ད་ལྟའི་ཆར་རྒྱ་ནག་གི་གདུག་རྩུབ་ཀྱི་བྱ་སྤྱོད་རྣམས་མང་གཙོའི་འཛམ་གླིང་གི་མིག་ལམ་དུ་ཇེ་གསལ་དུ་གྱུར་ནས་སྣང་མེད་གཏོང་ཐབས་བྲལ་བའི་ཚད་དུ་ཐོན་ཡོད་པས། ཨ་རི་དང་། ཨོ་སི་ཁྲུ་ལི་ཡ་གཉིས་ཙམ་མ་ཟད། མང་གཙོའི་མཐུན་གྲོགས་རྒྱལ་ཁབ་གཞན་རྣམས་ཀྱིས་ཀྱང་༢༠༢༢ ལོའི་པེ་ཅིང་ཨོ་ལིམ་ཕིག་རྩེད་འགྲན་ཆེན་མོ་གཞུང་འབྲེལ་ཐོག་ནས་བཀག་སྡོམ་བྱེད་པའི་གོ་སྐབས་ཆེན་པོ་ཡོད་འདུག ། 

གསར་འགོད་པ་དཀོན་མཆོག་རབ་བརྟན།