ཉེན་ཁ་ཆུང་ཤོས་དང་ནུས་པ་ཆེ་ཤོས།

ད་ལྟའི་ཆར་(Internet)དྲ་བའི་བརྒྱུད་ལམ་འདི་ཉིད་ཡར་རྒྱས་དང་རྒྱ་ཁྱབ་ཏུ་ཤུགས་ཆེ་འགྲོ་བཞིན་པར་བརྟེན་(Fax)མྱུར་འཕྲིན་ཡང་ཕན་མེད་དུ་འགྲོ་བཞིན་པ་མིག་མདུན་གྱི་དངོས་ཡོད་གནས་ཚུལ་དུ་གྱུར་ཡོད། དེར་བརྟེན་བོད་ཕྱི་ནང་གཉིས་ཀྱི་ནང་ནས་བོད་རིགས་ན་གཞོན་མང་པོ་ཞིག་ལ་མཚོན་ན་གྲརྣྤྟཔྱརྣྟྤདྲ་བའི་བརྒྱུད་ལམ་ལ་རྒྱུས་མེད་ནས་རྒྱུས་ཡོད་དུ་འགྱུར་བཞིན་པ་དང༌། ཡོད་ཚད་ཀྱི་ནང་ནས་རང་ཉིད་དང་ཐག་ཉེ་ཤོས་ཀྱི་ཡོ་བྱད་གལ་ཆེན་ཞིག་ཏུ་འགྱུར་བཞིན་ཡོད། དེ་དང་ཆབས་ཅིག་ཏུ་བོད་ཡིག་ཀྱང་དེང་དུས་གློག་འཕྲིན་དྲ་བའི་བརྒྱུད་ལམ་གྱི་ནང་དུ་བེད་སྤྱོད་ཐུབ་པའི་འབད་བརྩོན་བོད་ཕྱི་ནང་གཉིས་ཆ་ནས་བྱེད་བཞིན་ཡོད་པ་དང༌། ད་ལྟའི་ཆར་མ་འོངས་པར་བདག་གཅེས་བྱེད་མཁན་གྱི་མི་རབས་གསར་པ་རྣམས་ཀྱིས་འཐུས་ཤོར་དུ་མ་སོང་ན་བོད་ཡིག་ཀྱང་དེང་དུས་དྲ་བའི་བརྒྱུད་ལམ་གྱི་མ་ལག་ཚང་མའི་ནང་དུ་བེད་སྤྱོད་བྱེད་ཐུབ་པའི་ཁོར་ཡུག་གང་འཚམས་ཤིག་བསྐྲུན་ཐུབ་ཡོད་པ་འདི། རང་བཙན་མེད་པར་མི་རིགས་གཞན་པ་ཞིག་གི་བཙན་གནོན་འོག་ཏུ་མནར་གཅོད་མྱོང་བཞིན་པའི་ང་ཚོ་ལ་མཚོན་ན་ཧ་ཅང་གི་གལ་ཆེའི་རང་བཞིན་ཞིག་ཏུ་གྱུར་ཡོད་པ་ངོས་འཛིན་གསལ་པོ་བྱེད་དགོས་པའི་དུས་ལ་སླེབས་ཡོད།

ལོ་སྔོན་མ་དང་ལྷག་པར་དུ་ལོ་འདིའི་ནང་དུ་བོད་ཕྱི་ནང་གཉིས་སུ་དྲ་རྒྱ་ཁག་གི་ཡིག་གཟུགས་རྒྱལ་སྤྱིའི་གཅིག་གྱུར་ཨང་སྒྲིག་ཅན་གྱི་ཧི་མ་ལ་ཡ་(Microsoft Himalaya)བེད་སྤྱོད་བྱས་ཡོད་པ་མ་ཟད། སྔོན་མ་ཁྱབ་ཆུང་བའི་ཡིག་གཟུགས་བེད་སྤྱོད་བྱས་པའི་དྲ་རྒྱ་གང་འཚམས་ཤིག་གིས་ཀྱང་ཡིག་གཟུགས་ཧི་མ་ལ་ཡ་རུ་བསྒྱུར་བ་སོགས་བོད་ཕྱི་ནང་གཉིས་ཀྱི་དྲ་བའི་ཐོག་ནས་བེད་སྤྱོད་བྱེད་རྒྱུའི་ཡིག་གཟུགས་གཅིག་གྱུར་གྱི་ཕྱོགས་སུ་གོམ་པ་ཧ་ཅང་ཆེན་པོ་ཞིག་སྤོ་ཐུབ་ཡོད། འདི་ནི་ཧི་མ་ལ་ཡ་རི་བོའི་འཕྲེད་ཀྱིས་བཅད་པའི་གཞིས་བྱེས་བོད་རིགས་གཞོན་སྐྱེས་རྣམས་ཀྱི་བསམ་ཚུལ་བརྗེ་ལེན་དང་ཕན་ཚུན་རྒྱུས་ལོན་བྱེད་རྒྱུའི་ཁོར་ཡུག་ཉེན་ཁ་ཆུང་ཤོས་དང༌། ནུས་པ་ཆེ་ཤོས་སུ་འགྱུར་བཞིན་ཡོད། དེར་བརྟེན་དྲ་བའི་བརྒྱུད་ལམ་འདི་ཉིད་རང་ཉིད་ཀྱི་ཤེས་ཡོན་ཡར་རྒྱས་དང༌། སྤྱི་ཚོགས་ཀྱི་གནས་སྟངས་རྒྱུས་ལོན་བྱེད་ཡུལ་གྱི་རྒྱལ་སྒོ་ཆེན་པོ་ཞིག་ཏུ་བརྩིས་ནས་དོ་སྣང་གལ་ཆེན་པོ་གནང་དགོས་པ་ཞིག་ཡིན་ལ། བོད་མི་རིགས་ཀྱི་འཕྲལ་ཕུགས་ཀྱི་རྩ་དོན་གང་ཐད་ནས་བཤད་ཀྱང་སྐད་འབོད་རེ་ཟུང་བྱས་པ་ཙམ་ལས། ལས་འགུལ་གྱི་ངོ་བོའི་ཐོག་ནས་བསམ་བློ་བཏང་ཡང་ཧ་ཅང་གལ་ཆེའི་རང་བཞིན་ཅན་གྱི་ནུས་པ་ཡོད་པར་ངོས་འཛིན་ཡོང་ཐབས་སུ་བོད་གཞུང་དང༌། གཞུང་འབྲེལ་མ་ཡིན་པའི་ཚོགས་པ་ཁག དེ་བཞིན་མི་སྒེར་བཅས་ཀྱི་ངོས་ནས་འབད་བརྩོན་བྱེད་དགོས་པ་ཧ་ཅང་གལ་ཆེ། ད་ལྟ་བཙན་བྱོལ་བོད་པའི་སྤྱི་ཚོགས་གཅིག་པུ་ལ་མཚོན་ནས་བཤད་ནའང་དྲ་བའི་བརྒྱུད་ལམ་འདི་ཉིད་ཡར་རྒྱས་ཆེ་རུ་འགྲོ་བཞིན་ཡོད་ཀྱང༌། ད་དུང་སྤྱི་ཡོངས་ཀྱི་ཐོག་ནས་བཤད་ན་གླུ་བརྒྱ་གདངས་གཅིག་ལྟ་བུ་ལས་སྣ་མང་རང་བཞིན་ཅན་གྱི་ཕྱོགས་སུ་དེ་ཙམ་བསྐྱོད་ཐུབ་མེད་སྟབས། དྲ་བའི་ཐོག་ནས་བོད་ཀྱི་སྨན་རྩིས་ཀྱི་སྐོར་བོད་ཡིག་གིས་ངོ་སྤྲོད་བྱེད་ཡུལ་དང༌། བོད་ཀྱི་ལོ་རྒྱུས་ངོ་སྤྲོད་བྱེད་ཡུལ་གྱི་དྲ་རྒྱ། ནང་ཆོས་རྐྱང་པ་ངོ་སྤྲོད་བྱེད་ཡུལ་གྱི་དྲ་རྒྱ་སོགས་སྟོང་ཆ་མང་པོ་ཡོད་པ་འདི་དག་ཀྱང་འབྲེལ་ཡོད་ཀྱི་སྡེ་ཚན་སུ་དང་གང་ཡོད་ཀྱིས་འགན་ཁུར་ཐུབ་ན་ཕན་ཐོགས་ཆེ་བར་སྣང༌། གཙོ་ཆེ་ཤོས་ད་ལྟའི་དུས་རབས་འདིར་སྒོར་ས་ཡ་མང་པོ་དང་འབྲེལ་བའི་གན་རྒྱ་ཡང་དྲ་བ་བརྒྱུད་ནས་འཇོག་བཞིན་ཡོད་པ་དང༌། སྒོར་ས་ཡ་མང་པོ་དྲ་བ་བརྒྱུད་ནས་སྐར་ཆ་ཁ་ཤས་ཀྱི་ནང་ནས་ཕར་སྤྲོད་ཚུར་ལེན་བྱེད་ཀྱི་ཡོད་པ་སོགས་འཛམ་གླིང་ཁྱོན་གྱི་སྦྲག་ཁང་ཕལ་མོ་ཆེའི་ལས་ཀའང་ཉུང་དུ་འགྲོ་བཞིན་པ་བཅས། དེང་དུས་དྲ་བའི་བརྒྱུད་ལམ་འདི་ཉིད་སྤྱི་ཚོགས་ཀྱི་འཚོ་བ་དངོས་དང་ཆེས་ཁ་ཐག་ཉེ་བའི་བྱ་དངོས་ཤིག་ཏུ་གྲུབ་ཡོད་སྟབས་གལ་ཆེ་བའི་གོ་སྐབས་འདི་ཉིད་བོད་པས་ཀྱང་མ་ཤོར་བ་བྱེད་རྒྱུ་ཧ་ཅང་གལ་ཆེར་མཐོང༌།།