རང་བཙན་སླར་གསོའི་སྐྱ་ཐིགས་ཤིག་ངེས་པར་ཕབ་དགོས།

དེར་བརྟེན། བོད་རྒྱལ་ཁབ་དང་མི་རིགས་ཀྱི་ལས་དབང་ཐད་ཛ་དྲག་དང་བློ་རྩ་བརྟན་པོས་ཐག་གཅོད་བསྐྱར་མ་ཞིག་དང་འབད་རྩོན་སྣོན་མ་ཞིག་དགོས་པའི་དུས་ལ་སླེབས་ཡོད། དེ་ཡང་བར་ལམ་བོད་ནང་གི་ཛ་དྲག་གནས་སྟངས་མྱུར་སྐྱོབ་བྱ་ཕྱོགས་དང༌། བོད་ཀྱི་ངོ་བོ་རྩ་བརླག་གཏོང་ཐབས་ཀྱི་རྒྱ་གཞུང་གི་ངན་ཇུས་སྤྱི་དང་བྱེ་བྲག་ཐོག་གདོང་ལེན་བྱ་ཕྱོགས། དེ་བཞིན་འདས་པའི་མི་ལོ་ང་དགུའི་བོད་དོན་འཐབ་རྩོད་ཀྱི་བྱུང་རབས་སྤྱི་དང༌། ལྷག་པར་མི་ལོ་སུམ་ཅུ་ཉེ་བའི་གུ་བཤངས་དང་བློས་གཏོང་རང་བཞིན་གྱི་དབུ་མའི་ལམ་གྱི་སྲིད་ཇུས་དང་གྲུབ་འབྲས་ཐོག་རིག་པ་དྭངས་གསལ་དང་གཟབ་ནན་ངང་དཔྱད་ཞིབ་ཀྱིས་བློ་སྟོབས་ཆེན་པོས་གནས་བབ་དངོས་ལ་བསྡོམས་ཚིག་ཅིག་བཀོད་དེ། རང་གི་སྟོབས་ཤུགས་དང་རྒྱབ་སྐྱོར་གྱི་ཁ་ཕྱོགས་གཅིག་གྱུར་དོན་སྨིན་མདུན་སྐྱོད་ཐུབ་སླད། ལོ་རྒྱུས་དང་རང་ནུས་རང་དགོས་བཅས་ལ་གདེངས་འཇོགས་འཕེར་བའི་རང་བཙན་སླར་གསོའི་ཐོག་གོམ་སྟབས་གཅིག་གྱུར་སྤོ་རྒྱུའི་ཐག་གཅོད་བསྐྱར་མའི་སྐྱ་ཐིགས་ཤིག་ངེས་པར་ཕབ་དགོས། དེ་དག་ཐད་གོ་སྡུར་གླེང་སློང་ཡོང་ངེས་པས་མང་དུ་སྨྲ་དོན་དབེན།

གཞིས་ལུས་བོད་མིའི་མངོན་འདོད་བོད་རང་བཙན་རེད་ཟེར་དོན་ནི། སྐད་འབོད་རེ་གཉིས་ཀྱིས་སྒྲུབ་དགོས་མེད་པར། ད་བར་མདོ་དབུས་ཁམས་གསུམ་གྱི་རྒྱལ་གཅེས་དཔའ་བོ་དཔའ་མོ་ཁྲི་ཚོ་དུ་མའི་རྒྱ་རྒོལ་བོད་སྐྱོབ་ཀྱི་འབོད་ཚིག་བརྒྱ་ཆ་དགུ་བཅུ་རང་བཙན་སྐད་འབོད་ཀྱིས་ཟིན་ཡོད་པ་སྤོབས་པ་ཆེན་པོས་བརྗོད་ཆོག་ཅིང༌། ཁོང་ཚོའི་རང་བཙན་འབོད་སྒྲ་ནི་རང་གི་མི་རིགས་དང་རྒྱལ་ཁབ་ཀྱི་དོན་དུ་རིག་པ་དྭངས་གསལ་གྱིས་ངེས་ཤེས་དང་ཐག་གཅོད་ཀྱི་ལམ་ནས་རང་སྲོག་དོར་བའི་དཔའ་སྐད་དྭངས་མ་དེ་ཡིན་པས། དེ་ལ་གཞིས་ལུས་མི་མང་གི་མངོན་འདོད་མཚོན་ནུས་མེད་ན། འོ་ན་རང་དོན་དུ་རང་གི་རྒྱལ་ཁབ་དང་མི་རིགས་བཙོང་བའི་བོད་རིགས་ཏང་ཡོན་པ་རེ་གཉིས་ཀྱིས་རྒྱ་ནག་གི་འོག་ཏུ་བདེ་སྐྱིད་ཆེ་ཚུལ་དང་ཏཱ་ལའི་ལོགས་སྤྱོད་ཤོག་ཁག་ཟེར་