སྲོལ་རྒྱུན་སོ་ནམ་གྱི་སྲིད་ཇུས་ནི་མུན་ནག་མདའ་འཕེན་རེད།

དེ་ནི་རང་བཞིན་གཉིས་ཕོངས་དང་སྤྱི་སྒེར་གཉིས་ཟད། སྐྱེས་འཕེལ་གཉིས་གནོད་དང་ཉམས་གུད་གཉིས་ལྷུང་སོགས་ཀྱི་ལམ་ལ་ཁྲིད་པ་སྟེ། སྲིད་ཇུས་ནོར་འཁྲུལ་ཅན་གྱིས་དུས་རབས་དང་ཁོར་ཡུག་གཉིས་ཀར་མི་འཚམས་པའི་གནའ་བོའི་ཞིང་ལས་ལམ་སྲོལ་ལ་ཨུ་ཚུགས་མཐའ་སྐྱེལ་བྱེད་པ་དེས་ཤེས་ཐུབ། དཔེར་ན། ལྷོ་གཞིས་ཀོ་ལི་གྷལ་དོན་ལྡན་གླིང་དུ་སྲོལ་རྒྱུན་ལ་ཁ་ཕྱོགས་བསྒྱུར་ནས་ལོ་ཤས་སོང་རྗེས་འདི་ཟླའི་ཚེས་བཅུ་ཉིན་དེ་གའི་གཞིས་འགོ་མཆོག་གི་གསུང་བཤད་དུ། སྲོལ་རྒྱུན་ཞིང་ལས་ལ་འབད་བརྩོན་ཆེ་རུ་གཏོང་དགོས། གང་ཡིན་ཟེར་ན་བཙན་བྱོལ་གཞུང་གི་སྲིད་ཇུས་རེད། ཅེས་སོགས་རྒྱུ་མཚན་གསལ་བཤད་མེད་པར་ཚིག་དུམ་དེ་འདྲ་གཡུག་ནས་ད་དུང་བཙན་བྱོལ་གཞུང་བཀའ་དྲིན་ཆེན་པོ་ཡིན་པས་དྲིན་ལན་ལོག་འཇལ་བྱེད་མི་འོས་ཚུལ་དང༌། སྐྱབས་མགོན་རིན་པོ་ཆེར་དད་པ་ཡོད་ན་ཡོད་གོ་ཆོད་པ་དགོས་ཚུལ་སོགས་གླེང་ནས་མི་མང་ལ་སྐུལ་འདེད་བྱས་པ་ཁོ་བོས་མྱོང་ཚོར་ཏེ། རྒྱུ་མཚན་དང་གྲུབ་འབྲས་ལ་རྩིས་བརྒྱབ་ནས་ལམ་སྟོན་བྱེད་རྒྱུར་གཙིགས་ཆེར་མི་འཛིན་པར། བཙན་བྱོལ་གཞུང་གི་བཀའ་རེད། སྐྱབས་མགོན་རིན་པོ་ཆེར་སྐྱབས་སུ་མཆི། ཟེར་བ་ཙམ་མ་འོངས་བོད་ཀྱི་ལམ་སྟོན་ཡིན་པར་སྐུ་ངོ་ཁོ་རང་གིས་ཡིད་ཆེས་གནང་བའམ་ཁོ་རང་གི་ཁེ་ཕན་དུ་གཟིགས་པ། དེ་ཁོ་ན་བེད་སྤྱོད་ཀྱིས་ཁུལ་དེའི་ཞིང་པ་ཚོར་གནའ་བོའི་སོ་ནམ་ལམ་ལུགས་ལ་འཁྲིད་ཐབས་བྱེད་བཞིན་པ་དེར་ཡིད་ཐང་ཐད་ཀར་ཆད་སོང༌། ཞིང་པ་ཚོའི་བསམ་ཚུལ་དངོས་ནི། བོད་ཀྱི་བང་ཆེན་གྱི་གསར་འགོད་པས་དོན་ལྡན་གླིང་གི་གྲོང་སྡེ་ཉི་ཤུ་རྩ་གཉིས་ཀྱི་བསམ་ཚུལ་བསྡུས་པ་དེ་ལས་གསལ་པོ་ཆགས་ཡོད་པ་དང༌། སྲོལ་རྒྱུན་སོ་ནམ་ལ་གོམ་ཁ་སྤོ་མཁན་གྱི་དམིགས་ཡུལ་གཅིག་ནི། གཞུང་གི་རོགས་རམ་གྱིས་ནང་མི་རེ་ཟུང་ཕྱི་རྒྱལ་དུ་གཏོང་བ་དེ་ཡིན་པ་དང༌། དེ་ཚོས་ཁ་ནས་བཙན་བྱོལ་གཞུང་དང་རྒྱལ་བ་རིན་པོ་ཆེའི་བཀའ་ལ་ཉན་གྱི་ཡོད་ཅེས་ཁ་ཤོམ་རྫིག་པོས་གྲོང་སྡེ་གཞན་པ་ཚོར་ཟུར་ཟ་བྱེད་ཀྱི་ཡོད་ཚོད་དང༌། སྲོལ་རྒྱུན་སོ་ནམ་ཉུང་ཉུང་ཞིག་ལས་མི་འདེབས་མཁན་ཚོས་ཀྱང་ཞིང་ལས་སྤུས་དག་ཡོང་བར་འབད་བརྩོན་མི་བྱེད་པར་གཞུང་གི་གུན་གསབ་ཀྱི་རོགས་རམ་དེས་གྲོད་ཁོག་རྒྱག་ཐབས་བྱེད་ཀྱི་འདུག་ཟེར། ད་རུང་དགོད་བྲོ་བ་གཅིག་ལ། སྲོལ་རྒྱུན་འདེབས་ལས་བྱེད་མཁན་ཚོའི་ནང་དུ། ཁྱོད་རང་ག་པར་འགྲོ་ཡི་ཡིན། ཞེས་པའི་དྲི་བ་དེ་ལ། Glucoseསྟོབས་བསྐྱེད་ཁབ་རྒྱག་སར་འགྲོ་ཡི་ཡིན། ཞེས་ལན་འདེབས་བྱེད་སྲོལ་ཡོད་འདུག ཚིག་དེ་ནི་སྲོལ་རྒྱུན་ཡིན་ཟེར་བའི་ཞིང་ཁའི་ནང་ལྐོག་ནས་སྨན་བེད་སྤྱོད་གཏོང་སྲོལ་ཡོད་པ་དེའི་གསང་ཚིག་རེད་ཟེར། འདི་གཅིག་པུར་བསམ་བློ་བཏང་ཡང་གོང་ཞུའི་གཞུང་ནས་འགྲོ་གྲོན་དང་སྒེར་གྱི་ལྐོག་ལས་གཉིས་ཀ་ངལ་རྩོལ་དོན་མེད་མ་རེད་དམ། ཞེས་པའི་དྲི་བ་དེ་ཡང་རང་བཞིན་གྱི་སླེབས་ངེས་ཡིན། གང་ལྟར་ངོ་ལྐོག་མི་མཐུན་པའི་ལས་ཀ་དང་རྒྱུ་མཚན་གསལ་བཤད་མེད་པའི་སྐུལ་འདེད་བྱེད་པ་དེ་གཉིས་ཀ་ཡང་དག་པའི་བཟང་སྤྱོད་དང་མི་མཐུན་ཞིང་སྤྱི་སྒེར་གང་རུང་ལ་ཕན་ཐོགས་ཡོད་པ་ཞིག་གཏན་ནས་ཆགས་ཀྱི་མེད། གཞུང་ལ་ཐུགས་ཁག་མེད་པ་ལྟ་བུའི་སྣང་ཚུལ་གཅིག་ནི་མི་གཅིག་གིས་གཞུང་གི་ཞིབ་འཇུག་པ་ལ་སྤྲེལ་ལད་ཀྱིས་ཡག་རབས་འཇོན་རབས་ཤ་སྟག་གིས་སྤྲེད་ལད་ཁ་གང་བཤད་ནས་ཁེ་ཕན་གཡག་ཙམ་ཐོབ་ཐབས་བྱས་པ་དང༌། གསར་འགོད་པ་ལ་བསམ་ཚུལ་ངོ་མ་དང་དངོས་ཡོད་ཀྱི་སྐྱིད་སྡུག་གསལ་བཤད་བྱས་པ་དེས་ལན་པ་རེད། སྐད་ཆ་དེ་གཉིས་ཀྱི་ངོ་གདོང་ནི་རྦད་དེ་ཕྱི་ནང་བསློགས་པ་དང་དོན་དམ་གྱི་དངོས་ཡོད་གསལ་བཤད་ཕྱི་མ་དེ་ཡིན་པ་གསར་འགོད་པར་དངོས་ར་འཕྲོད་ཡོད། དེ་ལྟར་མི་མང་གི་བསམ་ཚུལ་དང་དོན་དངོས་གཉིས་ཀས་ཁ་གྲག་ཡོང་དུས། སྲོལ་རྒྱུན་སོ་ནམ་གྱི་སྲིད་བྱུས་དེ་མཚམས་འཇོག་གནང་ན་མི་ལེགས་སམ།།

           སེར་སྨད་བློ་དགའ།