བླ་ཆེན་ཞིག་ལ་དྲན་གསོ་བྱས་པར་དོགས་ཟོན་བྱེད་དོན་གང་ཡིན།

དེ་བཞིན་ལྷ་སའི་གྲོང་ཁྱེར་ནང་གི་ཨུ་ཡོན་ལྷན་ཁང་ཁག་ལ་ཡང་བར་སྐོར་ནང་འགྲོ་མི་ཆོག་པའི་བརྡ་ཁྱབ་བཏང་ཡོད་ལ། ལྷ་སའི་ཉེ་འཁོར་གྱི་ཕན་པོ་རྫོང་དང༌། སྟག་རྩེ་རྫོང༌། སྟོད་ལུང་བདེ་ཆེན་རྫོང༌། ནགས་རུ་གོང་དཀར་རྫོང་སོགས་ནས་ལྷ་སར་ཡོང་སའི་ལམ་ཚང་མར་ཞིབ་བཤེར་བྱེད་མཁན་བཞག་ནས། བསང་བཙོང་དུ་ཡོང་མཁན་གྱི་ཞིང་པ་ཚོ་བཀག་ཡོད་པ་རེད། ཕྱི་ལོ་༢༠༠༦ གི་དགའ་ལྡན་ལྔ་མཆོད་སླེབས་ལ་ཉེ་བའི་སྐབས་དེར་ལྷ་ས་གྲོང་ཁྱེར་གྱི་ཨུ་ཡོན་ལྷན་ཁང་དང་ལྷ་ས་གྲོང་ཁྱེར་མི་མང་སྲིད་གཞུང་ནས་ལྷ་ས་དགོང་དྲོའི་ཚགས་པར་ཤོག་ངོས་དང་པོའི་ཐོག་གྲོང་ཁྱེར་གྱི་བོད་མི་ཡོངས་ལ་བརྡ་ཁྱབ་བཏང་བའི་ནང༌། ཆོས་ཕྱོགས་དུས་དྲན་དགའ་ལྡན་ལྔ་མཆོད་སླེབས་ལ་ཉེ་བས་ལྷ་སར་ཡོད་པའི་ཏང་སྲིད་ཚན་པ་ཁག་དང༌། ཁེ་ལས་དང་ཚོང་ལས་ཀྱི་ལས་ཁུངས་ཁག མི་མང་གི་ཚོགས་སྡེ་ཁག་བཅས་ནས་ལས་བཟོ་བ་དང་ལས་བྱེད་ཚོར་སློབ་གསོ་རྒྱག་རྒྱུ་དང་དོ་དམ་བྱེད་རྒྱུར་ཤུགས་སྣོན་རྒྱག་དགོས། གུང་ཁྲན་ཚོགས་པའི་ཚོགས་མི་དང༌། རྒྱལ་ཁབ་ཀྱི་གཞུང་ཞབས་པ། རྒན་ཡོལ་ཐོབ་ཟིན་པ། ཁེ་ལས་ཚོང་ལས་ཚན་པ། མི་མང་གི་ཚོགས་སྡེའི་ལས་བྱེད། གཞོན་སྐྱེས་སློབ་ཕྲུག་སོགས་དགའ་ལྡན་ལྡ་མཆོད་ཀྱི་ཆོས་ཕྱོགས་བྱེད་སྒོར་ཞུགས་མི་ཆོག་པ་དང༌། ལྟ་རུབ་རྒྱག་མི་ཆོག གྲོང་ཁྱེར་ཨུ་ཡོན་ལྷན་ཁང་དང༌། གྲོང་ཁྱེར་སྲིད་གཞུང་གི་དགོས་འདུན་ལ་རང་འགུལ་གྱིས་བརྩི་བསྲུང་ཞུ་དགོས་པས་དམིགས་བསལ་བརྡ་ཁྱབ་འདི་བཏང་བ་ཡིན། རྒྱ་ནག་གུང་ཁྲན་གཞུང་གི་ལྷ་ས་གྲོང་ཁྱེར་ཨུ་ཡུན་ལྷན་ཁང་གི་གཞུང་དོན་ཁང་དང༌། ལྷ་ས་གྲོང་ཁྱེར་མི་མང་སྲིད་གཞུང་གི་གཞུང་དོན་ཁང་ནས་༢༠༠༦ ལོའི་ཟླ་༡༢ ཚེས་༡༢ ཉིན་ཞེས་བརྡ་ཁྱབ་བཀག་སྡོམ་དེ་བཏང་ཡོད་པ་རེད་ཅེས་དང༌། གནད་དོན་དེའི་ཐོག་བོད་མི་འགས་དྲ་རྒྱའི་ཐོག་དྲི་བ་བཏང་ཡོད་པ་དང༌། བརྡ་ཁྱབ་དེ་ཧ་ཅང་གསལ་པོ་འདུག