བའི་བླ་བཙོང་གི་བརྡར་སྐད་ལ་གཞིས་ལུས་བོད་མིའི་མངོན་འདོད་མཚོན་ནུས་ཡོད་ཟེར་དགོས་པ་ཡིན་ནམ། ལྷག་པར་བོད་ཀྱི་རྒྱལ་གཅེས་དཔའ་བོ་དཔའ་མོ་ཚོས་རྔམ་སྟོན་ཁྲོམ་སྐོར་ཐོག་བོད་རང་བཙན་སྐད་འབོད་གཅིག་པུ་མིན་པར། ཁོང་ཚོས་བཙོན་ཁང་ནང་དུ་ཡང་ལོ་དང་ཟླ་བ་མཐུད་དེ་གནར་གཅོད་དང་འཇིགས་དངངས་བརྒྱ་ཕྲག་ལ་གདོང་ལེན་གྱིས་རང་བཙན་ལངས་ཕྱོགས་རྒྱུན་འཁྱོངས་དང༌། ཐ་ན་འཛེམས་ཟོན་མེད་པར་རང་བཙན་གྱི་སྦྱར་ཡིག་དང༌། གཞས་ཚིག རང་བཙན་མཚོན་པའི་ཅ་དངོས་གསར་བཟོ་སོགས་ཀྱིས་སོ་སོའི་ཆོད་སེམས་དང་མངོན་འདོད་མཚོན་པར་གནང་གི་ཡོད་ན། ང་ཚོས་འདི་ནས་ཨུ་ཚུགས་མཐའ་སྐྱེལ་གྱིས་ཁོང་ཚོའི་རང་བཙན་འབོད་སྒྲས་རང་བཙན་མངོན་འདོད་མཚོན་མི་ཐུབ་ཟེར་དགོས་དོན་ཅི་ཡིན་ནམ། དེ་ལྟར་ཁུངས་སྐྱེལ་ཐུབ་ཚེ་ང་ཚོའི་འཐབ་རྩོད་ལ་ཕན་ཐོགས་དང་མདུན་ལམ་ཆེ་རུ་འགྲོ་ཡི་ཡོད་དམ། རང་ཉིད་ཀྱིས་ངོས་འཛིན་ནི་དེ་ལྟར་མིན་པར་ཁོང་ཚོའི་རང་བཙན་འབོད་ཚིག་ལ་རང་བཙན་གྱི་མངོན་འདོད་མཚོན་ནུས་ཡོད་པ་མ་ཟད། རིག་པ་དྭངས་གསལ་གྱིས་རང་ཉིད་ཀྱི་ཆོད་སེམས་དང་དགོས་འདུན་ཕྱིར་སྟོན་པའི་ཡར་ལངས་ཀྱི་བརྡ་མཚོན་ཞིག་ཡིན་ལ། དེ་ནི་ང་ཚོ་ཐུན་མོང་གི་བདེན་དོན་ཙམ་མ་ཟད། མ་འོངས་པའི་རེ་བ་དང་མདུན་ལམ་ཆེ་ཤོས་ཀྱང་ཡིན་ངེས་ལ། གཞིས་ལུས་བོད་མིའི་རང་བཙན་འབོད་སྒྲ་ནི། ཆབ་སྲིད་ཕྱོགས་ཁག་གི་ལྟ་བ་དང་སྲིད་ཇུས་མིན་པར། ལོ་རྒྱུས་ཀྱི་བདེན་དོན་དང་མ་འོངས་བོད་མིའི་མདུན་ལམ་ལ་གཞི་བཅོལ་བའི་བརྡ་མཚོན་ཞིག་ཡིན་པས། བདེན་དོན་དང་བོད་མིའི་མདུན་ལམ་ཁས་ལེན་མཁན་ཞིག་གི་ངོས་ནས་ཁོང་ཚོའི་འབོད་ཚིག་ལ་རྩོད་ལེན་མ་ཐུབ་ཀྱང༌། འབོད་ཚིག་དེར་མཚོན་ནུས་ལྡན་པའི་ངོས་འཛིན་དང་ཆ་འཇོག་ངེས་པར་གནང་དགོས་པས། དེ་རིང་ཚོགས་ཆེན་ཐོག་དེར་བརྩིས་མེད་མི་གཏོང་བའི་རེ་འབོད་སླར་ཡང་ཞུ་རྒྱུ་ཡིན་ཞིང༌། གཞིས་ལུས་བོད་མིའི་མངོན་འདོད་གང་ཡིན་རྩོད་དགོས་མེད་པར། བོད་ཕྱི་ནང་གཉིས་ཙམ་མ་ཟད་རྒྱལ་སྤྱིའི་ཐོག་ཏུ་ཡང་གསལ་པོ་ཆགས་ཟིན་ཡོད་པས། ང་ཚོས་མངོན་འདོད་གང་ཡིན་དེ་འབད་རྩོན་བྱ་ཕྱོགས་ལ་བློ་ཁ་སྡུར་དགོས་ཞེས་པ་འཕྲོས་བཤད་དང༌། དེ་འབྲེལ་འཐབ་རྩོད་བྱེད་མཁན་ཞིག་གི་ངོས་ནས་འཐབ་རྩོད་ཀྱི་སྟོབས་ཤུགས་དང་ཁ་ཕྱོགས་ཀྱི་དམིགས་འབེན་དུ་གཞན་གྱི་རྒྱབ་སྐྱོར་དང༌། རང་ཉིད་ཀྱི་སྟོབས་ཤུགས། དགྲ་བོའི་གནས་བབ་གསུམ་གྱི་ཐད་འབད་རྩོན་དབྱེ་ཞིབ་ངེས་པར་དགོས་ཀྱང༌། དེ་དག་གི་ནང་ནས་གལ་ཆེ་ཤོས་དེ་དགྲ་བོའི་གནས་བབ་དང་གཞན་གྱི་རྒྱབ་སྐྱོར་ངོས་འཛིན་མིན་པར། གཙོ་བོ་བོད་མི་རང་ཉིད་ཀྱི་བློ་རྩ་བརྟན་པོ་དང་ཆིག་སྒྲིལ་རང་བཞིན་གྱི་སྟོབས་ཤུགས་དང་རང་ཡིད་རང་ཆེས་ཀྱི་འབད་བརྩོན་ལ་ཐུག་ཡོད་པ་དང༌། དེ་ཡང་བོད་ཕྱི་ནང་གཉིས་ཀྱི་བོད་མིའི་ནུས་ཤུགས་དང་འབད་བརྩོན་ལས་མ་འདས་ཤིང༌། བོད་ནང་དུ་འདི་ནས་ཐད་ཀར་ཤུགས་རྐྱེན་སྤྲོད་ཐབས་དང་སྤྲོད་དགོས་མེད་ཅིང༌། ང་ཚོ་རང་ཉིད་ཀྱི་ལག་ཏུ་ཁ་སྒོ་ན་ཡོད་པའི་བཙན་བྱོལ་བོད་གཞུང་དང༌། དེ་བཞིན་བཙན་བྱོལ་སྤྱི་ཚོགས་དང་སྡེ་ཁག་གི་ལས་དོན་དང་གནས་བབ་ལེགས་བཅོས་ཡར་རྒྱས་དང་ཚགས་ཚུད་གཏང་རྒྱུ་ཧ་ཅང་གལ་ཆེན་ཡིན་ཞིང༌། དེ་འབྲེལ་གྲུབ་འབྲས་གཅིག་པུ་མིན་པར་འཐུས་ཤོར་དང་ཞན་སྐྱོན་རིགས་ཀྱང་སུ་ལ་ཡང་ཁག་དཀྲི་ས་མེད་པར་ང་ཚོ་རང་ཉིད་ཀྱིས་འཁུར་དགོས།

དེ་ཡང་ད་བར་བཙན་བྱོལ་སྤྱི་ཚོགས་ཀྱི་ལོ་ངོ་ ༤༩ རིང་གི་ལེགས་ཆ་ཁོ་ན་མིན་པར་གཙོ་བོ་འཐུས་ཤོར་དང་ཞན་སྐྱོན་གྱི་ཕྱོགས་ལ་བློ་སྟོབས་ཆེན་པོ་དང་ལྷག་བསམ་རྣམ་དག་གིས་ངོས་འཛིན་དང་བསྒྱུར་བཅོས་གཏང་རྒྱུ་ནི། རང་ལག་ཏུ་ཡོད་པའི་ལག་ལེན་དང་མདུན་ལམ་ངོ་མ་ཡིན་ཞིང༌། ད་བར་མི་ལོ་ཞེ་དགུའི་དུས་ཡུན་ནང་གཙོ་ཆེ་ྋགོང་ས་ྋསྐྱབས་མགོན་ཆེན་པོ་མཆོག་གི་དབུ་ཁྲིད་ལམ་སྟོན་ཡང་དག་འོག མི་རབས་རྒན་པ་རྣམས་ཀྱི་སྙིང་སྟོབས་འབད་བརྩོན་ལ་བརྟེན་ནས་རྒྱུས་མེད་ཀྱི་གཞན་ཡུལ་དུ་བཙན་བྱོལ་བོད་མི་འབུམ་ཚོ་བརྒལ་བའི་འཚོ་ཐབས་གཞིས་ཆགས་དང་མཉམ་ལས་ཁང་གསར་སྐྲུན། དེ་བཞིན་ཤེས་ཡོན་སྦྱོང་བརྡར་དང་རིག་གཞུང་སྲུང་སྐྱོབ་གཅེས་འཛིན་སླད། སློབ་གྲྭ་དང་དགོན་སྡེ་ཁག་གསར་བསྐྲུན། བོད་ཀྱི་ངོ་བོ་དང་མ་འོངས་པའི་མདུན་ལམ་ཆེད་བཙན་བྱོལ་བོད་གཞུང་མ་ལག་དང་བཅས་པ་ལེགས་བཅོས་ངང་འཛིན་སྐྱོང་དང༌། ལྷག་པར་གཞན་ཡུལ་དུ་གྱར་ཡང་དུས་རབས་ཀྱི་འཕེལ་ཕྱོགས་དང་བོད་མིའི་མདུན་ལམ་ཆེད། བོད་གཞུང་གི་ཆབ་སྲིད་མང་གཙོའི་ལམ་དུ་བཅོས་སྒྱུར་སྣེ་ཁྲིད་གནང་བ་སོགས་གྲུབ་འབྲས་རླབས་ཆེན་བྱུང་ཡོད།

