སྟོབས་ཆེན་རྒྱལ་ཁབ་བདུན་གྱི་འགོ་ཁྲིད་ལྷན་ཚོགས།

རེས་གཟའ་ཉི་མའི་ཉིན་འཛམ་གླིང་བཟོ་ལས་ཅན་གྱི་སྟོབས་ཆེན་རྒྱལ་ཁབ་བདུན་གྱི་ལྷན་ཚོགས་དེ་འཇར་མན་དུ་འགོ་འཛུགས་བྱས་ཡོད་པ་དང་། ཨ་རིའི་སྲིད་འཛིན་ཨོ་བྷ་མ་དང་འཇར་མན་གྱི་སྲིད་བློན་ལྕམ་མར་ཁལ་གཉིས་སོ་སོར་ནས་ཨ་རུ་སུས་ངེས་པར་དུ་ཡུག་རེན་གྱི་མངའ་ཁོངས་གཅིག་གྱུར་ལ་བརྩི་བཀུར་དགོས་སྐོར་ནན་བརྗོད་བྱས་ཡོད་པ་རེད།

ཨུ་རུ་སུ་ཡིས་ཡུག་རེན་གྱི་ཁི་རི་མི་ཡ་བཙན་བཟུང་བྱས་པ་ནས་བཟུང་འདས་པའི་ལོ་གཉིས་རིང་བཟོ་ལས་ཅན་གྱི་སྟོབས་ཆེན་རྒྱལ་ཁབ་བདུན་གྱིས་ཨུ་རུ་སུའི་སྲིད་འཛིན་པུ་ཌིན་ལྷན་ཚོགས་ཐོག་གདན་འདྲེན་བྱས་མེད་པ་དང་། རྒྱུ་རྐྱེན་དེར་བརྟེན་ནས་སྟོབས་ཆེན་རྒྱལ་ཁབ་བརྒྱད་ཀྱི་འགོ་ཁྲིད་ལྷན་ཚོགས་དེ་རྒྱལ་ཁབ་བདུན་དུ་གྱུར་ཡོད་པ་རེད།

སྤྱིར་འཆར་ཅན་ལྟར་ན་སྟོབས་ཆེན་རྒྱལ་ཁབ་བདུན་གྱི་ལྷན་ཚོགས་སྐབས་ཀྱི་བརྗོད་གཞི་གཙོ་བོ་རྒྱལ་སྤྱིའི་ཚོང་འབྲེལ་སྐོར་ཡིན་ནའང་། ཚོགས་ཞུགས་རྒྱལ་ཁབ་སོ་སོས་འཛམ་གླིང་ཐོག་འཕྲད་བཞིན་གནད་དོན་ཧ་ཅང་མང་པོ་ཞིག་ཐོག་ལ་བགྲོ་གླེང་དང་གྲོས་བསྡུར་བྱེད་བཞིན་པ་ལྟར། ཐེངས་འདིའི་ལྷན་ཚོགས་ཐོག་ཨུ་རུ་སུས་ཡུག་རེན་གྱི་ཁི་རི་མི་ཡ་ས་ཁུལ་ཧམ་ཟ་བྱས་པའི་གནད་དོན་དང་། གྷི་རི་སི་ཡི་བུ་ལོན་གཉན་འཕྲང་སོགས་འཛམ་གླིང་དང་ས་ཁུལ་གྱི་གནད་དོན་མང་པོ་ཞིག་ལ་གདོང་ལེན་བྱས་དགོས་ཁེལ་ཡོད་འདུག

ཟླ་འདིའི་ཕྱི་ཚེས་༦ རེས་གཟའ་སྤེན་པའི་ཉིན་ཨུ་རུ་སུའི་སྲིད་འཛིན་པུ་ཌིན་གྱིས་ཐེངས་འདིའི་ལྷན་ཚོགས་ལ་ལན་འདེབས་ཀྱི་ཚུལ་དུ། ཨུ་རུ་སུས་འཇིགས་སྐུལ་བྱེད་བཞིན་མེད་སྟབས། ཞེད་སྣང་དགོས་དོན་མེད་སྐོར་བརྗོད་ཡོད་པ་རེད། འདི་ལོའི་འཛམ་གླིང་བཟོ་ལས་ཅན་གྱི་རྒྱལ་ཁབ་བདུན་གྱི་འགོ་ཁྲིད་ལྷན་ཚོགས་ཐོག་འཇར་མན་གྱི་སྲིད་བློན་མར་ཁལ་དང་ཨ་རིའི་སྲིད་འཛིན་ཨོ་བྷ་མ། ཉི་ཧོང་གི་སྲིད་བློན་ཨ་བྷི། དབྱིན་ཡུལ་གྱི་སྲིད་བློན་ཁེ་མར་རོན། ཧྤ་རེན་སིའི་སྲིད་འཛིན་ཧོ་ལན་ཌི། ཁ་ན་ཌའི་སྲིད་བློན་ཧ་ཕར་ཁུའུ་ཁི། ཨེ་ཊ་ལི་ཡི་སྲིད་བློན་ལཱན་ཛི་བཅས་རྒྱལ་ཁབ་བདུན་གྱི་འགོ་ཁྲིད་མཉམ་ཞུགས་བྱས་ཡོད་པ་རེད།།

གསར་འགོད་པ་ཏྲེ་ཧོར་ཐུབ་བསྟན།