ཤེས་ཡོན་སྲིད་བྱུས་སྐོར་དཔྱད་པ།

ཁོ་བོས་ད་ལྟའི་ཆར་དྷ་སར་འཚོགས་གཏན་འཁེལ་བའི་ཚོགས་འདུའི་བརྗོད་གཞིར་དོ་སྣང་བྱེད་དགོས་པ་གལ་ཆེ་ཉིད་དུ་སེམས་ནའང་རང་གཞུང་བཀའ་ཤག་ནས་གཏན་ལ་ཕབ་པའི་ཤེས་ཡོན་སྲིད་བྱུས་དེ་རྗེ་བཙུན་པདྨ་ལགས་ནས་ལག་བསྟར་གནང་གི་མིན་ཞེས་པ་གོ་མ་ཐག་བློ་ཕམ་པའི་སྒོ་ནས་བོད་མིའི་རྩ་དོན་དང་འབྲེལ་ལས་དོན་གལ་པོ་ཆེར་མཐོང་སྟེ་རང་གི་བསམ་ཚུལ་མ་བྲིས་ཐབས་མེད་བྱུང་སོང༌། བཀའ་ཟུར་རྗེ་བཙུན་པདྨ་ལགས་ནས་བཙན་བྱོལ་གྱི་བོད་ཕྲུག་རྣམས་ལ་ཤེས་ཡོན་སྤྲོད་ཕྱོགས་ཐད་བྱས་རྗེས་རླབས་ཆེན་ཞིག་བཞག་ཡོད་པ་ནི་ཚང་མས་མཁྱེན་གསལ་ཡིན། དེ་བཞིན་ཤེས་ཡོན་གྱི་རྣམ་བཞག་སྐོར་ལ་ཉམས་མྱོང་གང་མང་ཞིག་ཡོད་པ་ལྟ་ཅི་སྨོས། དེས་ན་བཀའ་ཤག་སྐབས་བཅུ་གཉིས་པས་གཏན་ལ་ཕབ་པའི་ཤེས་ཡོན་སྲིད་བྱུས་དེ་ལག་བསྟར་གནང་རྒྱུ་མིན་པའི་རྒྱུ་མཚན་གསལ་པོ་བརྗོད་དགོས། ཤེས་ཡོན་སྲིད་བྱུས་ཀྱི་ནང་དོན་གང་ཞིག་ལག་བསྟར་གནང་ཚེ་སྐྱོན་དུ་འགྱུར་བ་དང༌། ཡང་ན་ཤེས་ཡོན་སྲིད་བྱུས་གསར་པ་ཞིག་གཏན་འབེབས་གནང་འཆར་ཡོད་རིགས་དེ་སྐོར་གསལ་བཤད་བྱ་དགོས་པ་ལས་རྒྱུ་མཚན་མེད་པར་ཅི་བྱ་གཏོལ་མེད་དུ་ལག་བསྟར་གནང་གི་མིན་གསུངས་པ་ལེགས་བཤད་དུ་ག་ལ་སེམས། བོད་ཁྱིམ་སློབ་གྲྭའི་ཁོངས་ནས་ཤེས་ཡོན་སྲིད་བྱུས་དེར་རྒྱབ་སྐྱོར་གནང་དགོས་པ་ལས་ལག་བསྟར་གནང་རྒྱུ་མིན་ཞེས་ཐ་ཚིག་བསྒྲགས་པ་དེ་ཡིད་སྐྱོ་བའི་གནས་སུ་སེམས། སྲིད་བྱུས་གསར་པ་དེས་རྐྱེན་པས་ཐོག་མའི་ཆར་དཀའ་ངལ་ཕྲད་ནའང་རིམ་གྱིས་ལག་བསྟར་གནང་བ་ལས་དཀའ་ཚེགས་མེད་པར་ལས་སླ་རུ་འགྲོ་བའི་ཡིད་ཆེས་ཡོད། ཤེས་ཡོན་སྲིད་བྱུས་འོག་ལག་བསྟར་གནང་ཚེ་འབྱུང་འགྱུར་ལོ་ཤས་ནང་གྲུབ་འབྲས་གཟེངས་སུ་ཐོན་པ་བྱུང་བ་དང་ན་གཞོན་རྣམས་ལ་བོད་ཀྱི་སྐད་ཡིག་གི་དཀའ་ངལ་སེལ་ཐུབ་ངེས་ཡིན། སྤྱིར་བཀའ་ཤག་སྐབས་བཅུ་གཉིས་པས་གཏན་ལ་ཕབ་པའི་ཤེས་ཡོན་སྲིད་བྱུས་དེར་ལག་བསྟར་གནང་གི་མིན་གསུང་མཁན་དེ་སྔོན་སྤྱི་འཐུས་ག་གེ་མོ་དེ་འདྲ་མང་པོ་བྱུང་ཡོད། འོན་ཀྱང་སྲིད་བྱུས་དེ་མགོ་ནས་མཇུག་བར་བཀླགས་རྗེས་ནང་དོན་རྟོགས་མ་ཐག་ལག་བསྟར་གནང་གི་མིན་གསུང་དགོས་པའི་རྒྱུ་མཚན་མ་རྙེད། དེ་རྗེས་བོད་མི་མང་སྤྱི་འཐུས་ལྷན་ཚོགས་ནས་རྒྱུ་མཚན་ཤེས་ནས་སྲིད་བྱུས་དེར་རྒྱབ་སྐྱོར་དང་གཏན་འབེབས་གནང་བ་ལས་གང་ཟག་བྱེ་བྲག་པ་ཞིག་གིས་གཏན་འབེབས་གནང་བ་ཞིག་མིན། སྲིད་བྱུས་དེ་ནི་བོད་ཀྱི་སྐད་ཡིག་གཞི་རྩར་བཞག་པའི་སྒོ་ནས་བོད་ཀྱི་ཆོས་དང་རིག་གཞུང་སྲུང་སྐྱོབས་གནང་ཐབས་ཞིག་ཡིན་པ་ལས་རྒྱུ་མཚན་གཞན་གང་ཡང་མིན། དེ་སྔོན་བཙན་བྱོལ་བོད་གཞུང་གི་ཤེས་ཡོན་སྲིད་བྱུས་ནི་དབྱིན་ཇིའི་གཏན་ལ་ཕབ་པའི་རྒྱ་གར་གཞུང་གི་ཤེས་ཡོན་སྲིད་བྱུས་ཤིག་ཡིན་སྐོར་བཀའ་ཁྲི་མཆོག་ནས་གསུངས་མྱོང་ཡོད། སྲིད་བྱུས་དེས་རྐྱེན་པས་བོད་ཕྲུག་སློབ་ཐོན་པ་མང་པོ་བོད་ཡིག་གི་གནས་སྟངས་སྐྱོ་བོ་ཞིག་བྱུང་ཡོད། བོད་ཡིག་ཡར་རྒྱས་གཏོང་རྒྱུའི་ཐུགས་འགན་ཡོངས་རྫོགས་དགོན་སྡེ་ཁག་ནང་ཡོད་གྲྭ་བཙུན་རྣམས་ནས་བཞེས་ཡོད། འབྱུང་འགྱུར་མུ་མཐུད་ནས་གྲྭ་བཙུན་ཁོ་ནས་ལས་འགན་དེ་འགྲུབ་ག་ལ་ནུས། ད་ལྟའི་ཆར་བཙན་བྱོལ་སྤྱི་ཚོགས་ནང་བོད་ཡིག་གི་གནས་ཚད་མཐོ་རུ་འགྲོ་འགོ་ཚུགས་བཞིན་ཡོད་པ་ནི་བོད་ཡིག་ལ་ཆེ་མཐོང་དང་རང་གཞུང་གི་ཡང་དག་པའི་ཤེས་ཡོན་སྲིད་བྱུས་ལ་བརྟེན་ནས་བྱུང་ཡོད། དེ་བཞིན་ྋགོང་ས་མཆོག་ནས་ཕྱི་ལོ་༢༠༠༤ ལོའི་ཏོ་རོན་ཏོ་དུས་འཁོར་དབང་ཆེན་སྐབས་མི་མང་ལ་བོད་ཀྱི་སྐད་ཡིག་སྦྱོང་དགོས་སྐོར་བཀའ་སློབ་ནན་པོ་གནང་ཡོད་པ་ཚང་མས་མཁྱེན་གསལ་ཡིན། བོད་ཡིག་སྦྱངས་རྗེས་ལས་མེད་ལས་ཡོད་དུ་འགྱུར་བ་ལས་ལས་མེད་དུ་ག་ལ་འགྱུར། ང་ཚོའི་སྤྱི་ཚོགས་ནང་བོད་ཡིག་གི་ཐོག་ལས་གཞི་མང་བ་ལས་དབྱིན་ཡིག་ཐོག་ལས་གཞི་དེ་ཙམ་མེད། ད་ལྟའི་ཆར་འཛམ་གླིང་ནང་བོད་ཡིག་ལ་དོ་སྣང་བྱེད་མཁན་མང་དུ་ཕྱིན་ཡོད་པ་དང༌། དེ་བཞིན་བོད་ཡིག་ལ་ཆེ་མཐོང་ཆེ་རུ་ཕྱིན་ཏེ་མཐོ་སློབ་མང་པོའི་ནང་བོད་ཡིག་སྡེ་ཚན་གསར་འཛུགས་བྱེད་བཞིན་ཡོད། བལ་ཡུལ་ཧི་མ་ལའི་མི་རིགས་རྣམས་བོད་ཡིག་ལ་དོ་སྣང་ཆེ་རུ་སོང་སྟེ་བལ་གཞུང་ལ་ཤེས་ཡོན་སྲིད་བྱུས་ཀྱི་ལམ་ནས་བོད་ཡིག་ནང་ཚན་རིག་དང༌། སྤྱི་ཚོགས་ཚན་རིག་སོགས་ཀྱི་སློབ་ཚན་ཡོད་པའི་སྒོ་ནས་སློབ་ཁྲིད་དགོས་སྐོར་འཐབ་རྩོད་བྱ་བཞིན་ཡོད། རྒྱལ་ཁབ་གཞན་ཞིག་གིས་ཀྱང་བོད་ཡིག་གལ་ཆེར་བརྩི་བཞིན་ཡོད་ན་བོད་མི་ཚོས་དེ་བས་གལ་ཆེ་བརྩི་དགོས་པ་མ་ཡིན་ནམ། དེ་བཞིན་ཧཕ་རན་སི་དང༌། རྗར་མ་ནི། འཇར་པན་སོགས་རྒྱལ་ཁབ་གང་སར་ཐོག་མར་རང་སྐད་ཀྱིས་སྒོ་ནས་སློབ་ཁྲིད་བྱེད་པ་ལས་དབྱིན་སྐད་དུ་བྱེད་སྲོལ་ཡོད་པ་མ་མཐོང༌། དེ་སྐོར་བཀའ་ཟུར་རྗེ་བཙུན་པདྨ་ལགས་ནས་མ་མཁྱེན་པ་མི་སྲིད་ཅིང༌། རྒྱལ་ཁབ་གང་སར་སྐད་ཡིག་གི་གྲལ་རིམ་ནང་སོ་སོའི་སྐད་ཡིག་གྲལ་རིམ་དང་པོའི་ནང་བཞག་སྟེ། དེ་རྗེས་དབྱིན་ཇིའི་སྐད་སོགས་དགོས་མཁོ་དང་བསྟུན་ཏེ་བཞག་པ་ལས་གཞན་སྐད་གཙོ་བོར་བྱེད་པ་མ་སྣང༌། འཛམ་གླིང་མཁས་པ་ཀུན་གྱིས་བོད་ཀྱི་སྟོབས་ཤུགས་ནི་བོད་ཀྱི་རིག་གཞུང་ངམ་ལེགས་སྦྱང་ལ་བརྩི་བཞིན་ཡོད། ཇི་སྲིད་བོད་ཀྱི་སྐད་ཡིག་ཉམ་པ་དེ་སྲིད་བོད་ཀྱི་སྟོབས་ཤུགས་ཉམ་ཆག་འགྲོ་བཞིན་ཡོད་པ་གསལ་པོ་བྱེད་ནས་ཤེས་དགོས། མདོར་ན་ཁོ་བོས་རྗེ་བཙུན་པདྨ་ལགས་ནས་ཤེས་ཡོན་སྲིད་བྱུས་ལག་བསྟར་གནང་གི་མིན་གསུངས་པ་དེས་བོད་ཀྱི་སྐད་ཡིག་ཉམ་ཆག་ཏུ་འགྲོ་བའི་ཉེན་ཁ་ཆེན་པོ་ཞིག་ཏུ་མཐོང་ངོ།།

བསྟན་འཛིན་ཤསྟྲིས། བལ་ཡུལ།