འོན་ཀྱང༌། གཞན་གྱི་རྒྱབ་སྐྱོར་ངོས་འཛིན་དང་བླ་ན་མེད་པའི་དབུ་ཁྲིད་ཡོད་ཚོད་ལ་དཔག་པའི་གཞི་རིམ་མང་ཚོགས་ཀྱི་མང་གཙོ་དང་ཆབ་སྲིད་ཀྱི་གོ་རྟོགས། དེ་བཞིན་ལས་ཀྱི་སྣེ་མོ་བ་ཚོའི་ཤེས་འཇོན་འབད་བརྩོན་སོགས་ལ་བརྟེན་ནས་གྲུབ་འབྲས་མ་སོན་པར་འཐུས་ཤོར་གྱི་ཆ་ཡང་ཤུགས་ཆེ་ཡོད་པ་ངེས་པར་དུ་ངོས་འཛིན་དགོས་པ་མ་ཟད། ལེགས་བཅོས་མདུན་སྐྱོད་བྱེད་པའི་མཐའ་དུས་ལ་སླེབས་ཡོད། དེ་དག་ལས་གཤམ་དུ་ངེས་པར་ལེགས་བཅོས་དང་ནུས་ཤུགས་འདོན་དགོས་པའི་དོན་ཚན་ཁག་ཅིག་ཞུ་རྒྱུ་ཡིན།

༡། མང་གཙོའི་ཐོབ་ཐང་དང་འགན་འཁུར་གོང་སྤེལ་དོ་སྙོམ་ཡོང་ཐབས།

མང་གཙོ་ནི་དེང་གོ་ལ་ཧྲིལ་པོའི་སྲིད་ཐབས་ལེགས་ཤོས་དེ་ཡིན་ཡང༌། དེ་ཉིད་ལག་ལེན་བྱེད་མཁན་དབུ་ཁྲིད་དང་མང་ཚོགས་ལ་མང་གཙོའི་གོ་རྟོགས་ཚད་ལྡན་མེད་ན། མང་གཙོ་ནི་གཡོ་འཁྱོམ་རང་བཞིན་དང་ཁག་དཀྲི་སྐབས་འཚོལ་གྱི་བརྒྱུད་ལམ་ཞིག་ལས་མ་འདས་པས། བཙན་བྱོལ་གཞུང་གི་ལས་ཀྱི་སྣེ་མོ་བའི་གཙོས་བཙན་བྱོལ་བོད་མི་ཡོངས་ལ་མང་གཙོའི་གོ་རྟོགས་དང་འགན་འཁུར་ངེས་པར་ཚད་མཐོ་རུ་གཏང་དགོས། གང་ལགས་ཞེ་ན། བཙན་བྱོལ་བོད་གཞུང་ཁྲིམས་ལུགས་རང་བཞིན་གྱི་མང་གཙོའི་ལམ་དུ་ཤར་སྐྱོད་གནང་བཞིན་ཡོད་ཀྱང༌། ང་ཚོའི་སྤྱི་ཚོགས་ནང་ལས་ཀྱི་སྣེ་མོ་བ་རྣམས་དང་མང་ཚོགས་ལ་མང་གཙོའི་གོ་རྟོགས་དམན་དྲགས་པས། གཞི་རིམ་མང་ཚོགས་ཁྲོད་མང་གཙོའི་འོས་འགན་འོས་བསྡུ་དང་རང་བཙན་བཅའ་དངུལ་འབུལ་སྤྲོད་ཀྱི་ལས་རིམ་ནང་བོད་མི་ཁག་ཅིག་གིས་ཆ་ཤས་ལེན་གྱི་མེད་པ་སོགས་མང་གཙོའི་ཐོབ་ཐང་ཙམ་ལས། མང་གཙོའི་འགན་འཁུར་ཚུལ་བཞིན་སྒྲུབ་ཀྱི་མེད་པ་དང༌། དེ་བཞིན་ཁག་ཅིག་གིས་མང་གཙོའི་ཐོབ་ཐང་གི་དབྱེ་མཚམས་མ་ཤེས་པའམ་ཤེས་བཞིན་ཁྱད་གསོད་ཀྱིས་ཁ་ནས་མང་གཙོ་བཤད་བཞིན་དུ་ལག