ལྷ་སའི་གྲོང་མི་ཚོས་སྲིད་གཞུང་གི་བཀའ་རྒྱ་དེར་བརྩི་བཀུར་ཞུ་དགོས་ཁེལ་ས་རེད། ཡིན་ནའང་ང་རང་ད་དུང་མགོ་མ་ཚོས་པ་ཁག་ཅིག་ཡོད་པ། དང་པོ་སྲོལ་རྒྱུན་གྱི་བོད་པའི་དུས་ཆེན་ཞིག་ཡིན་ན། ལས་བྱེད་དང་ལས་བཟོ་བའི་ཁྲོད་སློབ་གསོ་དང་དོ་དམ་བྱེད་རྒྱུའི་ཐོག་ཤུགས་སྣོན་རྒྱག་དགོས་དོན་གང་ཡིན། གཉིས་པ་སློབ་གསོ་གང་རྒྱག་དགོས་ཀྱི་ཡོད་དམ། གང་གི་ཕྱོགས་སུ་སློབ་སྟོན་བྱེད་དགོས་ཀྱི་ཡོད། དོ་དམ་ག་འདྲ་བྱེད་དགོས་ཀྱི་ཡོད། གསུམ་པ་དེའི་ནང་མཉམ་ཞུགས་བྱེད་མ་ཆོག་ནའང་ལྟ་རུབ་རྒྱག་པར་མ་འགྲིག་པ་གང་ཡོད། དུས་ཆེན་དེ་རིག་གཞུང་དང་སྲོལ་རྒྱུན་ཁོ་ནའི་ཐོག་ལ་ལྟ་སྟངས་ཤིག་འཛིན་མི་ཐུབ་པ་གང་ཡིན་ནམ། བཞི་པ་གལ་ཏེ་མཉམ་ཞུགས་དང་ལྟ་རུབ་བརྒྱབ་པ་ཡིན་ན་མཐའ་འབྲས་ག་འདྲ་ཆགས་རྒྱུ་རེད་དམ། ལྔ་པ་མི་ལོ་ལྔ་བརྒྱའི་སྔོན་གྱི་ནང་པའི་བླ་ཆེན་ཞིག་ལ་དྲན་གསོ་བྱས་པར་དེ་ལྟ་བུའི་དོགས་ཟོན་བྱེད་དགོས་དོན་གང་ཡིན་ཞེས་དང༌། ན་ནིང་དགའ་ལྡན་ལྡ་མཆོད་སྐབས་བར་སྐོར་ནང་གི་ཚོང་ཁང་ཁག་ལ་སྔ་བོ་ནས་སྒོ་རྒྱག་དགོས་པའི་བཀའ་རྒྱ་བཏང་ཡོད་པ་དང༌། གཙུག་ལག་ཁང་གི་གཡས་གཡོན་དུ་ཉེན་རྟོག་པའི་མོ་ཊ་བཞག་འདུག་ལ། དྲག་ཆས་སྤྲས་པའི་ཉེན་རྟོག་མི་སྣ་དང་དྲག་ཆས་མེད་པའི་ཉེན་རྟོག་མི་སྣ་བཀྲམ་འདུག གཙུག་ལག་ཁང་གི་སྒོ་དེར་ཉེན་རྟོག་པ་བཞག་འདུག་ལ་མི་མང་མཆོད་མཇལ་ལ་གཏོང་གི་མི་འདུག ཉེ་འཁོར་གྱི་ཁང་པའི་ཐོག་ཏུའང་ཉེན་རྟོག་པ་བཞག་ནས་ལྟ་རྟོག་དང་དོ་དམ་བྱེད་ཀྱི་འདུག མཐའ་འཁོར་དུ་མི་མང་སྐོར་བ་རྒྱག་མཁན་རྒྱུན་ཆད་ཀྱི་མི་འདུག་ལ། ཕལ་ཆེར་ཚང་མ་ཞིང་འབྲོག་ཁུལ་ནས་ཡོང་བའི་མང་ཚོགས་ཤ་སྟག་རེད། ས་རུབ་པའི་རྗེས་གཙུག་ལག་ཁང་གི་དགེ་འདུན་པ་ཚོས་སྒེའུ་ཁུང་ནང་མར་མེ་མཆོད་པ་དང༌། དུང་རྒྱུན་རིང་པོ་འབུད་པ། གཙུག་ལག་ཁང་གི་འགྲམ་དུ་བསང་གཏོང་གིན་འདུག་ལ། མེ་ལྕེའི་འོད་ནས་ཨ་མདོ་དང༌། ཁམས། བྱང་ཐང་ནས་ཡིན་པ་མང་པོ་མཐོང་གི་འདུག ཁ་རས་གོན་མཁན་ཡང་འདུག ཁོང་གིས་ཁ་རས་གོན་པའི་སྐྱེས་པ་ཞིག་ལ་ཕ་ཡུལ་གང་ཡིན་སྐད་ཆ་འདྲི་སྐབས་བསམ་བློ་གང་འཚམས་བཏང་རྗེས་ལྷ་ས་ནས་ཡིན་ཟེར་གྱི་འདུག ལྷ་སའི་མི་ཚོས་ཁ་རས་གོན་ནས་དགའ་ལྡན་ལྔ་མཆོད་གཏོང་དགོས་ཀྱི་ཡོད་པ་འདྲ། དེ་ནི་རྒྱ་ནག་གཞུང་གིས་དྲིལ་བསྒྲགས་བྱས་པའི་ཆོས་དད་རང་མོས་དེ་རེད་དམ་ཞེས་འགྲེལ་བརྗོད་གནང་ཡོད་པ་རེད།།