་ལེན་ངོ་མའི་སྐབས་མང་གཙོ་ལ་ལྡོག་ཟླ་དང་ཁྱད་གསོད་བྱེད་མཁན་ཡང་ཡོང་གི་ཡོད། དཔེར་ན། སྐབས་འཚོལ་བ་དང་ཁག་དཀྲི་རིང་ལུགས་པ་ཚོས་རང་ཉིད་ཀྱི་བསམ་ཚུལ་མ་མཐུན་པའི་རིགས་ལ་གནོད་སྐྱོན་དང༌། རང་ཉིད་ཀྱིས་ལག་ལེན་མ་འཁེལ་བ་ཁག་གི་ནག་ཉེས་སྦས་འགེབས་སླད། རང་བཙན་འཐབ་རྩོད་སོགས་ལས་དོན་དེ་དང་དེ་ྋགོང་ས་མཆོག་གི་བཀའ་དགོངས་དང་འགལ་ཚུལ་ཆེད་བཟོ་ཆེད་སྒྲོག་བྱས་ཏེ། རང་ཉིད་དང་ལྟ་བ་མ་མཐུན་པའི་སྒྲིག་འཛུགས་དང་གང་ཟག་བྱེ་བྲག་པ་འབུར་འཇོམ་གཏོང་ཐབས་བྱེད་པ་སོགས་ང་ཚོའི་མང་གཙོའི་འཕེལ་རིམ་དང༌། ལྷག་པར་སྤྱི་ཚོགས་མཉམ་རུབ་ཀྱི་ལས་དོན་ལ་དོ་ཕོགས་འཚབ་ཆེའི་ལས་འཛོལ་ཤུགས་ཆེ་ཡོང་བཞིན་ཡོད་པས། དེའི་རིགས་མང་གཙོའི་དབང་ཚད་དང༌། རྒྱལ་ཁབ་ཀྱི་སྲི་ཞུ་སྒྲུབ་པའི་འོས་འགན་སོགས་ཀྱི་ཆ་ནས་འཚབ་ཆེའི་ནོར་འཁྲུལ་ཡིན་པས། གཞི་རྩའི་རྒྱལ་ཁབ་དང་མི་རིགས་ཀྱི་ཁེ་ཕན་ལ་གནོད་གཞི་མིན་པའི་བསམ་ཚུལ་དང་ལྟ་ཚུལ་མ་འདྲ་བའི་རིགས་འདོན་སྤེལ་ཙམ་དུ་མ་ཟད། ལག་ལེན་དགོས་པའི་ངེས་ཤེས་བརྙེད་ཐབས་ཀྱི་མང་གཙོའི་འདུ་ཤེས་ངོ་མ་དང་བློ་ཁོག་བསྐྲུན་དགོས་པ་དང༌། དེ་འབྲེལ་བསམ་ཚུལ་དང་ལྟ་ཚུལ་མ་འདྲ་བ་རིགས་རྒྱལ་ཁབ་དང་མི་རིགས་ཀྱི་ལས་དོན་ཆེད་དུ་ཕན་ཚུན་ཁས་ལེན་དང༌། རོགས་འདེགས་དགོས་པའི་བསམ་ཚུལ་དང་བློ་སྒོ་འབྱེད་ཐབས་འབད་རྩོན་དོན་ཕན་རང་བཞིན་གཞུང་དང་མང་ཚོགས་གཉིས་ཀས་གནང་དགོས།

༢། མི་རིགས་ཀྱི་གྲངས་ཚད་བསྐྱེད་འཕེལ་དང་འགན་འཁུར་རིགས་ཞེན་ཅན་དུ་འཚར་ལོངས་གསོ་སྐྱོང་ཡོང་ཐབས།

སྤྱིར་བོད་ནི་ཐོན་ཁུངས་ལེགས་ཤིང་ས་ཁྱོན་ཆེ་ཡང་བོད་ཀྱི་མི་འབོར་ཧ་ཅང་ཉུང་ངུ་ལས་མེད་པ་དང༌། ཐོན་ཁུངས་དང་ས་ཁྱོན་གྱི་དཀའ་ངལ་མེད་པའི་རྒྱལ་ཁབ་ཅིག་ལ་མཚོན་ན་མི་འབོར་འཕེལ་རྒྱལ་ནི་རྒྱལ་ཁབ་དེའི་ནུས་ཤུགས་འཕེལ་རྒྱལ་ཀྱི་ངོས་གཅིག་ཡིན་ཡང༌། རྒྱ་ནག་གིས་བོད་དུ་བཙན་འཛུལ་འགོ་བཙུགས་པ་ནས་བཟུང་ཐད་ཀར་མེ་མདའི་སོ་ཁ་དང་མནར་གཅོད་ཀྱི་འོག་བོད་མི་འབུམ་ཕྲག་དུ་མའི་སྲོག་འཕྲོགས་ཡོད་པ་དང༌། གཞི་རྩའི་རྒྱ་ནག་གི་བོད་མི་རིགས་རྩ་མེད་བཟོ་རྒྱུའི་ངན་བྱུས་འོག་ནུབ་བརྒྱུད་ཐོན་འབྱེད་ཆེན་མོ་དང༌། མེ་འཁོར་ལྕགས་ལམ་བཟོ་སྐྲུན། རྒྱ་ནག་གིས་བོད་དུ་ཕྲུ་གུ་ཚད་བཀག་བཟོ་བ་སོགས་ཀྱི་ལམ་ནས་བོད་ནང་རྒྱ་མི་རིགས་ཀྱི་མི་སེར་སྤེལ་བའི་སྲིད་བྱུས་འོག་བོད་མི་རིགས་རྩ་མེད་དང་བསྲེ་ལྷད་འབྱུང་བཞིན་པ་དང༌། དེ་བཞིན་བཙན་བྱོལ་ནང་དུ་ཡང་གཞན་གྱིས་ང་ཚོར་ཕྲུ་གུ་ཚད་བཀག་བཟོ་མཁན་མེད་ཀྱང་རང་ངོས་ནས་མི་རིགས་ཀྱི་གནས་བབ་ལ་མ་བསམས་པར་རང་ཉིད་ཀྱི་འཚོ་བ་སྟབས་བདེ་ཆེད་དམིགས་ཏེ། ཕྲུ་གུ་རེ་གཉིས་ཙམ་ལས་བསྐྱེད་སྲིངས་མི་བྱེད་པ་དང༌། དཔལ་འབྱོར་གྱི་ཁེ་ཕན་དང་བརྩེ་དུང་གི་རང་དབང་ཟེར་བའི་རླུང་ཡན་འོག་མི་རིགས་གཞན་དང་མཉམ་དུ་གཉེན་སྒྲིག་བྱེད་པ། དེ་བཞིན་བོད་ཕྱི་ནང་གཉིས་ཀར་སྨྱོས་རྫས་ཉལ་ཐ་དང༌། ཆང་རག བཟི་སྨན་སོགས་སྤྱོད་མཁན་དང༌། མི་ཚེའི་རིན་ཐང་དང་དམིགས་ཚད་མེད་མཁན་ཇེ་མང་དུ་འགྲོ་བཞིན་པ་བཅས་ནི། འཕྲལ་ཕུགས་གཉིས་ཀར་བོད་རྒྱལ་ཁབ་དང་བོད་མི་རིགས་ལ་ཉེན་འཚབ་ཧ་ཅང་ཆེ་བས། ང་ཚོས་རྒྱ་ནག་གི་མི་སེར་སྤེལ་བའི་སྲིད་ཇུས་ལ་ངོ་རྒོལ་གདོང་ལེན་ནུས་ཐོན་དགོས་པ་མ་ཟད། ང་ཚོ་རང་དབང་ལུང་པར་གནས་མཁན་བོད་མི་ཁྱིམ་འཛིན་པ་ཡོངས་ནས་ད་ལྟའི་བོད་རྒྱལ་ཁབ་དང་མི་རིགས་ཀྱི་ཛ་དྲག་གནས་སྟངས་ལ་དགོངས་བཞེས་ཀྱིས་རང་གི་སྟབས་བདེའི་འཚོ་ཐབས་བློས་གཏོང་གིས་རང་རིགས་ཕྲུ་གུ་མང་ཙམ་བསྐྱེད་འཕེལ་དང༌། དེ་ཡང་མི་རིགས་གཞན་དང་བསྲེ་ལྷད་མེད་པར་བོད་རིགས་ཁམས་གཙང་བསྐྱེད་སྲིངས་དགོས་པ་དང༌། བཙན་བྱོལ་བོད་མིའི་འདུས་སྡོད་གང་སར་ཕྲུ་གུ་མང་ཤོས་བསྐྱེད་འཕེལ་གནང་མཁན་ཚོར་གཞུང་གི་ངོས་ནས་དམིགས་བསལ་སློབ་འཇུག་དགོངས་བཞེས་དང༌། དེ་བཞིན་གཞུང་དང་ཚོགས་སྡེ་ཁག་ནས་ཁོང་ཚོར་བྱ་དགའ་གཟེངས་བསྟོད་ཀྱིས་བུ་ཕྲུག་མང་སྤེལ་གྱི་རིགས་ཞེན་བློ་སྤོབས་སྐྲུན་ཐབས་དང༌། བུ་ཕྲུག་རྣམས་མི་རིགས་ཀྱི་ལས་འགན་དང་རང་ཉིད་ཀྱི་མི་ཚེའི་རིན་ཐང་རྩོལ་སྒྲུབ་ངོས་འཛིན་ཐུབ་པའི་མི་རབས་ཚད་ལྡན་དུ་འཚར་ལོངས་གསོ་སྐྱོང་ཡོང་བར་གཞུང་དང༌། ཚོགས་སྡེ་ཁག སློབ་གྲྭ་དང་ཁྱིམ་ཚང་བཅས་ཚང་མས་ནུས་པ་ཐོན་ངེས་ཀྱི་སྲིད་ཇུས་དང་འབད་རྩོན་དགོས།

༣། གནས་ཚད་དང་ཤེས་ཚད་དོ་སྙོམ་ཡོང་ཐབས་དང༌། ཆེད་ལས་མཁས་པ་གསོ་སྐྱོང༌།

ཐོག་མར་བཙན་བྱོལ་དུ་འབྱོར་སྐབས་ཤེས་ཚད་དང་ཉམས་མྱོང༌། དཔལ་འབྱོར་སོགས་ཀྱི་ཆ་ནས་བཙན་བྱོལ་བོད་མིའི་སློབ་གྲྭ་ཟུར་འཛུགས་ལ་དཀའ་ཚེགས་ཧ་ཅང་ཆེ་ཞིང༌། སྐབས་དེར་བོད་ཕྲུག་རྣམས་རྒྱ་གར་གྱི་སློབ་གྲྭ་ལེགས་གྲས་ནང་ཁག་བགོས་ཀྱིས་བཞག་ན་ཡང་འགྲིག་པའི་གོ་སྐབས་ཐོབ་ཡོད་མོད། འོན་ཀྱང་བོད་ཕྲུག་རྣམས་མ་འོངས་བོད་དོན་འཐབ་རྩོད་དང་བོད་གསར་སྐྲུན་འཛིན་སྐྱོང་ལ་ཕན་པའི་ཕྱི་ནང་གི་ཤེས་ཡོན་ཟུང་ལྡན་དུ་གསོ་སྐྱོང་ཡོང་བར་དམིགས་ཏེ། ྋགོང་ས་མཆོག་ནས་གནས་སྐབས་ཀྱི་དཀའ་ཚེགས་དང་གོ་སྐབས་ལ་འཇིགས་ཞུམ་དང་དབུ་མ་འཁོར་བར་བཙན་བྱོལ་བོད་མིའི་སློབ་གྲྭ་ཆེད་དུ་ཟུར་འཛུགས་གནང་ཡོད་ཅིང༌། དམིགས་ཚད་དེའི་འོག་ནས་བཙན་བྱོལ་བོད་ཕྲུག་ཡོངས་ལ་སྤྱི་སྙོམ་གྱི་སློབ་སྦྱོང་གོ་སྐབས་ཐོབ་ཅིང༌། གཞིཧརིམ་དང་མཐོ་རིམ་གྱི་སློབ་མཐར་སོན་པ་ཧ་ཅང་མང་པོ་ཡོད་ཀྱང༌། དམིགས་ཚད་ཟིན་པ་བཞིན་བོད་མིའི་ནུས་ཤུགས་བསྐྱེད་སྤེལ་དང་དགོས་མཁོ་སྐོང་ནུས་ཀྱི་ཤེས་ཡོན་པའི་དཔུང་ཁག་ཧ་ཅང་ཉུང་ངུ་ལས་མེད། དཔེར་ན། བོད་དབྱིན་གཉིས་ཀྱི་སྐད་ཡིག་ཐད་ཀྱང་འཛིན་གྲྭ་བཅུ་གཉིས་ཐོན་མཁན་ལ་འཛིན་གྲྭ་བཅུ་གཉིས་ཀྱི་བོད་དབྱིན་གྱི་གནས་ཚད་ཡོད་པ་ནི་ཆེས་ཉུང་ངུ་ལས་མེད་པར། འཛིན་གྲྭ་བཅུ་གཉིས་ཐོན་ཀྱང་བོད་དབྱིན་གང་གི་ཐོག་ནས་དགོངས་ཞུ་ཡག་པོ་ཞིག་ཀྱང་འབྲི་མི་ཤེས་མཁན་ཧ་ཅང་མང་པོ་ཡོད་ཅིང༌། དེ་བཞིན་མཐོ་སློབ་མཐར་སོན་ཚོར་མཐོ་སློབ་ཀྱི་ལག་འཁྱེར་དེའི་ཤེས་ཚད་མེད་པར་ལས་དོན་དངོས་གཞིའི་སྐབས་དཀའ་ངལ་འཕྲད་དེ་ལས་དོན་འཐུས་ཤོར་འགྲོ་བ་དང༌། གཞུང་དང་གཞུང་འབྲེལ་མིན་པའི་སྡེ་ཁག་ཏུ་ལས་ཀའི་ས་མིག་ཡོད་ཀྱང་ལས་ནུས་ལྡན་པའི་མི་མ་ཐོབ་པར་ལས་དོན་དུས་ཐོག་སྒྲུབ་མ་ཐུབ་པའི་དཀའ་ཚེགས་འཕྲད་བཞིན་པ་ནི། རྒྱུན་ལྡན་ལས་བྱེད་བསྐོ་འདེམས་དང་ཡིག་སྒྱུར་གྱི་གནད་དོན་དང་ལྷག་པར་འདི་ལོར་ཛ་དྲག་ཚོགས་ཆུང་གི་ཡིག་ཆ་བཟོ་སྒྱུར་སོགས་ཀྱི་ཐད་དཀའ་ངལ་ཤུགས་ཆེ་འཕྲད་པ་ནས་ཀྱང་ང་ཚོའི་ཤེས་ཡོན་སྤྲོད་ཕྱོགས་དང་སྦྱོང་བརྡར་ཐད་འཚབས་ཆེའི་འཐུས་ཤོར་དང༌། མ་འདངས་པའི་ཆ་ཤུགས་ཆེ་ཡོད་པའི་དངོས་ར་གསལ་པོ་འཕྲོད་ཡོད་ཅིང༌། ཉེ་ལམ་བོད་ཁྱིམ་དབུ་བརྙེས་པའི་མཛད་སྒོར་ྋགོང་ས་ྋསྐྱབས་མགོན་ཆེན་པོ་མཆོག་གིས་ཐུགས་ཚོར་ཆེན་པོས་ང་ཚོའི་ཤེས་ཡོན་ཐད་འཐུས་ཤོར་ཆེན་པོ་ཕྱིན་ཡོད་སྐོར་བཀའ་སློབ་ཆེད་སྩལ་གནང་དགོས་ཐུག་ཡོད་པས། ད་ནས་ང་ཚོས་ངེས་པར་གཞི་རིམ་ཤེས་ཡོན་སྦྱོང་སྤྲོད་ཐད་ཛ་དྲག་གིས་བསྐྱར་ཞིབ་དང༌། ལྷག་པར་སློབ་གྲྭ་ཁག་ཏུ་ཆོས་དགེའི་གཙོས་དགེ་རྒན་རྣམས་ཀུན་སྐྱོད་དང་རིགས་ཞེན་ལྷག་བསམ་དཀར་ཞིང༌། ཤེས་ཡོན་ཚད་འཕེར་གྱི་དགེ་རྒན་བསྐོ་ཐབས་དང་དེ་དག་རྒྱུན་གནས་ཡོང་སླད་གླ་ཕོགས་སོགས་ཆ་རྐྱེན་འོས་འཚམས་སྤྱི་སྙོམ་བསྐྲུན་དགོས་པ་མ་ཟད། དགེ་རྒན་དང་སློབ་གྲྭའི་འཛིན་སྐྱོང་གི་ངོས་ནས་ཀྱང་ད་བར་གྱི་འཐུས་ཤོར་དང་ཞན་སྐྱོན་ཆེ་ཤོས་ཀྱི་གྲས་ཡིག་ཚད་གཏོང་ལེན་དེ་ཉིད་སློབ་མའི་ཤེས་ཚད་དཔྱད་དཔོགས་ཀྱི་གནད་དུ་མ་སོང་བར། འཛིན་རིམ་འཕར་ཐབས་དང་ཆ་སྙོམ་བརྒྱ་ཆ་ལོངས་ཐབས་གཙོར་འདོན་བྱས་པའི་ལམ་ནོར་ལས་བཅོས་སྒྱུར་ཆེན་པོ་ཞིག་ངེས་པར་གནང་དགོས་ཤིང༌། དེ་བཞིན་བཙན་བྱོལ་གཞུང་དང༌། བོད་ཁྱིམ། བཙན་བྱོལ་མང་ཚོགས་བཅས་ནས་བཀའ་ཤག་དང་གྲོས་ཚོགས་ཀྱིས་གཏན་ལ་ཕབ་ཟིན་པའི་ཤེས་ཡོན་སྲིད་ཇུས་གསར་པ་དེ་ཉིད་གཅིག་མཚུངས་ལག་བསྟར་གྱིས་བོད་སློབ་ཐོག་མར་ཟུར་འཛུགས་གནང་བའི་གོང་གསལ་དགོས་དམིགས་ཐད་ངེས་པར་འབད་རྩོན་མདུན་སྐྱོད་གནང་དགོས་པ་དང༌། འཁྲུག་ཆ་དོད་ལ་འགྲན་རྩོད་ངར་ཞིང་ཤེས་ཡོན་གྱིས་དབང་སྒྱུར་བའི་རྒྱལ་སྤྱིའི་ཁྲོད་དུ། བོད་དོན་འཐབ་རྩོད་དང་བོད་གསར་འཛུགས་སྐྲུན་བཅས་བོད་དང་བོད་མི་རིགས་ཀྱི་མདུན་ལམ་ལ་སྨིན་ངེས་ཀྱི་ཆེད་ལས་མཁས་པ་མང་ཙམ་གསོ་སྐྱོང་ཡོང་བའི་འབད་རྩོན་ཆེར་བསྐྱེད་བྱ་ཕྱོགས་བཅས་ཀྱི་ཐད་གོ་སྡུར་སྦྱངས་བཤད་དང༌། གཏན་འབེབས་ཤིག་ངེས་པར་བྱ་དགོས་ཞེས་པའི་རེ་སྐུལ་འདི་ནི་རང་ཉིད་སྒེར་གྱི་བསམ་ཚུལ་ཡིན།།